ಪತ್ನಿಯೊಂದಿಗೆ ಜಗಳವಾಡಿದ ಪತಿ ; ಬಳಿಕ ರೈಲ್ವೆ ಫ್ಲಾಟ್‌ಫಾರಂ ಮೇಲೆ ಕಾರು ಓಡಿಸಿ ಹುಡುಕಾಟ | Watch

ಗ್ವಾಲಿಯರ್, ಮಧ್ಯಪ್ರದೇಶ: ವಿಚಿತ್ರ ಮತ್ತು ಆತಂಕಕಾರಿ ಘಟನೆಯೊಂದರಲ್ಲಿ, ಗ್ವಾಲಿಯರ್‌ನಲ್ಲಿ ವ್ಯಕ್ತಿಯೊಬ್ಬ ಗುರುವಾರ ಬೆಳಗ್ಗೆ ತಮ್ಮ ಕಾರನ್ನು ನೇರವಾಗಿ ರೈಲ್ವೆ ಫ್ಲಾಟ್‌ಫಾರಂ ಮೇಲೆ ಓಡಿಸಿದ್ದಾರೆ. ಕೌಟುಂಬಿಕ ಕಲಹದ ನಂತರ ತಮ್ಮ ಪತ್ನಿಯನ್ನು ಹುಡುಕುತ್ತಿದ್ದರು ಎಂದು ಅವರು ಹೇಳಿಕೊಂಡಿದ್ದಾರೆ. ಈ ಆಘಾತಕಾರಿ ದೃಶ್ಯ ಬೆಳಗ್ಗೆ 3 ಗಂಟೆ ಸುಮಾರಿಗೆ ಕಂಡುಬಂದಿದ್ದು, ಪ್ರಯಾಣಿಕರು ಮತ್ತು ರೈಲ್ವೆ ಪೊಲೀಸರು ಬೆಚ್ಚಿಬಿದ್ದಿದ್ದಾರೆ.

ಉಪನಿರೀಕ್ಷಕ ರವೀಂದ್ರ ಸಿಂಗ್ ರಾಜಾವತ್ ಮತ್ತು ಅವರ ಗಸ್ತು ತಂಡವು ಝಾನ್ಸಿ ಕಡೆಯಿಂದ ಫ್ಲಾಟ್‌ಫಾರಂ ಪ್ರವೇಶಿಸಿ ಆಗ್ರಾ ಕಡೆಗೆ ಚಲಿಸುತ್ತಿದ್ದ ಬಿಳಿ ಕಾರನ್ನು ಗುರುತಿಸಿದ್ದಾರೆ. ತಡಮಾಡದೆ, ಉಪನಿರೀಕ್ಷಕ ರಾಜಾವತ್ ತಕ್ಷಣವೇ ವಾಹನವನ್ನು ತಡೆದು ಚಾಲಕನನ್ನು ಪ್ರಶ್ನಿಸಿದ್ದಾರೆ.

ಕುಡಿದ ಮತ್ತಿನಲ್ಲಿ ಪತ್ನಿ ಹುಡುಕಿದ ಚಾಲಕ

ವಿಚಾರಣೆ ವೇಳೆ, ನಿತಿನ್ ಎಂದು ಗುರುತಿಸಲಾದ ಚಾಲಕ, ಸರಣಿ ಘಟನೆಗಳನ್ನು ಬಹಿರಂಗಪಡಿಸಿದ್ದಾನೆ. ತನ್ನ ಪತ್ನಿಯೊಂದಿಗೆ ಜಗಳವಾಡಿದ್ದಾಗಿ, ನಂತರ ಆಕೆ ತನ್ನನ್ನು ಬಿಟ್ಟು ಹೋಗಿದ್ದಾಳೆ ಎಂದು ಒಪ್ಪಿಕೊಂಡಿದ್ದಾನೆ. ಇದರಿಂದ ಬೇಸರಗೊಂಡ ಮತ್ತು ಮದ್ಯಪಾನ ಮಾಡಿದ್ದ ಆತ, ಆಕೆಯನ್ನು ಅಲ್ಲಿ ಹುಡುಕುವ ಆಶಯದೊಂದಿಗೆ ರೈಲ್ವೆ ನಿಲ್ದಾಣಕ್ಕೆ ಕಾರು ಓಡಿಸಿಕೊಂಡು ಬಂದಿದ್ದಾಗಿ ಹೇಳಿದ್ದಾನೆ.

ರೈಲ್ವೆ ಪೊಲೀಸ್ ಪಡೆ (RPF) ಅಧಿಕಾರಿಗಳು ತಕ್ಷಣವೇ ವಾಹನವನ್ನು ಫ್ಲಾಟ್‌ಫಾರಂನಿಂದ ಸ್ಥಳಾಂತರಿಸಿದ್ದಾರೆ ಮತ್ತು ನಿತಿನ್‌ನನ್ನು ರೈಲ್ವೆ ಕಾಯ್ದೆಯ ಸಂಬಂಧಿತ ವಿಭಾಗಗಳ ಅಡಿಯಲ್ಲಿ ವಶಕ್ಕೆ ತೆಗೆದುಕೊಂಡಿದ್ದಾರೆ. ಅವನ ಕಾರನ್ನು ವಶಪಡಿಸಿಕೊಳ್ಳಲಾಗಿದ್ದು, ವೈದ್ಯಕೀಯ ಪರೀಕ್ಷೆಯಲ್ಲಿ ಘಟನೆ ನಡೆದ ಸಮಯದಲ್ಲಿ ಆತ ಕುಡಿದಿದ್ದನು ಎಂದು ದೃಢಪಟ್ಟಿದೆ.

“ಫ್ಲಾಟ್‌ಫಾರಂಗೆ ವಾಹನ ತರುವುದು ತಪ್ಪು”: ರೈಲ್ವೆ ಅಧಿಕಾರಿಗಳು

ಝಾನ್ಸಿ ರೈಲ್ವೆ ವಿಭಾಗದ ಸಾರ್ವಜನಿಕ ಸಂಪರ್ಕ ಅಧಿಕಾರಿ ಮನೋಜ್ ಕುಮಾರ್ ಈ ಕುರಿತು ಪ್ರತಿಕ್ರಿಯಿಸಿ “ಯುವಕ ಮದ್ಯಪಾನ ಮಾಡಿ ಫ್ಲಾಟ್‌ಫಾರಂಗೆ ತನ್ನ ಕಾರನ್ನು ತಂದಿದ್ದ. ಆರ್‌ಪಿಎಫ್ ತಕ್ಷಣವೇ ಸ್ಥಳಕ್ಕೆ ತಲುಪಿ ಆತನನ್ನು ವಶಕ್ಕೆ ತೆಗೆದುಕೊಂಡಿದೆ. ಸಂಬಂಧಿತ ವಿಭಾಗಗಳ ಅಡಿಯಲ್ಲಿ ಕಾನೂನು ಕ್ರಮ ಕೈಗೊಳ್ಳಲಾಗುತ್ತಿದೆ. ಪತ್ನಿ ಸಂಬಂಧಿತ ವಿಷಯ ಇರಬಹುದು, ಆದರೆ ವಾಹನವನ್ನು ಫ್ಲಾಟ್‌ಫಾರಂಗೆ ತರುವುದು ತಪ್ಪು, ಮತ್ತು ಅದಕ್ಕೆ ವಿರುದ್ಧವಾಗಿ ಕ್ರಮ ಕೈಗೊಳ್ಳಲಾಗುತ್ತಿದೆ.” ಎಂದಿದ್ದಾರೆ.