ಪಾಕಿಸ್ತಾನದ ಗುಪ್ತಚರ ಸಂಸ್ಥೆಯಾದ ಇಂಟರ್-ಸರ್ವೀಸಸ್ ಇಂಟೆಲಿಜೆನ್ಸ್(ಐಎಸ್ಐ) ಜೊತೆ ಸಂಪರ್ಕ ಹೊಂದಿದ್ದ ಎಂಬ ಆರೋಪದ ಮೇಲೆ ಅಮೃತಸರ ಗ್ರಾಮೀಣ ಪೊಲೀಸರು ಭಾರತೀಯ ಸೇನೆಯ ಯೋಧ ಸೇರಿದಂತೆ ಇಬ್ಬರು ವ್ಯಕ್ತಿಗಳನ್ನು ಬಂಧಿಸಿದ್ದಾರೆ.
ಪಹಲ್ಗಾಮ್‌ನಲ್ಲಿ ಇತ್ತೀಚೆಗೆ ನಡೆದ ಭಯೋತ್ಪಾದಕ ದಾಳಿಯ ನಂತರ ಭಾರತ ಮತ್ತು ಪಾಕಿಸ್ತಾನದ ನಡುವೆ ಹೆಚ್ಚಿದ ಉದ್ವಿಗ್ನತೆಯ ಮಧ್ಯೆ ಈ ಬೆಳವಣಿಗೆ ನಡೆದಿವೆ. ಪಾಕಿಸ್ತಾನಕ್ಕೆ ಸೂಕ್ಷ್ಮ ಮಾಹಿತಿಯನ್ನು ಸೋರಿಕೆ ಮಾಡುತ್ತಿರುವ ಶಂಕಿತ ವ್ಯಕ್ತಿಗಳ ಮೇಲೆ ಪಂಜಾಬ್ ಪೊಲೀಸರು ತಮ್ಮ ಕಾರ್ಯಾಚರಣೆಯನ್ನು ತೀವ್ರಗೊಳಿಸಿದ್ದಾರೆ.
ಇಬ್ಬರು ಆರೋಪಿಗಳನ್ನು ಗುರ್‌ಪ್ರೀತ್ ಸಿಂಗ್ ಅಲಿಯಾಸ್ ಗೋಪಿ ಫೌಜಿ ಮತ್ತು ಸಾಹಿಲ್ ಮಸಿಹ್ ಅಲಿಯಾಸ್ ಶಾಲಿ ಎಂದು ಗುರುತಿಸಲಾಗಿದೆ. ಅಮೃತಸರ(ಗ್ರಾಮೀಣ) ಹಿರಿಯ ಪೊಲೀಸ್ ವರಿಷ್ಠಾಧಿಕಾರಿ ಮಣೀಂದರ್ ಸಿಂಗ್ ಅವರ ಪ್ರಕಾರ, ಗುರ್‌ಪ್ರೀತ್ ಸಿಂಗ್ 2016 ರಿಂದ ಭಾರತೀಯ ಸೇನೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ ಮತ್ತು ಬಂಧನದ ಸಮಯದಲ್ಲಿ ಜಮ್ಮುವಿನಲ್ಲಿ ನಿಯೋಜಿಸಲ್ಪಟ್ಟಿದ್ದರು.
ಪ್ರಾಥಮಿಕ ತನಿಖೆಗಳಲ್ಲಿ ಅವರು ಐಎಸ್ಐ ಅಧಿಕಾರಿಗಳೊಂದಿಗೆ ನೇರ ಸಂಪರ್ಕದಲ್ಲಿದ್ದಾರೆ ಮತ್ತು ಯುಎಸ್‌ಬಿ ಡ್ರೈವ್‌ಗಳನ್ನು ಬಳಸಿಕೊಂಡು ಭಾರತೀಯ ಮಿಲಿಟರಿ ಸೂಕ್ಷ್ಮ ಮಾಹಿತಿಯನ್ನು ಪಾಕಿಸ್ತಾನಕ್ಕೆ ರವಾನಿಸುತ್ತಿದ್ದರು ಎಂದು ತಿಳಿದುಬಂದಿದೆ.
ಗುರುಪ್ರೀತ್ ಐಎಸ್ಐ ನಿರ್ವಾಹಕ ರಾಣಾ ಜಾವೇದ್ ಜೊತೆ ನೇರ ಸಂಪರ್ಕ ಸಾಧಿಸಿದ್ದ ಎಂದು ಎಸ್ಎಸ್ಪಿ ಸಿಂಗ್ ದೃಢಪಡಿಸಿದ್ದಾರೆ, ಅವರನ್ನು ಈಗ ಪಾಕಿಸ್ತಾನದ ಕಡೆಯ ಪ್ರಾಥಮಿಕ ಸಂಯೋಜಕ ಎಂದು ಗುರುತಿಸಲಾಗಿದೆ. ಐಎಸ್ಐ ಕಾರ್ಯಕರ್ತರೊಂದಿಗೆ ಸಂಪರ್ಕ ಸಾಧಿಸಲು ಆರೋಪಿಗಳು ಬಳಸುತ್ತಿದ್ದ ಎರಡು ಮೊಬೈಲ್ ಫೋನ್‌ಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಈ ಸಾಧನಗಳ ವಿಧಿವಿಜ್ಞಾನ ತಪಾಸಣೆ ಮತ್ತು ಡಿಜಿಟಲ್ ವಿಶ್ಲೇಷಣೆಯು ಬೇಹುಗಾರಿಕೆ ಸಂಪರ್ಕವನ್ನು ದೃಢಪಡಿಸಿದೆ.
ತನಿಖಾ ಸಂಸ್ಥೆಗಳು ಈಗ ಬೇಹುಗಾರಿಕೆ ಜಾಲದ ಸಂಪೂರ್ಣ ವ್ಯಾಪ್ತಿಯನ್ನು ಪರಿಶೀಲಿಸುತ್ತಿವೆ. ಇಬ್ಬರು ಶಂಕಿತರು ಇತರ ರಾಷ್ಟ್ರೀಯ ಅಥವಾ ಅಂತರರಾಷ್ಟ್ರೀಯ ಭಯೋತ್ಪಾದಕ ಗುಂಪುಗಳೊಂದಿಗೆ ಸಂಬಂಧ ಹೊಂದಿದ್ದಾರೆಯೇ ಎಂದು ಪರಿಶೀಲಿಸಲಾಗಿದೆ. ಪಹಲ್ಗಾಮ್ ಭಯೋತ್ಪಾದಕ ದಾಳಿಯಂತಹ ನಿರ್ಣಾಯಕ ಘಟನೆಗಳ ಸಮಯದಲ್ಲಿ ಅಥವಾ ಭಾರತ-ಪಾಕ್ ಗಡಿ ಉದ್ವಿಗ್ನತೆ ಹೆಚ್ಚಾದ ಸಮಯದಲ್ಲಿ ಯಾವ ನಿರ್ದಿಷ್ಟ ಗುಪ್ತಚರ ಮಾಹಿತಿಯನ್ನು ಹಂಚಿಕೊಂಡಿರಬಹುದು ಎಂಬುದನ್ನು ಅಧಿಕಾರಿಗಳು ಪರಿಶೀಲಿಸುತ್ತಿದ್ದಾರೆ.
ಪಹಲ್ಗಾಮ್ ದಾಳಿಯ ಬಗ್ಗೆ ಗುರ್‌ಪ್ರೀತ್‌ಗೆ ಮೊದಲೇ ತಿಳಿದಿರಬಹುದು ಮತ್ತು ದಾಳಿಕೋರರಿಗೆ ಅವರು ಯಾವ ಮಾಹಿತಿಯನ್ನು ರವಾನಿಸಿರಬಹುದು ಎಂದು ತನಿಖೆ ನಡೆಸುತ್ತಿದ್ದಾರೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.
