ತನ್ನ ಮಗುವಿಗೆ ಅವನ ಇಷ್ಟದ ಆಹಾರವನ್ನು ಮಾತ್ರ ನೀಡಿದ್ದಕ್ಕೆ ಒಬ್ಬ ತಾಯಿ ತನ್ನ ಮಗನನ್ನು ಕುರುಡನನ್ನಾಗಿ ಮಾಡಿದ ಭಯಾನಕ ಘಟನೆ ಮಲೇಷಿಯಾದಲ್ಲಿ ನಡೆದಿದೆ. ʼಡೈಲಿ ಮೇಲ್ʼ ವರದಿಯ ಪ್ರಕಾರ, ಈ ಮಗು ತನ್ನ ಬಾಲ್ಯದಿಂದಲೂ ಚಿಕನ್ ನಗೆಟ್ಸ್, ಸಾಸೇಜ್ ಮತ್ತು ಕುಕೀಸ್ ನಂತಹ ಜಂಕ್‌ ಫುಡ್ ಮಾತ್ರ ಸೇವಿಸುತ್ತಿದ್ದರಿಂದ ಅವನಿಗೆ ಅಗತ್ಯವಾದ ಪೋಷಕಾಂಶಗಳು ಸಿಕ್ಕಿರಲಿಲ್ಲ.
ಈ ಮಗು ಎರಡನೇ ತರಗತಿಯಲ್ಲಿದ್ದಾಗ ಒಂದು ದಿನ, “ಟೀಚರ್, ನನಗೆ ಏನೂ ಕಾಣಿಸುತ್ತಿಲ್ಲ” ಎಂದು ಕೂಗಿದ್ದು, ತಕ್ಷಣ ಅವನನ್ನು ಆಸ್ಪತ್ರೆಗೆ ಕರೆದೊಯ್ಯಲಾಯಿತು. ಈ ಸಂದರ್ಭದಲ್ಲಿ ಅವನಿಗೆ ತೀವ್ರವಾದ ವಿಟಮಿನ್ ಎ ಕೊರತೆ ಇರುವುದು ಕಂಡುಬಂದಿದ್ದು, ವಿಟಮಿನ್ ಎ ಕೊರತೆಯಿಂದಾಗಿ ದೃಷ್ಟಿ ನರದ ಕೋಶಗಳು ಹಾಳಾಗುವ ಸ್ಥಿತಿಯಾದ ಆಪ್ಟಿಕ್ ಅಟ್ರೋಫಿ ಬಂದಿದೆ ಎಂದು ವೈದ್ಯರು ಹೇಳಿದ್ದಾರೆ.
ವಿಟಮಿನ್ ಎ, ರೆಟಿನಾದಲ್ಲಿ ಬೆಳಕನ್ನು ಗ್ರಹಿಸುವ ರೋಡೋಪ್ಸಿನ್ ಎಂಬ ಪ್ರೋಟೀನ್‌ನಲ್ಲಿ ಪ್ರಮುಖ ಅಂಶವಾಗಿದೆ. ಕಡಿಮೆ ಬೆಳಕಿನಲ್ಲಿ ನೋಡಲು ಇದು ಸಹಾಯ ಮಾಡುತ್ತದೆ.
ಒಬ್ಬ ಜನಪ್ರಿಯ ವೈದ್ಯರಾದ ಡಾ. ಎರ್ನಾ ನಾಡಿಯಾ ತಮ್ಮ ಫೇಸ್‌ಬುಕ್ ಪೋಸ್ಟ್‌ನಲ್ಲಿ, “ಒಬ್ಬ ತಾಯಿಯಾಗಿ…… ನಾವು ಯಾವಾಗಲೂ ಬೇಯಿಸಲು ಸಾಧ್ಯವಿಲ್ಲ ಏಕೆಂದರೆ ನಾವು ಬ್ಯುಸಿಯಾಗಿರುತ್ತೇವೆ…… ಈ ವಿದ್ಯಾರ್ಥಿಯ ಪೋಷಕರಿಗೆ ಈಗ ವಿಷಾದವಾಗುತ್ತದೆ… ಇದನ್ನು ಅವರಿಗೆ ಸ್ವೀಕರಿಸಲು ಸುಲಭವಲ್ಲ” ಎಂದು ಬರೆದಿದ್ದಾರೆ.
ಡಾ. ನಾಡಿಯಾ, ವಿಟಮಿನ್ ಎ ಕೊರತೆಯ ಲಕ್ಷಣಗಳಾದ ಒಣ ಕಣ್ಣುಗಳು, ಕಣ್ಣಿನ ಬಿಳಿಯ ಭಾಗದಲ್ಲಿ ನೆರಳು ಅಥವಾ ಬೂದು ಬಣ್ಣದ ಕಲೆಗಳು, ರಾತ್ರಿ ಅಥವಾ ಕತ್ತಲೆಯಲ್ಲಿ ನೋಡುವಲ್ಲಿ ತೊಂದರೆ ಅಥವಾ ಕಣ್ಣೀರು ಬರದಿರುವುದು ಇತ್ಯಾದಿಗಳ ಬಗ್ಗೆ ಪೋಷಕರಿಗೆ ಅರಿವು ಮೂಡಿಸಿದ್ದಾರೆ.
ವಿಟಮಿನ್ ಎ ಹೇರಳವಾಗಿರುವ ಸೊಪ್ಪು, ಕ್ಯಾರೆಟ್, ಮಾವಿನಹಣ್ಣು, ಪಪ್ಪಾಯಿ, ಅಂಜೂರ, ಮೀನು, ಕೋಳಿ, ಮೊಟ್ಟೆ ಮತ್ತು ಸಿಹಿ ಆಲೂಗಡ್ಡೆಗಳನ್ನು ಸೇವಿಸುವುದು ಮುಖ್ಯ. ಡೈಲಿ ಮೇಲ್ ವರದಿಯ ಪ್ರಕಾರ, ಅಮೆರಿಕದಲ್ಲಿ ಪ್ರತಿ 100 ಮಕ್ಕಳಲ್ಲಿ ಒಬ್ಬ ಮಗುವಿಗೆ ವಿಟಮಿನ್ ಎ ಕೊರತೆ ಇದೆ ಮತ್ತು 11 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಲ್ಲಿ 70% ರಷ್ಟು ಮಕ್ಕಳಿಗೆ ವಿಟಮಿನ್ ಡಿ ಕೊರತೆ ಇರಬಹುದು. ಅಮೆರಿಕಾದಲ್ಲಿ ಪ್ರತಿ ಐದು ಮಕ್ಕಳಲ್ಲಿ ಒಬ್ಬ ಮಗುವಿಗೆ ವಿಟಮಿನ್ ಸಿ ಸಾಕಷ್ಟು ಸಿಗುತ್ತಿಲ್ಲ.
