ಚಂಡೀಗಢ: ಅಕಾಲಿ ದಳದ ಹಿರಿಯ ನಾಯಕ ಮತ್ತು ಕೇಂದ್ರದ ಮಾಜಿ ಸಚಿವ ಸುಖದೇವ್ ಸಿಂಗ್ ಧಿಂಡ್ಸಾ ಬುಧವಾರ ಪಂಜಾಬ್‌ ನಲ್ಲಿ ನಿಧನರಾದರು.
ಅವರಿಗೆ 89 ವರ್ಷ ವಯಸ್ಸಾಗಿತ್ತು. ಕಾಂಗ್ರೆಸ್ ನಾಯಕ ಅಮರಿಂದರ್ ಸಿಂಗ್ ರಾಜಾ ವಾರಿಂಗ್ ಅವರು ದಿವಂಗತ ನಾಯಕನನ್ನು “ಮಣ್ಣಿನ ಮಗ” ಎಂದು ಕರೆದಿದ್ದಾರೆ.
ಸರ್ದಾರ್ ಸುಖದೇವ್ ಸಿಂಗ್ ಧಿಂಡ್ಸಾ ಸಾಹಬ್ ಅವರ ದುಃಖಕರ ನಿಧನಕ್ಕೆ ನನ್ನ ಆಳವಾದ ಮತ್ತು ಹೃತ್ಪೂರ್ವಕ ಸಂತಾಪಗಳು. ಆರು ದಶಕಗಳಿಗೂ ಹೆಚ್ಚು ಕಾಲ ಪಂಜಾಬ್‌ಗೆ ಸೇವೆ ಸಲ್ಲಿಸಿದ ಮಣ್ಣಿನ ಮಹಾನ್ ಪುತ್ರನನ್ನು ನಾವು ಕಳೆದುಕೊಂಡಿದ್ದೇವೆ ಎಂದು ಅಮರಿಂದರ್ ಪೋಸ್ಟ್‌ನಲ್ಲಿ ಬರೆದಿದ್ದಾರೆ.
ಅವರು ರಾಜ್ಯ ಮತ್ತು ರಾಷ್ಟ್ರೀಯ ರಾಜಕೀಯಕ್ಕೆ ಅಪಾರ ಮತ್ತು ಸಕಾರಾತ್ಮಕ ಕೊಡುಗೆ ನೀಡುವುದರ ಜೊತೆಗೆ ಕೇಂದ್ರ ಸಚಿವರಾಗಿ ಸೇವೆ ಸಲ್ಲಿಸಿದರು. ಪಂಜಾಬ್‌ನ ಘಟನಾತ್ಮಕ ಇತಿಹಾಸಕ್ಕೆ ಸಾಕ್ಷಿಯಾದ ರಾಜ್ಯದ ಕೊನೆಯ ಮಹಾನ್ ಐಕಾನ್‌ಗಳಲ್ಲಿ ಅವರು ಬಹುಶಃ ಒಬ್ಬರು ಎಂದು ಅವರು ಹೇಳಿದ್ದಾರೆ.
ಧಿಂಡ್ಸಾ ಬುಧವಾರ ಮೊಹಾಲಿಯ ಫೋರ್ಟಿಸ್ ಆಸ್ಪತ್ರೆಯಲ್ಲಿ ದೀರ್ಘಕಾಲದ ಅನಾರೋಗ್ಯದಿಂದ ನಿಧನರಾದರು. ಅವರು ಶ್ವಾಸಕೋಶ ಚಿಕಿತ್ಸೆ ಪಡೆಯುತ್ತಿದ್ದರು. ಇತ್ತೀಚಿನ ಕೆಲವು ತಿಂಗಳುಗಳಿಂದ ವೈದ್ಯಕೀಯ ಆರೈಕೆಯಲ್ಲಿದ್ದರು.
ಇಂದು ಬೆಳಿಗ್ಗೆ ಅವರು ಕೊನೆಯುಸಿರೆಳೆದರು ಎಂದು ಕುಟುಂಬ ಮೂಲಗಳು ದೃಢಪಡಿಸಿವೆ.
ಅವರ ನಿಧನದೊಂದಿಗೆ ಪಂಜಾಬ್‌ನ ರಾಜಕೀಯ ಇತಿಹಾಸದಲ್ಲಿ ಮಹತ್ವದ ಅಧ್ಯಾಯವೊಂದು ಅಂತ್ಯವಾಗಿದೆ.
ಸುಖದೇವ್ ಸಿಂಗ್ ಧಿಂಡ್ಸಾ ಅವರ ರಾಜಕೀಯ ಪ್ರಯಾಣ
ಧಿಂಡ್ಸಾ ಅವರು ಏಪ್ರಿಲ್ 9, 1936 ರಂದು ಜನಿಸಿದರು. ಅವರು ಶಿರೋಮಣಿ ಅಕಾಲಿ ದಳ(ಸಂಯುಕ್ತ)ದ ಅಧ್ಯಕ್ಷರಾಗಿದ್ದರು, ಇದು ಶಿರೋಮಣಿ ಅಕಾಲಿ ದಳ(ಡೆಮಾಕ್ರಟಿಕ್) ಮತ್ತು ಶಿರೋಮಣಿ ಅಕಾಲಿ ದಳ(ತಕ್ಸಾಲಿ) ಗಳ ವಿಲೀನದ ಮೂಲಕ ರೂಪುಗೊಂಡ ಪಕ್ಷವಾಗಿದ್ದು, ಧಿಂಡ್ಸಾ ಮತ್ತು ರಂಜಿತ್ ಸಿಂಗ್ ಬ್ರಹ್ಮಪುರ ನೇತೃತ್ವದಲ್ಲಿ ಇದನ್ನು ರಚಿಸಲಾಯಿತು.
ಮಾರ್ಚ್ 2024 ರಲ್ಲಿ, ಅವರ ಪಕ್ಷವನ್ನು ಮತ್ತೆ ಶಿರೋಮಣಿ ಅಕಾಲಿ ದಳದಲ್ಲಿ ವಿಲೀನಗೊಳಿಸಲಾಯಿತು.
