ಸಾಮಾನ್ಯವಾಗಿ ಭಾರತೀಯ ಮದುವೆಗಳೆಂದರೆ ಅಲ್ಲಿ ಅದ್ದೂರಿ ಅಲಂಕಾರ, ಲಕ್ಷಾಂತರ ರೂಪಾಯಿ ಖರ್ಚು ಮತ್ತು ಗಣ್ಯ ವ್ಯಕ್ತಿಗಳ ಆಗಮನವೇ ದೊಡ್ಡ ಸುದ್ದಿಯಾಗುತ್ತದೆ. ತಮ್ಮ ಮನೆಯ ಸಮಾರಂಭಗಳು ಅದ್ಧೂರಿಯಾಗಿ ನಡೆಯಬೇಕು, ಸಮಾಜದಲ್ಲಿ ಅದೊಂದು ಮಾದರಿಯಾಗಬೇಕು ಎಂದು ಪ್ರತಿಯೊಬ್ಬರೂ ಬಯಸುತ್ತಾರೆ. ಆದರೆ ಉತ್ತರ ಪ್ರದೇಶದ ಗಾಜಿಪುರದ ಸಿದ್ಧಾರ್ಥ್ ರೈ ಎಂಬುವವರು ತಮ್ಮ ತಂಗಿಯ ಮದುವೆಯನ್ನು ಅತ್ಯಂತ ವಿಭಿನ್ನವಾಗಿ ಮತ್ತು ಅರ್ಥಪೂರ್ಣವಾಗಿ ಆಚರಿಸುವ ಮೂಲಕ ಸುದ್ದಿಯಾಗಿದ್ದಾರೆ.
ವಿಶೇಷ ಅತಿಥಿಗಳಾಗಿ ಆಗಮಿಸಿದ ನಿರ್ಗತಿಕರು ತಮ್ಮ ತಂಗಿಯ ಮದುವೆಗೆ ಕೇವಲ ಬಂಧು-ಬಳಗದವರನ್ನು ಮಾತ್ರವಲ್ಲದೆ, ಜಿಲ್ಲೆಯಾದ್ಯಂತ ಇದ್ದ ನೂರಾರು ಭಿಕ್ಷುಕರನ್ನು ಮತ್ತು ನಿರ್ಗತಿಕರನ್ನು ಸಿದ್ಧಾರ್ಥ್ ರೈ ಆಹ್ವಾನಿಸಿದ್ದರು. ಕೇವಲ ಆಮಂತ್ರಣ ನೀಡುವುದಷ್ಟೇ ಅಲ್ಲದೆ, ಅವರನ್ನು ಮದುವೆ ಮಂಟಪಕ್ಕೆ ಗೌರವಯುತವಾಗಿ ವಾಹನಗಳಲ್ಲಿ ಕರೆತರುವ ವ್ಯವಸ್ಥೆಯನ್ನೂ ಮಾಡಿದ್ದರು. ಮದುವೆಗೆ ಬಂದ ಇತರ ಅತಿಥಿಗಳಂತೆ ಇವರನ್ನೂ ಆತ್ಮೀಯವಾಗಿ ಬರಮಾಡಿಕೊಂಡ ಕುಟುಂಬಸ್ಥರು, ಎಲ್ಲರ ಜೊತೆ ಸಾಲಾಗಿ ಕುಳ್ಳಿರಿಸಿ ರುಚಿಕರವಾದ ಭೋಜನ ಬಡಿಸಿದ್ದಾರೆ.
ಭಾವನಾತ್ಮಕ ಕ್ಷಣಗಳು ಸಮಾರಂಭದಲ್ಲಿ ಪಾಲ್ಗೊಂಡಿದ್ದ ನಿರ್ಗತಿಕರು ಮದುವೆಯ ಸಂಗೀತಕ್ಕೆ ಹೆಜ್ಜೆ ಹಾಕಿ ಸಂಭ್ರಮಿಸಿದರು. ಜೀವನದಲ್ಲಿ ಮೊದಲ ಬಾರಿಗೆ ಇಂತಹ ಗೌರವ ಮತ್ತು ಪ್ರೀತಿ ಸಿಕ್ಕಿದ್ದನ್ನು ಕಂಡು ಹಲವರು ಭಾವುಕರಾದರು. ಈ ಬಗ್ಗೆ ಮಾತನಾಡಿದ ಸಿದ್ಧಾರ್ಥ್ ರೈ, “ಇವರನ್ನು ಯಾರು ಕೇಳುವವರಿಲ್ಲ ಎಂಬ ಕಾರಣಕ್ಕೆ ನಾನು ನನ್ನ ತಂಗಿಯ ಮದುವೆಗೆ ಮುಖ್ಯ ಅತಿಥಿಗಳಾಗಿ ಕರೆದಿದ್ದೆ. ನಿಜವಾದ ಆಶೀರ್ವಾದ ಇವರಿಂದಲೇ ಸಿಗುತ್ತದೆ ಎಂಬುದು ನನ್ನ ನಂಬಿಕೆ” ಎಂದು ತಮ್ಮ ಸಂತೋಷವನ್ನು ಹಂಚಿಕೊಂಡಿದ್ದಾರೆ.
ಅತ್ಯಮೂಲ್ಯ ಉಡುಗೊರೆ ನೀಡಿ ಬೀಳ್ಕೊಡುಗೆ ಊಟದ ನಂತರ ಸಿದ್ಧಾರ್ಥ್ ಅವರು ಪ್ರತಿಯೊಬ್ಬರಿಗೂ ವಿಶೇಷವಾದ ಉಡುಗೊರೆಗಳನ್ನು ನೀಡಿ ಗೌರವದಿಂದ ಕಳುಹಿಸಿಕೊಟ್ಟಿದ್ದಾರೆ. ಈ ವಿಶಿಷ್ಟ ಮದುವೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಸಿದ್ಧಾರ್ಥ್ ಅವರ ಮಾನವೀಯ ಗುಣಕ್ಕೆ ದೇಶಾದ್ಯಂತ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಹಣದ ಆಡಂಬರದ ನಡುವೆ ಪ್ರೀತಿ ಮತ್ತು ಸಹಾನುಭೂತಿಯೇ ಮುಖ್ಯ ಎಂದು ತೋರಿಸಿಕೊಟ್ಟ ಸಿದ್ಧಾರ್ಥ್ ಅವರ ಕಾರ್ಯ ಇತರರಿಗೆ ಮಾದರಿಯಾಗಿದೆ.
