ಇಂದಿನ ಧಾವಂತದ ಬದುಕಿನಲ್ಲಿ ನಾವು ಹಣ ಗಳಿಸುವ ಓಟದಲ್ಲಿ ಆರೋಗ್ಯವನ್ನು ಮರೆಯುತ್ತಿದ್ದೇವೆಯೇ? ಇತ್ತೀಚಿನ ದಿನಗಳಲ್ಲಿ ಯುವಕರಿಂದ ಹಿಡಿದು ವೃದ್ಧರವರೆಗೆ ಎಲ್ಲರನ್ನೂ ಕಾಡುತ್ತಿರುವ ಸಾಮಾನ್ಯ ಸಮಸ್ಯೆ ಎಂದರೆ ಅದು ನಿಶ್ಯಕ್ತಿ (Weakness). ಬೆಳಿಗ್ಗೆ ಎದ್ದ ತಕ್ಷಣ ಆಯಾಸ, ಸಣ್ಣ ಕೆಲಸ ಮಾಡಿದರೂ ದಣಿವು ಇವುಗಳನ್ನು ನಾವು ಕೇವಲ ಕೆಲಸದ ಒತ್ತಡ ಎಂದು ನಿರ್ಲಕ್ಷಿಸುತ್ತೇವೆ. ಆದರೆ, ನಮ್ಮ ಅಡುಗೆ ಮನೆಯಲ್ಲೇ ಇರುವ ಕೆಲವು ಶಕ್ತಿಶಾಲಿ ಪದಾರ್ಥಗಳು ಇದಕ್ಕೆ ರಾಮಬಾಣ ಎಂಬುದು ನಿಮಗೆ ಗೊತ್ತೇ?
ಅನೇಕ ಬಾರಿ ನಾವು ಎಷ್ಟೇ ನಿದ್ರೆ ಮಾಡಿದರೂ ಅಥವಾ ಆಹಾರ ಸೇವಿಸಿದರೂ ಒಳಗಿನಿಂದ ಸುಸ್ತಾದಂತೆ ಭಾಸವಾಗುತ್ತದೆ. ಮೆಟ್ಟಿಲು ಹತ್ತುವಾಗ ದಣಿಯುವುದು, ಕೆಲಸದಲ್ಲಿ ಗಮನ ಹರಿಸಲು ಸಾಧ್ಯವಾಗದಿರುವುದು ನಿಶ್ಯಕ್ತಿಯ ಲಕ್ಷಣಗಳು. ಇವುಗಳನ್ನು ನಿರ್ಲಕ್ಷಿಸಬೇಡಿ. ನಿಮ್ಮ ಅಡುಗೆ ಮನೆಯಲ್ಲಿಯೇ ಇರುವ ಈ ಪದಾರ್ಥಗಳು ನಿಮ್ಮನ್ನು ಶಕ್ತಿಶಾಲಿಯಾಗಿರಿಸಬಲ್ಲವು.
ಬೆಳಿಗ್ಗೆ ಎದ್ದ ತಕ್ಷಣ ಉಗುರು ಬೆಚ್ಚಗಿನ ನೀರು
ನಮ್ಮ ದೇಹದ ಶೇ. 70ರಷ್ಟು ಭಾಗ ನೀರಿದೆ. ನೀರಿನಂಶ ಕಡಿಮೆಯಾದಾಗ (Dehydration) ಮೊದಲು ಕಾಣಿಸಿಕೊಳ್ಳುವುದೇ ಆಯಾಸಬಹಳಷ್ಟು ಜನ ಕಾಫಿ ಅಥವಾ ಟೀ ಮೂಲಕ ದಿನ ಆರಂಭಿಸುತ್ತಾರೆ. ಆದರೆ, ಆರೋಗ್ಯ ತಜ್ಞರ ಪ್ರಕಾರ, ಒಂದು ಲೋಟ ಉಗುರು ಬೆಚ್ಚಗಿನ ನೀರು ನಿಮ್ಮ ಶರೀರಕ್ಕೆ ಅಮೃತವಿದ್ದಂತೆ. ಇದು ದೇಹದ ಒಳಗಿನ ಕಶ್ಮಲಗಳನ್ನು ಹೊರಹಾಕಿ, ದಿನವಿಡೀ ನಿಮ್ಮನ್ನು ಹಗುರವಾಗಿರಿಸುತ್ತದೆ.
ಶಕ್ತಿಯ ಖಜಾನೆ: ಬೆಲ್ಲ ಮತ್ತು ಕಡಲೆ
ಬೆಲ್ಲದಲ್ಲಿ ಕಬ್ಬಿಣದಂಶ (Iron) ಹೆಚ್ಚಿದ್ದರೆ, ಕಡಲೆಯಲ್ಲಿ ಪ್ರೋಟೀನ್ ಸಮೃದ್ಧವಾಗಿದೆ. ಇವೆರಡರ ಮಿಶ್ರಣವು ರಕ್ತಹೀನತೆಯನ್ನು (Anemia) ದೂರ ಮಾಡಿ, ತಕ್ಷಣವೇ ದೇಹಕ್ಕೆ ಕಾರ್ಬೋಹೈಡ್ರೇಟ್ ಪೂರೈಸುತ್ತದೆ. ಜಿಮ್‌ಗೆ ಹೋಗುವವರಿಗೆ ಅಥವಾ ದೈಹಿಕ ಶ್ರಮ ಪಡುವವರಿಗೆ ಇದು ಬೆಸ್ಟ್ ಸ್ನ್ಯಾಕ್ಸ್.ಇವುಗಳಲ್ಲಿರುವ ಕಬ್ಬಿಣದಂಶ ರಕ್ತಹೀನತೆಯನ್ನು ತಡೆದು ಮುಖದಲ್ಲಿ ಕಳೆಯನ್ನು ಹೆಚ್ಚಿಸುತ್ತವೆ.
ಜೀರ್ಣಕ್ರಿಯೆಗೆ ಮೊಸರು, ಆರೋಗ್ಯಕ್ಕೆ ಮೊಸರು
ಹೊಟ್ಟೆ ಸರಿಯಿದ್ದರೆ ಎಲ್ಲವೂ ಸರಿ. ಮೊಸರಿನಲ್ಲಿರುವ ಉತ್ತಮ ಬ್ಯಾಕ್ಟೀರಿಯಾಗಳು ನಿಮ್ಮ ಜೀರ್ಣಾಂಗವ್ಯೂಹವನ್ನು ಕಾಪಾಡುತ್ತವೆ. ಆಯಾಸವಾದಾಗ ಒಂದು ಕಪ್ ಮೊಸರು ಅಥವಾ ಮಜ್ಜಿಗೆ ಸೇವಿಸುವುದರಿಂದ ದೇಹದ ಉಷ್ಣತೆ ಕಡಿಮೆಯಾಗಿ ತಕ್ಷಣದ ಆರಾಮ ಸಿಗುತ್ತದೆ.ಮೊಸರಿನಲ್ಲಿರುವ ಪ್ರೋಬಯಾಟಿಕ್‌ಗಳು (Probiotics) ಹೊಟ್ಟೆಯ ಬ್ಯಾಕ್ಟೀರಿಯಾಗಳನ್ನು ಸಮತೋಲನದಲ್ಲಿಡುತ್ತವೆ. ಇದು ವಿಟಮಿನ್ ಬಿ12 ಪಡೆಯಲು ಸಹಾಯ ಮಾಡುತ್ತದೆ, ಇದು ನರಗಳ ಶಕ್ತಿಗೆ ಮತ್ತು ಆಯಾಸ ತಡೆಗಟ್ಟಲು ಅತ್ಯಗತ್ಯ
ವಿಟಮಿನ್ ಸಿ ಕಣಜ: ನೆಲ್ಲಿಕಾಯಿ
ಕೇವಲ ಒಂದು ನೆಲ್ಲಿಕಾಯಿ ನಿಮ್ಮ ದೇಹದ ರೋಗನಿರೋಧಕ ಶಕ್ತಿಯನ್ನು ದುಪ್ಪಟ್ಟು ಮಾಡಬಲ್ಲದು. ನಿಶ್ಯಕ್ತಿಯಿಂದ ಬಳಲುವವರು ದಿನವೂ ಒಂದು ನೆಲ್ಲಿಕಾಯಿ ಸೇವಿಸುವುದರಿಂದ ಚರ್ಮ, ಕೂದಲು ಮತ್ತು ದೈಹಿಕ ಶಕ್ತಿ ಸುಧಾರಿಸುತ್ತದೆ.ವಿಟಮಿನ್ ಸಿ ಕೊರತೆಯಿಂದಲೂ ಅನೇಕ ಬಾರಿ ದೇಹಕ್ಕೆ ಬೇಗ ಆಯಾಸವಾಗುತ್ತದೆ.ಇದು ಬಿಳಿ ರಕ್ತಕಣಗಳ ಉತ್ಪತ್ತಿಯನ್ನು ಹೆಚ್ಚಿಸಿ, ಸಣ್ಣಪುಟ್ಟ ಕಾಯಿಲೆಗಳು ನಿಮ್ಮ ಹತ್ತಿರ ಸುಳಿಯದಂತೆ ನೋಡಿಕೊಳ್ಳುತ್ತದೆ. ಪ್ರತಿದಿನ ಒಂದು ಚಮಚ ನೆಲ್ಲಿಕಾಯಿ ಪುಡಿ ಅಥವಾ ಜ್ಯೂಸ್ ಸೇವಿಸಿ ನೋಡಿ.
ನಿದ್ರೆ: ಕೇವಲ ವಿಶ್ರಾಂತಿಯಲ್ಲ, ಅದು ರಿಪೇರಿ
ಕಡಿಮೆ ನಿದ್ರೆ ನಿಮ್ಮ ಮೆದುಳನ್ನು ಮಂದಗೊಳಿಸುತ್ತದೆ. ರಾತ್ರಿ ಕನಿಷ್ಠ 7-8 ಗಂಟೆಗಳ ಕಾಲ ಶಾಂತಿಯುತ ನಿದ್ರೆ ಮಾಡುವುದು ನಿಮ್ಮ ಸ್ನಾಯುಗಳ ಚೇತರಿಕೆಗೆ ಅತೀ ಮುಖ್ಯ.ನಿದ್ರೆ ಎಂದರೆ ಕೇವಲ ವಿಶ್ರಾಂತಿಯಲ್ಲ, ಅದು ದೇಹದ ‘ರೀಚಾರ್ಜಿಂಗ್’ ಪ್ರಕ್ರಿಯೆ
