ಕಳೆದ ಐದು ದಿನಗಳಿಂದ ಯಾರೂ ತಡೆಯಲಾಗದ ವೇಗದಲ್ಲಿ ಓಡುತ್ತಿದ್ದ ಬೆಳ್ಳಿಯ ಓಟಕ್ಕೆ ಶುಕ್ರವಾರ ಕೊನೆಗೂ ಬ್ರೇಕ್ ಬಿದ್ದಿದೆ. ಸತತವಾಗಿ ದಾಖಲೆ ಬರೆಯುತ್ತಿದ್ದ ಬೆಳ್ಳಿ ಬೆಲೆಯಲ್ಲಿ ಇಂದು ಬರೋಬ್ಬರಿ ₹4,027 ರಷ್ಟು ಭಾರಿ ಕುಸಿತ ಕಂಡುಬಂದಿದ್ದು ಹೂಡಿಕೆದಾರರಲ್ಲಿ ಸಂಚಲನ ಮೂಡಿಸಿದೆ. ಜಾಗತಿಕ ಮಾರುಕಟ್ಟೆಯಲ್ಲಿ ಉಂಟಾದ ಮಂದಗತಿ ಮತ್ತು ಅಮೆರಿಕನ್ ಡಾಲರ್ ಮತ್ತಷ್ಟು ಬಲಗೊಂಡಿರುವುದು ಈ ದಿಢೀರ್ ಬದಲಾವಣೆಗೆ ಪ್ರಮುಖ ಕಾರಣ ಎನ್ನಲಾಗಿದೆ
ಮಾರುಕಟ್ಟೆಯ ಪ್ರಮುಖ ಅಂಕಿ-ಅಂಶಗಳು:
*ಬೆಳ್ಳಿ ಬೆಲೆ (Silver): ಮಲ್ಟಿ ಕಮೋಡಿಟಿ ಎಕ್ಸ್ಚೇಂಜ್ (MCX) ನಲ್ಲಿ ಮಾರ್ಚ್ ವಿತರಣೆಯ ಬೆಳ್ಳಿ ದರ ₹4,027 (ಶೇ. 1.38) ಇಳಿಕೆಯಾಗಿ ಪ್ರತಿ ಕೆಜಿಗೆ ₹2,87,550 ಕ್ಕೆ ತಲುಪಿದೆ. ಗಮನಾರ್ಹವೆಂದರೆ, ಗುರುವಾರವಷ್ಟೇ (ಜೂನ್ 15) ಬೆಳ್ಳಿ ₹2,92,960 ರ ಸಾರ್ವಕಾಲಿಕ ಗರಿಷ್ಠ ಮಟ್ಟ ತಲುಪಿತ್ತು.
*ಚಿನ್ನದ ಬೆಲೆ (Gold): ದೇಶೀಯ ಮಾರುಕಟ್ಟೆಯಲ್ಲಿ ಹೂಡಿಕೆದಾರರು ಲಾಭಾಂಶ ನಗದೀಕರಣಕ್ಕೆ(Profit Booking) ಮುಂದಾದ ಪರಿಣಾಮ, ಚಿನ್ನದ ಬೆಲೆಯು ಪ್ರತಿ 10 ಗ್ರಾಂಗೆ ₹1,42,601 ಕ್ಕೆ ಇಳಿಕೆಯಾಗಿದೆ.
ಲಾಭದ ಬೆನ್ನತ್ತಿದ ಹೂಡಿಕೆದಾರರು:
ಮಾರುಕಟ್ಟೆಯು ಗರಿಷ್ಠ ಮಟ್ಟ ತಲುಪಿದ್ದನ್ನೇ ಕಾಯುತ್ತಿದ್ದ ಹೂಡಿಕೆದಾರರು ದೊಡ್ಡ ಮಟ್ಟದಲ್ಲಿ ಪ್ರಾಫಿಟ್ ಬುಕಿಂಗ್ (ಲಾಭಾಂಶ ನಗದೀಕರಣ) ಗೆ ಮುಂದಾಗಿದ್ದಾರೆ. ಇದರಿಂದಾಗಿ ಮಾರುಕಟ್ಟೆಯಲ್ಲಿ ಮಾರಾಟದ ಒತ್ತಡ ಹೆಚ್ಚಾಗಿ ಬೆಳ್ಳಿ ಬೆಲೆ ನೆಲಕಚ್ಚಿದೆ. ಬೆಳ್ಳಿಯ ಈ ಹಾದಿಯನ್ನೇ ಅನುಸರಿಸಿದ ಹಳದಿ ಲೋಹ ಚಿನ್ನದ ಬೆಲೆಯೂ ಕೂಡ ಪ್ರತಿ 10 ಗ್ರಾಂಗೆ ₹1,42,601 ಕ್ಕೆ ಇಳಿಕೆಯಾಗಿದೆ.
ಕುಸಿತಕ್ಕೆ ಕಾರಣವೇನು?
ಅಂತರಾಷ್ಟ್ರೀಯ ಮಾರುಕಟ್ಟೆಯ ದುರ್ಬಲ ಪ್ರವೃತ್ತಿ ಮತ್ತು ಡಾಲರ್ ಮೌಲ್ಯದ ಏರಿಕೆಯು ಹೂಡಿಕೆದಾರರಲ್ಲಿ ಆತಂಕ ಮೂಡಿಸಿದ್ದು, ಸುರಕ್ಷಿತ ಹೂಡಿಕೆಯತ್ತ ಮುಖ ಮಾಡುವಂತೆ ಮಾಡಿದೆ. ಸದ್ಯಕ್ಕೆ ಗಗನಕ್ಕೇರಿದ್ದ ಲೋಹಗಳ ಬೆಲೆಗೆ ಈಗ ಪ್ರೈಸ್ ಕರೆಕ್ಷನ್ ಬಿಸಿ ತಟ್ಟಿದ್ದು, ಖರೀದಿದಾರರಿಗೆ ಮಾತ್ರ ಇದು ತುಸು ಸಮಾಧಾನ ತಂದಿದೆ.
ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ (Comex) ಚಿನ್ನದ ಬೆಲೆ ಫೆಬ್ರವರಿ ವಿತರಣೆಗೆ ಶೇ. 0.47ರಷ್ಟು, ಅಂದರೆ 21.9 ಡಾಲರ್ ಕುಸಿದು ಪ್ರತಿ ಔನ್ಸ್‌ಗೆ 4,601.8 ಡಾಲರ್‌ಕ್ಕೆ ತಲುಪಿದೆ. ಜೂನ್ 14ರಂದು ಚಿನ್ನವು ಪ್ರತಿ ಔನ್ಸ್‌ಗೆ 4,650.50 ಡಾಲರ್ ತಲುಪಿದ್ದು ಇದು ಅದ್ಭುತ ದಾಖಲೆ ಎಂದು ತೋರಿಸುತ್ತದೆ.
ಬೆಲೆ ಇಳಿಕೆಯ ಹಿಂದಿನ ಪ್ರಮುಖ ಕಾರಣಗಳು:
*ಅಮೆರಿಕದ ಇತ್ತೀಚಿನ ಆರ್ಥಿಕ ಮಾಹಿತಿ ಪೈಕಿ ಡಾಲರ್ ಇಂಡೆಕ್ಸ್ ಹಲವು ವಾರಗಳ ಗರಿಷ್ಠ ಮಟ್ಟಕ್ಕೆ ಏರಿದ್ದು, ಚಿನ್ನದ ಬೆಲೆಗೆ ಒತ್ತಡ ತಂದಿದೆ.
*ಫೆಡರಲ್ ರಿಸರ್ವ್ ಈ ವರ್ಷದ ಮೊದಲಾರ್ಧದಲ್ಲಿ ಬಡ್ಡಿ ದರವನ್ನು ಕಡಿಮೆ ಮಾಡದೇ ಇರುವ ಸಾಧ್ಯತೆಯ ನಿರೀಕ್ಷೆ ಬುಲಿಯನ್ ಮಾರುಕಟ್ಟೆಗೆ ತೀವ್ರ ಒತ್ತಡ ಉಂಟುಮಾಡಿದೆ.
*ಮಹಾರಾಷ್ಟ್ರದಲ್ಲಿ ನಾಗರಿಕ ಚುನಾವಣೆಗಳ ಕಾರಣದಿಂದ ಗುರುವಾರ ಬೆಳಗಿನ ವೇಳೆಯಲ್ಲಿ ಎಂಸಿಎಕ್ಸ್ ವಹಿವಾಟು ಸ್ಥಗಿತಗೊಂಡಿದ್ದು, ವಹಿವಾಟು ಮೇಲೆ ಪರಿಣಾಮ ಬೀರಿದೆ.
