ನವದೆಹಲಿ/ಉದಯ್ಪುರ : ಫೆಬ್ರವರಿ 26, 2026 ರಂದು ರಾಜಸ್ಥಾನದ ಉದಯ್ಪುರದ ‘ಐಟಿಸಿ ಮೊಮೆಂಟೋಸ್’ನಲ್ಲಿ ನಡೆಯಲಿರುವ ಸೌತ್ ಸೂಪರ್ ಸ್ಟಾರ್’ಗಳಾದ ವಿಜಯ್’ ದೇವರಕೊಂಡ ಮತ್ತು ರಶ್ಮಿಕಾ ಮಂದಣ್ಣ ಅವರ ವಿವಾಹಕ್ಕೆ ಪ್ರಧಾನಿ ನರೇಂದ್ರ ಮೋದಿ ಅವರು ವಿಶೇಷ ಅಭಿನಂದನಾ ಪತ್ರದ ಮೂಲಕ ಶುಭ ಹಾರೈಸಿದ್ದಾರೆ.
ವಿಜಯ್ ಅವರ ಪೋಷಕರಾದ ಮಾಧವಿ ಮತ್ತು ಗೋವರ್ಧನ ರಾವ್ ಅವರಿಗೆ ಬರೆದ ಪತ್ರದಲ್ಲಿ ಮೋದಿ, “ವಿಜಯ್ ಮತ್ತು ರಶ್ಮಿಕಾ ಅವರ ವಿವಾಹಕ್ಕೆ ಆಹ್ವಾನ ನೀಡಿದ್ದಕ್ಕಾಗಿ ಧನ್ಯವಾದಗಳು. ದೇವರಕೊಂಡ ಮತ್ತು ಮಂದಣ್ಣ ಕುಟುಂಬಗಳಿಗೆ ಈ ಮಂಗಳಕರ ಸಂದರ್ಭದಲ್ಲಿ ನನ್ನ ಹೃತ್ಪೂರ್ವಕ ಅಭಿನಂದನೆಗಳು,” ಎಂದು ತಿಳಿಸಿದ್ದಾರೆ.
ಸಖ ಸಪ್ತಪದ ಭಾವ: ವಿವಾಹದ ಮಹತ್ವವನ್ನು ವಿವರಿಸಿದ ಅವರು, “ಸಖ ಸಪ್ತಪದ ಭಾವ ಎಂದರೆ ಏಳು ಹೆಜ್ಜೆಗಳನ್ನು ಜೊತೆಯಾಗಿ ನಡೆಯುವ ಮೂಲಕ ದಂಪತಿಗಳು ಜೀವನಪರ್ಯಂತ ಸ್ನೇಹಿತರಾಗುತ್ತಾರೆ. ಇದು ವಿಜಯ್ ಮತ್ತು ರಶ್ಮಿಕಾ ಜೀವನದ ಸುಂದರ ಅಧ್ಯಾಯದ ಆರಂಭ,” ಎಂದಿದ್ದಾರೆ.
ಬೆಳ್ಳಿ ಪರದೆಗಿಂತ ಮಿಗಿಲಾದ ದೈವಿಕ ಸ್ಕ್ರಿಪ್ಟ್: ನಟರ ವೃತ್ತಿಜೀವನವನ್ನು ಸ್ಮರಿಸಿದ ಪ್ರಧಾನಿ, “ವಿಜಯ್ ಮತ್ತು ರಶ್ಮಿಕಾ ಇಬ್ಬರಿಗೂ ಸಿನಿಮಾಗಳ ಸ್ಕ್ರಿಪ್ಟ್ಗಳು ಹೊಸದೇನಲ್ಲ. ಆದರೆ ಪ್ರೀತಿ ಮತ್ತು ಅನುರಾಗದಿಂದ ತುಂಬಿರುವ ಅವರ ನೈಜ ಜೀವನದ ಈ ದೈವಿಕವಾಗಿ ಬರೆಯಲ್ಪಟ್ಟ (Divinely scripted) ಅಧ್ಯಾಯವು, ಬೆಳ್ಳಿ ಪರದೆಯ ಮೇಲೆ ಅವರು ಸೃಷ್ಟಿಸಿದ ಮ್ಯಾಜಿಕ್ಗಿಂತಲೂ ಹೆಚ್ಚು ಹೊಳೆಯಲಿದೆ,” ಎಂದು ಮನಸಾರೆ ಹಾರೈಸಿದ್ದಾರೆ.
ಜವಾಬ್ದಾರಿಯುತ ಜೀವನಕ್ಕೆ ಹಾರೈಕೆ: “ಮುಂದಿನ ದಿನಗಳು ಹಂಚಿಕೊಂಡ ಕನಸುಗಳ ಈಡೇರಿಕೆಯಿಂದ ಕೂಡಿರಲಿ. ಪರಸ್ಪರರ ಅಪೂರ್ಣತೆಗಳನ್ನು ಒಪ್ಪಿಕೊಳ್ಳುತ್ತಾ, ಒಬ್ಬರ ಬಲದಿಂದ ಇನ್ನೊಬ್ಬರು ಕಲಿಯುತ್ತಾ, ಜವಾಬ್ದಾರಿಗಳನ್ನು ಹಂಚಿಕೊಂಡು ಜೀವನದ ಪಯಣದಲ್ಲಿ ನಿಜವಾದ ಸಂಗಾತಿಗಳಾಗಿ ಸಾಗಲಿ,” ಎಂದು ಮೋದಿ ಹರಸಿದ್ದಾರೆ.
ಮದುವೆಯ ಸಂಭ್ರಮ: ಉದಯ್ಪುರದಲ್ಲಿ ಫೆಬ್ರವರಿ 24 ರಿಂದಲೇ ಸಂಗೀತ, ಹಳದಿ ಮತ್ತು ಮೆಹಂದಿ ಶಾಸ್ತ್ರಗಳು ಆರಂಭವಾಗಿವೆ. ವರದಿಗಳ ಪ್ರಕಾರ, ಎರಡೂ ಕುಟುಂಬಗಳ ಸಂಪ್ರದಾಯಗಳಿಗೆ ಗೌರವ ನೀಡುವ ಸಲುವಾಗಿ ಎರಡು ವಿಭಿನ್ನ ವಿಧಿವಿಧಾನಗಳ ಮೂಲಕ ಮದುವೆ ನೆರವೇರಲಿದೆ. ಈಗಾಗಲೇ ಚಿತ್ರರಂಗದ ಪ್ರಮುಖ ನಿರ್ದೇಶಕರಾದ ಸಂದೀಪ್ ರೆಡ್ಡಿ ವಂಗಾ ಸೇರಿದಂತೆ ಹಲವು ಗಣ್ಯರು ವಿವಾಹ ಸ್ಥಳಕ್ಕೆ ತಲುಪಿದ್ದಾರೆ.
