ಉತ್ತರ ಪ್ರದೇಶದ ಹಾಪೂರ್‌ನ ಬಿಜೆಪಿ ಶಾಸಕ ವಿಜಯ್ ಪಾಲ್, ಪದೇ ಪದೇ ಚಹಾ ತರುವಂತೆ ಕೇಳಿದ್ದಕ್ಕೆ ನಿರಾಕರಿಸಿದ 58 ವರ್ಷದ ಸಹಾಯಕ ಅಭಿವೃದ್ಧಿ ಅಧಿಕಾರಿ (ಎಡಿಒ) ಬಿಷನ್ ಸಕ್ಸೇನಾಗೆ ವರ್ಗಾವಣೆ ಶಿಕ್ಷೆ ನೀಡಲಾಗಿದೆ. ಅಷ್ಟೇ ಅಲ್ಲ, ಅವರ ಅಮಾನತು ಪ್ರಕ್ರಿಯೆಯೂ ನಡೆಯುತ್ತಿದೆ.
ಕ್ಯಾನ್ಸರ್‌ನಿಂದ ಬಳಲುತ್ತಿರುವ ಬಿಷನ್ ಸಕ್ಸೇನಾ, “ಸ್ವಲ್ಪ ಹೊತ್ತಿನ ಹಿಂದೆಯಷ್ಟೇ ಚಹಾ ಕೊಟ್ಟಿದ್ದೇನೆ. ಮತ್ತೆ ಮತ್ತೆ ತರಲು ನಾನು ಶಾಸಕರ ಅಧೀನನಲ್ಲ. ರಾಷ್ಟ್ರಪತಿ, ಪ್ರಧಾನ ಮಂತ್ರಿಗೂ ಇಷ್ಟು ಬಾರಿ ಚಹಾ ಕೊಡುವುದಿಲ್ಲ” ಎಂದು ಹೇಳಿದ್ದಾರೆ ಎನ್ನಲಾಗಿದೆ. ಇದರಿಂದ ಕೋಪಗೊಂಡ ಶಾಸಕ ವಿಜಯ್ ಪಾಲ್, ಜಿಲ್ಲಾಧಿಕಾರಿ ಪ್ರೇರಣಾ ಶರ್ಮಾ ಅವರಿಗೆ ದೂರು ನೀಡಿದ್ದಾರೆ.
ಇದರ ಬೆನ್ನಲ್ಲೇ, ಎಡಿಒ ಬಿಷನ್ ಸಕ್ಸೇನಾರನ್ನು ಮುಖ್ಯ ಕಚೇರಿಗೆ ವರ್ಗಾಯಿಸಲಾಗಿದ್ದು, ಅಮಾನತು ಪ್ರಕ್ರಿಯೆ ಆರಂಭವಾಗಿದೆ. ಹಾಪೂರ್‌ನ ಮುಖ್ಯ ಅಭಿವೃದ್ಧಿ ಅಧಿಕಾರಿ (ಸಿಡಿಒ) ಹಿಮಾಂಶು ಗೌತಮ್ ಅವರ ಮೇಲ್ವಿಚಾರಣೆಯಲ್ಲಿ ಇಲಾಖಾ ತನಿಖೆಯನ್ನೂ ನಡೆಸಲಾಗುತ್ತಿದೆ.
“ಶಾಸಕರು ಲಿಖಿತ ದೂರು ನೀಡಿದ್ದಾರೆ. ಸಕ್ಸೇನಾರನ್ನು ವಿಕಾಸ್ ಭವನಕ್ಕೆ ಲಗತ್ತಿಸಲಾಗಿದೆ. ಅವರಿಗೆ ಶೋಕಾಸ್ ನೋಟಿಸ್ ನೀಡಲಾಗಿದೆ. ಮುಂದಿನ ಕ್ರಮಕ್ಕಾಗಿ ವರದಿಯನ್ನು ಸರ್ಕಾರಕ್ಕೆ ಕಳುಹಿಸಲಾಗುವುದು” ಎಂದು ಸಿಡಿಒ ಗೌತಮ್ ಹೇಳಿದ್ದಾರೆ.
“ವಯಸ್ಸಿನಲ್ಲಿ ಹಿರಿಯನಾಗಿರುವುದರಿಂದ ಚಹಾ ತರಲು ನಿರೀಕ್ಷಿಸಬಾರದು ಎಂದು ಸಕ್ಸೇನಾ ತಿರುಗೇಟು ನೀಡಿದ್ದಾರೆ. ಅವರು ಕ್ಯಾನ್ಸರ್‌ನಿಂದ ಬಳಲುತ್ತಿದ್ದಾರೆ ಮತ್ತು ಜೀವ ಉಳಿಸುವ ಔಷಧಗಳನ್ನು ತೆಗೆದುಕೊಳ್ಳುತ್ತಿದ್ದಾರೆ… ಅವರು ಉದ್ವೇಗಕ್ಕೆ ಒಳಗಾಗುತ್ತಾರೆ ಎಂದು ಅವರ ಸಹೋದ್ಯೋಗಿಗಳು ವರದಿ ಮಾಡಿದ್ದಾರೆ, ಆದರೆ ಅಂತಹ ನಡವಳಿಕೆಯನ್ನು ಕೆಲಸದ ಸ್ಥಳದಲ್ಲಿ ಸಹಿಸಲು ಸಾಧ್ಯವಿಲ್ಲ” ಎಂದು ಗೌತಮ್ ಹೇಳಿದ್ದಾರೆ.
ಈ ಘಟನೆ, ಜನಪ್ರತಿನಿಧಿಗಳು ಮತ್ತು ಸರ್ಕಾರಿ ನೌಕರರ ನಡುವಿನ ಅಧಿಕಾರದ ಅಸಮತೋಲನ, ಕೆಲಸದ ಸ್ಥಳದಲ್ಲಿನ ನಡವಳಿಕೆ ಮತ್ತು ಮಾನವೀಯ ಕಾಳಜಿಗಳ ಬಗ್ಗೆ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.
Loading ...
