ಅಮೆರಿಕ ಮತ್ತು ಚೀನಾ ನಡುವೆ ನಡೆಯುತ್ತಿರುವ ವ್ಯಾಪಾರ ಸಮರದ ಬಿಸಿ ಭಾರತೀಯ ಗ್ರಾಹಕರಿಗೆ ತಟ್ಟಲಿದೆ. ಆದರೆ ಇದು ಕೆಟ್ಟ ಸುದ್ದಿಯಲ್ಲ, ಬದಲಿಗೆ ಸಿಹಿ ಸುದ್ದಿ! ಟಿವಿ, ಫ್ರಿಡ್ಜ್ ಮತ್ತು ಸ್ಮಾರ್ಟ್‌ಫೋನ್‌ಗಳಂತಹ ಎಲೆಕ್ಟ್ರಾನಿಕ್ ವಸ್ತುಗಳ ಬೆಲೆ ಶೀಘ್ರದಲ್ಲೇ ಕಡಿಮೆಯಾಗುವ ಸಾಧ್ಯತೆ ಇದೆ. ಇದಕ್ಕೆ ಕಾರಣ ಚೀನಾದ ಎಲೆಕ್ಟ್ರಾನಿಕ್ ಬಿಡಿಭಾಗಗಳ ತಯಾರಕರು ಭಾರತೀಯ ಕಂಪನಿಗಳಿಗೆ ನೀಡುತ್ತಿರುವ ಭರ್ಜರಿ ರಿಯಾಯಿತಿ.
ಹೌದು, ಅಮೆರಿಕವು ಚೀನಾ ಸರಕುಗಳ ಮೇಲೆ ಹೆಚ್ಚಿನ ಸುಂಕ ವಿಧಿಸುತ್ತಿರುವುದರಿಂದ, ಚೀನಾದಿಂದ ಅಮೆರಿಕಕ್ಕೆ ಹೋಗುವ ವಸ್ತುಗಳ ಬೆಲೆ ಏರಿಕೆಯಾಗುವ ಸಾಧ್ಯತೆ ಇದೆ. ಇದರಿಂದ ಬೇಡಿಕೆ ಕಡಿಮೆಯಾಗುವ ಆತಂಕ ಚೀನೀ ತಯಾರಕರನ್ನು ಕಾಡುತ್ತಿದೆ. ಈ ಹಿನ್ನೆಲೆಯಲ್ಲಿ, ತಮ್ಮ ಉತ್ಪನ್ನಗಳ ಬೇಡಿಕೆಯನ್ನು ಹೆಚ್ಚಿಸಿಕೊಳ್ಳಲು ಚೀನೀ ಕಂಪನಿಗಳು ಭಾರತೀಯ ಎಲೆಕ್ಟ್ರಾನಿಕ್ ವಸ್ತುಗಳ ತಯಾರಕರಿಗೆ ಶೇಕಡಾ 5 ರವರೆಗೆ ರಿಯಾಯಿತಿ ನೀಡಲು ಮುಂದಾಗಿವೆ.
ಇದರ ನೇರ ಪರಿಣಾಮ ಭಾರತೀಯ ಗ್ರಾಹಕರ ಮೇಲೆ ಆಗಲಿದೆ. ಭಾರತೀಯ ತಯಾರಕರು ಈ ರಿಯಾಯಿತಿಯ ಒಂದು ಭಾಗವನ್ನು ಗ್ರಾಹಕರಿಗೆ ವರ್ಗಾಯಿಸಿದರೆ, ಟಿವಿ, ಫ್ರಿಡ್ಜ್, ಸ್ಮಾರ್ಟ್‌ಫೋನ್ ಸೇರಿದಂತೆ ಅನೇಕ ಎಲೆಕ್ಟ್ರಾನಿಕ್ ವಸ್ತುಗಳ ಬೆಲೆ ಗಣನೀಯವಾಗಿ ಇಳಿಯಬಹುದು. ಇದು ಮಧ್ಯಮ ವರ್ಗದ ಜನರಿಗೆ ಖಂಡಿತವಾಗಿಯೂ ಸಂತಸದ ಸುದ್ದಿಯಾಗಿದೆ.
ತಜ್ಞರ ಪ್ರಕಾರ, ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಚೀನಾ ಸರಕುಗಳ ಮೇಲೆ ಶೇಕಡಾ 125 ರಷ್ಟು ಭಾರೀ ಸುಂಕ ವಿಧಿಸಿರುವುದು ಇದಕ್ಕೆ ಪ್ರಮುಖ ಕಾರಣ. ಚೀನಾದಲ್ಲಿ ತಯಾರಿಸಿದ 100 ಡಾಲರ್ ಮೌಲ್ಯದ ವಸ್ತು ಅಮೆರಿಕ ತಲುಪಿದಾಗ 225 ಡಾಲರ್ ಆಗಲಿದೆ. ಇದರಿಂದ ಚೀನಾ ಸರಕುಗಳ ಬೇಡಿಕೆ ಅಮೆರಿಕದಲ್ಲಿ ಕಡಿಮೆಯಾಗುವುದು ಸಹಜ.
ಅಮೆರಿಕ ಮತ್ತು ಚೀನಾ ಈ ವ್ಯಾಪಾರ ಸಮರವನ್ನು ಮಾತುಕತೆಯ ಮೂಲಕ ಕೊನೆಗೊಳಿಸಲು ಪ್ರಯತ್ನಿಸುತ್ತಿದ್ದರೂ, ಉಭಯ ದೇಶಗಳ ನಡುವಿನ ಬಿಕ್ಕಟ್ಟು ಇದಕ್ಕೆ ಅಡ್ಡಿಯಾಗಬಹುದು ಎಂದು ತಜ್ಞರು ಅಭಿಪ್ರಾಯಪಡುತ್ತಾರೆ. ಆದರೆ ಸದ್ಯಕ್ಕಂತೂ ಈ ಬೆಳವಣಿಗೆ ಭಾರತೀಯ ಗ್ರಾಹಕರಿಗೆ ಲಾಭದಾಯಕವಾಗುವ ಸಾಧ್ಯತೆ ಇದೆ.
Loading ...
