ಅಮೆರಿಕದ ಮ್ಯಾಸಚೂಸೆಟ್ಸ್‌ನ ನ್ಯೂಟನ್-ವೆಲ್ಲೆಸ್ಲಿ ಆಸ್ಪತ್ರೆಯಲ್ಲಿ ಆಘಾತಕಾರಿ ಬೆಳವಣಿಗೆ ಕಂಡುಬಂದಿದೆ. ಒಂದೇ ಮಹಡಿಯಲ್ಲಿ ಕೆಲಸ ಮಾಡುತ್ತಿದ್ದ ಆರು ಮಂದಿ ಸಿಬ್ಬಂದಿ ಸದಸ್ಯರಿಗೆ ನಿಗೂಢವಾಗಿ ಮೆದುಳಿನ ಗೆಡ್ಡೆಗಳು ಕಾಣಿಸಿಕೊಂಡಿವೆ. ಈ ಪ್ರಕರಣಗಳು ಆಸ್ಪತ್ರೆಯ ಐದನೇ ಮಹಡಿಯ ಹೆರಿಗೆ ಘಟಕದಲ್ಲಿ ಕೆಲಸ ಮಾಡುವ ದಾದಿಯರಲ್ಲಿ ವರದಿಯಾಗಿವೆ.
ಸ್ಥಳೀಯ ಮಾಧ್ಯಮ ಡಬ್ಲ್ಯುಬಿಝೆಡ್ ಈ ವಿಷಯವನ್ನು ಮೊದಲು ಬೆಳಕಿಗೆ ತಂದಿದ್ದು, ಕಳೆದ ಡಿಸೆಂಬರ್‌ನಿಂದಲೇ ಆಸ್ಪತ್ರೆ ಈ ಬಗ್ಗೆ ತನಿಖೆ ನಡೆಸುತ್ತಿದೆ. ಆದರೆ, ಈ ಪ್ರಕರಣಗಳ ಹಿಂದೆ ಯಾವುದೇ “ಪರಿಸರ ಅಪಾಯ” ಇಲ್ಲ ಎಂದು ಆಸ್ಪತ್ರೆ ಸ್ಪಷ್ಟಪಡಿಸಿದೆ. ನ್ಯೂಟನ್-ವೆಲ್ಲೆಸ್ಲಿಯ ಮಾತೃ ಸಂಸ್ಥೆಯಾದ ಮ್ಯಾಸ್ ಜನರಲ್ ಬ್ರಿಘಮ್‌ನ ಔದ್ಯೋಗಿಕ ಆರೋಗ್ಯ ಮತ್ತು ಸುರಕ್ಷತಾ ಇಲಾಖೆ (ಒಹೆಚ್‌ಎಸ್) ಆರನೇ ಪ್ರಕರಣವನ್ನು ದೃಢಪಡಿಸಿದೆ.
ಐದು ದಾದಿಯರಲ್ಲಿ ಹಾನಿಕರವಲ್ಲದ ಮೆದುಳಿನ ಗೆಡ್ಡೆಗಳು ಕಾಣಿಸಿಕೊಂಡಾಗ ತನಿಖೆ ಆರಂಭಿಸಲಾಯಿತು. ಬೋಸ್ಟನ್ ಹೆರಾಲ್ಡ್ ವರದಿ ಪ್ರಕಾರ, ಒಹೆಚ್‌ಎಸ್ ಕಳುಹಿಸಿದ ಪತ್ರದಲ್ಲಿ ಈ ಆಘಾತಕಾರಿ ಮಾಹಿತಿಯನ್ನು ರೋಗಿಗಳು ಮತ್ತು ಕುಟುಂಬಗಳಿಗೆ ತಿಳಿಸಲಾಗಿದೆ. ಮ್ಯಾಸ್ ಜನರಲ್ ಬ್ರಿಘಮ್/ನ್ಯೂಟನ್-ವೆಲ್ಲೆಸ್ಲಿ ಆಸ್ಪತ್ರೆಯ ಅಧ್ಯಕ್ಷ ಎಲೆನ್ ಮೊಲೊನಿ ಅವರು, ಐದನೇ ಮಹಡಿಯಲ್ಲಿ ವಿವಿಧ ಅವಧಿಗಳಿಗೆ ಕೆಲಸ ಮಾಡಿದ ಆರು ಸಿಬ್ಬಂದಿ ಸದಸ್ಯರಲ್ಲಿ ಕ್ಯಾನ್ಸರ್ ಅಲ್ಲದ ಮೆದುಳಿನ ಗೆಡ್ಡೆಗಳು ಪತ್ತೆಯಾಗಿವೆ ಎಂದು ಖಚಿತಪಡಿಸಿದ್ದಾರೆ.
ಮ್ಯಾಸಚೂಸೆಟ್ಸ್ ನರ್ಸಸ್ ಅಸೋಸಿಯೇಷನ್ ಈ ಸಾಮೂಹಿಕ ಗೆಡ್ಡೆಗಳಿಗೆ ಕಾರಣವೇನಿರಬಹುದು ಎಂದು ಕೂಲಂಕಷವಾಗಿ ಪರಿಶೀಲಿಸುತ್ತಿದೆ. ಒಹೆಚ್‌ಎಸ್ ಸದ್ಯಕ್ಕೆ ಗೆಡ್ಡೆಗಳ ನಡುವೆ ಯಾವುದೇ ಸಾಮಾನ್ಯ ಸಂಪರ್ಕವನ್ನು ಕಂಡುಹಿಡಿಯಲಾಗಿಲ್ಲ ಎಂದು ಹೇಳಿದೆ. “ಒಹೆಚ್‌ಎಸ್ ತನಿಖೆ ನಡೆಯುತ್ತಿರುವಾಗ, ಈ ವೈದ್ಯಕೀಯ ಪರಿಸ್ಥಿತಿಗಳು ಕೆಲಸದ ವಾತಾವರಣದಿಂದ ಉಂಟಾಗಿವೆ ಎಂಬುದಕ್ಕೆ ಯಾವುದೇ ಪುರಾವೆಗಳನ್ನು ನಾವು ಕಂಡುಕೊಂಡಿಲ್ಲ” ಎಂದು ಪತ್ರದಲ್ಲಿ ತಿಳಿಸಲಾಗಿದೆ.
ಆದರೆ, ಪರಿಸರದಲ್ಲಿನ ಕ್ಯಾನ್ಸರ್ ಕಾರಕ ವಿಷಕಾರಿ ಅಂಶಗಳು ಈ ಗೆಡ್ಡೆಗಳಿಗೆ ಕಾರಣವಾಗಿರಬಹುದು ಎಂಬ ಆತಂಕವನ್ನು ತಳ್ಳಿಹಾಕುವಂತಿಲ್ಲ. ಸಾಮಾನ್ಯವಾಗಿ, ಇಂತಹ ವಿಷಕಾರಿ ಅಂಶಗಳು ಒಂದೇ ಮೂಲದಲ್ಲಿ ಸಂಗ್ರಹಗೊಂಡು ಅನೇಕ ಜನರ ಮೇಲೆ ಪರಿಣಾಮ ಬೀರಬಹುದು. ಆಸ್ಪತ್ರೆ ಅಧಿಕಾರಿಗಳು ಸಾಮಾನ್ಯ ಕಾರಣವನ್ನು ಪತ್ತೆಹಚ್ಚಲು ವಿಫಲರಾಗಿದ್ದರೂ, ಸಿಬ್ಬಂದಿ ಸದಸ್ಯರು ಬೇರೆಯದೇ ಅಭಿಪ್ರಾಯವನ್ನು ಹೊಂದಿದ್ದಾರೆ. ಈ ಗೆಡ್ಡೆಗಳು ಮಾತ್ರವಲ್ಲದೆ, ಸಿಬ್ಬಂದಿಯಲ್ಲಿ ಕಂಡುಬರುತ್ತಿರುವ ಇತರ ಕಾಯಿಲೆಗಳೂ ಸಹ ನಿಗೂಢವಾಗಿಯೇ ಉಳಿದಿವೆ ಎಂದು ಅವರು ಅನುಮಾನ ವ್ಯಕ್ತಪಡಿಸಿದ್ದಾರೆ.
ಮ್ಯಾಸಚೂಸೆಟ್ಸ್ ನರ್ಸ್ ಅಸೋಸಿಯೇಷನ್ ಹೆರಾಲ್ಡ್‌ಗೆ ತಿಳಿಸಿರುವಂತೆ, ಗೆಡ್ಡೆಗಳ ಮೂಲ ಕಾರಣವನ್ನು ಪತ್ತೆಹಚ್ಚಲು ತನಿಖೆ ಮುಂದುವರಿದಿದೆ. ಆಸ್ಪತ್ರೆಯ ತನಿಖೆಯು ಸಮಗ್ರವಾಗಿಲ್ಲ ಮತ್ತು ನ್ಯೂಟನ್-ವೆಲ್ಲೆಸ್ಲಿ ಆಸ್ಪತ್ರೆಯಲ್ಲಿ ಏನೋ ಗಂಭೀರವಾದ ತೊಂದರೆ ಇದೆ ಎಂದು ಅಸೋಸಿಯೇಷನ್ ಹೇಳಿದೆ. ಯೂನಿಯನ್ ತನ್ನ ಸಂಶೋಧನೆಗಳನ್ನು ಸಾರ್ವಜನಿಕಗೊಳಿಸಲಿದ್ದು, ತಿಂಗಳಾಂತ್ಯದವರೆಗೆ ಈ ನಿಗೂಢ ಕಾಯಿಲೆಯ ತನಿಖೆ ನಡೆಯಲಿದೆ.
Loading ...
