ಬೆಂಗಳೂರು: ಎಳ್ಳು ಅಂದ ತಕ್ಷಣ ನಮ್ಮ ಕಣ್ಣಮುಂದೆ ಬರುವುದು ಸಂಕ್ರಾಂತಿಯ ಕುಸರೆಳ್ಳು ಅಥವಾ ಬಿಸಿಬಿಸಿ ಸಜ್ಜಿ ರೊಟ್ಟಿ. ಆದರೆ, ಭಾರತೀಯ ಅಡುಗೆಮನೆಯ ಈ ಅವಿಭಾಜ್ಯ ಅಂಗ ಕೇವಲ ಹಬ್ಬದ ಸಡಗರಕ್ಕಷ್ಟೇ ಸೀಮಿತವಲ್ಲ. ಆಯುರ್ವೇದದ ಪ್ರಕಾರ, ಎಳ್ಳು ಪ್ರಕೃತಿ ನಮಗೆ ನೀಡಿದ ಒಂದು ಅಮೃತ ಸದೃಶ ಬೀಜ.
ಆರೋಗ್ಯದ ಪವರ್‌ಹೌಸ್: ನೋಡಲು ಪುಟ್ಟದಾಗಿದ್ದರೂ, ಎಳ್ಳಿನಲ್ಲಿರುವ ಪೌಷ್ಟಿಕಾಂಶದ ಮೌಲ್ಯ ಅಪಾರ. ಇದರಲ್ಲಿ ಕ್ಯಾಲ್ಸಿಯಂ, ಐರನ್, ಮೆಗ್ನೀಷಿಯಂ ಮತ್ತು ಫೈಬರ್ ಅಂಶಗಳು ಸಮೃದ್ಧವಾಗಿವೆ. ಚಳಿಗಾಲದ ಈ ಸಮಯದಲ್ಲಿ ದೇಹಕ್ಕೆ ಅಗತ್ಯವಿರುವ ಉಷ್ಣತೆ ಮತ್ತು ಬಲವನ್ನು ನೀಡಲು ಎಳ್ಳಿಗಿಂತ ಮಿಗಿಲಾದ ಆಹಾರವಿಲ್ಲ. ಇದು ಕಫ ಮತ್ತು ಪಿತ್ತವನ್ನು ನಾಶಮಾಡಿ, ಚರ್ಮಕ್ಕೆ ನೈಸರ್ಗಿಕ ಕಾಂತಿ ನೀಡುವ ಔಷಧೀಯ ಗುಣವನ್ನು ಹೊಂದಿದೆ.
ಯಾವುದು ಶ್ರೇಷ್ಠ? ಮಾರುಕಟ್ಟೆಯಲ್ಲಿ ಕಪ್ಪು, ಬಿಳಿ ಮತ್ತು ಕಂದು ಬಣ್ಣದ ಎಳ್ಳುಗಳು ಲಭ್ಯವಿವೆ. ಆದರೆ ಆಯುರ್ವೇದದ ಪ್ರಕಾರ:
ಕಪ್ಪು ಎಳ್ಳು: ಅತ್ಯಂತ ಶ್ರೇಷ್ಠ ಮತ್ತು ಪೌಷ್ಟಿಕ.
ಬಿಳಿ ಎಳ್ಳು: ಮಧ್ಯಮ ಗುಣಮಟ್ಟದ್ದು.
ಕಂದು ಎಳ್ಳು: ಸಾಮಾನ್ಯ ಗುಣವುಳ್ಳದ್ದು ಎಂದು ಪರಿಗಣಿಸಲಾಗಿದೆ.
ಎಳ್ಳಿನ ಹೋಳಿಗೆಯಿಂದ ಹಿಡಿದು ಚಿಗಳಿಯವರೆಗೆ, ನಾನಾ ರೂಪದಲ್ಲಿ ಬಳಸಲ್ಪಡುವ ಈ ಕಾಳುಗಳು ಆಧುನಿಕ ವಿಜ್ಞಾನ ಮತ್ತು ಪ್ರಾಚೀನ ಆಯುರ್ವೇದ ಎರಡರ ದೃಷ್ಟಿಯಲ್ಲೂ ಆರೋಗ್ಯದ ಸಂಜೀವಿನಿಯೇ ಸರಿ.
ಎಳ್ಳು ಕೇವಲ ಅಡುಗೆಯ ರುಚಿ ಹೆಚ್ಚಿಸುವುದಲ್ಲ, ಇದು ತಲೆಯಿಂದ ಪಾದದವರೆಗೆ ದೇಹದ ಪ್ರತಿಯೊಂದು ಅಂಗಕ್ಕೂ ಒಂದು ನೈಸರ್ಗಿಕ ಔಷಧ.
ಈ ಪುಟ್ಟ ಬೀಜದ ಅದ್ಭುತ ಪ್ರಯೋಜನಗಳು ಇಲ್ಲಿವೆ:
ಹಲ್ಲು ಮತ್ತು ವಸಡುಗಳ ರಕ್ಷಾಕವಚ
ಪ್ರತಿದಿನ ಸುಮಾರು 20 ಗ್ರಾಂ ಎಳ್ಳನ್ನು ನಿಧಾನವಾಗಿ ಅಗಿದು ತಿನ್ನುವುದರಿಂದ ಹಲ್ಲುಗಳು ಸದೃಢವಾಗುತ್ತವೆ. ಇದು ವಸಡುಗಳನ್ನು ಗಟ್ಟಿಮಾಡಿ, ಹಲ್ಲುಗಳಿಗೆ ನೈಸರ್ಗಿಕ ಹೊಳಪು ನೀಡುತ್ತದೆ ಹಾಗೂ ದಂತ ರೋಗಗಳನ್ನು ದೂರವಿಡುತ್ತದೆ.
ಕೂದಲಿನ ಸೌಂದರ್ಯಕ್ಕೆ ನೈಸರ್ಗಿಕ ಟಾನಿಕ್
ಕೂದಲು ಅಕಾಲಿಕವಾಗಿ ಬೆಳ್ಳಗಾಗುತ್ತಿದೆಯೇ? ಎಳ್ಳು ಗಿಡದ ಬೇರು ಮತ್ತು ಎಲೆಗಳನ್ನು ನೀರಿನಲ್ಲಿ ಕುದಿಸಿ ಆ ನೀರಿನಿಂದ ಕೂದಲು ತೊಳೆಯಿರಿ. ಇದು ಕೂದಲಿಗೆ ನೈಸರ್ಗಿಕ ಕಪ್ಪು ಬಣ್ಣ ಮತ್ತು ಹೊಳಪನ್ನು ನೀಡುತ್ತದೆ.
ಕೆಮ್ಮು ಮತ್ತು ಉಸಿರಾಟದ ಸಮಸ್ಯೆಗೆ ಪರಿಹಾರ
ಜೇನುತುಪ್ಪ ಅಥವಾ ಕಲ್ಲು ಸಕ್ಕರೆ ಸೇರಿಸಿದ ಎಳ್ಳಿನ ಕಷಾಯವು ಕೆಮ್ಮಿನ ಸಮಸ್ಯೆಗೆ ಉತ್ತಮ ಮದ್ದಾಗಿದೆ. ಇದು ಗಂಟಲಿನ ಕಿರಿಕಿರಿಯನ್ನು ಕಡಿಮೆ ಮಾಡುತ್ತದೆ.
ಮಹಿಳೆಯರ ಮತ್ತು ಮಕ್ಕಳ ಆರೋಗ್ಯ
ಮಾಸಿಕ ಧರ್ಮ: ಋತುಚಕ್ರದ ಏರುಪೇರಿದ್ದರೆ ಎಳ್ಳು-ಬೆಲ್ಲದ ಸೇವನೆ ಅಥವಾ ಎಳ್ಳಿನ ಕಷಾಯ ರಾಮಬಾಣ.
ಮಕ್ಕಳಲ್ಲಿ ಮೂತ್ರದ ಸಮಸ್ಯೆ: ರಾತ್ರಿ ಹಾಸಿಗೆಯಲ್ಲಿ ಮೂತ್ರ ಮಾಡುವ ಅಭ್ಯಾಸವಿರುವ ಮಕ್ಕಳಿಗೆ ಕರಿ ಎಳ್ಳು ಮತ್ತು ಬೆಲ್ಲದ ಉಂಡೆ ತಿನ್ನಿಸುವುದು ಪರಿಣಾಮಕಾರಿ.
ಸಂಧಿವಾತ ಮತ್ತು ಮಂಡಿನೋವು
ಸಂಧಿವಾತದಿಂದ ಬಳಲುವವರು ಎಳ್ಳು, ಒಣ ಶುಂಠಿ ಮತ್ತು ಮೆಂತ್ಯ ಪುಡಿಯ ಮಿಶ್ರಣವನ್ನು ದಿನಕ್ಕೆ ಮೂರು ಬಾರಿ ಸೇವಿಸಿದರೆ ನೋವಿನಿಂದ ಮುಕ್ತಿ ಪಡೆಯಬಹುದು.
ಚರ್ಮದ ಕಾಂತಿಗೆ ಎಳ್ಳೆಣ್ಣೆ ಮಾಲಿಶ್
ಅಭ್ಯಂಗ ಸ್ನಾನಕ್ಕೆ ಎಳ್ಳೆಣ್ಣೆ ಅತ್ಯುತ್ತಮ. ಪ್ರತಿದಿನ ದೇಹಕ್ಕೆ ಎಳ್ಳೆಣ್ಣೆ ಹಚ್ಚಿ ಮಾಲಿಶ್ ಮಾಡುವುದರಿಂದ ರಕ್ತ ಸಂಚಾರ ಸುಗಮವಾಗಿ, ಚರ್ಮದ ಕಾಂತಿ ಹೆಚ್ಚುತ್ತದೆ ಮತ್ತು ವಾತದ ದೋಷಗಳು ನಿವಾರಣೆಯಾಗುತ್ತವೆ.
ಮಧುಮೇಹ ನಿಯಂತ್ರಣ: ಇದರಲ್ಲಿ ನಾರಿನಂಶ (Fiber) ಮತ್ತು ಪ್ರೋಟೀನ್ ಹೆಚ್ಚಿದ್ದು, ಸಕ್ಕರೆ ಅಂಶ ಕಡಿಮೆ ಇರುವುದರಿಂದ ಮಧುಮೇಹಿಗಳಿಗೆ ಇದು ಉತ್ತಮ ಆಹಾರ.
ಮೂಳೆಗಳ ಬಲವರ್ಧನೆ: ಕ್ಯಾಲ್ಸಿಯಂ, ಮೆಗ್ನೀಸಿಯಮ್ ಮತ್ತು ವಿಟಮಿನ್ E ಸಮೃದ್ಧವಾಗಿರುವುದರಿಂದ ಮೂಳೆ ಮತ್ತು ಕೀಲು ನೋವಿನ ಸಮಸ್ಯೆಗೆ ಇದು ರಾಮಬಾಣ
ನಿಮ್ಮ ಆಹಾರದಲ್ಲಿ ಎಳ್ಳನ್ನು ಹೇಗೆ ಬಳಸಬಹುದು?
ಸಲಾಡ್ ಮತ್ತು ಸೂಪ್: ಹುರಿದ ಎಳ್ಳನ್ನು ಸಲಾಡ್ ಅಥವಾ ಸೂಪ್‌ಗಳ ಮೇಲೆ ಉದುರಿಸಿ ಸವಿಯಬಹುದು.
ನಟ್ಸ್ ಮಿಕ್ಸ್: ಒಣ ದ್ರಾಕ್ಷಿ, ಗೋಡಂಬಿಯ ಜೊತೆಗೆ ಎಳ್ಳನ್ನು ಸೇರಿಸಿ ಸ್ನ್ಯಾಕ್ಸ್ ಆಗಿ ಬಳಸಬಹುದು.
ಅಡುಗೆ ಎಣ್ಣೆ: ಚಳಿಗಾಲದಲ್ಲಿ ಅಡುಗೆಗೆ ಎಳ್ಳೆಣ್ಣೆ ಬಳಸುವುದು ದೇಹಕ್ಕೆ ಉಷ್ಣತೆ ಮತ್ತು ಶಕ್ತಿ ನೀಡುತ್ತದೆ.
ಬ್ರೆಡ್ & ಮಫಿನ್: ಮನೆಯಲ್ಲಿ ಮಾಡುವ ಬೇಕರಿ ಪದಾರ್ಥಗಳಲ್ಲಿ ಎಳ್ಳನ್ನು ಬಳಸಬಹುದು
