ಬೆಂಗಳೂರು: ಸ್ಯಾಂಡಲ್‌ವುಡ್‌ನಿಂದ ಕೆರಿಯರ್ ಆರಂಭಿಸಿ, ಇಂದು ಇಡೀ ದಕ್ಷಿಣ ಭಾರತದ ‘ಮೋಸ್ಟ್ ವಾಂಟೆಡ್’ ನಟಿಯಾಗಿ ಬೆಳೆದಿರುವ ಶ್ರೀಲೀಲಾ, ಬೆಳ್ಳಿತೆರೆಯ ಮೇಲೆ ಮಾತ್ರವಲ್ಲದೆ ನಿಜ ಜೀವನದಲ್ಲೂ ಹೀರೊಯಿನ್ ಎನಿಸಿಕೊಂಡಿದ್ದಾರೆ. ತಮ್ಮ ನಟನೆ ಮತ್ತು ಎಲೆಕ್ಟ್ರಿಫೈಯಿಂಗ್ ಡ್ಯಾನ್ಸ್‌ನಿಂದ ಅಭಿಮಾನಿಗಳ ಗುಂಗು ಹಿಡಿಸಿರುವ ಈ ಚೆಲುವೆ, ಈಗ ತಮ್ಮ ಉದಾರ ಗುಣದ ಮೂಲಕ ಎಲ್ಲರ ಮನಗೆದ್ದಿದ್ದಾರೆ. ಕೇವಲ 24ನೇ ವಯಸ್ಸಿನಲ್ಲಿ, ಕೆರಿಯರ್‌ನ ಅತ್ಯಂತ ಯಶಸ್ವಿ ಹಂತದಲ್ಲಿರುವಾಗಲೇ ಮೂವರು ಮಕ್ಕಳನ್ನು ದತ್ತು ಪಡೆಯುವ ಮೂಲಕ ಸುದ್ದಿಯಾಗಿದ್ದಾರೆ.
ಸಾಮಾನ್ಯವಾಗಿ ನಟಿಯರು ತಮ್ಮ ವೃತ್ತಿಜೀವನದ ಉತ್ತುಂಗದಲ್ಲಿದ್ದಾಗ ಮದುವೆ ಅಥವಾ ತಾಯ್ತನದ ಬಗ್ಗೆ ಯೋಚಿಸುವುದು ಕಡಿಮೆ. ಆದರೆ ಶ್ರೀಲೀಲಾ ಸದ್ದಿಲ್ಲದೆ ಮೂವರು ಪುಟ್ಟ ಮಕ್ಕಳ ಬಾಳಿಗೆ ಬೆಳಕಾಗಿದ್ದಾರೆ. ಇತ್ತೀಚೆಗೆ ನೀಡಿದ ಸಂದರ್ಶನವೊಂದರಲ್ಲಿ ಈ ಅಚ್ಚರಿಯ ವಿಷಯವನ್ನು ಹಂಚಿಕೊಂಡಿರುವ ಅವರು, “ನಾನು ಈ ವಿಷಯವನ್ನು ಅತಿ ದೊಡ್ಡ ಮಟ್ಟದಲ್ಲಿ ಪ್ರಚಾರ ಮಾಡಲು ಇಷ್ಟಪಡುವುದಿಲ್ಲ, ಇದು ನನ್ನ ವೈಯಕ್ತಿಕ ನಿರ್ಧಾರ” ಎಂದು ಹೇಳುವ ಮೂಲಕ ತಮ್ಮ ಸರಳತೆಯನ್ನು ಮೆರೆದಿದ್ದಾರೆ.
ಸಿನಿಮಾ ರಂಗದಲ್ಲಿ ಅತಿ ಕಡಿಮೆ ಅವಧಿಯಲ್ಲಿ ಸ್ಟಾರ್ ಪಟ್ಟಕ್ಕೇರಿದ ನಟಿ ಎಂದರೆ ಅದು ಶ್ರೀಲೀಲಾ. 2017ರಲ್ಲಿ ‘ಚಿತ್ರಾಂಗದ’ ಚಿತ್ರದ ಮೂಲಕ ಬಾಲನಟಿಯಾಗಿ ಬೆಳ್ಳಿತೆರೆಗೆ ಎಂಟ್ರಿ ಕೊಟ್ಟ ಈ ಚೆಲುವೆ, ಇಂದು ಇಡೀ ಭಾರತೀಯ ಚಿತ್ರರಂಗವೇ ತನ್ನತ್ತ ತಿರುಗಿ ನೋಡುವಂತೆ ಮಾಡಿದ್ದಾರೆ. ಆದರೆ, ಅವರ ಈ ಗ್ಲಾಮರ್ ಲೋಕದ ಯಶಸ್ಸಿನ ಹಿಂದೆ ಎಲ್ಲೂ ಪ್ರಚಾರ ಪಡೆಯದ ಅದ್ಭುತ ‘ಮಾನವೀಯ ಕಥೆ’ಯೊಂದಿದೆ.
2019ರಲ್ಲಿ ಎ.ಪಿ. ಅರ್ಜುನ್ ನಿರ್ದೇಶನದ ‘ಕಿಸ್’ (Kiss) ಚಿತ್ರದ ಮೂಲಕ ಅಧಿಕೃತವಾಗಿ ನಾಯಕಿಯಾದ ಶ್ರೀಲೀಲಾ, ನಂತರ ‘ಭರಾಟೆ’ಯಲ್ಲಿ ಮಿಂಚಿದರು. ತೆಲುಗಿನ ‘ಪೆಳ್ಳಿ ಸಂದಡಿ’ ಮತ್ತು ‘ಧಮಾಕಾ’ ಚಿತ್ರಗಳು ಇವರನ್ನು ಟಾಲಿವುಡ್‌ನ ರಾತ್ರೋರಾತ್ರಿ ಸ್ಟಾರ್ ನಟಿಯನ್ನಾಗಿ ಮಾಡಿದವು. ಇತ್ತೀಚೆಗೆ ‘ಪುಷ್ಪ 2’ ಚಿತ್ರದ ಸ್ಪೆಷಲ್ ಹಾಡಿನ ಮೂಲಕ ಇಡೀ ದೇಶದ ಸಿನಿಪ್ರಿಯರ ಹಾಟ್ ಫೇವರಿಟ್ ಆಗಿದ್ದಾರೆ.
ದತ್ತು ಪಡೆಯುವ ನಿರ್ಧಾರಕ್ಕೆ ಕಾರಣವಾದ ಆ ಒಂದು ಭೇಟಿ
ತಮ್ಮ ವೈಯಕ್ತಿಕ ಜೀವನದ ಅತಿ ದೊಡ್ಡ ರಹಸ್ಯವನ್ನು ಬಿಚ್ಚಿಟ್ಟಿರುವ ಶ್ರೀಲೀಲಾ, ತಾವು ದತ್ತು ಮಕ್ಕಳನ್ನು ಹೊಂದಿರುವ ಬಗ್ಗೆ ಭಾವುಕರಾಗಿ ಮಾತನಾಡಿದ್ದಾರೆ. 2019ರಲ್ಲಿ ‘ಕಿಸ್’ ಚಿತ್ರೀಕರಣದ ಸಮಯದಲ್ಲಿ ನಿರ್ದೇಶಕರು ನನ್ನನ್ನು ಒಂದು ಆಶ್ರಮಕ್ಕೆ ಕರೆದೊಯ್ದಿದ್ದರು. ಅಲ್ಲಿನ ಮಕ್ಕಳನ್ನು ನೋಡಿದಾಗ ನನ್ನಲ್ಲಿ ಏನೋ ಬದಲಾವಣೆಯಾಯಿತು. ಆ ಕ್ಷಣದಲ್ಲೇ ಆ ಮಕ್ಕಳ ಜವಾಬ್ದಾರಿ ಹೊರಲು ನಿರ್ಧರಿಸಿದೆ, ಎನ್ನುತ್ತಾರೆ ಈ ‘ರಿಯಲ್ ಲೈಫ್’ ಹೀರೊಯಿನ್
https://www.instagram.com/p/DSFM7CikS8s/?utm_source=ig_web_copy_link
ದೂರವಿದ್ದರೂ ಕಾಳಜಿಯಲ್ಲಿ ಇವರೇ ಮೊದಲು
ಮಕ್ಕಳನ್ನು ದತ್ತು ಪಡೆದ ವಿಷಯವನ್ನು ಶ್ರೀಲೀಲಾ ತುಂಬಾ ಸಮಯ ರಹಸ್ಯವಾಗಿಟ್ಟಿದ್ದರು. “ನಾನು ಅವರೊಂದಿಗೆ ವಾಸಿಸುತ್ತಿಲ್ಲ ನಿಜ, ಆದರೆ ಅವರ ಶಿಕ್ಷಣ, ಆರೋಗ್ಯ ಮತ್ತು ಪ್ರತಿ ಹೆಜ್ಜೆಯ ಜವಾಬ್ದಾರಿಯನ್ನು ನಾನೇ ಹೊತ್ತಿದ್ದೇನೆ. ಬಿಡುವು ಸಿಕ್ಕಾಗಲೆಲ್ಲಾ ಅವರನ್ನು ಭೇಟಿ ಮಾಡುತ್ತೇನೆ, ಫೋನ್‌ನಲ್ಲಿ ಮಾತನಾಡುತ್ತೇನೆ. ಅವರ ಬಗ್ಗೆ ಯಾರಾದರೂ ಕೇಳಿದಾಗ ನನಗೆ ಅರಿವಿಲ್ಲದಂತೆ ಕಣ್ಣಾಲಿಗಳು ತುಂಬಿ ಬರುತ್ತವೆ,” ಎಂದು ಅವರು ತಮ್ಮ ತಾಯ್ತನದ ಪ್ರೀತಿಯನ್ನು ಹಂಚಿಕೊಂಡಿದ್ದಾರೆ
ದಕ್ಷಿಣದಲ್ಲಿ ಸದ್ದು ಮಾಡಿದ ಈ ‘ಡ್ಯಾನ್ಸಿಂಗ್ ಕ್ವೀನ್’ ಈಗ ಬಾಲಿವುಡ್‌ಗೂ ಲಗ್ಗೆ ಇಡುತ್ತಿದ್ದಾರೆ. ಖ್ಯಾತ ನಿರ್ದೇಶಕ ಅನುರಾಗ್ ಬಸು ಅವರ ಮುಂದಿನ ತೀವ್ರವಾದ ಪ್ರೇಮಕಥೆಯಲ್ಲಿ ಚಾಕೊಲೇಟ್ ಹೀರೊ ಕಾರ್ತಿಕ್ ಆರ್ಯನ್ ಜೊತೆ ಶ್ರೀಲೀಲಾ ನಾಯಕಿಯಾಗಿ ಮಿಂಚಲಿದ್ದಾರೆ. ಸದ್ಯ ಹಿಂದಿ ಸಿನಿಪ್ರಿಯರು ಕೂಡ ಈ ಹೊಸ ಜೋಡಿಯ ಕೆಮಿಸ್ಟ್ರಿ ನೋಡಲು ಕಾತುರರಾಗಿದ್ದಾರೆ.
