ನಿಮ್ಮ ಸ್ಮಾರ್ಟ್ಫೋನ್ 2021 ಅಥವಾ ಅದಕ್ಕಿಂತ ಹಳೆಯದಾಗಿದ್ದರೆ ನೀವು ಈಗಲೇ ಜಾಗರೂಕರಾಗಬೇಕಿದೆ. ವಿಶ್ವದಾದ್ಯಂತ 100 ಕೋಟಿಗೂ ಹೆಚ್ಚು ಆಂಡ್ರಾಯ್ಡ್ ಬಳಕೆದಾರರ ಸಂಕಷ್ಟ ಹೆಚ್ಚಾಗಲಿದೆ. ಆಂಡ್ರಾಯ್ಡ್ 12 ಅಥವಾ ಅದಕ್ಕಿಂತ ಹಳೆಯ ಆವೃತ್ತಿಗಳಲ್ಲಿ ಕಾರ್ಯನಿರ್ವಹಿಸುವ ಸ್ಮಾರ್ಟ್ಫೋನ್ಗಳಿಗೆ ಇನ್ನು ಮುಂದೆ ಭದ್ರತಾ ಅಪ್ಡೇಟ್ಗಳನ್ನು (Security Updates) ನೀಡುವುದಿಲ್ಲ ಎಂದು ಟೆಕ್ ದೈತ್ಯ ಗೂಗಲ್ ಸ್ಪಷ್ಟಪಡಿಸಿದೆ. ಇದರ ನೇರ ಅರ್ಥವೇನೆಂದರೆ, ವಿಶ್ವದ ಸುಮಾರು 100 ಕೋಟಿಗೂ ಹೆಚ್ಚು ಫೋನ್ಗಳು ಈಗ ಹ್ಯಾಕರ್ಗಳ ಗುರಿಯಾಗಲಿವೆ.
ದತ್ತಾಂಶ ಮತ್ತು ಮಾಧ್ಯಮ ವರದಿಗಳ ಪ್ರಕಾರ, ಸುಮಾರು ಶೇ. 42.1 ರಷ್ಟು ಆಂಡ್ರಾಯ್ಡ್ ಬಳಕೆದಾರರು ಇನ್ನೂ ಹಳೆಯ ಸಾಫ್ಟ್ವೇರ್ ಬಳಸುತ್ತಿದ್ದಾರೆ. ಈ ಸಾಧನಗಳಿಗೆ ಗೂಗಲ್ ಭದ್ರತಾ ಪ್ಯಾಚ್ಗಳನ್ನು ಬಿಡುಗಡೆ ಮಾಡುವುದನ್ನು ನಿಲ್ಲಿಸಿದೆ. ಸರಳವಾಗಿ ಹೇಳುವುದಾದರೆ, ಈ ಫೋನ್ಗಳ ಬಾಗಿಲುಗಳು ಈಗ ವೈರಸ್ ಮತ್ತು ಮಾಲ್ವೇರ್ಗಳಿಗಾಗಿ ತೆರೆದಿವೆ, ಏಕೆಂದರೆ ಅವುಗಳನ್ನು ಲಾಕ್ ಮಾಡುವ ‘ಅಪ್ಡೇಟ್’ ಇನ್ನು ಮುಂದೆ ಸಿಗುವುದಿಲ್ಲ.
ಯಾವ ಫೋನ್ ಈಗ ಅಸುರಕ್ಷಿತ ?
• ನಿಮ್ಮ ಫೋನ್ 2021 ಅಥವಾ ಅದಕ್ಕಿಂತ ಮೊದಲು ಬಿಡುಗಡೆಯಾಗಿದ್ದರೆ ನೀವು ಹೆಚ್ಚಿನ ಅಪಾಯದಲ್ಲಿದ್ದೀರಿ.
• ಅಸುರಕ್ಷಿತ ಆವೃತ್ತಿಗಳು: ಆಂಡ್ರಾಯ್ಡ್ 12, 11, 10, 9 ಮತ್ತು ಅದಕ್ಕಿಂತ ಹಳೆಯವು.
• ಸುರಕ್ಷಿತ ಆವೃತ್ತಿಗಳು: ಆಂಡ್ರಾಯ್ಡ್ 13, 14, 15 ಮತ್ತು ಇತ್ತೀಚಿನ ಆಂಡ್ರಾಯ್ಡ್ 16 ಮಾತ್ರ ಸದ್ಯಕ್ಕೆ ಸುರಕ್ಷಿತವಾಗಿವೆ.
ಆಪಲ್ ಸಂಸ್ಥೆಗಿಂತ ಆಂಡ್ರಾಯ್ಡ್ ಏಕೆ ಹಿಂದುಳಿದಿದೆ?
ವರದಿಯ ಪ್ರಕಾರ ‘ಆಂಡ್ರಾಯ್ಡ್ ಫ್ರಾಗ್ಮೆಂಟೇಶನ್’ ಇದಕ್ಕೆ ಮುಖ್ಯ ಕಾರಣ. ಆಪಲ್ ತನ್ನ ಹಳೆಯ ಐಫೋನ್ಗಳಿಗೂ ದೀರ್ಘಕಾಲದವರೆಗೆ ಅಪ್ಡೇಟ್ಗಳನ್ನು ನೀಡುತ್ತದೆ. ಆದರೆ ಸ್ಯಾಮ್ಸಂಗ್, ಶಿಯೋಮಿ ಮತ್ತು ಮೋಟೋರೋಲಾದಂತಹ ಕಂಪನಿಗಳು ಕೆಲವು ವರ್ಷಗಳ ನಂತರ ಹಳೆಯ ಮಾಡೆಲ್ಗಳಿಗೆ ಅಪ್ಡೇಟ್ ನೀಡುವುದನ್ನು ನಿಲ್ಲಿಸುತ್ತವೆ.
ನಿಮ್ಮ ಫೋನ್ ಸುರಕ್ಷಿತವಾಗಿದೆಯೇ ಎಂದು ಪರಿಶೀಲಿಸುವುದು ಹೇಗೆ ?
* ಮೊದಲು ನಿಮ್ಮ ಫೋನ್ನ Settings ಗೆ ಹೋಗಿ.
* ಅಲ್ಲಿ About phone ಮೇಲೆ ಕ್ಲಿಕ್ ಮಾಡಿ.
* Android version ಅನ್ನು ಗಮನಿಸಿ.
ಒಂದು ವೇಳೆ ನಿಮ್ಮ ಫೋನ್ ಆಂಡ್ರಾಯ್ಡ್ 12 ಅಥವಾ ಅದಕ್ಕಿಂತ ಹಳೆಯ ವರ್ಷನ್ ಹೊಂದಿದ್ದು, ಯಾವುದೇ ಹೊಸ ಅಪ್ಡೇಟ್ ಬರುತ್ತಿಲ್ಲವೆಂದರೆ ಅದು ಗೂಗಲ್ ದೃಷ್ಟಿಯಲ್ಲಿ ಸುರಕ್ಷಿತವಲ್ಲ
ಗೂಗಲ್ ನೀಡಿದ ಸಲಹೆ
ಫೋರ್ಬ್ಸ್ ವರದಿಯ ಪ್ರಕಾರ, ನಿಮ್ಮ ಫೋನ್ ಆಂಡ್ರಾಯ್ಡ್ 12 ರಲ್ಲೇ ನಿಂತಿದ್ದರೆ ಮತ್ತು ಅಪ್ಡೇಟ್ ಆಗದಿದ್ದರೆ ಹೊಸ ಫೋನ್ ಖರೀದಿಸುವುದೇ ಜಾಣತನ. ನೀವು ದುಬಾರಿ ಫೋನ್ ಖರೀದಿಸಬೇಕೆಂದಿಲ್ಲ, ಆಂಡ್ರಾಯ್ಡ್ 13 ಅಥವಾ ಅದಕ್ಕಿಂತ ಮೇಲ್ಪಟ್ಟ ಯಾವುದೇ ಮಿಡ್-ರೇಂಜ್ ಫೋನ್ ತೆಗೆದುಕೊಳ್ಳಬಹುದು.
ಹಳೆಯ ಫೋನ್ಗಳಲ್ಲಿ ಬ್ಯಾಂಕಿಂಗ್ ವಂಚನೆ, ಪಾಸ್ವರ್ಡ್ ಚೋರಿ ಮತ್ತು ವೈಯಕ್ತಿಕ ಸಂದೇಶಗಳನ್ನು ಹ್ಯಾಕ್ ಮಾಡುವ ಅಪಾಯ ಹೆಚ್ಚಿರುತ್ತದೆ. ಗೂಗಲ್ ಪ್ಲೇ ಪ್ರೊಟೆಕ್ಟ್ (Google Play Protect) ಸಣ್ಣಪುಟ್ಟ ರಕ್ಷಣೆ ನೀಡಿದರೂ, ಸಿಸ್ಟಮ್ ಮಟ್ಟದ ದೊಡ್ಡ ಲೋಪದೋಷಗಳನ್ನು ಸರಿಪಡಿಸಲು ಸಾಧ್ಯವಿಲ್ಲ.
ಹಳೆಯ ಫೋನ್ ಬಳಸುತ್ತಿದ್ದರೆ ನೀವು ಮಾಡಬೇಕಾದ ತುರ್ತು ಕ್ರಮಗಳು:
ಒಂದು ವೇಳೆ ನೀವು ಅನಿವಾರ್ಯವಾಗಿ ಆಂಡ್ರಾಯ್ಡ್ 12 ಅಥವಾ ಅದಕ್ಕಿಂತ ಹಳೆಯ ಫೋನ್ ಬಳಸುತ್ತಿದ್ದರೆ, ಈ ಸುರಕ್ಷತಾ ಕ್ರಮಗಳನ್ನು ಪಾಲಿಸಿ:
• ಬ್ಯಾಂಕಿಂಗ್ ಆಪ್ಗಳ ಬಳಕೆ ಕಡಿಮೆ ಮಾಡಿ: ಸಾಧ್ಯವಾದಷ್ಟು ಮಟ್ಟಿಗೆ ಹಳೆಯ ಫೋನ್ಗಳಲ್ಲಿ ಯುಪಿಐ (UPI) ಅಥವಾ ನೆಟ್ ಬ್ಯಾಂಕಿಂಗ್ ಬಳಸುವುದನ್ನು ತಪ್ಪಿಸಿ.
• ಅಪರಿಚಿತ ಲಿಂಕ್ಗಳನ್ನು ಕ್ಲಿಕ್ ಮಾಡಬೇಡಿ: ವಾಟ್ಸಾಪ್ ಅಥವಾ ಎಸ್ಎಂಎಸ್ ಮೂಲಕ ಬರುವ ಅನುಮಾನಾಸ್ಪದ ಲಿಂಕ್ಗಳನ್ನು ತೆರೆಯಬೇಡಿ.
• ಅಪ್ಲಿಕೇಶನ್ ಅಪ್ಡೇಟ್: ಗೂಗಲ್ ಪ್ಲೇ ಸ್ಟೋರ್ಗೆ ಹೋಗಿ ಎಲ್ಲಾ ಆಪ್ಗಳನ್ನು ಅಪ್ಡೇಟ್ ಆಗಿ ಇಟ್ಟುಕೊಳ್ಳಿ.
• ಹೊಸ ಫೋನ್ ಚಿಂತನೆ: ನಿಮ್ಮ ಫೋನ್ನಲ್ಲಿ ಅತೀ ಹೆಚ್ಚು ವೈಯಕ್ತಿಕ ಡೇಟಾ ಮತ್ತು ಬ್ಯಾಂಕಿಂಗ್ ಮಾಹಿತಿ ಇದ್ದರೆ, ಬಜೆಟ್ ಬೆಲೆಯ ಹೊಸ ಆಂಡ್ರಾಯ್ಡ್ ಫೋನ್ಗೆ (Android 14/15 ಇರುವ ಫೋನ್) ಬದಲಾಗುವುದು ಉತ್ತಮ.
