ಕೇರಳದ ತಿರೂರ್‌ನಲ್ಲಿ ನಡೆದ ವಿಲಕ್ಷಣ ಘಟನೆಯೊಂದರಲ್ಲಿ ಕೋತಿಯೊಂದು ಛಾವಣಿಯ ಮೇಲೆ ಕೆಲಸ ಮಾಡುತ್ತಿದ್ದ ಯುವಕನ ಮೊಬೈಲ್ ಎತ್ತಿಕೊಂಡಿದೆ. ಫೋನ್ ಅನ್ನು ಹಿಂಪಡೆಯಲು ಗಂಟೆಗಳ ಕಾಲದ ವಿಫಲ ಪ್ರಯತ್ನಗಳ ನಂತರ, ಕೋತಿ ಮತ್ತೊಂದು ಮರಕ್ಕೆ ಹಾರಿದಾಗ ಫೋನ್ ಕೆಳಗೆ ಬಿದ್ದಿದ್ದು, ಕೊನೆಗೂ ಫೋನ್ ಸಿಕ್ಕ ಖುಷಿಯಲ್ಲಿ ಯುವಕ ನೆಮ್ಮದಿಯ ನಿಟ್ಟುಸಿರು ಬಿಟ್ಟಿದ್ದಾನೆ.
ಮಲಪ್ಪುರಂನ ತಿರೂರಿನಲ್ಲಿ ಈ ಕೋತಿ ಮೊಬೈಲ್ ಫೋನ್ ಎತ್ತಿಕೊಂಡಿದ್ದಲ್ಲದೇ, ಒಳಬರುವ ಕರೆಗಳನ್ನು ಸ್ವೀಕಾರ ಮಾಡಿದೆ. ತಿರೂರಿನ ಸಂಗಮಮ್ ರೆಸಿಡೆನ್ಸಿಯ ಮೇಲಿನ ಮಹಡಿಯಲ್ಲಿ ಅಲ್ಯೂಮಿನಿಯಂ ಫ್ಯಾಬ್ರಿಕೇಶನ್ ಕೆಲಸ ಮಾಡುತ್ತಿದ್ದ ಯುವಕನ ಮೊಬೈಲ್ ಫೋನ್ ಅನ್ನುಈ ಕೋತಿ ಎತ್ತಿಕೊಂಡಿತ್ತು. ಕೆಲಸ ಮಾಡುವಾಗ, ಫೋನ್ ಅನ್ನು ನೆಲದ ಮೇಲೆ ಇರಿಸಲಾಗಿದ್ದು, ಸಿಕ್ಕ ಅವಕಾಶವನ್ನು ಸದುಪಯೋಗಪಡಿಸಿಕೊಂಡ ಕೋತಿ ಫೋನ್ ಹಿಡಿದುಕೊಂಡು ವೇಗವಾಗಿ ತೆಂಗಿನ ಮರ ಏರಿದೆ.
ಯುವಕ, ತನ್ನ ಸಹೋದ್ಯೋಗಿಗಳೊಂದಿಗೆ ಸೇರಿ ಫೋನ್ ಹಿಂಪಡೆಯಲು ಪ್ರಯತ್ನಿಸಿದರೂ ಕೋತಿ ಅಲ್ಲಿ ನಿಲ್ಲದೆ, ಎತ್ತರದ ಕೊಂಬೆಗಳಿಗೆ ಏರುವುದನ್ನು ಮುಂದುವರೆಸಿದೆ, ಅವರ ಪ್ರಯತ್ನದ ನಡುವೆಯೇ ಫೋನ್ ರಿಂಗಣಿಸಿದ್ದು, ಕೋತಿ ಬಟನ್ ಒತ್ತಿ ಫೋನ್ ಅನ್ನು ಕಿವಿಗೆ ಹಿಡಿದಿದೆ. ಅನಿರೀಕ್ಷಿತವಾದ ಘಟನೆಯಿಂದ ನೋಡುತ್ತಿದ್ದವರೆಲ್ಲರೂ ದಿಗ್ಭ್ರಮೆಗೊಂಡರು.
ಅಂತಿಮವಾಗಿ ಕೋತಿ ಮತ್ತೊಂದು ಮರಕ್ಕೆ ನೆಗೆಯಲು ತಯಾರಿ ನಡೆಸುತ್ತಿದ್ದಂತೆಯೇ ಫೋನ್ ನೆಲಕ್ಕೆ ಬಿದ್ದಿದೆ. ಇದರಿಂದಾಗಿ ಗಂಟೆಗಳ ಪ್ರಯತ್ನದ ನಂತರ, ಯುವಕ ಮತ್ತು ಅವನ ಸ್ನೇಹಿತರು ಅಂತಿಮವಾಗಿ ಫೋನ್ ಅನ್ನು ಮರುಪಡೆಯಲು ಸಾಧ್ಯವಾಗಿದೆ.
Loading ...
