ಭಾರತೀಯ ಕಾರ್ಪೊರೇಟ್ ವಲಯದಲ್ಲಿ 2026ನೇ ವರ್ಷವು ಉದ್ಯೋಗ ಹಬ್ಬಕ್ಕೆ ಸಾಕ್ಷಿಯಾಗಲಿದೆ. ಪ್ರಮುಖ ಸ್ಟಾಫಿಂಗ್ ಸಂಸ್ಥೆ ‘ಟೀಮ್‌ಲೀಸ್’ (TeamLease) ವರದಿಯ ಪ್ರಕಾರ, ಮುಂದಿನ ವರ್ಷ ದೇಶದಲ್ಲಿ ಬರೋಬ್ಬರಿ 10 ರಿಂದ 12 ಮಿಲಿಯನ್ (1 ರಿಂದ 1.2 ಕೋಟಿ) ಹೊಸ ಉದ್ಯೋಗಗಳು ಸೃಷ್ಟಿಯಾಗಲಿವೆ. 2025ರಲ್ಲಿ ಈ ಪ್ರಮಾಣ 80 ಲಕ್ಷದಿಂದ 1 ಕೋಟಿಯಷ್ಟಿತ್ತು.
ಹೊಸ ವರ್ಷದ ನೇಮಕಾತಿಯ ಪ್ರಮುಖ ಲಕ್ಷಣಗಳು: ಈ ಬಾರಿಯ ನೇಮಕಾತಿಯಲ್ಲಿ ಕಂಪನಿಗಳು ಕೇವಲ ಸಂಖ್ಯೆಗೆ ಮಾತ್ರವಲ್ಲದೆ, ವೈವಿಧ್ಯತೆ (Diversity) ಮತ್ತು ಹೊಸ ತಂತ್ರಜ್ಞಾನದ ಕೌಶಲಗಳಿಗೆ ಹೆಚ್ಚಿನ ಆದ್ಯತೆ ನೀಡುತ್ತಿವೆ.
- ಕ್ಯಾಂಪಸ್ ಹೈರಿಂಗ್‌ಗೆ ಆದ್ಯತೆ: ಇವೈ (EY) ಇಂಡಿಯಾ ಸಂಸ್ಥೆಯು 2026ರ ಆರ್ಥಿಕ ವರ್ಷದಲ್ಲಿ 14,000 ರಿಂದ 15,000 ಜನರನ್ನು ನೇಮಿಸಿಕೊಳ್ಳಲು ಯೋಜಿಸಿದೆ. ಹೊಸ ಪದವೀಧರರನ್ನು ಹೆಚ್ಚಿನ ಸಂಖ್ಯೆಯಲ್ಲಿ ಕಂಪನಿಗೆ ಸೇರಿಸಿಕೊಳ್ಳುವುದು ಇವೈ ಮತ್ತು ಇತರ ಪ್ರಮುಖ ಸಂಸ್ಥೆಗಳ ಮುಖ್ಯ ಗುರಿಯಾಗಿದೆ.
- ತಂತ್ರಜ್ಞಾನದ ಮೇಲಿನ ಹೂಡಿಕೆ: ಟಾಟಾ ಮೋಟಾರ್ಸ್ ಸಂಸ್ಥೆಯು ಎಲೆಕ್ಟ್ರಿಕ್ ವಾಹನಗಳತ್ತ ಮುಖ ಮಾಡಿದ್ದು, ಬ್ಯಾಟರಿ ತಂತ್ರಜ್ಞಾನ, ಹೈಡ್ರೋಜನ್ ಇಂಧನ ಮತ್ತು ಸಾಫ್ಟ್‌ವೇರ್ ಕ್ಷೇತ್ರಗಳಲ್ಲಿ ತಜ್ಞರನ್ನು ಹುಡುಕುತ್ತಿದೆ. ಮೋತಿಲಾಲ್ ಓಸ್ವಾಲ್ ಸಂಸ್ಥೆಯು ಡೇಟಾ ಸೈನ್ಸ್ ಮತ್ತು ಎಐ (AI) ತಜ್ಞರಿಗೆ ಮಣೆ ಹಾಕುತ್ತಿದೆ.
- ವೈವಿಧ್ಯತೆ ಮತ್ತು ಒಳಗೊಳ್ಳುವಿಕೆ (D&I): ಗೋದ್ರೇಜ್ ಕನ್ಸ್ಯೂಮರ್ ಪ್ರಾಡಕ್ಟ್ಸ್ ಸಂಸ್ಥೆಯು ತನ್ನ ಒಟ್ಟು ಉದ್ಯೋಗಿಗಳಲ್ಲಿ ಮಹಿಳೆಯರು, ಎಲ್‌ಜಿಬಿಟಿಕ್ಯೂಎ+ (LGBTIQA+) ಮತ್ತು ವಿಕಲಚೇತನರ ಸಂಖ್ಯೆಯನ್ನು ಶೇ. 33ಕ್ಕೆ ಏರಿಸಲು ನಿರ್ಧರಿಸಿದೆ. ಡಿಯಾಜಿಯೊ ಇಂಡಿಯಾ ಕೂಡ ಮಹಿಳಾ ಪ್ರಾತಿನಿಧ್ಯವನ್ನು ಹೆಚ್ಚಿಸಲು ಒತ್ತು ನೀಡುತ್ತಿದೆ.
ಯಾವ ಕ್ಷೇತ್ರಗಳಲ್ಲಿ ಬೇಡಿಕೆ ಹೆಚ್ಚಿದೆ? ಡಿಜಿಟಲ್ ಟ್ರಾನ್ಸ್‌ಫರ್ಮೇಷನ್, ಎಂಜಿನಿಯರಿಂಗ್, ಸಪ್ಲೈ ಚೈನ್ ಮತ್ತು ಹಸಿರು ಇಂಧನ (Green Mobility) ಕ್ಷೇತ್ರಗಳಲ್ಲಿ ಉದ್ಯೋಗಾವಕಾಶಗಳು ಹೆಚ್ಚಾಗಿವೆ. ಕೌಶಲ ಆಧಾರಿತ ನೇಮಕಾತಿಯ ಜೊತೆಗೆ ಸಮಾನ ಅವಕಾಶಗಳನ್ನು ನೀಡುವ ಮೂಲಕ ಜಾಗತಿಕ ಮಟ್ಟದಲ್ಲಿ ಸ್ಪರ್ಧಿಸಲು ಭಾರತೀಯ ಕಂಪನಿಗಳು ಸಜ್ಜಾಗುತ್ತಿವೆ.
