ಆಗ್ರಾದ ಯಮುನಾ ಎಕ್ಸ್ಪ್ರೆಸ್ವೇನಲ್ಲಿ ಪತ್ತೆಯಾದ ಅಪರಿಚಿತ ಮಹಿಳೆಯ ಶವದ ರಹಸ್ಯವನ್ನು ಭೇದಿಸುವಲ್ಲಿ ಉತ್ತರ ಪ್ರದೇಶ ಪೊಲೀಸರು ಯಶಸ್ವಿಯಾಗಿದ್ದಾರೆ. ಈ ಸಂಕೀರ್ಣ ಕೊಲೆ ಪ್ರಕರಣವನ್ನು ಕೇವಲ 24 ಗಂಟೆಗಳಲ್ಲಿ ಭೇದಿಸಲು ಪೊಲೀಸರಿಗೆ ಸಾಂಪ್ರದಾಯಿಕ ತನಿಖೆಯ ಜೊತೆಗೆ ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನ ದೊಡ್ಡ ಮಟ್ಟದಲ್ಲಿ ನೆರವಾಗಿದೆ.
ರಸ್ತೆಯ ಬದಿಯಲ್ಲಿ ಪತ್ತೆಯಾದ ಶವ ಫೆಬ್ರವರಿ 6 ರಂದು ಆಗ್ರಾದ ಖಂಡೌಲಿ ಪ್ರದೇಶದ ಯಮುನಾ ಎಕ್ಸ್ಪ್ರೆಸ್ವೇ ಬದಿಯಲ್ಲಿ ಕಂಬಳಿಯಲ್ಲಿ ಸುತ್ತಿದ ಸ್ಥಿತಿಯಲ್ಲಿ ಮಹಿಳೆಯ ಶವವೊಂದು ಪತ್ತೆಯಾಗಿತ್ತು. ಸ್ಥಳಕ್ಕೆ ಧಾವಿಸಿದ ಪೊಲೀಸರಿಗೆ ಮಹಿಳೆಯ ಕುತ್ತಿಗೆ ಮತ್ತು ಮುಖದ ಮೇಲೆ ತೀವ್ರ ಗಾಯದ ಗುರುತುಗಳು ಕಂಡುಬಂದಿದ್ದವು. ಮಹಿಳೆಯನ್ನು ಬೇರೆ ಕಡೆ ಕೊಲೆ ಮಾಡಿ, ಸಾಕ್ಷ್ಯ ನಾಶಪಡಿಸಲು ಶವವನ್ನು ಇಲ್ಲಿ ತಂದು ಎಸೆಯಲಾಗಿದೆ ಎಂಬುದು ಪ್ರಾಥಮಿಕ ತನಿಖೆಯಲ್ಲಿ ತಿಳಿದುಬಂದಿತ್ತು.
ತನಿಖೆಗೆ ಸವಾಲಾದ ಗುರುತು ಪತ್ತೆ ಮೃತದೇಹದ ಬಳಿ ಯಾವುದೇ ಗುರುತಿನ ಚೀಟಿಗಳು ಲಭ್ಯವಿರಲಿಲ್ಲ. ಮಹಿಳೆಯ ಕೈ ಮೇಲೆ ‘RS’ ಮತ್ತು ‘Sunny’ ಎಂಬ ಹೆಸರುಗಳು ಮಾತ್ರ ಹಚ್ಚೆ ಹಾಕಲ್ಪಟ್ಟಿದ್ದವು. ಪೊಲೀಸರು ಮೃತದೇಹದ ಫೋಟೋವನ್ನು ಎಲ್ಲಾ ಪೊಲೀಸ್ ಠಾಣೆಗಳಿಗೆ ಕಳುಹಿಸಿದರೂ ಯಾವುದೇ ಸುಳಿವು ಸಿಗಲಿಲ್ಲ. ಈ ಹಂತದಲ್ಲಿ ಪೊಲೀಸರು ವಿಭಿನ್ನ ಹಾದಿ ತುಳಿಯಲು ನಿರ್ಧರಿಸಿದರು.
ಕೈ ಹಿಡಿದ ಎಐ ತಂತ್ರಜ್ಞಾನ ಮಹಿಳೆಯ ಮುಖದ ಗುರುತು ಪತ್ತೆ ಹಚ್ಚಲು ಪೊಲೀಸರು ಎಐ (AI) ಉಪಕರಣಗಳನ್ನು ಬಳಸಿಕೊಂಡರು. ಮೃತದೇಹದ ಫೋಟೋವನ್ನು ಡಿಜಿಟಲ್ ಆಗಿ ಮರುಸೃಷ್ಟಿಸಲಾಯಿತು. ವಿಶೇಷವೆಂದರೆ, ಎಐ ತಂತ್ರಜ್ಞಾನದ ಮೂಲಕ ಫೋಟೋದಲ್ಲಿ ಮಹಿಳೆಯ ಕಣ್ಣುಗಳನ್ನು ತೆರೆದಿರುವಂತೆ ಮಾಡಿ, ಬದುಕಿದ್ದಾಗ ಆಕೆ ಹೇಗಿರುತ್ತಿದ್ದರು ಎಂಬ ಸ್ಪಷ್ಟ ಚಿತ್ರಣವನ್ನು ಸಿದ್ಧಪಡಿಸಲಾಯಿತು. ಈ ಡಿಜಿಟಲ್ ಚಿತ್ರದ ಸಹಾಯದಿಂದ ಆಕೆ ಮಹೋಬಾ ನಿವಾಸಿ 25 ವರ್ಷದ ಸೋನಾಲಿ ಎಂಬುದು ಖಚಿತವಾಯಿತು.
ಲಿವ್-ಇನ್ ಪಾರ್ಟ್ನರ್ ಅರೆಸ್ಟ್ ಮಹಿಳೆಯ ಗುರುತು ಪತ್ತೆಯಾದ ಬೆನ್ನಲ್ಲೇ ಆಕೆಯ ಕೈ ಮೇಲಿದ್ದ ಹೆಸರಿನ ಆಧಾರದ ಮೇಲೆ ಸನ್ನಿ ಎಂಬಾತನನ್ನು ಪೊಲೀಸರು ವಶಕ್ಕೆ ಪಡೆದರು. ವಿಚಾರಣೆಯ ವೇಳೆ ಸನ್ನಿ ತನ್ನ ಕೃತ್ಯವನ್ನು ಒಪ್ಪಿಕೊಂಡಿದ್ದಾನೆ. ಸೋನಾಲಿ ತನ್ನೊಂದಿಗೆ ಲಿವ್-ಇನ್ ಸಂಬಂಧದಲ್ಲಿದ್ದಳು. ಆದರೆ ಆಕೆಯಿಂದ ದೂರವಾಗಲು ಬಯಸಿದ್ದ ಸನ್ನಿ, ಆಕೆಯನ್ನು ಹತ್ಯೆ ಮಾಡಿ ಶವವನ್ನು ಕಂಬಳಿಯಲ್ಲಿ ಸುತ್ತಿ ಎಕ್ಸ್ಪ್ರೆಸ್ವೇ ಬದಿಯಲ್ಲಿ ಎಸೆದಿದ್ದಾಗಿ ಬಾಯಿಬಿಟ್ಟಿದ್ದಾನೆ.
ಪ್ರಸ್ತುತ ಆರೋಪಿ ಸನ್ನಿಯನ್ನು ಪೊಲೀಸರು ಬಂಧಿಸಿದ್ದು, ಆಧುನಿಕ ತಂತ್ರಜ್ಞಾನವು ತನಿಖಾ ಸಂಸ್ಥೆಗಳಿಗೆ ಎಷ್ಟು ಸಹಕಾರಿ ಎಂಬುದಕ್ಕೆ ಈ ಪ್ರಕರಣ ಸಾಕ್ಷಿಯಾಗಿದೆ.
