2021ರ ಪಶ್ಚಿಮ ಬಂಗಾಳದ ಚುನಾವಣೆಯಲ್ಲಿ ಒಟ್ಟು 5.98 ಕೋಟಿ ಜನರು ಮತ ಚಲಾಯಿಸಿದ್ದರು. ಆದರೆ ಈ ಬಾರಿ ಆ ಸಂಖ್ಯೆ 6.31 ಕೋಟಿಗೇರಿದೆ. ಅಂದರೆ ಈ ಬಾರಿ 33 ರಿಂದ 34 ಲಕ್ಷಕ್ಕೂ ಹೆಚ್ಚು ಮತದಾರರು ಮತಗಟ್ಟೆಗೆ ಬಂದಿದ್ದಾರೆ. ಈ ಹೆಚ್ಚುವರಿ ಮತಗಳು ಬಂಗಾಳದ ರಾಜಕೀಯ ಭವಿಷ್ಯವನ್ನು ಬದಲಿಸಬಲ್ಲವೇ ಎಂಬ ಚರ್ಚೆ ಈಗ ಶುರುವಾಗಿದೆ.
ವಿಶೇಷ ತೀವ್ರ ಪರಿಷ್ಕರಣೆ (SIR) ಮೂಲಕ ಲಕ್ಷಾಂತರ ‘ನಕಲಿ’ ಮತದಾರರನ್ನು ಪಟ್ಟಿಯಿಂದ ಕೈಬಿಟ್ಟಿದ್ದರೂ ಸಹ, ಮತದಾನದ ಪ್ರಮಾಣವು ಸುಮಾರು 93 ಪ್ರತಿಶತದಷ್ಟು ದಾಖಲಾಗಿದೆ.2021ರಲ್ಲಿ ತೃಣಮೂಲ ಕಾಂಗ್ರೆಸ್ (TMC), ಬಿಜೆಪಿಗಿಂತ ಸುಮಾರು 60 ಲಕ್ಷ ಹೆಚ್ಚು ಮತಗಳನ್ನು ಪಡೆದಿತ್ತು. ಈಗ ಬಂದಿರುವ ಈ ಹೆಚ್ಚುವರಿ 34 ಲಕ್ಷ ಮತಗಳು ಯಾರ ಪಾಲಾಗಲಿವೆ ಎಂಬುದು ಫಲಿತಾಂಶವನ್ನು ತಲೆಕೆಳಗು ಮಾಡಬಲ್ಲದು.
ಬಿಜೆಪಿ ಮತ್ತು ಟಿಎಂಸಿ ನಡುವಿನ ಸಮರ
ಈ ಹೆಚ್ಚುವರಿ ಮತಗಳ ಬಗ್ಗೆ ಉಭಯ ಪಕ್ಷಗಳು ತಮ್ಮದೇ ಆದ ವಾದಗಳನ್ನು ಮುಂದಿಡುತ್ತಿವೆ:
ಬಿಜೆಪಿ ವಾದ:
ಈ 34 ಲಕ್ಷ ಹೆಚ್ಚುವರಿ ಮತದಾರರು ನಮ್ಮವರೇ ಎಂದು ಬಿಜೆಪಿ ನಂಬಿದೆ.ಸುಮಾರು 2.5 ಲಕ್ಷ ಕೇಂದ್ರ ಭದ್ರತಾ ಪಡೆಗಳ ನಿಯೋಜನೆಯಿಂದಾಗಿ ಜನರಲ್ಲಿದ್ದ “ಭಯದ ವಾತಾವರಣ” ದೂರವಾಗಿದೆ. ಇದರಿಂದಾಗಿ ಮತದಾರರು ಧೈರ್ಯದಿಂದ ಹೊರಬಂದು ಮತ ಚಲಾಯಿಸಿದ್ದಾರೆ.
ಹೆಚ್ಚಿನ ಮತದಾನವು “ಬದಲಾವಣೆಗಾಗಿ ಮತ” (Vote for Change) ಮತ್ತು ಆಡಳಿತ ವಿರೋಧಿ ಅಲೆಯ ಸಂಕೇತ ಎಂದು ಬಿಜೆಪಿ ಭಾವಿಸಿದೆ. ಅಲ್ಲದೆ, ನಗರ ಪ್ರದೇಶಗಳ ವಸತಿ ಸಂಕೀರ್ಣಗಳಲ್ಲೇ ಮತಗಟ್ಟೆಗಳನ್ನು ಸ್ಥಾಪಿಸಿದ್ದು ತಮಗೆ ಲಾಭವಾಗಲಿದೆ ಎಂದು ಅದು ಹೇಳುತ್ತಿದೆ.
ಟಿಎಂಸಿ ವಾದ:
ಟಿಎಂಸಿ ಪ್ರಕಾರ, ಇದು ಕೇಂದ್ರ ಸರ್ಕಾರದ ‘SIR’ ಕ್ರಮದ ವಿರುದ್ಧದ “ಪ್ರತಿಭಟನಾ ಮತ” (Protest Vote).“SIR ಮೂಲಕ ಭವಿಷ್ಯದಲ್ಲಿ ತಮ್ಮ ಮತದಾನದ ಹಕ್ಕನ್ನು ಕಳೆದುಕೊಳ್ಳಬಹುದು ಎಂಬ ಭೀತಿಯಿಂದ ನಮ್ಮ ಬೆಂಬಲಿಗರೆಲ್ಲರೂ ಒಗ್ಗಟ್ಟಾಗಿ ಹೊರಬಂದು ಮತ ಚಲಾಯಿಸಿದ್ದಾರೆ” ಎಂದು ಟಿಎಂಸಿ ನಾಯಕರು ಹೇಳುತ್ತಿದ್ದಾರೆ.ಹಾಗಾಗಿ, ಹೆಚ್ಚಿನ ಮತದಾನವು ಆಡಳಿತ ಪಕ್ಷಕ್ಕೆ ಯಾವುದೇ ಆತಂಕ ತಂದಿಲ್ಲ, ಬದಲಾಗಿ ಇದು ತಮ್ಮ ಪರವಾಗಿರುವ ಮತಗಳ ಧ್ರುವೀಕರಣ ಎಂದು ಟಿಎಂಸಿ ಪ್ರತಿಪಾದಿಸುತ್ತಿದೆ.
