ಢಾಕಾದಲ್ಲಿ ಬುಧವಾರ ನಡೆದ ಬಾಂಗ್ಲಾದೇಶ ಎಮರ್ಜಿಂಗ್ ತಂಡ ಮತ್ತು ದಕ್ಷಿಣ ಆಫ್ರಿಕಾ ಎಮರ್ಜಿಂಗ್ ತಂಡಗಳ ನಡುವಿನ ಟೆಸ್ಟ್ ಪಂದ್ಯದ ವೇಳೆ “ಅಸಹನೀಯ” ಮತ್ತು “ಅತಿರೇಕದ” ಘಟನೆಯೊಂದು ನಡೆದಿದೆ. ದಕ್ಷಿಣ ಆಫ್ರಿಕಾದ ಬೌಲರ್ ತ್ಶೆಪೊ ಎಂಟುಲಿ ಮತ್ತು ಬಾಂಗ್ಲಾದೇಶದ ಬ್ಯಾಟರ್ ರಿಪೋನ್ ಮೊಂಡಲ್ ನಡುವೆ ಮೈದಾನದಲ್ಲೇ ದೈಹಿಕ ಘರ್ಷಣೆ ನಡೆದಿದೆ.
ಈ ಘಟನೆಯು ರಿಪೋನ್ ಮೊಂಡಲ್, ಎಂಟುಲಿ ಬೌಲಿಂಗ್‌ನಲ್ಲಿ ಸಿಕ್ಸರ್ ಬಾರಿಸಿದ ನಂತರ ಸಂಭವಿಸಿದೆ. ಮೊಂಡಲ್ ತಮ್ಮ ಸಹ-ಬ್ಯಾಟರ್ ಕಡೆಗೆ ಸಾಗುತ್ತಿದ್ದಾಗ, ಬೌಲರ್ ಎಂಟುಲಿಯೊಂದಿಗೆ ಮಾತಿನ ಚಕಮಕಿ ನಡೆಸಿದರು, ಅದು ತಕ್ಷಣವೇ ಕೈಕೈ ಮಿಲಾಯಿಸುವ ಹಂತಕ್ಕೆ ತಲುಪಿತು. ಎಂಟುಲಿ ಆಕ್ರಮಣಕಾರಿಯಾಗಿ ಮೊಂಡಲ್ ಕಡೆಗೆ ನುಗ್ಗಿ, ಅವರನ್ನು ತಳ್ಳಾಡಿ, ಅವರ ಹೆಲ್ಮೆಟ್‌ ಅನ್ನು ಎರಡು ಬಾರಿ ಹಿಡಿದು ಎಳೆದಿದ್ದಾರೆ.
ಮೈದಾನದಲ್ಲಿದ್ದ ಅಂಪೈರ್ ಕಮರುಜ್ಜಮಾನ್ ತಕ್ಷಣವೇ ಮಧ್ಯಪ್ರವೇಶಿಸಿ ಆಟಗಾರರನ್ನು ಬೇರ್ಪಡಿಸಲು ಯತ್ನಿಸಿದರು. ಆದರೆ, ಕೆಲವು ದಕ್ಷಿಣ ಆಫ್ರಿಕಾದ ಆಟಗಾರರು ಕೂಡ ಎಂಟುಲಿಯೊಂದಿಗೆ ಸೇರಿಕೊಂಡು ರಿಪೋನ್‌ರನ್ನು ಎದುರಿಸಿದರು. ಈ ಘಟನೆಯನ್ನು ವೀಕ್ಷಕ ವಿವರಣೆಕಾರರು ಮತ್ತು ಸಾಮಾಜಿಕ ಮಾಧ್ಯಮಗಳಲ್ಲಿ ತೀವ್ರವಾಗಿ ಖಂಡಿಸಲಾಯಿತು. ನಬಿಲ್ ಕೈಸರ್ ಎಂಬ ವೀಕ್ಷಕ ವಿವರಣೆಕಾರರು, “ಇದು ಅತಿರೇಕ, ಇದು ಅಸಹನೀಯ. ಸಾಮಾನ್ಯವಾಗಿ ಕ್ರಿಕೆಟ್ ಮೈದಾನದಲ್ಲಿ ಮೌಖಿಕ ವಾಗ್ವಾದಗಳನ್ನು ನೋಡುತ್ತೇವೆ, ಆದರೆ ಇಂತಹ ದೈಹಿಕ ಘರ್ಷಣೆಗಳು ಅಪರೂಪ” ಎಂದು ಹೇಳಿದ್ದಾರೆ.
ಈ ವಾಗ್ವಾದ ಅಲ್ಲಿಗೆ ನಿಲ್ಲಲಿಲ್ಲ. ಮೂರು ಎಸೆತಗಳ ನಂತರ, ರಿಪೋನ್ ಚೆಂಡನ್ನು ಬೌಲರ್‌ಗೆ ಹಿಂತಿರುಗಿಸಿದಾಗ, ಎಂಟುಲಿ ಚೆಂಡನ್ನು ಮತ್ತೆ ಬ್ಯಾಟರ್ ಕಡೆಗೆ ಅಸಭ್ಯವಾಗಿ ಎಸೆದರು. ಆದರೆ, ಬ್ಯಾಟರ್ ಸಮಯ ಪ್ರಜ್ಞೆ ಉಪಯೋಗಿಸಿ ಚೆಂಡಿನಿಂದ ತಪ್ಪಿಸಿಕೊಂಡರು.
ಕ್ರಿಕೆಟ್ ಅಧಿಕಾರಿಗಳು ಈ ಘಟನೆಯ ಕುರಿತು ಅಂಪೈರ್‌ಗಳು ಮತ್ತು ಮ್ಯಾಚ್ ರೆಫರಿಯಿಂದ ಅಧಿಕೃತ ವರದಿಗಾಗಿ ಕಾಯುತ್ತಿದ್ದಾರೆ. ವರದಿ ಬಂದ ನಂತರ, ಬಾಂಗ್ಲಾದೇಶ ಕ್ರಿಕೆಟ್ ಮಂಡಳಿ (BCB) ಮತ್ತು ಕ್ರಿಕೆಟ್ ದಕ್ಷಿಣ ಆಫ್ರಿಕಾ (CSA) ಆಟಗಾರರ ವಿರುದ್ಧ ಅಂತಿಮ ಶಿಸ್ತು ಕ್ರಮವನ್ನು ಕೈಗೊಳ್ಳಲಿವೆ.
ಈ ಸರಣಿಯಲ್ಲಿ ಇದು ಮೊದಲ ಅಸಭ್ಯ ವರ್ತನೆಯ ಘಟನೆಯಲ್ಲ. ಈ ಹಿಂದೆ ರಾಜಶಾಹಿಯಲ್ಲಿ ನಡೆದ 50 ಓವರ್‌ಗಳ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾದ ಆಂಡಿಲೆ ಸಿಮೆಲಾನೆ ಮತ್ತು ಬಾಂಗ್ಲಾದೇಶದ ಜಿಶಾನ್ ಆಲಂ ಕೂಡ ತಮ್ಮ ವರ್ತನೆಗಾಗಿ ಅಮಾನತುಗೊಂಡಿದ್ದರು. ನಡೆಯುತ್ತಿರುವ ಈ ಟೆಸ್ಟ್ ಪಂದ್ಯವು ಸರಣಿಯ ಅಂತಿಮ ಪಂದ್ಯವಾಗಿದ್ದು, ಬಾಂಗ್ಲಾದೇಶ ಒಂದು ದಿನದ ಸರಣಿಯನ್ನು 2-1 ಅಂತರದಿಂದ ಗೆದ್ದುಕೊಂಡಿದೆ ಮತ್ತು ಮೊದಲ ನಾಲ್ಕು ದಿನಗಳ ಪಂದ್ಯ ಡ್ರಾನಲ್ಲಿ ಅಂತ್ಯಗೊಂಡಿತ್ತು.
Loading ...
