ಇತ್ತೀಚಿನ ದಿನಗಳಲ್ಲಿ ಜನರು ಚಹಾ ಮತ್ತು ಕಾಫಿಗೆ ಬದಲಾಗಿ ಗ್ರೀನ್ ಟೀ (Green Tea) ಗೆ ಹೆಚ್ಚಿನ ಆದ್ಯತೆ ನೀಡುತ್ತಿದ್ದಾರೆ. ಆರೋಗ್ಯದ ಬಗ್ಗೆ ಕಾಳಜಿ ಹೆಚ್ಚಾದಂತೆ ಗ್ರೀನ್ ಟೀ ಬಳಕೆ ಕೂಡ ಗಣನೀಯವಾಗಿ ಹೆಚ್ಚಿದೆ. ಆದರೆ, ಕೇವಲ ಗ್ರೀನ್ ಟೀ ಕುಡಿಯುವುದು ಮಾತ್ರವಲ್ಲ, ಅದನ್ನು ಯಾವಾಗ ಕುಡಿಯಬೇಕು? ಮತ್ತು ಅದರಲ್ಲಿ ಏನನ್ನು ಬೆರೆಸಬೇಕು? ಎಂಬ ಅಂಶಗಳು ಕೂಡ ಮುಖ್ಯ ಎಂದು ಆರೋಗ್ಯ ತಜ್ಞರು ಹೇಳುತ್ತಾರೆ. ಅದರಲ್ಲೂ ತೂಕ ಇಳಿಸಿಕೊಳ್ಳುವ ಗುರಿ ಹೊಂದಿರುವವರು ಸರಿಯಾದ ಕ್ರಮ ಅನುಸರಿಸಿದರೆ, ತಿಂಗಳಿಗೆ 3 ರಿಂದ 4 ಕಿಲೋ ತೂಕ ಇಳಿಸಿಕೊಳ್ಳಬಹುದು.
ಸರಿಯಾದ ಸಮಯ: ಮೆಟಬಾಲಿಸಂಗೆ ಬೂಸ್ಟ್
- ಬೆಳಿಗ್ಗೆ: ನಿದ್ದೆಯಿಂದ ಎದ್ದ 30 ನಿಮಿಷಗಳ ನಂತರ ಗ್ರೀನ್ ಟೀ ಕುಡಿಯುವುದು ಉತ್ತಮ. ಖಾಲಿ ಹೊಟ್ಟೆಯಲ್ಲಿ ಕುಡಿಯುವ ಬದಲು ಸ್ವಲ್ಪ ಸಮಯದ ನಂತರ ಸೇವಿಸಿದರೆ ಮೆಟಬಾಲಿಸಂ (ಚಯಾಪಚಯ ಕ್ರಿಯೆ) ವೇಗವಾಗಿ ಕೆಲಸ ಮಾಡಲು ಪ್ರಾರಂಭಿಸುತ್ತದೆ.
- ಮಧ್ಯಾಹ್ನ: ಮಧ್ಯಾಹ್ನದ ಊಟಕ್ಕೆ 30 ನಿಮಿಷಗಳ ಮೊದಲು ಒಂದು ಕಪ್ ಗ್ರೀನ್ ಟೀ ಕುಡಿಯುವುದು ಕೊಬ್ಬು ಕರಗುವ ಪ್ರಕ್ರಿಯೆಗೆ (Fat cut process) ಸಹಾಯ ಮಾಡುತ್ತದೆ. ಇದು ಹಸಿವನ್ನು ನಿಯಂತ್ರಿಸಲು ಕೂಡ ಸಹಕಾರಿ.
- ರಾತ್ರಿ: ರಾತ್ರಿ ಊಟದ ಪ್ರಮಾಣ ಕಡಿಮೆ ಇರುವುದು ಮತ್ತು ಗ್ರೀನ್ ಟೀ ಸೇವನೆಯು ದೇಹ ವಿಶ್ರಾಂತಿ ಪಡೆಯುವಾಗಲೂ ಮೆಟಬಾಲಿಸಂ ಸಮತೋಲನದಲ್ಲಿರುವಂತೆ ಮಾಡುತ್ತದೆ.
- ನೆನಪಿಡಿ: ಗ್ರೀನ್ ಟೀಯನ್ನು ಸಕ್ಕರೆ ಇಲ್ಲದೆ ಕುಡಿಯಬೇಕು. ಜೇನುತುಪ್ಪ ಬೆರೆಸುವುದು ಕೂಡ ಅಷ್ಟು ಒಳ್ಳೆಯದಲ್ಲ ಎಂದು ತಜ್ಞರು ಎಚ್ಚರಿಸುತ್ತಾರೆ.
ದಾಲ್ಚಿನ್ನಿ ಮತ್ತು ತುಪ್ಪ ಬೆರೆಸಿದರೆ ಹೆಚ್ಚಿನ ಲಾಭ
ಗ್ರೀನ್ ಟೀಯ ಪ್ರಭಾವವನ್ನು ಹೆಚ್ಚಿಸಲು ಕೆಲವು ಪದಾರ್ಥಗಳನ್ನು ಬೆರೆಸುವುದು ಉತ್ತಮ:
- ದಾಲ್ಚಿನ್ನಿ (Cinnamon): ಗ್ರೀನ್ ಟೀಯೊಂದಿಗೆ ದಾಲ್ಚಿನ್ನಿ ಬೆರೆಸುವುದರಿಂದ ದೇಹದ ಉರಿಯೂತ (Inflammation) ಕಡಿಮೆಯಾಗುತ್ತದೆ. ಇದರಲ್ಲಿರುವ ‘ಸಿನ್ನಮಾಲ್ಡಿಹೈಡ್’ ಅಂಶವು ಆರೋಗ್ಯವನ್ನು ಸುಧಾರಿಸುತ್ತದೆ ಮತ್ತು ಇನ್ಸುಲಿನ್ ಸೂಕ್ಷ್ಮತೆಯನ್ನು ಹೆಚ್ಚಿಸಿ ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ನಿಯಂತ್ರಿಸುತ್ತದೆ.
- ತುಪ್ಪ (Ghee): ಗ್ರೀನ್ ಟೀಯೊಂದಿಗೆ ಸ್ವಲ್ಪ ತುಪ್ಪ ಬೆರೆಸಿ ಸೇವಿಸುವುದು ಪ್ರಯೋಜನಕಾರಿ. ತುಪ್ಪದಲ್ಲಿರುವ ಬ್ಯುಟೈರೇಟ್ (Butyrate) ಎಂಬ ಫ್ಯಾಟಿ ಆಸಿಡ್ ಜೀರ್ಣಾಂಗ ವ್ಯವಸ್ಥೆಯನ್ನು ಉತ್ತಮಗೊಳಿಸುತ್ತದೆ. ಗ್ರೀನ್ ಟೀಯಲ್ಲಿರುವ ವಿಟಮಿನ್ ಮತ್ತು ಆಂಟಿ-ಆಕ್ಸಿಡೆಂಟ್‌ಗಳು ದೇಹಕ್ಕೆ ಸಮರ್ಥವಾಗಿ ತಲುಪಲು ತುಪ್ಪ ಸಹಾಯ ಮಾಡುತ್ತದೆ. ಈ ಕಾಂಬಿನೇಷನ್ ತೂಕ ಇಳಿಸುವ ಪ್ರಕ್ರಿಯೆಯನ್ನು ವೇಗಗೊಳಿಸುತ್ತದೆ.
ಡಯಟ್ ಮತ್ತು ವಾಕಿಂಗ್‌ನಿಂದ ದುಪ್ಪಟ್ಟು ಫಲಿತಾಂಶ
ಕೇವಲ ಗ್ರೀನ್ ಟೀ ಕುಡಿದರೆ ಸಾಲದು, ಅದರ ಜೊತೆಗೆ ಸರಿಯಾದ ಜೀವನಶೈಲಿ ಅಗತ್ಯ:
- ದಿನಕ್ಕೆ ಕನಿಷ್ಠ 30 ನಿಮಿಷಗಳ ನಡಿಗೆ (Walking) ಮಾಡುವುದರಿಂದ ಗ್ರೀನ್ ಟೀಯ ಪ್ರಭಾವ ದುಪ್ಪಟ್ಟಾಗುತ್ತದೆ.
- ನಿಯಂತ್ರಿತ ಆಹಾರ, ಕಡಿಮೆ ಕಾರ್ಬೋಹೈಡ್ರೇಟ್ ಮತ್ತು ಹೆಚ್ಚಿನ ನಾರಿನಂಶ (Fiber) ಇರುವ ಆಹಾರ ಸೇವನೆಯು ತೂಕ ಇಳಿಕೆಯನ್ನು ಸುಲಭಗೊಳಿಸುತ್ತದೆ.
ಸೂಚನೆ: ಗ್ರೀನ್ ಟೀ ಆರೋಗ್ಯಕ್ಕೆ ಮಿತ್ರನಾಗಿದ್ದರೂ, ಯಾವುದೇ ಬದಲಾವಣೆ ಮಾಡುವ ಮೊದಲು ನಿಮ್ಮ ವೈಯಕ್ತಿಕ ಆರೋಗ್ಯ ಸ್ಥಿತಿಯನ್ನು ಗಮನದಲ್ಲಿಟ್ಟುಕೊಂಡು ತಜ್ಞ ವೈದ್ಯರ ಸಲಹೆ ಪಡೆಯುವುದು ಉತ್ತಮ.
