ರಾಂಪುರ: ಉತ್ತರ ಪ್ರದೇಶದ ರಾಂಪುರ ಜಿಲ್ಲೆಯಲ್ಲಿ ಚಲನಚಿತ್ರದ ಕಥೆಯನ್ನೇ ಮೀರಿಸುವಂತಹ ಘಟನೆಯೊಂದು ನಡೆದಿದೆ. ಮದುವೆಯ ಸಂಭ್ರಮ ಮುಗಿಸಿ ಗಂಡನ ಮನೆಗೆ ಬಂದ ನವವಧುವೊಬ್ಬರು, ಮದುವೆಯಾದ ಮೊದಲ ರಾತ್ರಿಯೇ ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದಾರೆ. ಈ ಸುದ್ದಿ ತಿಳಿಯುತ್ತಿದ್ದಂತೆಯೇ ಇಡೀ ಜಿಲ್ಲೆಯಲ್ಲಿ ಭಾರಿ ಚರ್ಚೆ ಆರಂಭವಾಗಿದೆ.
ಏನಿದು ಘಟನೆ? ರಾಂಪುರದ ಅಜೀಂನಗರ ಪೊಲೀಸ್ ಠಾಣಾ ವ್ಯಾಪ್ತಿಯ ಕುಮ್ಹಾರಿಯಾ ಮತ್ತು ಬಹದ್ದೂರ್‌ಗಂಜ್ ಗ್ರಾಮಗಳ ನಡುವೆ ಈ ಸಂಬಂಧ ಏರ್ಪಟ್ಟಿತ್ತು. ಕುಮ್ಹಾರಿಯಾ ಗ್ರಾಮದ ಯುವಕ ಮತ್ತು ಬಹದ್ದೂರ್‌ಗಂಜ್‌ನ ಯುವತಿಯ ನಡುವೆ ಕಳೆದ ಆರು ತಿಂಗಳ ಹಿಂದೆಯೇ ಮದುವೆ ನಿಶ್ಚಯವಾಗಿತ್ತು. ಗ್ರಾಮಸ್ಥರ ಪ್ರಕಾರ, ಇಬ್ಬರ ನಡುವೆ ಮೊದಲೇ ಪ್ರೇಮ ಸಂಬಂಧವಿತ್ತು ಎನ್ನಲಾಗಿದೆ.
ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದ ಮದುವೆ: ಕೆಲವು ದಿನಗಳ ಹಿಂದಷ್ಟೇ ಯುವತಿ ತನಗೆ ತಕ್ಷಣ ಮದುವೆ ಮಾಡಿಕೊಡಬೇಕು ಎಂದು ಪಟ್ಟು ಹಿಡಿದು ಪೊಲೀಸ್ ಚೌಕಿಯ ಮೆಟ್ಟಿಲೇರಿದ್ದರು. ಪರಿಸ್ಥಿತಿಯ ಗಂಭೀರತೆಯನ್ನು ಅರಿತ ಪೊಲೀಸರು ಎರಡೂ ಗ್ರಾಮಗಳ ಮುಖಂಡರನ್ನು ಕರೆಸಿ ಮಾತುಕತೆ ನಡೆಸಿದರು. ಪಂಚಾಯತ್ ಸಮ್ಮುಖದಲ್ಲಿ ಎರಡೂ ಕುಟುಂಬಗಳು ಮದುವೆಗೆ ಒಪ್ಪಿಗೆ ಸೂಚಿಸಿದವು.
ಮೊದಲ ರಾತ್ರಿಯೇ ಹೆರಿಗೆ: ಕಳೆದ ಶನಿವಾರ ರಾತ್ರಿ ಯುವಕ ಕೇವಲ ಐದು ಮಂದಿ ಸಂಬಂಧಿಕರೊಂದಿಗೆ ಹೋಗಿ ಸರಳವಾಗಿ ಮದುವೆಯಾಗಿ ವಧುವನ್ನು ಮನೆಗೆ ಕರೆತಂದಿದ್ದನು. ಆದರೆ, ಮಧ್ಯರಾತ್ರಿ ಸುಮಾರಿಗೆ ವಧುವಿಗೆ ತೀವ್ರ ಹೊಟ್ಟೆನೋವು ಕಾಣಿಸಿಕೊಂಡಿತು. ಕೂಡಲೇ ಮಹಿಳಾ ವೈದ್ಯರನ್ನು ಕರೆಸಲಾಯಿತು. ಭಾನುವಾರ ಬೆಳಗಿನ ಜಾವದ ವೇಳೆಗೆ ಆಕೆ ಸುಂದರವಾದ ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದಾಳೆ.
ಸಿಹಿ ಹಂಚಿ ಸಂಭ್ರಮಿಸಿದ ವರ: ಸಾಮಾನ್ಯವಾಗಿ ಇಂತಹ ಘಟನೆಗಳು ನಡೆದಾಗ ವಿವಾದಗಳು ಸೃಷ್ಟಿಯಾಗುತ್ತವೆ. ಆದರೆ ಇಲ್ಲಿ ವರನು ಯಾವುದೇ ಬೇಸರ ಮಾಡಿಕೊಳ್ಳದೆ, ಮಗು ಹುಟ್ಟಿದ ಖುಷಿಯಲ್ಲಿ ಇಡೀ ಹಳ್ಳಿಗೆ ಸಿಹಿ ಹಂಚಿ ಸಂಭ್ರಮಿಸಿದ್ದಾನೆ. ಮದುವೆಯಾದ ಕೆಲವೇ ಗಂಟೆಗಳಲ್ಲಿ ದಂಪತಿಗಳು ಮಗುವನ್ನು ಬರಮಾಡಿಕೊಂಡ ಈ ವಿಶಿಷ್ಟ ಘಟನೆ ಈಗ ಎಲ್ಲೆಡೆ ವೈರಲ್ ಆಗಿದೆ.
