ಉದ್ಯೋಗಿಗಳಿಗೆ ʼಫಾರ್ಮ್ 16ʼ ಕುರಿತು ಇಲ್ಲಿದೆ ಮಹತ್ವದ ಮಾಹಿತಿ

ಆದಾಯ ತೆರಿಗೆ ರಿಟರ್ನ್ಸ್ (ITR) ಸಲ್ಲಿಕೆಗೆ ಸಿದ್ಧತೆ ನಡೆಸುತ್ತಿರುವ ಲಕ್ಷಾಂತರ ಸಂಬಳದಾರರಿಗೆ ಇಲ್ಲಿದೆ ಒಂದು ಪ್ರಮುಖ ಮಾಹಿತಿ. ಬಹುನಿರೀಕ್ಷಿತ ಫಾರ್ಮ್ 16 ವಿತರಣೆಗೆ ಜೂನ್ 15 ಅಂತಿಮ ದಿನಾಂಕವಾಗಿದೆ. ನೀವು ಇನ್ನೂ ನಿಮ್ಮ ಫಾರ್ಮ್ 16 ಪಡೆದಿಲ್ಲವಾದರೆ, ಜೂನ್ 15ರೊಳಗೆ ನಿಮ್ಮ ಸಂಸ್ಥೆಯ ಎಚ್‌ಆರ್ ವಿಭಾಗವನ್ನು ಸಂಪರ್ಕಿಸಬಹುದು.

ಟಿಡಿಎಸ್ ರಿಟರ್ನ್ಸ್ ಸಲ್ಲಿಕೆಗೆ ಮೇ 31 ಅಂತಿಮ ದಿನಾಂಕವಾಗಿದ್ದು, ಸಂಸ್ಥೆಗಳು ಮೇ 31 ರೊಳಗೆ ಟಿಡಿಎಸ್ ರಿಟರ್ನ್ಸ್ ಸಲ್ಲಿಸಬೇಕಾಗುತ್ತದೆ. ನಂತರ, ನೌಕರರಿಗೆ ಫಾರ್ಮ್ 16 ಅನ್ನು 15 ದಿನಗಳೊಳಗೆ ವಿತರಿಸುವುದು ಕಡ್ಡಾಯವಾಗಿದೆ. ಈ ನಿಯಮದಂತೆ, ಪ್ರತಿ ವರ್ಷವೂ ಜೂನ್ 1 ರಿಂದ ಜೂನ್ 15 ರೊಳಗೆ ಉದ್ಯೋಗದಾತರು ಫಾರ್ಮ್ 16 ಅನ್ನು ನೀಡಬೇಕಾಗುತ್ತದೆ.

ಏನಿದು ಫಾರ್ಮ್ 16 ?

ಫಾರ್ಮ್ 16 ಎಂಬುದು ನಿಮ್ಮ ಸಂಬಳದಿಂದ ಕಡಿತಗೊಳಿಸಲಾದ ತೆರಿಗೆ (TDS) ಮತ್ತು ನೀವು ಕ್ಲೈಮ್ ಮಾಡಿರುವ ತೆರಿಗೆ ಕಡಿತಗಳ ವಿವರಗಳನ್ನು ಒಳಗೊಂಡಿರುವ ಒಂದು ಪ್ರಮುಖ ಪ್ರಮಾಣಪತ್ರವಾಗಿದೆ. ಇದು ನಿಮ್ಮ ಸಂಬಳದ ವಿವರಗಳು, ಆದಾಯದ ಮೂಲಗಳು ಮತ್ತು ತೆರಿಗೆ ಪ್ರಯೋಜನಗಳ ಮಾಹಿತಿಯನ್ನು ಸಹ ಹೊಂದಿರುತ್ತದೆ. ಇದರ ಪ್ರಮುಖ ಅನುಕೂಲವೆಂದರೆ, ಐಟಿಆರ್ ಫಾರ್ಮ್‌ನಲ್ಲಿ ಈ ವಿವರಗಳು ಹೆಚ್ಚಾಗಿ ಮೊದಲೇ ಭರ್ತಿಯಾಗಿರುತ್ತವೆ. ನೀವು ಕೇವಲ ಅದನ್ನು ಪರಿಶೀಲಿಸಿ, ದೃಢೀಕರಿಸಿ ಸಲ್ಲಿಸಿದರೆ ಸಾಕು. ಇದರಿಂದ ಆದಾಯ ತೆರಿಗೆ ಸಲ್ಲಿಕೆ ಕಾರ್ಯ ಕೇವಲ 2-3 ನಿಮಿಷಗಳಲ್ಲಿ ಮುಗಿಯುತ್ತದೆ.

ಫಾರ್ಮ್ 16 ರ ಪ್ರಮುಖ ಭಾಗಗಳು

ಫಾರ್ಮ್ 16 ಎರಡು ಭಾಗಗಳನ್ನು ಹೊಂದಿದೆ:

• ಭಾಗ ಎ (Part A): ಇದು ನಿಮ್ಮ ಪ್ಯಾನ್ (PAN), ಕಂಪನಿಯ ಟ್ಯಾನ್ (TAN) ಮತ್ತು ಪ್ಯಾನ್ ವಿವರಗಳನ್ನು ಹೊಂದಿರುತ್ತದೆ. ಜೊತೆಗೆ ನಿಮ್ಮ ಉದ್ಯೋಗದ ಅವಧಿ ಮತ್ತು ಸರ್ಕಾರಕ್ಕೆ ಜಮಾ ಮಾಡಲಾದ ಟಿಡಿಎಸ್ ವಿವರಗಳನ್ನು ನಮೂದಿಸಲಾಗುತ್ತದೆ.
• ಭಾಗ ಬಿ (Part B): ಈ ಭಾಗದಲ್ಲಿ ನಿಮ್ಮ ಸಂಬಳದ ವಿಭಜನೆ (gross ಮತ್ತು net salary), ಮನೆ ಬಾಡಿಗೆ ಭತ್ಯೆ (HRA) ಎಷ್ಟು ಪಡೆದಿದ್ದೀರಿ, ಪಿಎಫ್ ಖಾತೆಗೆ ಎಷ್ಟು ಕೊಡುಗೆ ನೀಡಲಾಗಿದೆ, ವೃತ್ತಿಪರ ತೆರಿಗೆ ಕಡಿತ ಮತ್ತು ಸೆಕ್ಷನ್-ವಾರು ತೆರಿಗೆ ಕಡಿತಗಳ (ಉಳಿತಾಯ, ವೈದ್ಯಕೀಯ ಇತ್ಯಾದಿಗಳಲ್ಲಿ ಹೂಡಿಕೆ) ವಿವರಗಳನ್ನು ತೋರಿಸುತ್ತದೆ.

ಫಾರ್ಮ್ 26AS ಜೊತೆ ತಾಳೆ ನೋಡಿ

ಫಾರ್ಮ್ 26AS ಎಂಬುದು ನಿಮ್ಮ ಆದಾಯ ಮತ್ತು ಕಡಿತಗೊಳಿಸಲಾದ ತೆರಿಗೆಯ ಸಂಪೂರ್ಣ ಸಾರಾಂಶವಾಗಿದೆ. ಆದಾಯ ತೆರಿಗೆ ರಿಟರ್ನ್ಸ್ ಸಲ್ಲಿಸುವ ಮೊದಲು, ನಿಮ್ಮ ಫಾರ್ಮ್ 16 ಅನ್ನು ಫಾರ್ಮ್ 26AS ನೊಂದಿಗೆ ಹೋಲಿಸಿ ನೋಡಲು ಮರೆಯದಿರಿ. ನಿಮ್ಮ ಖಾತೆಯನ್ನು ಬಳಸಿಕೊಂಡು ಆದಾಯ ತೆರಿಗೆ ಇ-ಫೈಲಿಂಗ್ ವೆಬ್‌ಸೈಟ್‌ನಿಂದ ಫಾರ್ಮ್ 26AS ಅನ್ನು ಡೌನ್‌ಲೋಡ್ ಮಾಡಬಹುದು. ಈ ಹಂತವು ಎಲ್ಲಾ ತೆರಿಗೆ ಕಡಿತಗಳನ್ನು ಸರಿಯಾಗಿ ತೋರಿಸಲಾಗಿದೆಯೇ ಎಂದು ಪರಿಶೀಲಿಸಲು ಸಹಾಯ ಮಾಡುತ್ತದೆ.

ನೀವು ಸಂಬಳ ಪಡೆಯುವ ಉದ್ಯೋಗಿಯಾಗಿದ್ದರೆ, ಜೂನ್ 15 ರವರೆಗೆ ಫಾರ್ಮ್ 16 ಗಾಗಿ ನಿರೀಕ್ಷಿಸಿ. ಈ ವರ್ಷ ಆದಾಯ ತೆರಿಗೆ ರಿಟರ್ನ್ಸ್ ಸಲ್ಲಿಸಲು ಕೊನೆಯ ದಿನಾಂಕವನ್ನು ಸೆಪ್ಟೆಂಬರ್ 15 ರವರೆಗೆ ವಿಸ್ತರಿಸಲಾಗಿದೆ. ಆದ್ದರಿಂದ, ನಿಮಗೆ ಫಾರ್ಮ್ 16 ದೊರೆತ ನಂತರ ಸುಲಭವಾಗಿ ನಿಮ್ಮ ಐಟಿಆರ್ ಸಲ್ಲಿಸಬಹುದು.