ಮುಂಬೈ: ಬೆಳ್ಳಿಯಲ್ಲಿ ಹೂಡಿಕೆ ಮಾಡಲು ದೊಡ್ಡ ಮೊತ್ತದ ಹಣ ಬೇಕು ಎಂಬುದಿಲ್ಲ. ಕೇವಲ ₹10ರಿಂದಲೇ ಡಿಜಿಟಲ್ ಬೆಳ್ಳಿ ಖರೀದಿಸುವ ಅವಕಾಶವನ್ನು ಜಿಯೋ ಫೈನಾನ್ಸ್ ಪರಿಚಯಿಸಿದೆ. ಜಿಯೋ ಫೈನಾನ್ಸ್ ಪ್ಲಾಟ್‌ಫಾರ್ಮ್ ಅಂಡ್ ಸರ್ವೀಸಸ್ ಲಿಮಿಟೆಡ್ (JFPSL) ತನ್ನ ಆ್ಯಪ್‌ನಲ್ಲಿ ‘ಜಿಯೋ ಸಿಲ್ವರ್’ ಎಂಬ ಹೊಸ ಸೇವೆ ಆರಂಭಿಸಿದೆ.
ಈ ಸೇವೆಯ ಮೂಲಕ ಗ್ರಾಹಕರು 99.9% ಶುದ್ಧತೆಯ ಡಿಜಿಟಲ್ ಬೆಳ್ಳಿಯಲ್ಲಿ ₹10ರಿಂದ ₹1 ಲಕ್ಷದವರೆಗೆ ಹೂಡಿಕೆ ಮಾಡಬಹುದು ಎಂದು ಕಂಪನಿ ತಿಳಿಸಿದೆ.
₹10ರಿಂದ ₹1 ಲಕ್ಷದವರೆಗೆ ಖರೀದಿ
ಜಿಯೋ ಸಿಲ್ವರ್ ಮೂಲಕ ಮಾರುಕಟ್ಟೆಯ ಲೈವ್ ದರದಲ್ಲಿ ಡಿಜಿಟಲ್ ಬೆಳ್ಳಿ ಖರೀದಿಸಬಹುದು. ಬೆಳ್ಳಿಯನ್ನು ಮಾರಾಟ ಮಾಡಿದಾಗ ದೊರೆಯುವ ಹಣವನ್ನು ನೇರವಾಗಿ ಬ್ಯಾಂಕ್ ಖಾತೆಗೆ ಜಮೆ ಮಾಡಿಕೊಳ್ಳುವ ಆಯ್ಕೆಯೂ ಇದೆ.
ವಾರಕ್ಕೊಮ್ಮೆ ಅಥವಾ ತಿಂಗಳಿಗೊಮ್ಮೆ ನಿಯಮಿತವಾಗಿ ಹೂಡಿಕೆ ಮಾಡಲು SIP ಸೌಲಭ್ಯ ಕೂಡ ನೀಡಲಾಗಿದೆ.
ಡಿಜಿಟಲ್ ಬೆಳ್ಳಿಯನ್ನು ನಾಣ್ಯವಾಗಿ ಪಡೆಯಬಹುದು
ಆ್ಯಪ್‌ನಲ್ಲಿ ಡಿಜಿಟಲ್ ರೂಪದಲ್ಲಿ ಖರೀದಿಸಿದ ಬೆಳ್ಳಿಯನ್ನು ಮುಂದೆ ಪ್ರಮಾಣೀಕೃತ ಬೆಳ್ಳಿ ನಾಣ್ಯಗಳ ರೂಪದಲ್ಲಿ ಮನೆಗೆ ತರಿಸಿಕೊಳ್ಳುವ ಆಯ್ಕೆಯೂ ಇದೆ.
ಜಿಯೋ ಸಿಲ್ವರ್ ಡ್ಯಾಶ್‌ಬೋರ್ಡ್‌ನಲ್ಲಿ ಬೆಳ್ಳಿಯ ಪ್ರಸ್ತುತ ದರ, ಹೂಡಿಕೆ ಮೊತ್ತ ಮತ್ತು ವಹಿವಾಟಿನ ವಿವರಗಳನ್ನು ನೋಡಬಹುದು.
ಕಂಪನಿಯ ಪ್ರಕಾರ, ಬೆಳ್ಳಿಯ ಶುದ್ಧತೆಯನ್ನು NABL ಮಾನ್ಯತೆ ಪಡೆದ ಪ್ರಯೋಗಾಲಯಗಳಲ್ಲಿ ಪರೀಕ್ಷಿಸಲಾಗುತ್ತದೆ.
ಪ್ರತಿ ಖರೀದಿಗೂ ಜಿಯೋ ಪಾಯಿಂಟ್ಸ್
ಜಿಯೋ ಸಿಲ್ವರ್‌ನಲ್ಲಿ ಬೆಳ್ಳಿ ಖರೀದಿಸುವ ಗ್ರಾಹಕರಿಗೆ ‘ಜಿಯೋ ಪಾಯಿಂಟ್ಸ್’ ಕೂಡ ಸಿಗಲಿದೆ. ಈ ಪಾಯಿಂಟ್ಸ್‌ಗಳನ್ನು ಬ್ರ್ಯಾಂಡ್ ವೋಚರ್‌ಗಳು ಮತ್ತು ಶಾಪಿಂಗ್ ಡಿಸ್ಕೌಂಟ್‌ಗಳಿಗೆ ಬಳಸಬಹುದು ಎಂದು ಕಂಪನಿ ತಿಳಿಸಿದೆ.
ಜಿಯೋ ಫೈನಾನ್ಸ್ ಪ್ಲಾಟ್‌ಫಾರ್ಮ್‌ನ ಸಿಇಒ ಸುರ್ಭಿ ಎಸ್. ಶರ್ಮಾ ಮಾತನಾಡಿ, ಚಿನ್ನ ಮತ್ತು ಬೆಳ್ಳಿಯಂತಹ ಅಮೂಲ್ಯ ಲೋಹಗಳು ಹೂಡಿಕೆಯಲ್ಲಿ ಪ್ರಮುಖ ಸ್ಥಾನ ಹೊಂದಿವೆ ಎಂದು ಹೇಳಿದ್ದಾರೆ.
ಸಾಂಪ್ರದಾಯಿಕವಾಗಿ ಬೆಳ್ಳಿಯನ್ನು ಭೌತಿಕ ರೂಪದಲ್ಲಿ ಖರೀದಿಸಿ ಇಟ್ಟುಕೊಳ್ಳಲಾಗುತ್ತಿತ್ತು. ಇದೀಗ ಜಿಯೋ ಸಿಲ್ವರ್ ಮೂಲಕ ಡಿಜಿಟಲ್ ರೂಪದಲ್ಲೂ ಬೆಳ್ಳಿಯನ್ನು ಖರೀದಿಸಲು ಸುಲಭ ಅವಕಾಶ ಸಿಕ್ಕಿದೆ ಎಂದು ಅವರು ತಿಳಿಸಿದ್ದಾರೆ.
ಜಿಯೋ ಫೈನಾನ್ಸ್ ಈಗಾಗಲೇ ಡಿಜಿಟಲ್ ಗೋಲ್ಡ್ ಸೇವೆಯನ್ನು ನೀಡುತ್ತಿದ್ದು, ಇದೀಗ ಜಿಯೋ ಸಿಲ್ವರ್ ಮೂಲಕ ಡಿಜಿಟಲ್ ಬೆಳ್ಳಿ ಹೂಡಿಕೆಯ ಆಯ್ಕೆಯನ್ನೂ ತನ್ನ ಆ್ಯಪ್‌ಗೆ ಸೇರಿಸಿದೆ.
