88 ರ ಹರೆಯದಲ್ಲೂ ಸ್ವಚ್ಛತಾ ಕ್ರಾಂತಿ ; ಚಂಡೀಗಢ ರಸ್ತೆಗಳನ್ನು ಸ್ವಚ್ಛಗೊಳಿಸುವ ನಿವೃತ್ತ ಐಪಿಎಸ್ ಅಧಿಕಾರಿ !

ಚಂಡೀಗಢ: ವಯಸ್ಸು ಕೇವಲ ಸಂಖ್ಯೆ ಎಂಬುದನ್ನು ನಿರೂಪಿಸಿರುವ 88 ವರ್ಷದ ನಿವೃತ್ತ ಐಪಿಎಸ್ ಅಧಿಕಾರಿ ಇಂದರ್‌ಜಿತ್ ಸಿಂಗ್ ಸಿಧು ಅವರು ಚಂಡೀಗಢದ ರಸ್ತೆಗಳನ್ನು ಪ್ರತಿದಿನವೂ ಸ್ವಚ್ಛಗೊಳಿಸುವ ಮೂಲಕ ಆನ್‌ಲೈನ್‌ನಲ್ಲಿ ಜನಮನ ಗೆದ್ದಿದ್ದಾರೆ. ಕೈಗಾರಿಕೋದ್ಯಮಿ ಆನಂದ್ ಮಹೀಂದ್ರಾ ಅವರು ಎಕ್ಸ್ (ಹಿಂದೆ ಟ್ವಿಟರ್) ನಲ್ಲಿ ಈ ಸ್ಫೂರ್ತಿದಾಯಕ ವಿಡಿಯೋವನ್ನು ಹಂಚಿಕೊಂಡಿದ್ದು, ಸಿದ್ಧು ಅವರ ನಿಸ್ವಾರ್ಥ ಸೇವೆಗೆ ಭಾರಿ ಪ್ರಶಂಸೆ ವ್ಯಕ್ತವಾಗಿದೆ.

ವಿಡಿಯೋದಲ್ಲಿ, ಸಿಧು ಅವರು ಚಂಡೀಗಢದ ಸೆಕ್ಟರ್ 49 ರ ತಮ್ಮ ಪ್ರದೇಶದಲ್ಲಿ ಕಸವನ್ನು ಹೆಕ್ಕಿ ಗಾಡಿಯೊಂದಕ್ಕೆ ತುಂಬುತ್ತಿರುವುದು ಕಂಡುಬರುತ್ತದೆ. ಈ ವಿಡಿಯೋ ವೈರಲ್ ಆಗಿದ್ದು, ನೆಟ್ಟಿಗರಿಂದ ವ್ಯಾಪಕ ಮೆಚ್ಚುಗೆಗೆ ಪಾತ್ರವಾಗಿದೆ.

1964ರ ಬ್ಯಾಚ್‌ನ ಐಪಿಎಸ್ ಅಧಿಕಾರಿಯಾದ ಸಿಧು ಅವರು ಪ್ರತಿದಿನ ಬೆಳಿಗ್ಗೆ 6 ಗಂಟೆಗೆ ತಮ್ಮ ದಿನವನ್ನು ಪ್ರಾರಂಭಿಸುತ್ತಾರೆ ಮತ್ತು ಯಾವುದೇ ಗುರುತಿನ ಬಯಕೆ ಇಲ್ಲದೆ ಬೀದಿಗಳಿಂದ ಕಸವನ್ನು ಸಂಗ್ರಹಿಸುತ್ತಾರೆ.

ವಿಡಿಯೋವನ್ನು ಹಂಚಿಕೊಂಡ ಮಹೀಂದ್ರಾ, “ಸ್ಪಷ್ಟವಾಗಿ, ಪ್ರತಿದಿನ ಬೆಳಿಗ್ಗೆ 6 ಗಂಟೆಗೆ, ಚಂಡೀಗಢದ ಸೆಕ್ಟರ್ 49 ರ ಶಾಂತ ಬೀದಿಗಳಲ್ಲಿ, ಈ 88 ವರ್ಷದ ನಿವೃತ್ತ ಪೊಲೀಸ್ ಅಧಿಕಾರಿ ತಮ್ಮ ಸೇವೆಯನ್ನು ಪ್ರಾರಂಭಿಸುತ್ತಾರೆ” ಎಂದು ಬರೆದಿದ್ದಾರೆ.

ಸ್ವಚ್ಛ ಸರ್ವೇಕ್ಷಣದಲ್ಲಿ ಚಂಡೀಗಢದ ‘ಕಡಿಮೆ ಶ್ರೇಯಾಂಕ’ದಿಂದ ಸಿಧು ನಿರಾಶೆಗೊಂಡಿದ್ದರು, ಆದರೆ ದೂರುವ ಬದಲು ಕಾರ್ಯಪ್ರವೃತ್ತರಾಗಲು ನಿರ್ಧರಿಸಿದರು ಎಂದು ಮಹೀಂದ್ರಾ ಹೇಳಿದ್ದಾರೆ. “ಅವರು ಸ್ವಚ್ಛಗೊಳಿಸುವ ಪ್ರತಿಯೊಂದು ಕಸವು ಕೇವಲ ಕಸ ವಿಲೇವಾರಿಗಿಂತ ಹೆಚ್ಚು. ಅದು ಒಂದು ಹೇಳಿಕೆ. ಉತ್ತಮ ಜಗತ್ತಿನಲ್ಲಿ ನಿಶ್ಯಬ್ದ, ಅಚಲವಾದ ನಂಬಿಕೆ. ವಯಸ್ಸು ಅಥವಾ ಗುರುತಿನ ಹೊರತಾಗಿಯೂ ಅರ್ಥಪೂರ್ಣ ಜೀವನವನ್ನು ನಡೆಸುವ ನಂಬಿಕೆ” ಎಂದು ಅವರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

“ಯುವಕರು ಮತ್ತು ವೇಗದ ಬಗ್ಗೆ ಹೆಚ್ಚು ಗಮನ ಹರಿಸುವ ಜಗತ್ತಿನಲ್ಲಿ, ಅವರ ನಿಧಾನ ಆದರೆ ಸ್ಥಿರ ಹೆಜ್ಜೆಗಳು ಉದ್ದೇಶಕ್ಕೆ ಅಂತ್ಯವಿಲ್ಲ ಎಂದು ಹೇಳುತ್ತವೆ. ಸೇವೆಗೆ ವಯಸ್ಸಿಲ್ಲ. ಬೀದಿಗಳ ಈ ನಿಶ್ಯಬ್ದ ಯೋಧನಿಗೆ ಸಲಾಂ” ಎಂದು ಉದ್ಯಮಿ ಆನಂದ್ ಮಹೀಂದ್ರಾ ಬಣ್ಣಿಸಿದ್ದಾರೆ.

ಎಎನ್‌ಐ ಜೊತೆ ಮಾತನಾಡಿರುವ ಸಿಧು, “ನನಗೆ ಸ್ವಚ್ಛ ಸ್ಥಳಗಳು ಇಷ್ಟ, ಹಾಗಾಗಿ ನಾನು ಸ್ವಚ್ಛಗೊಳಿಸಲು ಪ್ರಯತ್ನಿಸುತ್ತೇನೆ. ಈ ಮಾರುಕಟ್ಟೆಯ ಪಾರ್ಕಿಂಗ್ ಪ್ರದೇಶವು ಸ್ವಚ್ಛವಾಗಿದ್ದರೆ ಉತ್ತಮ. ನೀವು ವಿದೇಶಕ್ಕೆ ಹೋದರೆ ಅಲ್ಲಿನ ನೆಲಹಾಸುಗಳನ್ನು ನೋಡಿದರೆ, ಅವು ಸಾಮಾನ್ಯವಾಗಿ ಬಹಳ ಸ್ವಚ್ಛವಾಗಿರುತ್ತವೆ, ಆದರೆ ಭಾರತದಲ್ಲಿ ಹಾಗಲ್ಲ. ಭಾರತದಾದ್ಯಂತ ಸ್ವಚ್ಛತಾ ಸ್ಪರ್ಧೆಯಲ್ಲಿ ಚಂಡೀಗಢ ಎರಡನೇ ಸ್ಥಾನದಲ್ಲಿದೆ. ಚಂಡೀಗಢ ತನ್ನ ಸ್ವಚ್ಛತೆ ಮತ್ತು ಸೌಂದರ್ಯಕ್ಕೆ ಹೆಸರುವಾಸಿಯಾಗಿದೆ” ಎಂದು ಹೇಳಿದ್ದಾರೆ. “ಈ ನಗರವನ್ನು ಸ್ವಚ್ಛತೆಯ ವಿಷಯದಲ್ಲಿ ಎರಡನೇ ಸ್ಥಾನಕ್ಕೆ ತರಲು ನಾನು ನನ್ನ ಕೈಲಾದಷ್ಟು ಪ್ರಯತ್ನಿಸುತ್ತಿದ್ದೇನೆ. ನಾವೆಲ್ಲರೂ ಇದನ್ನು ಮಾಡುತ್ತಲೇ ಇದ್ದರೆ, ಒಂದು ದಿನ ಇದು ನಂಬರ್ ಒನ್ ಆಗುತ್ತದೆ” ಎಂದು ಮಾಜಿ ಐಪಿಎಸ್ ಅಧಿಕಾರಿ ಭರವಸೆ ವ್ಯಕ್ತಪಡಿಸಿದ್ದಾರೆ.