ನಂಬಲಸಾಧ್ಯವಾದರೂ ಇದು ಸತ್ಯ ಸಂಗತಿ: 14 ತಿಂಗಳ ಅವಧಿಯಲ್ಲಿ ಬರೋಬ್ಬರಿ 78 ಬಾರಿ ಕೊರೊನಾ ಸೋಂಕಿಗೊಳಗಾದ ವ್ಯಕ್ತಿ…!

ಕೋವಿಡ್​ ಸೋಂಕು ಕಳೆದೆರಡು ವರ್ಷಗಳಿಂದ ಜನರ ನಿದ್ದೆಗೆಡಿಸಿದೆ. ಹೇಗಾದರೂ ಮಾಡಿ ಸೋಂಕಿನಿಂದ ಬಚಾವಾಗಬೇಕು ಎಂದು ಜನರು ಪ್ರಯತ್ನಿಸುತ್ತಲೇ ಇದ್ದಾರೆ. ಆದರೆ ಟರ್ಕಿಯಲ್ಲಿ ವ್ಯಕ್ತಿಯೊಬ್ಬ ಸತತ 14 ತಿಂಗಳುಗಳ ಕಾಲ ಕೋವಿಡ್​ ಸೋಂಕಿಗೆ ಒಳಗಾಗಿದ್ದಾನೆ..!

56 ವರ್ಷ ಪ್ರಾಯದ ಮುಜಾಫರ್​​ ಕಯಾಸನ್​​ ಎಂಬ ಹೆಸರಿನ ವ್ಯಕ್ತಿಯು 2020 ರಿಂದ ಬರೋಬ್ಬರಿ 78 ಬಾರಿ ಕೋವಿಡ್​ ಸೋಂಕಿಗೆ ಒಳಗಾಗಿದ್ದಾರೆ. ಈ ಮೂಲಕ ಟರ್ಕಿಯಲ್ಲಿ ಅತ್ಯಂತ ದೀರ್ಘ ಅವಧಿಯವರೆಗೆ ಕೋವಿಡ್​ ಸೋಂಕಿಗೆ ಒಳಗಾದ ವ್ಯಕ್ತಿ ಎನಿಸಿದ್ದಾರೆ.

ಈಗಾಗಲೇ ಊಹೆಗೂ ನಿಲುಕದ ಕಷ್ಟವನ್ನು ಅನುಭವಿಸಿದ ಈತ 14 ತಿಂಗಳುಗಳ ಕಾಲ ಮನೆ ಹಾಗೂ ಆಸ್ಪತ್ರೆಯಲ್ಲಿಯೇ ಇದ್ದನು. ಅಂದರೆ ಒಂಬತ್ತು ತಿಂಗಳು ಆಸ್ಪತ್ರೆಯಲ್ಲಿ ಹಾಗೂ ಇನ್ನೊಂದು ಐದು ತಿಂಗಳು ಮನೆಯಲ್ಲಿ ಐಸೋಲೇಟ್​ ಆಗಿದ್ದಾನೆ.

ನನಗೆ ಇಲ್ಲಿ ಬಂಧಿಯಾಗಿರಲು ಬೇರೆ ಯಾವುದೇ ಸಮಸ್ಯೆ ಇರಲಿಲ್ಲ. ಆದರೆ ನನ್ನ ಪ್ರೀತಿಪಾತ್ರರನ್ನು ಮುಟ್ಟಲೂ ನನಗೆ ಅವಕಾಶ ಇಲ್ಲದೇ ಇರುವುದೇ ನನಗೆ ಕಷ್ಟದ ವಿಚಾರವಾಗಿದೆ ಎಂದು ಮುಜಾಫರ್​ ಹೇಳಿದನು.

ಲ್ಯುಕೇಮಿಯಾ ರೋಗಿಯಾಗಿರುವ ಮುಜಾಫರ್​, 2020ರ ನವೆಂಬರ್​ ತಿಂಗಳಲ್ಲಿ ಮೊಟ್ಟ ಮೊದಲ ಬಾರಿಗೆ ಕೋವಿಡ್​ ಸೋಂಕಿಗೆ ಒಳಗಾದರು. ಇದಾದ ಬಳಿಕ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಮೊದಲೇ ಲ್ಯುಕೇಮಿಯಾದಿಂದ ಬಳಲುತ್ತಿದ್ದ ಕಯಾಸನ್​​ ಕೊರೊನಾದಿಂದ ಬದುಕುಳಿಯುವ ಸಾಧ್ಯತೆ ಇಲ್ಲ ಎಂದೇ ವೈದ್ಯರು ಹೇಳಿದ್ದರು.

ಆದರೆ ಸ್ವಲ್ಪ ಸಮಯದ ಬಳಿಕ ಅವರನ್ನು ಆಸ್ಪತ್ರೆಯಿಂದ ಡಿಸ್ಚಾರ್ಜ್​ ಮಾಡಲಾಗಿತ್ತು. ಇದಾದ ಬಳಿಕ ಮುಜಾಫರ್​​ 78 ಬಾರಿ ಕೋವಿಡ್​ ಪರೀಕ್ಷೆಗೆ ಒಳಗಾಗಿದ್ದು ಪ್ರತಿ ಬಾರಿಯೂ ವರದಿ ಪಾಸಿಟಿವ್​ ಎಂದೇ ಬಂದಿದೆ. 14 ತಿಂಗಳುಗಳ ಕಾಲ ಕೊರೊನಾದ ವಿರುದ್ಧ ಹೋರಾಡಿದ್ದರೂ ಸಹ ಅವರು ಇನ್ನೂ ಜೀವಂತವಾಗಿದ್ದಾರೆ. ಹಾಗೂ ಈ ಮಾರಣಾಂತಿಕ ಕಾಯಿಲೆ ವಿರುದ್ಧ ಹೋರಾಡುತ್ತಿದ್ದಾರೆ.