ಚಳಿಗಾಲ ಸಮೀಪಿಸುತ್ತಿದ್ದಂತೆ ನಾವು ಬೆಚ್ಚಗಿನ ಉಡುಪು, ಸೌಂದರ್ಯದ ಬಗ್ಗೆ ತಲೆಕೆಡಿಸಿಕೊಳ್ಳುತ್ತೇವೆ. ಆದರೆ, ನಮ್ಮ ದೇಹದ ಅತ್ಯಂತ ಪ್ರಮುಖ ಅಂಗವಾದ ಹೃದಯ ಈ ಸಮಯದಲ್ಲಿ ಅತಿ ಹೆಚ್ಚು ಅಪಾಯದಲ್ಲಿರುತ್ತದೆ ಎಂಬ ಸತ್ಯ ನಿಮಗೊತ್ತೇ? ಹೌದು, ಅಂಕಿಅಂಶಗಳ ಪ್ರಕಾರ ವರ್ಷದ ಉಳಿದ ದಿನಗಳಿಗಿಂತ ಚಳಿಗಾಲದಲ್ಲಿ ಹೃದಯಾಘಾತ (Heart Attack) ಸಂಭವಿಸುವ ಸಾಧ್ಯತೆ ಅತಿ ಹೆಚ್ಚು.
ಹೃದಯದ ಮೇಲೆ ಚಳಿಯ ಅಟ್ಯಾಕ್: ಏನಿದು ‘ವಾಸೋಕನ್ಸ್ಟ್ರಿಕ್ಷನ್’?
ಚಳಿಗಾಲದಲ್ಲಿ ನಮ್ಮ ದೇಹವು ಒಳಗಿನ ಶಾಖವನ್ನು ಕಾಪಾಡಿಕೊಳ್ಳಲು ವಿಭಿನ್ನವಾಗಿ ಪ್ರತಿಕ್ರಿಯಿಸುತ್ತದೆ. ಈ ಪ್ರಕ್ರಿಯೆಯೇ ಹೃದಯಕ್ಕೆ ಕಂಟಕವಾಗಬಹುದು:
ರಕ್ತನಾಳಗಳ ಸಂಕೋಚನ (Vasoconstriction): ಚಳಿಯ ವಾತಾವರಣದಲ್ಲಿ ದೇಹದ ಉಷ್ಣತೆ ಉಳಿಸಿಕೊಳ್ಳಲು ರಕ್ತನಾಳಗಳು ಕಿರಿದಾಗುತ್ತವೆ. ಇದರಿಂದ ರಕ್ತ ಸಂಚಾರಕ್ಕೆ ಅಡ್ಡಿಯಾಗಿ ರಕ್ತದೊತ್ತಡ (BP) ದಿಢೀರ್ ಏರಿಕೆಯಾಗುತ್ತದೆ.
ಹೃದಯಕ್ಕೆ ಡಬಲ್ ಕೆಲಸ: ರಕ್ತನಾಳಗಳು ಕಿರಿದಾದಾಗ, ದೇಹದ ಉಳಿದ ಭಾಗಗಳಿಗೆ ರಕ್ತ ಪಂಪ್ ಮಾಡಲು ಹೃದಯವು ಸಾಮಾನ್ಯಕ್ಕಿಂತ ಹೆಚ್ಚು ಶ್ರಮ ಪಡಬೇಕಾಗುತ್ತದೆ.
ದಪ್ಪವಾಗುವ ರಕ್ತ: ಶೀತದ ಗಾಳಿಯಿಂದಾಗಿ ರಕ್ತವು ದಪ್ಪವಾಗುತ್ತದೆ ಮತ್ತು ಪ್ಲೇಟ್‌ಲೆಟ್‌ಗಳು ಒಂದಕ್ಕೊಂದು ಅಂಟಿಕೊಳ್ಳುತ್ತವೆ. ಇದು ರಕ್ತ ಹೆಪ್ಪುಗಟ್ಟುವಿಕೆಗೆ (Blood Clots) ಕಾರಣವಾಗಿ ನೇರವಾಗಿ ಹೃದಯಾಘಾತಕ್ಕೆ ದಾರಿ ಮಾಡಿಕೊಡುತ್ತದೆ.
ತಜ್ಞರು ಏನಂತಾರೆ?
ಹಿರಿಯ ತಜ್ಞರಾದ ಡಾ. ಶ್ರದ್ಧೇ ಕಟಿಯಾರ್ ಅವರ ಪ್ರಕಾರ, ಚಳಿಗಾಲದಲ್ಲಿ ಹೃದಯಾಘಾತದ ಹೆಚ್ಚಳವು ಕೇವಲ ಕಾಕತಾಳೀಯವಲ್ಲ. ವಾಯುಭಾರ ಒತ್ತಡ, ಗಾಳಿಯ ವೇಗ ಮತ್ತು ಶೂನ್ಯ ಡಿಗ್ರಿ ತಾಪಮಾನವು ನರಮಂಡಲದ ಮೇಲೆ ಒತ್ತಡ ಹೇರುತ್ತದೆ. ನಗರ ಪ್ರದೇಶಗಳಲ್ಲಿನ ವಾಯುಮಾಲಿನ್ಯವು ಈ ಅಪಾಯವನ್ನು ಮತ್ತಷ್ಟು ಹೆಚ್ಚಿಸುತ್ತದೆ.
ಯಾರು ಅತಿ ಹೆಚ್ಚು ಎಚ್ಚರವಾಗಿರಬೇಕು?
ಹಿರಿಯ ನಾಗರಿಕರು ಮತ್ತು ಮಕ್ಕಳು.
ಈಗಾಗಲೇ ಹೃದಯ ಸಂಬಂಧಿ ಕಾಯಿಲೆ ಇರುವವರು.
ಅಧಿಕ ರಕ್ತದೊತ್ತಡ (BP) ಮತ್ತು ಮಧುಮೇಹ (Diabetes) ಇರುವವರು.
ಧೂಮಪಾನದ ಅಭ್ಯಾಸವಿರುವವರು.
ಈ ಲಕ್ಷಣಗಳನ್ನು ಮರೆತೂ ನಿರ್ಲಕ್ಷಿಸಬೇಡಿ!
ನಿಮಗೆ ಅಥವಾ ನಿಮ್ಮ ಸುತ್ತಮುತ್ತಲಿನವರಿಗೆ ಈ ಕೆಳಗಿನ ಲಕ್ಷಣಗಳು ಕಂಡರೆ ಕೂಡಲೇ ವೈದ್ಯರ ಸಹಾಯ ಪಡೆಯಿರಿ:
ಎದೆ ನೋವು ಅಥವಾ ಬಿಗಿತದ ಅನುಭವ.
ಉಸಿರಾಟದ ತೊಂದರೆ ಮತ್ತು ಹಠಾತ್ ದೌರ್ಬಲ್ಯ.
ವಿಪರೀತ ಬೆವರುವುದು (ಚಳಿಯಲ್ಲೂ ಬೆವರುತ್ತಿದ್ದರೆ ಎಚ್ಚರ!).
ತಲೆತಿರುಗುವಿಕೆ ಅಥವಾ ವಾಕರಿಕೆ.
ಹೃದಯವನ್ನು ಕಾಪಾಡಿಕೊಳ್ಳಲು ಸಿಂಪಲ್ ಟಿಪ್ಸ್:
ದೇಹ ಬೆಚ್ಚಗಿರಲಿ: ಯಾವಾಗಲೂ ಲೇಯರ್ಡ್ ಉಡುಪುಗಳನ್ನು ಧರಿಸಿ, ಕಿವಿ ಮತ್ತು ತಲೆಯನ್ನು ಮುಚ್ಚಿಕೊಳ್ಳಿ.
ಆಹಾರದ ಮೇಲೆ ಹಿಡಿತ: ಚಳಿಗಾಲದಲ್ಲಿ ಹುರಿದ ಮತ್ತು ಹೆಚ್ಚಿನ ಕ್ಯಾಲೋರಿ ಆಹಾರದ ಮೋಹಕ್ಕೆ ಬೀಳಬೇಡಿ. ಇದು ಕೊಲೆಸ್ಟ್ರಾಲ್ ಹೆಚ್ಚಿಸುತ್ತದೆ.
ಲಘು ವ್ಯಾಯಾಮ: ಚಳಿ ಎಂದು ವ್ಯಾಯಾಮ ಬಿಡಬೇಡಿ. ಮನೆಯೊಳಗೇ ಯೋಗ ಅಥವಾ ನಡಿಗೆಯಂತಹ ಚಟುವಟಿಕೆಗಳನ್ನು ಮಾಡಿ.
ಪರಿಶೀಲನೆ: ಬಿಪಿ ಮತ್ತು ಮಧುಮೇಹವನ್ನು ಆಗಾಗ ಪರೀಕ್ಷಿಸಿಕೊಳ್ಳಿ.
ಚಳಿಗಾಲದಲ್ಲಿ ಬೆಳಿಗ್ಗೆ ಅತಿ ಬೇಗ (ಅಂದರೆ ವಿಪರೀತ ಚಳಿ ಇರುವಾಗ) ವಾರ್ಕಿಂಗ್ ಮಾಡುವುದನ್ನು ತಪ್ಪಿಸಿ. ಸೂರ್ಯ ಬಂದ ನಂತರ ಅಥವಾ ಮನೆಯೊಳಗೇ ವ್ಯಾಯಾಮ ಮಾಡುವುದು ಹೃದಯದ ಮೇಲೆ ಒತ್ತಡವನ್ನು ಕಡಿಮೆ ಮಾಡುತ್ತದೆ.
