2025 ರಲ್ಲಿ ಜಾಗತಿಕ ಮಟ್ಟದಲ್ಲಿನ ಉದ್ವಿಗ್ನತೆಗಳು ತಾರಕಕ್ಕೇರಿವೆ. ಇದರ ಪರಿಣಾಮವಾಗಿ, ನ್ಯೂಸ್‌ವೀಕ್ ಬಿಡುಗಡೆ ಮಾಡಿದ ಹೊಸ ನಕ್ಷೆಯು, ವರ್ಲ್ಡ್ ಪಾಪ್ಯುಲೇಷನ್ ರಿವ್ಯೂ ನಡೆಸಿದ ಸಂಶೋಧನೆಯ ಆಧಾರದ ಮೇಲೆ, ಜಗತ್ತು ಅತಿ ಹೆಚ್ಚು ದ್ವೇಷಿಸುವ ಹತ್ತು ರಾಷ್ಟ್ರಗಳನ್ನು ಬಹಿರಂಗಪಡಿಸಿದೆ. ಈ ಶ್ರೇಯಾಂಕಗಳನ್ನು ಅಂತರರಾಷ್ಟ್ರೀಯ ವರದಿಗಳು ಮತ್ತು ಸಾರ್ವಜನಿಕ ಅಭಿಪ್ರಾಯ ಸಮೀಕ್ಷೆಗಳ ಮಿಶ್ರಣದಿಂದ ಪಡೆಯಲಾಗಿದೆ. ಇದು ಆಯಾ ದೇಶಗಳ ಸರ್ಕಾರಗಳು, ನೀತಿಗಳು ಮತ್ತು ಜಾಗತಿಕ ವರ್ತನೆಯ ಬಗ್ಗೆ ಹೆಚ್ಚುತ್ತಿರುವ ಅಸಮಾಧಾನವನ್ನು ಎತ್ತಿ ತೋರಿಸುತ್ತದೆ.
ಈ ಪಟ್ಟಿಯಲ್ಲಿ ಚೀನಾ ಮೊದಲ ಸ್ಥಾನದಲ್ಲಿದೆ. ಅದರ ಸರ್ವಾಧಿಕಾರಿ ಆಡಳಿತ, ಕಾರ್ಖಾನೆಗಳ ಬಳಕೆ, ವ್ಯಾಪಕವಾದ ಸೆನ್ಸಾರ್‌ಶಿಪ್ ಮತ್ತು ಜಾಗತಿಕ ಮಾಲಿನ್ಯದಲ್ಲಿನ ಪಾತ್ರದ ಬಗ್ಗೆ ವ್ಯಾಪಕ ಟೀಕೆಗಳನ್ನು ಅದು ಎದುರಿಸುತ್ತಿದೆ. ಹಾಂಗ್ ಕಾಂಗ್, ತೈವಾನ್ ಮತ್ತು ಮಕಾವುಗಳಿಗೆ ಸ್ವಾತಂತ್ರ್ಯ ನೀಡಲು ನಿರಾಕರಿಸುತ್ತಿರುವುದು ಹಾಗೂ ಉಯಿಘರ್ ಮುಸ್ಲಿಂ ಜನಸಂಖ್ಯೆಯ ಮೇಲಿನ ಅದರ ದೌರ್ಜನ್ಯವು ಜಾಗತಿಕ ಅವಿಶ್ವಾಸವನ್ನು ಮತ್ತಷ್ಟು ಹೆಚ್ಚಿಸಿದೆ.
ಅಚ್ಚರಿಯೆಂಬಂತೆ ಅಮೆರಿಕ ಸಂಯುಕ್ತ ಸಂಸ್ಥಾನವು ಎರಡನೇ ಸ್ಥಾನದಲ್ಲಿದೆ. ಅಂತರರಾಷ್ಟ್ರೀಯ ವ್ಯವಹಾರಗಳಲ್ಲಿ ಅದರ ಅತಿಯಾದ ಹಸ್ತಕ್ಷೇಪ, ಜಾಗತಿಕ ಸಂಘರ್ಷಗಳಲ್ಲಿ ತನ್ನದೇ ಆದ ಅಜೆಂಡಾವನ್ನು ತಳ್ಳುವುದು ಟೀಕೆಗೆ ಗುರಿಯಾಗಿದೆ. ಅದರ ಕಹಿ ಸಂಸ್ಕೃತಿಯ ಯುದ್ಧಗಳು, ಬಂದೂಕು ಮತ್ತು ಜಂಕ್ ಫುಡ್ ಮೇಲಿನ ಗೀಳು ಮತ್ತು ಅಹಂಕಾರದ ವರ್ತನೆಗಳು ಅದರ ಜಾಗತಿಕ ಚಿತ್ರಣವನ್ನು ಹದಗೆಡಿಸಿವೆ.
ಉಕ್ರೇನ್‌ನಲ್ಲಿನ ನಿರಂತರ ಯುದ್ಧ ಮತ್ತು ಪ್ರಜಾಪ್ರಭುತ್ವದ ಸ್ವಾತಂತ್ರ್ಯದ ಮೇಲಿನ ನಿರ್ಬಂಧಗಳಿಂದಾಗಿ ರಷ್ಯಾ ಈ ಪಟ್ಟಿಯಲ್ಲಿ ಸ್ಥಾನ ಪಡೆದಿದೆ. ಸರ್ಕಾರದ ಆಕ್ರಮಣಕಾರಿ ವಿದೇಶಾಂಗ ನೀತಿ ಮತ್ತು ನಾಗರಿಕರ ಮೂಲಭೂತ ಹಕ್ಕುಗಳ ಕೊರತೆಯು ಜಾಗತಿಕ ಟೀಕೆಗೆ ಗುರಿಯಾಗಿದೆ.
ಉತ್ತರ ಕೊರಿಯಾವು ಕಟ್ಟುನಿಟ್ಟಾದ ಸರ್ವಾಧಿಕಾರಿ ಆಡಳಿತ, ಕಠಿಣ ಶಿಕ್ಷೆಗಳು ಮತ್ತು ಪ್ರತ್ಯೇಕವಾದ, ಮಿಲಿಟರೀಕೃತ ನಿಲುವಿನಿಂದಾಗಿ ಜಗತ್ತಿನಾದ್ಯಂತ ಭಯ ಮತ್ತು ತಿರಸ್ಕಾರವನ್ನು ಹುಟ್ಟುಹಾಕುತ್ತಿದೆ.
ಪ್ಯಾಲೆಸ್ತೀನ್‌ನೊಂದಿಗಿನ ದೀರ್ಘಕಾಲದ ಸಂಘರ್ಷ ಮತ್ತು ವಿವಾದಾತ್ಮಕ ಮಿಲಿಟರಿ ಕಾರ್ಯಾಚರಣೆಗಳು ಇಸ್ರೇಲ್ ಅನ್ನು ತಪ್ಪು ಕಾರಣಗಳಿಗಾಗಿ ಗಮನದಲ್ಲಿರಿಸಿವೆ. ಇದು ಹಲವಾರು ರಾಷ್ಟ್ರಗಳು ಮತ್ತು ಅಂತರರಾಷ್ಟ್ರೀಯ ಸಂಸ್ಥೆಗಳಿಂದ ಪ್ರತಿಭಟನೆಗಳು ಮತ್ತು ವಿರೋಧಕ್ಕೆ ಕಾರಣವಾಗಿದೆ.
ಆಂತರಿಕ ಅಸ್ಥಿರತೆ, ಧಾರ್ಮಿಕ ಉಗ್ರವಾದ ಮತ್ತು ಭಾರತ ಹಾಗೂ ಅಫ್ಘಾನಿಸ್ತಾನದೊಂದಿಗಿನ ಉದ್ವಿಗ್ನ ಅಂತರರಾಷ್ಟ್ರೀಯ ಸಂಬಂಧಗಳು ಪಾಕಿಸ್ತಾನದ ಈ ಪಟ್ಟಿಯಲ್ಲಿನ ಸ್ಥಾನಕ್ಕೆ ಕಾರಣವಾಗಿವೆ.
ಇರಾನ್‌ನ ಪಾಶ್ಚಿಮಾತ್ಯ ರಾಷ್ಟ್ರಗಳೊಂದಿಗಿನ ಕಲುಷಿತ ಸಂಬಂಧಗಳು, ನಾಗರಿಕ ಸ್ವಾತಂತ್ರ್ಯಗಳ ಮೇಲಿನ ದಮನ ಮತ್ತು ಮಧ್ಯಪ್ರಾಚ್ಯದಲ್ಲಿನ ಪ್ರಾಕ್ಸಿ ಯುದ್ಧಗಳಲ್ಲಿನ ಅದರ ಪಾತ್ರವು ಜಾಗತಿಕ ಮಟ್ಟದಲ್ಲಿ ತೀವ್ರ ಪರಿಶೀಲನೆಗೆ ಒಳಪಡಿಸಿದೆ.
ವರ್ಷಗಳ ಪುನರ್ನಿರ್ಮಾಣದ ಹೊರತಾಗಿಯೂ, ಇರಾಕ್ ಇನ್ನೂ ಹಿಂಸಾಚಾರ, ಅಸ್ಥಿರತೆ ಮತ್ತು ಆಂತರಿಕ ಸಂಘರ್ಷದೊಂದಿಗೆ ಸಂಬಂಧ ಹೊಂದಿದೆ. ಇದು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಅದರ ನೋಟವನ್ನು ರೂಪಿಸಿದೆ.
ವರ್ಷಗಳ ಕಾಲದ ಕ್ರೂರ ಅಂತರ್ಯುದ್ಧ, ಸರ್ಕಾರದ ದಮನ ಮತ್ತು ಮಾನವೀಯ ಬಿಕ್ಕಟ್ಟು ಸಿರಿಯಾವನ್ನು ವಿಶ್ವದ ಕೆಟ್ಟ ಖ್ಯಾತಿಯ ರಾಷ್ಟ್ರಗಳಲ್ಲಿ ಒಂದಾಗಿಸಿದೆ.
ಪಟ್ಟಿಯ ಕೊನೆಯಲ್ಲಿ ಭಾರತವಿದೆ. ಹೆಚ್ಚುತ್ತಿರುವ ಧಾರ್ಮಿಕ ಉದ್ವಿಗ್ನತೆಗಳು, ಅಲ್ಪಸಂಖ್ಯಾತರ ಮೇಲಿನ ದೌರ್ಜನ್ಯ ಮತ್ತು ಅಂತರ್ಜಾಲ ಸೆನ್ಸಾರ್‌ಶಿಪ್‌ನಿಂದಾಗಿ ಅದರ ಜಾಗತಿಕ ಪ್ರತಿಷ್ಟೆಗೆ ಧಕ್ಕೆಯಾಗಿದೆ. ನಡೆಯುತ್ತಿರುವ ಗಡಿ ವಿವಾದಗಳು ಮತ್ತು ದೇಶೀಯ ಅಶಾಂತಿ ಇದಕ್ಕೆ ಮತ್ತಷ್ಟು ಇಂಬು ನೀಡಿವೆ.
ಈ ಶ್ರೇಯಾಂಕಗಳು ಕೇವಲ ಸರ್ಕಾರದ ನೀತಿಗಳನ್ನು ಮಾತ್ರ ಪ್ರತಿಬಿಂಬಿಸುವುದಿಲ್ಲ. ಒಂದು ದೇಶದ ಜಾಗತಿಕ ಚಿತ್ರಣವು ಅದರ ಕ್ರಮಗಳು, ಮೌಲ್ಯಗಳು ಮತ್ತು ಸಂಘರ್ಷಗಳನ್ನು ನಿಭಾಯಿಸುವ ವಿಧಾನದಿಂದ ರೂಪುಗೊಳ್ಳುತ್ತದೆ ಎಂದು ವರ್ಲ್ಡ್ ಪಾಪ್ಯುಲೇಷನ್ ರಿವ್ಯೂ ಹೇಳಿದೆ. ದ್ವೇಷವು ಎಂದಿಗೂ ಕೇವಲ ಒಂದು ವಿಷಯಕ್ಕೆ ಸೀಮಿತವಾಗಿರುವುದಿಲ್ಲ. ಒಂದು ದೇಶದ ಖ್ಯಾತಿಯು ಅದರ ಮಿಲಿಟರಿ ಕ್ರಮಗಳಿಂದ ಹಿಡಿದು ಅದರ ಪಾಪ್ ಸಂಸ್ಕೃತಿಯವರೆಗೆ ಮತ್ತು ಅದರ ಪ್ರವಾಸಿಗರು ವಿದೇಶದಲ್ಲಿ ಹೇಗೆ ವರ್ತಿಸುತ್ತಾರೆ ಎಂಬುದರವರೆಗೂ ಎಲ್ಲದರಿಂದಲೂ ಪ್ರಭಾವಿತವಾಗಿರುತ್ತದೆ. ಜಗತ್ತು ಹೆಚ್ಚು ಅಂತರ್ಸಂಪರ್ಕಿತವಾದಂತೆ, ಜಾಗತಿಕ ತೀರ್ಪು ಕೂಡಾ ಹೆಚ್ಚು ತೀವ್ರವಾಗುತ್ತದೆ.
Loading ...
