ಮಹಾರಾಷ್ಟ್ರದ ಪುಣೆ ನಗರದಲ್ಲಿ ನಡೆದ ಅಮಾನವೀಯ ಘಟನೆಯೊಂದು ಬೆಳಕಿಗೆ ಬಂದಿದೆ. ಭಾನುವಾರ, ಏಪ್ರಿಲ್ 13 ರಂದು ಪುಣೆ ಪೊಲೀಸರು 36 ವರ್ಷದ ಮಹಿಳೆ ಹಾಗೂ ಆಕೆಯ 24 ವರ್ಷದ ಗೆಳೆಯನನ್ನು ಬಂಧಿಸಿದ್ದಾರೆ. ಈ ಬಂಧನಕ್ಕೆ ಕಾರಣ ಆಘಾತಕಾರಿ ಆರೋಪ: ಆ ಮಹಿಳೆ ತನ್ನ ಸ್ವಂತ 14 ವರ್ಷದ ಅಪ್ರಾಪ್ತ ಮಗಳ ಅಶ್ಲೀಲ ವಿಡಿಯೊಗಳನ್ನು ಬೇರೆಯವರಿಗೆ ಹಂಚಿದ್ದಾಳೆ!
ವಿಷಯ ಇನ್ನಷ್ಟು ಗಂಭೀರವಾಗುವುದು ಮೂರು ತಿಂಗಳ ಹಿಂದೆಯೇ ಈ ಬಾಲಕಿ ತನ್ನ ತಾಯಿಯ ವಿರುದ್ಧ ಪೊಲೀಸರಿಗೆ ದೂರು ನೀಡಿದ್ದಳು ಎಂಬ ಅಂಶದಿಂದ. ಆ ದೂರಿನಲ್ಲಿ ಬಾಲಕಿ ಹೇಳಿಕೊಂಡಿರುವುದೇನೆಂದರೆ, ತಾನು ಸ್ನಾನ ಮಾಡುವಾಗ ಮತ್ತು ಬಟ್ಟೆ ಬದಲಾಯಿಸುವಾಗ ಆಕೆಯ ತಾಯಿ ವಿಡಿಯೊಗಳನ್ನು ಚಿತ್ರೀಕರಿಸಿದ್ದಳು. ಅಷ್ಟೇ ಅಲ್ಲ, ಆ ವಿಡಿಯೊಗಳನ್ನು ತನ್ನ ಸಂಬಂಧಿಕರು ಮತ್ತು ಸ್ನೇಹಿತರಿಗೂ ಹಂಚಿದ್ದಾಳೆ ಎಂದು ಆಕೆ ಆರೋಪಿಸಿದ್ದಾಳೆ.
ಪೊಲೀಸರ ತನಿಖೆಯಲ್ಲಿ ತಿಳಿದು ಬಂದಿರುವ ಸಂಗತಿ ಇನ್ನಷ್ಟು ಆಘಾತಕಾರಿ. ತನ್ನ ಅನೈತಿಕ ಸಂಬಂಧದಿಂದ ಮನೆಯವರ ಗಮನವನ್ನು ಬೇರೆಡೆಗೆ ಸೆಳೆಯಲು ಆ ಮಹಿಳೆ ತನ್ನ ಮಗಳ ವಿಡಿಯೊಗಳನ್ನು ಹಂಚಿದ್ದಾಳೆ ಎನ್ನಲಾಗಿದೆ. ಆ ಬಾಲಕಿ ತನ್ನ ತಾಯಿಯ ಪರಪುರುಷ ಸಂಬಂಧವನ್ನು ಕಂಡುಹಿಡಿದು, ಆ ವಿಷಯವನ್ನು ಮನೆಯ ಮಾಲೀಕರಿಗೆ ತಿಳಿಸಿದ್ದಳು. ಇದರಿಂದ ಕೋಪಗೊಂಡ ತಾಯಿ, ತನ್ನ ಮಗಳು ಈ ವಿಷಯವನ್ನು ಇನ್ನಷ್ಟು ಬಹಿರಂಗಪಡಿಸಬಹುದು ಎಂಬ ಭಯದಿಂದ ಇಂತಹ ಕೃತ್ಯಕ್ಕೆ ಮುಂದಾಗಿದ್ದಳು ಎಂದು ವರದಿಯಾಗಿದೆ. ಅಷ್ಟೇ ಅಲ್ಲದೆ, ಆಕೆ ಸಾಮಾಜಿಕ ಮಾಧ್ಯಮದಲ್ಲೂ ಈ ವಿಡಿಯೊಗಳನ್ನು ಅಪ್‌ಲೋಡ್ ಮಾಡಿದ್ದಳು ಎಂದು ಬಾಲಕಿ ದೂರಿನಲ್ಲಿ ತಿಳಿಸಿದ್ದಾಳೆ.
ಆರೋಪಿ ಮಹಿಳೆ ಈ ವರ್ಷದ ಆರಂಭದಲ್ಲಿಯೇ ಈ ಕೃತ್ಯ ಎಸಗಿದ್ದಳು. ಆಕೆಯ ಈ ದುಷ್ಕೃತ್ಯಕ್ಕೆ ಆಕೆಯ ಪ್ರಿಯಕರ ಕೂಡ ಸಾಥ್ ನೀಡಿದ್ದನು. ಈ ವಿಷಯ ಜನವರಿಯಲ್ಲಿ ಬಾಲಕಿಯ ಚಿಕ್ಕಮ್ಮನಿಗೆ ತಿಳಿದಾಗ ಆಕೆ ಪೊಲೀಸರನ್ನು ಸಂಪರ್ಕಿಸಿ ದೂರು ದಾಖಲಿಸಿದಳು. ತಕ್ಷಣ ಕಾರ್ಯಪ್ರವೃತ್ತರಾದ ಪೊಲೀಸರು, ಆ ವಿಡಿಯೊಗಳು ಮತ್ತು ತುಣುಕುಗಳನ್ನು ಅಪ್‌ಲೋಡ್ ಮಾಡಲಾಗಿದ್ದ ವೆಬ್‌ಸೈಟ್‌ಗಳನ್ನು ಪರಿಶೀಲಿಸಿದರು.
ತನಿಖೆಯ ವೇಳೆ ಪೊಲೀಸರಿಗೆ ತಿಳಿದು ಬಂದ ವಿಷಯವೆಂದರೆ, ಆರೋಪಿ ಮಹಿಳೆ ಮತ್ತು ಆಕೆಯ ಪತಿ ಕೂಲಿ ಕಾರ್ಮಿಕರು. ಆಕೆಯ ಗೆಳೆಯನು ಕೂಡ ದಿನಗೂಲಿ ನೌಕರನೇ ಆಗಿದ್ದಾನೆ. ಪೊಲೀಸರು ಆ ವಿಡಿಯೊಗಳನ್ನು ಬಾಲಕಿಯ ತಾಯಿಯ ಮೊಬೈಲ್‌ನಲ್ಲೇ ಚಿತ್ರೀಕರಿಸಲಾಗಿದ್ದು ಮತ್ತು ಅದೇ ಫೋನ್‌ನಿಂದ ಅಪ್‌ಲೋಡ್ ಮಾಡಲಾಗಿದೆ ಎಂದು ಖಚಿತಪಡಿಸಿಕೊಂಡಿದ್ದಾರೆ. ಪ್ರಕರಣ ದಾಖಲಾದ ತಕ್ಷಣ ಆರೋಪಿ ಮಹಿಳೆ ಪುಣೆಯಿಂದ ಪರಾರಿಯಾಗಿದ್ದಳು. ಕಳೆದ ಮೂರು ತಿಂಗಳುಗಳಿಂದ ಪೊಲೀಸರು ಆಕೆ ಹಾಗೂ ಆಕೆಯ ಗೆಳೆಯನಿಗಾಗಿ ಸೋಲಾಪುರ, ಧಾರಾಶಿವ, ಛತ್ರಪತಿ ಸಂಭಾಜಿನಗರ ಮತ್ತು ಅಹಿಲ್ಯಾನಗರ ಜಿಲ್ಲೆಗಳಲ್ಲಿ ತೀವ್ರ ಶೋಧ ನಡೆಸುತ್ತಿದ್ದರು.
ಅಂತಿಮವಾಗಿ, ಶನಿವಾರ ಪೊಲೀಸರಿಗೆ ದೊರೆತ ಖಚಿತ ಮಾಹಿತಿಯ ಆಧಾರದ ಮೇಲೆ ಕಾರ್ಯಾಚರಣೆ ನಡೆಸಿ, ಭಾನುವಾರ ಸಂಜೆ ಖಡಕ್ವಾಸ್ಲಾ ಅಣೆಕಟ್ಟೆಯ ಬಳಿ ಕಾಣಿಸಿಕೊಂಡಿದ್ದ ಆ ಮಹಿಳೆ ಮತ್ತು ಆಕೆಯ ಪುರುಷ ಸ್ನೇಹಿತನನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಪೊಲೀಸರು ಆರೋಪಿ ಮಹಿಳೆಯ ಮೊಬೈಲ್ ಫೋನ್ ಅನ್ನು ವಶಪಡಿಸಿಕೊಂಡಿದ್ದು, ಅದನ್ನು ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ ಕಳುಹಿಸಿ ಹೆಚ್ಚಿನ ತನಿಖೆ ನಡೆಸುತ್ತಿದ್ದಾರೆ. ಈ ಘಟನೆ ಆನ್‌ಲೈನ್ ಜಗತ್ತಿನಲ್ಲಿ ತೀವ್ರ ಆಘಾತ ಮತ್ತು ಆತಂಕವನ್ನು ಮೂಡಿಸಿದೆ.
