ಕ್ರಿಕೆಟ್ ಲೋಕದ ದಿಗ್ಗಜ ಸಚಿನ್ ತೆಂಡೂಲ್ಕರ್ ಅವರ ಹೆಸರಿಲ್ಲದೆ ಸಾರ್ವಕಾಲಿಕ ಶ್ರೇಷ್ಠ ಇಲೆವೆನ್ (All-time XI) ಪಟ್ಟಿ ಪೂರ್ಣಗೊಳ್ಳುವುದು ಅಸಾಧ್ಯ. ಆದರೆ, ಇತ್ತೀಚೆಗೆ ನಡೆದ ಪಾಡ್ಕಾಸ್ಟ್ ಒಂದರಲ್ಲಿ ಆಸ್ಟ್ರೇಲಿಯಾದ ಮಾಜಿ ಕ್ರಿಕೆಟಿಗ ಮಾರ್ಕ್ ವಾ ಸಚಿನ್ ಅವರನ್ನು ತಮ್ಮ ಪಟ್ಟಿಯಿಂದ ಕೈಬಿಟ್ಟಾಗ ನಡೆದ ಘಟನೆ ಈಗ ಭಾರಿ ವೈರಲ್ ಆಗಿದ್ದು, ನಗುವಿನ ಅಲೆ ಎಬ್ಬಿಸಿದೆ.
ನಡೆದಿದ್ದೇನು? ‘ಸ್ಟಿಕ್ ಟು ಕ್ರಿಕೆಟ್’ (Stick to Cricket) ಪಾಡ್ಕಾಸ್ಟ್ನ ಸಂಚಿಕೆಯೊಂದರಲ್ಲಿ ಮಾರ್ಕ್ ವಾ ತಮ್ಮ ಸಾರ್ವಕಾಲಿಕ ಶ್ರೇಷ್ಠ ತಂಡವನ್ನು ಆಯ್ಕೆ ಮಾಡುತ್ತಿದ್ದರು. ಈ ವೇಳೆ ಅವರು ಸಚಿನ್ ತೆಂಡೂಲ್ಕರ್ ಹೆಸರನ್ನು ಕೈಬಿಟ್ಟರು. ಇದನ್ನು ಗಮನಿಸಿದ ಇಂಗ್ಲೆಂಡ್ ಮಾಜಿ ನಾಯಕ ಮೈಕಲ್ ವಾನ್, ಕೂಡಲೇ ಸಚಿನ್ಗೆ ಫೋನ್ ಮಾಡಿ ಕೇಳುವಂತೆ ಡೇವಿಡ್ ಲಾಯ್ಡ್ ಅವರಿಗೆ ತಮಾಷೆಯಾಗಿ ಒತ್ತಾಯಿಸಿದರು.
ಕಾಮಿಡಿ ಫೋನ್ ಕಾಲ್: ಮೈಕಲ್ ವಾನ್ ಮಾತಿಗೆ ಸಮ್ಮತಿಸಿದ ಡೇವಿಡ್ ಲಾಯ್ಡ್, ಕಾರ್ಯಕ್ರಮದ ಮಧ್ಯದಲ್ಲೇ ಸಚಿನ್ ಅವರಿಗೆ ಫೋನ್ ಮಾಡಿದರು. ಸಚಿನ್ ಫೋನ್ ಎತ್ತಿದ ಕೂಡಲೇ ಲಾಯ್ಡ್, “ನಾನು ಬಂಬಲ್ (Bumble), ಸಚಿನ್ ನಾನು ಬಂಬಲ್ ಮಾತಾಡ್ತಿರೋದು” ಎಂದು ಪದೇ ಪದೇ ಪರಿಚಯಿಸಿಕೊಂಡರು. ಆದರೆ, ಲಾಯ್ಡ್ ಅವರ ಧ್ವನಿ ಕೇಳಿಸಿಕೊಳ್ಳುತ್ತಿದ್ದಂತೆಯೇ ಸಚಿನ್ ಫೋನ್ ಕಟ್ ಮಾಡಿದರು! ಇದನ್ನು ನೋಡಿ ಅಲ್ಲಿದ್ದವರೆಲ್ಲರೂ ನಗೆಗಡಲಲ್ಲಿ ತೇಲಿದರು. “ಅವರು ಹೋದರು!” (He’s gone!) ಎಂದು ಲಾಯ್ಡ್ ಹಾಸ್ಯ ಚಟಾಕಿ ಹಾರಿಸಿದರು.
ಸಚಿನ್ ದಾಖಲೆಗಳ ಮೇಲೆ ಕಣ್ಣಿಟ್ಟಿರುವ ಇಂದಿನ ಆಟಗಾರರು:
- ವಿರಾಟ್ ಕೊಹ್ಲಿ: ಸಚಿನ್ ಅವರ ಒಟ್ಟು ರನ್ಗಳ ದಾಖಲೆಗೆ (34,357) ಹತ್ತಿರವಿರುವ ಏಕೈಕ ಸಕ್ರಿಯ ಆಟಗಾರ ಕೊಹ್ಲಿ. ಇತ್ತೀಚೆಗೆ ನ್ಯೂಜಿಲೆಂಡ್ ವಿರುದ್ಧದ ಪಂದ್ಯದಲ್ಲಿ ಕುಮಾರ್ ಸಂಗಕ್ಕಾರ ಅವರ ದಾಖಲೆ ಮುರಿದು 28,091 ರನ್ಗಳೊಂದಿಗೆ ಎರಡನೇ ಸ್ಥಾನಕ್ಕೇರಿದ್ದಾರೆ. ಆದರೆ ಸಚಿನ್ ದಾಖಲೆ ಮುರಿಯಲು ಇನ್ನೂ 6,000ಕ್ಕೂ ಹೆಚ್ಚು ರನ್ಗಳ ಅಗತ್ಯವಿದೆ.
- ಜೋ ರೂಟ್: ಟೆಸ್ಟ್ ಕ್ರಿಕೆಟ್ನಲ್ಲಿ ಸಚಿನ್ ಅವರ ರನ್ಗಳ ದಾಖಲೆಗೆ ಇಂಗ್ಲೆಂಡ್ನ ಜೋ ರೂಟ್ ದೊಡ್ಡ ಸವಾಲಾಗಿದ್ದಾರೆ. ಅವರು ಸಚಿನ್ಗಿಂತ ಕೇವಲ 2,000 ರನ್ಗಳಷ್ಟೇ ಹಿಂದೆ ಇದ್ದಾರೆ.
