ನವದೆಹಲಿ: ಕೇಂದ್ರ ಸರ್ಕಾರ ಚಿನ್ನಾಭರಣ ಪ್ರಿಯರಿಗೆ ಸಿಹಿ ಸುದ್ದಿ ನೀಡಿದೆ. ವಿದೇಶದಿಂದ ಭಾರತಕ್ಕೆ ಮರಳುವ ಪ್ರಯಾಣಿಕರು ತರುವ ಚಿನ್ನದ ಆಭರಣದ ಮೌಲ್ಯದ ಬಗ್ಗೆ ಚಿಂತಿಸದೆ ಗರಿಷ್ಠ 40 ಗ್ರಾಂ ಚಿನ್ನ ತರಬಹುದಾಗಿದೆ.
ವಿದೇಶಗಳಿಂದ ಬರುವಾಗ, ಹೋಗುವಾಗ ಪ್ರಯಾಣಿಕರು ವಿಮಾನ ನಿಲ್ದಾಣಗಳಲ್ಲಿ ಎದುರಿಸುವ ಸಮಸ್ಯೆಗಳಿಗೆ ಪರಿಹಾರ ನೀಡಲು ಕೇಂದ್ರ ಸರ್ಕಾರ ಹೊಸ ಬ್ಯಾಗೇಜ್ ನೀತಿ 2026 ಜಾರಿಗೊಳಿಸಿದ್ದು, ಫೆಬ್ರವರಿ 2ರಿಂದ ಇದು ಅನುಷ್ಠಾನಕ್ಕೆ ಬರಲಿದೆ.
ಮಹಿಳೆಯರು ಗರಿಷ್ಠ 40 ಗ್ರಾಂ ಮತ್ತು ಇತರರು ಗರಿಷ್ಠ 20 ಗ್ರಾಂ ತೂಕದ ಚಿನ್ನದ ಒಡವೆಗಳನ್ನು ತೆರಿಗೆ ರಹಿತವಾಗಿ ತರಬಹುದಾಗಿದೆ. ಚಿನ್ನದ ದರ ಭಾರಿ ಏರಿಕೆ ಕಾಣುತ್ತಿರುವ ಹಿನ್ನೆಲೆಯಲ್ಲಿ ಕೇಂದ್ರದಿಂದ ಈ ಕ್ರಮ ಕೈಗೊಳ್ಳಲಾಗಿದೆ. ವಿದೇಶದಿಂದ ತರುವ ಚಿನ್ನಕ್ಕೆ ಮೌಲ್ಯದ ಮಿತಿ ಇರುವುದಿಲ್ಲ. ಈ ಹಿಂದೆ ಮಹಿಳಾ ಪ್ರಯಾಣಿಕರು 40 ಗ್ರಾಂ ವರೆಗೆ ಚಿನ್ನಾಭರಣ ತರಲು ಅವಕಾಶ ನೀಡಿದ್ದರೂ ಅದರ ಗರಿಷ್ಠ ಮಿತಿ 1 ಲಕ್ಷ ರೂ. ಇತ್ತು. ಪುರುಷರು 20 ಗ್ರಾಂ ವರೆಗಿನ ಗರಿಷ್ಠ 50 ಸಾವಿರ ರೂಪಾಯಿ ಮೌಲ್ಯದ ಆಭರಣಗಳನ್ನು ತರಲು ಅವಕಾಶವಿದ್ದು, ಇದರಿಂದ ಸಮಸ್ಯೆ ಎದುರಾಗಿದ್ದರಿಂದ ಸರ್ಕಾರದಿಂದ ಹೊಸ ನಿಯಮ ಜಾರಿಗೊಳಿಸಲಾಗಿದೆ.
ಮೌಲ್ಯದ ಮಿತಿ ಇಲ್ಲದೆ ಮಹಿಳೆಯರು 40 ಗ್ರಾಂ, ಪುರುಷರು 20 ಗ್ರಾಂ ಚಿನ್ನಾಭರಣವನ್ನು ತೆರಿಗೆ ವಿನಾಯಿತಿಯಡಿ ತರಬಹುದಾಗಿದೆ. ಚಿನ್ನದ ಗಟ್ಟಿ ಅಥವಾ ಬಿಸ್ಕೆಟ್ ರೂಪದಲ್ಲಿ ತಂದರೆ ಅದನ್ನು ಹೂಡಿಕೆ ಎಂದು ಪರಿಗಣಿಸಿ ಸೀಮಾ ಸುಂಕ ವಿಧಿಸಲಾಗುವುದು.
