ಬ್ರಿಟನ್‌ನಲ್ಲಿ ಶಿಕ್ಷಕಿಯೊಬ್ಬರು ಸುಮಾರು 25 ವರ್ಷಗಳ ಹಿಂದೆ ವಿದ್ಯಾರ್ಥಿಯೊಂದಿಗೆ ಲೈಂಗಿಕ ಸಂಬಂಧ ಹೊಂದಿದ್ದರು ಎಂದು ಒಪ್ಪಿಕೊಂಡ ನಂತರ ಅವರಿಗೆ ಜೀವಿತಾವಧಿ ಬೋಧನಾ ನಿಷೇಧ ಹೇರಲಾಗಿದೆ ಎಂದು ಬಿಬಿಸಿ ವರದಿ ಮಾಡಿದೆ. ಈ ಪ್ರಕರಣವು ಶಿಕ್ಷಕರ ನಂಬಿಕೆಯ ಸ್ಥಾನದ ದುರುಪಯೋಗದ ಗಂಭೀರತೆಯನ್ನು ಎತ್ತಿ ಹಿಡಿದಿದೆ.
ಪ್ರಸ್ತುತ 55 ವರ್ಷದ ಹೆಲೆನ್ ಫ್ಲಿಂಡರ್ಸ್, 2000ನೇ ಇಸವಿಯಲ್ಲಿ ಸ್ವಿಂಡನ್‌ನ ಸೇಂಟ್ ಜೋಸೆಫ್ ಶಾಲೆಯಲ್ಲಿ ಕೆಲಸ ಮಾಡುತ್ತಿದ್ದಾಗ ಈ ಸಂಬಂಧ ಪ್ರಾರಂಭವಾಗಿತ್ತು. ಶಾಲೆಯ ಕ್ರೀಡಾ ದಿನದ ನಂತರ ಇನ್ನೊಬ್ಬ ಶಿಕ್ಷಕರ ಮನೆಯಲ್ಲಿ ಫ್ಲಿಂಡರ್ಸ್ ವಿದ್ಯಾರ್ಥಿಗೆ ಮುತ್ತು ನೀಡಿದ ನಂತರ ಇದು ಶುರುವಾಯಿತು. ನ್ಯಾಯಾಲಯದ ದಾಖಲೆಗಳ ಪ್ರಕಾರ, ಆ ನಂತರ ಸುಮಾರು ಆರು ತಿಂಗಳ ಕಾಲ ನಿಯಮಿತವಾಗಿ ಲೈಂಗಿಕ ಸಂಪರ್ಕವನ್ನು ಹೊಂದಿದ್ದರು.
‘ಸ್ಟೂಡೆಂಟ್ ಎ’ ಎಂದು ಹೆಸರಿಸಲಾದ ಈ ವಿದ್ಯಾರ್ಥಿ, ಆ ಸಮಯದಲ್ಲಿ ತಮ್ಮ ಪೋಷಕರು ಹಗಲಿನಲ್ಲಿ ಕೆಲಸದಲ್ಲಿ ಇರುತ್ತಿದ್ದರು ಮತ್ತು ಈ ಘಟನೆಗಳ ಬಗ್ಗೆ ಅವರಿಗೆ ತಿಳಿದಿರಲಿಲ್ಲ ಎಂದು ಹೇಳಿದ್ದಾರೆ. ಈ ಸಂಬಂಧವು ಡಿಸೆಂಬರ್ 2000ದಲ್ಲಿ ಕೊನೆಗೊಂಡಿತು.
ನ್ಯಾಯಾಲಯದ ದಾಖಲೆಗಳು, “ಮಿ ಸಿಸ್ ಫ್ಲಿಂಡರ್ಸ್ ವಿದ್ಯಾರ್ಥಿ ಎ ಅವರೊಂದಿಗೆ ಲೈಂಗಿಕ ಸಂಪರ್ಕ ಹೊಂದಲು ಅವರ ಪೋಷಕರ ಮನೆಗೆ ಹೋಗಿದ್ದರು ಎಂಬುದನ್ನು ಒಪ್ಪಿಕೊಂಡಿದ್ದಾರೆ. ಲೈಂಗಿಕ ಸಂಬಂಧವು ಯೋಜಿತವಾಗಿತ್ತು ಮತ್ತು ಸುಮಾರು ಆರು ತಿಂಗಳ ಕಾಲ ಮುಂದುವರೆಯಿತು. ಫ್ಲಿಂಡರ್ಸ್ ಅವರ ನಡವಳಿಕೆಯು ಶಿಕ್ಷಕ-ವಿದ್ಯಾರ್ಥಿ ಸಂಬಂಧದ ಎಲ್ಲೆ ಮೀರಿ, ನಂಬಿಕೆಯ ಸ್ಥಾನವನ್ನು ದುರುಪಯೋಗಪಡಿಸಿಕೊಂಡಿದೆ ಮತ್ತು ವಿದ್ಯಾರ್ಥಿಯ ಸುರಕ್ಷತೆ ಹಾಗೂ ಯೋಗಕ್ಷೇಮವನ್ನು ಕಾಪಾಡುವಲ್ಲಿ ವಿಫಲವಾಗಿದೆ” ಎಂದು ಉಲ್ಲೇಖಿಸಿವೆ.
ದಶಕಗಳ ನಂತರ ಬೆಳಕಿಗೆ ಬಂದ ಸತ್ಯ !
ಫ್ಲಿಂಡರ್ಸ್ 2002ರಲ್ಲಿ ಸೇಂಟ್ ಜೋಸೆಫ್ ಶಾಲೆಯನ್ನು ತೊರೆದು ನಂತರ ಚರ್ಚ್‌ಫೀಲ್ಡ್ಸ್ ಶಾಲೆಯಲ್ಲಿ ಕಲಾ ಶಿಕ್ಷಕಿಯಾಗಿ ಸೇರಿಕೊಂಡಿದ್ದರು. ಈ ಸಂಬಂಧವು ಮೊದಲು 2011ರಲ್ಲಿ ಬೆಳಕಿಗೆ ಬಂದಿತು, ಆಗ ಮಾಜಿ ವಿದ್ಯಾರ್ಥಿ ಚರ್ಚ್‌ಫೀಲ್ಡ್ಸ್‌ಗೆ ಸಂಬಂಧಿಸಿದ ವ್ಯಕ್ತಿಯೊಬ್ಬರಿಗೆ ಈ ವದಂತಿಗಳನ್ನು ಖಚಿತಪಡಿಸಿದರು. ಪೊಲೀಸರು ತನಿಖೆ ನಡೆಸಿದರೂ, ಆ ಸಮಯದಲ್ಲಿ 18 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ವಿದ್ಯಾರ್ಥಿಗಳೊಂದಿಗೆ ಲೈಂಗಿಕ ಸಂಪರ್ಕ ಹೊಂದುವುದು ಅಪರಾಧವೆಂದು ಪರಿಗಣಿಸುವ ಕಾನೂನು ಜಾರಿಗೆ ಬಂದಿರಲಿಲ್ಲವಾದ್ದರಿಂದ ಯಾವುದೇ ಆರೋಪಗಳನ್ನು ದಾಖಲಿಸಲಿಲ್ಲ. ಆ ಕಾನೂನು 2001ರ ಜನವರಿಯಲ್ಲಿ ಮಾತ್ರ ಜಾರಿಗೆ ಬಂದಿತು, ಅಷ್ಟರೊಳಗೆ ಈ ಸಂಬಂಧ ಕೊನೆಗೊಂಡಿತ್ತು.
ಸಂಬಂಧ ಬಯಲಾದ ನಂತರ ಫ್ಲಿಂಡರ್ಸ್ ತಕ್ಷಣವೇ ಚರ್ಚ್‌ಫೀಲ್ಡ್ಸ್‌ನಲ್ಲಿ ತಮ್ಮ ಕೆಲಸವನ್ನು ತೊರೆದರು ಮತ್ತು ಮತ್ತೆ ಎಂದಿಗೂ ಬೋಧನೆಗೆ ಮರಳಲಿಲ್ಲ. ಈ ಪ್ರಕರಣವನ್ನು 2022ರಲ್ಲಿ ʼಟೀಚಿಂಗ್ ರೆಗ್ಯುಲೇಶನ್ ಏಜೆನ್ಸಿ (TRA)ʼ ಗೆ ವರದಿ ಮಾಡಲಾಯಿತು. ಇತ್ತೀಚೆಗೆ ನಡೆದ ವಿಚಾರಣೆಯಲ್ಲಿ, ಫ್ಲಿಂಡರ್ಸ್ ಸಂಬಂಧವನ್ನು ಒಪ್ಪಿಕೊಂಡರು ಮತ್ತು ಅದು ಪರಸ್ಪರ ಸಮ್ಮತದಿಂದ ನಡೆದಿತ್ತು ಎಂದು ಹೇಳಿದರು. ಅವರು ಮಾಜಿ ವಿದ್ಯಾರ್ಥಿಯಲ್ಲಿ ಕ್ಷಮೆಯಾಚಿಸಿದರು, ತಮ್ಮ ಹಿಂದಿನ ಘಟನೆಗಳನ್ನು ನೆನಪಿಸಿಕೊಂಡಿದ್ದಕ್ಕಾಗಿ ಅವನಿಗೆ ಯಾವುದೇ ಹಾನಿಯಾಗದಿರಲಿ ಎಂದು ಆಶಿಸಿದರು.
ವಿದ್ಯಾರ್ಥಿಗೆ ಶಿಕ್ಷಕಿ ಬಗ್ಗೆ ಯಾವುದೇ ದ್ವೇಷವಿಲ್ಲ!
ಮಾಜಿ ವಿದ್ಯಾರ್ಥಿ ಕೂಡ ವಿಚಾರಣೆಯಲ್ಲಿ ಮಾತನಾಡಿ, ತನಗೆ ಯಾವುದೇ ರೀತಿಯಲ್ಲಿ ದುರುಪಯೋಗಪಡಿಸಿಕೊಳ್ಳಲಾಗಿದೆ ಎಂದು ಅನಿಸಿಲ್ಲ ಮತ್ತು ಫ್ಲಿಂಡರ್ಸ್ ಬಗ್ಗೆ ಯಾವುದೇ ಕೆಟ್ಟ ಭಾವನೆಗಳಿಲ್ಲ ಎಂದು ಹೇಳಿದರು. ಆದರೂ, TRA ಸಮಿತಿಯು, ಫ್ಲಿಂಡರ್ಸ್ ವಿದ್ಯಾರ್ಥಿಯೊಂದಿಗೆ ಸಂಬಂಧದಲ್ಲಿ ತೊಡಗಿಸಿಕೊಂಡು ಗಂಭೀರವಾದ ಗೆರೆಯನ್ನು ದಾಟಿದ್ದಾರೆ ಎಂದು ಅಭಿಪ್ರಾಯಪಟ್ಟಿತು. ಅವರು ಶಿಕ್ಷಕರಿಗೆ ನಿರೀಕ್ಷಿತ ನಂಬಿಕೆಯನ್ನು ಮುರಿದು, ವಿದ್ಯಾರ್ಥಿಯನ್ನು ಸುರಕ್ಷಿತವಾಗಿಡಲು ವಿಫಲರಾಗಿದ್ದಾರೆ ಎಂದು ಸಮಿತಿ ಹೇಳಿತು. ಈ ಕಾರಣಕ್ಕಾಗಿ, ಅವರಿಗೆ ಜೀವಿತಾವಧಿ ಬೋಧನಾ ನಿಷೇಧ ವಿಧಿಸಲಾಯಿತು.
Loading ...
