2021 ರ ಸಬ್-ಇನ್ಸ್‌ಪೆಕ್ಟರ್ ನೇಮಕಾತಿ ಪರೀಕ್ಷೆಯಲ್ಲಿನ ಪೇಪರ್ ಲೀಕ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ರಾಜಸ್ಥಾನದ ವಿಶೇಷ ಕಾರ್ಯಾಚರಣೆ ಗುಂಪು (SOG) ತರಬೇತಿ ನಿರತ ಸಬ್-ಇನ್ಸ್‌ಪೆಕ್ಟರ್ ಮೋನಿಕಾ ಜಾಟ್ ಅವರನ್ನು ಬಂಧಿಸಿದೆ. 25 ವರ್ಷದ ಮೋನಿಕಾ ಜಾಟ್, ಜುಂಜುನು ಜಿಲ್ಲೆಯ ನವಲ್ಗಢದ ನಿವಾಸಿಯಾಗಿದ್ದಾರೆ. ಬ್ಲೂಟೂತ್ ಸಾಧನವನ್ನು ಬಳಸಿ ಮೋಸ ಮಾಡುವ ಮೂಲಕ ಮೋನಿಕಾ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿದ್ದರು.
SOG ಮತ್ತು ATS ನ ಹೆಚ್ಚುವರಿ ನಿರ್ದೇಶಕ ಜನರಲ್ ವಿಜಯ್ ಕುಮಾರ್ ಸಿಂಗ್, 2021 ರಲ್ಲಿ ನೇಮಕಗೊಂಡ ಮೋನಿಕಾ ಜಾಟ್ ಜುಂಜುನು ಪೊಲೀಸ್ ಲೈನ್ಸ್‌ನಲ್ಲಿ ತರಬೇತಿ ನಿರತ ಸಬ್-ಇನ್ಸ್‌ಪೆಕ್ಟರ್ ಆಗಿ ಸೇವೆ ಸಲ್ಲಿಸುತ್ತಿದ್ದರು. ಅವರನ್ನು ಮಂಗಳವಾರ, ಮಾರ್ಚ್ 18 ರಂದು ಬಂಧಿಸಲಾಗಿದೆ ಎಂದು ತಿಳಿಸಿದ್ದಾರೆ.
ಪರೀಕ್ಷಾ ಪತ್ರಿಕೆ ಪಡೆಯಲು 15 ಲಕ್ಷ ರೂ. ಪಾವತಿ
ಪರೀಕ್ಷೆಗೆ ಮೊದಲು ಬ್ಲೂಟೂತ್ ಮೂಲಕ ಪರೀಕ್ಷಾ ಪತ್ರಿಕೆ ಪಡೆಯಲು ಮೋನಿಕಾ ಅವರು ಮೋಸದ ಜಾಲದ ಕಿಂಗ್ ಪಿನ್ ಪೌರವ್ ಕಲಾರ್ ಅವರೊಂದಿಗೆ 15 ಲಕ್ಷ ರೂಪಾಯಿಗಳಿಗೆ ಒಪ್ಪಂದ ಮಾಡಿಕೊಂಡಿದ್ದರು ಎನ್ನಲಾಗಿದೆ. ಮೋನಿಕಾ ಅವರ ಸಬ್-ಇನ್ಸ್‌ಪೆಕ್ಟರ್ ಪರೀಕ್ಷೆ 2021 ರ ಸೆಪ್ಟೆಂಬರ್ 15 ರಂದು ಅಜ್ಮೀರ್‌ನಲ್ಲಿ ನಡೆದಿತ್ತು. ಪೌರವ್ ಕಲಾರ್ ಮೋನಿಕಾಗೆ ಲಿಖಿತ ಪರೀಕ್ಷೆಯ ಎರಡೂ ಭಾಗಗಳ ಪ್ರಶ್ನೆಪತ್ರಿಕೆಯನ್ನು ಒದಗಿಸಿದ್ದರು.
ಮೋಸದಿಂದ ಪಡೆದ ಅಂಕಗಳಿಂದ ಮೋನಿಕಾ ಉದ್ಯೋಗ ಪಡೆದರು
ಪರೀಕ್ಷೆಯಲ್ಲಿ ಮೋಸ ಮಾಡಿದ್ದಾರೆ ಎನ್ನಲಾದ ಮೋನಿಕಾ ಹಿಂದಿಯಲ್ಲಿ 200 ಕ್ಕೆ 184 ಮತ್ತು ಸಾಮಾನ್ಯ ಜ್ಞಾನದಲ್ಲಿ 200 ಕ್ಕೆ 161 ಅಂಕಗಳನ್ನು ಪಡೆದಿದ್ದರು. ಸಂದರ್ಶನದಲ್ಲಿ ಅವರು ಕೇವಲ 15 ಅಂಕಗಳನ್ನು ಪಡೆದಿದ್ದರು. ಆದರೆ ಲಿಖಿತ ಪರೀಕ್ಷೆಗಳಲ್ಲಿ ಪಡೆದ ಅಂಕಗಳಿಂದಾಗಿ ಮೋನಿಕಾ ಸಬ್-ಇನ್ಸ್‌ಪೆಕ್ಟರ್ ಹುದ್ದೆಗೆ ಆಯ್ಕೆಯಾಗಿದ್ದರು.
ತನಿಖೆಯ ಸಮಯದಲ್ಲಿ SOG ಪೌರವ್ ಕಲಾರ್ ಅವರನ್ನು ಬಂಧಿಸಿದಾಗ, ಮೋನಿಕಾ ಜೈಪುರದ ರಾಜಸ್ಥಾನ ಪೊಲೀಸ್ ಅಕಾಡೆಮಿಯಿಂದ ತರಬೇತಿಯ ಮಧ್ಯದಲ್ಲಿಯೇ ತಲೆಮರೆಸಿಕೊಂಡಿದ್ದರು. ಆದಾಗ್ಯೂ, ಅವರು ಸೇರ್ಪಡೆಗಾಗಿ ಜುಂಜುನು ಪೊಲೀಸ್ ಲೈನ್ಸ್‌ಗೆ ಆಗಮಿಸಿದ್ದರು. ಅಲ್ಲಿಯೇ SOG ಮೋನಿಕಾ ಅವರನ್ನು ಬಂಧಿಸಿತು.
