ಭಾರತಕ್ಕೆ ‘ದ್ರೋಹ’ ಮಾಡಿ ಚೀನಾಕ್ಕೆ ಹಾರಿದ ಎಲೋನ್‌ ಮಸ್ಕ್‌; ಟೆಸ್ಲಾ ಕಾರುಗಳ ಮಾರಾಟಕ್ಕೆ ಮಾಸ್ಟರ್‌ ಪ್ಲಾನ್!‌

ಭಾರತದ ಗ್ರಾಹಕರು ಟೆಸ್ಲಾ ಕಾರುಗಳಿಗಾಗಿ ಇನ್ನಷ್ಟು ದಿನ ಕಾಯಬೇಕಾಗಬಹುದು. ನಿರೀಕ್ಷೆಯಂತೆ ಟೆಸ್ಲಾ ಸಿಇಓ ಎಲೋನ್ ಮಸ್ಕ್ ಈ ತಿಂಗಳು ಭಾರತಕ್ಕೆ ಬರಬೇಕಿತ್ತು, ಆದರೆ ತಮ್ಮ ಭಾರತ ಪ್ರವಾಸವನ್ನು ರದ್ದುಗೊಳಿಸಿದ ಅವರು ಚೀನಾಕ್ಕೆ ಹಾರಿದ್ದಾರೆ. ಚೀನಾದಲ್ಲಿ ಟೆಸ್ಲಾ ಕಾರುಗಳ ಮೇಲಿನ ನಿಷೇಧದ ನಡುವೆಯೇ ಅಲ್ಲಿಗೆ ಭೇಟಿ ನೀಡಿದ ಎಲೋನ್ ಮಸ್ಕ್, ಪ್ರಧಾನಿ ಲಿ ಕಿಯಾಂಗ್ ಅವರನ್ನು ಸಹ ಭೇಟಿಯಾದರು. ಈ ಭೇಟಿಯ ಮೂಲಕ ಚೀನಾದಲ್ಲಿ ಟೆಸ್ಲಾ ಕಾರುಗಳ ಮೇಲಿದ್ದ ನಿಷೇಧವನ್ನು ತೆಗೆದುಹಾಕುವಲ್ಲಿ ಎಲೋನ್‌ ಮಸ್ಕ್ ಯಶಸ್ವಿಯಾಗಿದ್ದಾರೆ.

ವಾಸ್ತವವಾಗಿ ಚೀನಾ ಟೆಸ್ಲಾ ಕಾರುಗಳನ್ನು ನಿಷೇಧಿಸಿತ್ತು. ಚೀನಾದ ಮೇಲೆ ಹದ್ದಿನ ಕಣ್ಣಿಡಲು ಟೆಸ್ಲಾ ಕಾರುಗಳನ್ನು ಬಳಸಬಹುದು ಎಂಬುದು ಆ ದೇಶದ ಆತಂಕ. ಹಾಗಾಗಿಯೇ ಚೀನಾದಲ್ಲಿ ಸೂಕ್ಷ್ಮ ಪ್ರದೇಶಗಳಿಗೆ ಟೆಸ್ಲಾ ಕಾರುಗಳನ್ನು ಕೊಂಡೊಯ್ಯಲು ನಿಷೇಧವಿತ್ತು. ಈ ನಿಷೇಧವು ಟೆಸ್ಲಾ ಕಾರುಗಳ ಮಾರಾಟದ ಮೇಲೆ ನಕಾರಾತ್ಮಕ ಪರಿಣಾಮ ಬೀರಿತು. ಚೀನಾದಂತಹ ಪ್ರಮುಖ ವಾಹನ ಮಾರುಕಟ್ಟೆಯಲ್ಲಿ ಟೆಸ್ಲಾಗೆ ಈ ನಷ್ಟವನ್ನು ಸಹಿಸಲು ಸಾಧ್ಯವಾಗಲಿಲ್ಲ. ಹಾಗಾಗಿ ಈ ನಿಷೇಧವನ್ನು ತೆಗೆದುಹಾಕಲು ಎಲೋನ್ ಮಸ್ಕ್ ಸ್ವತಃ ಚೀನಾ ತಲುಪಿದರು.

ಟೆಸ್ಲಾದ ಪೂರ್ಣ-ಸ್ವಯಂ ಚಾಲನಾ ಸಾಫ್ಟ್‌ವೇರ್ ಚೀನಾದ ಪ್ರಮುಖ ಪರೀಕ್ಷೆಯಲ್ಲಿ ಉತ್ತೀರ್ಣವಾಗಿದೆ. ಚೀನಾದಲ್ಲಿ ಟೆಸ್ಲಾದ ಚಾಲಕ-ಸಹಾಯ ವ್ಯವಸ್ಥೆಯನ್ನು ಪರಿಚಯಿಸಲು ಅನುಮತಿಯನ್ನು ಸ್ವೀಕರಿಸಲಾಗಿದೆ. ಟೆಸ್ಲಾ ಕಾರುಗಳ ಮ್ಯಾಪಿಂಗ್ ಮತ್ತು ನ್ಯಾವಿಗೇಷನ್ ಕಾರ್ಯಗಳಿಗಾಗಿ ಚೈನೀಸ್ ಟೆಕ್ ದೈತ್ಯ ಬೈದು ಇಂಕ್ ಜೊತೆಗೆ ಒಪ್ಪಂದ ಮಾಡಿಕೊಳ್ಳಲಾಗಿದೆ. ಕಂಪನಿಯು ಚೀನಾದ ಪ್ರಮುಖ ಡೇಟಾ-ಭದ್ರತೆ ಮತ್ತು ಗೌಪ್ಯತೆ ಅಗತ್ಯವನ್ನು ಸಹ ಅಂಗೀಕರಿಸಿದೆ.

ಎಲೋನ್ ಮಸ್ಕ್ ಕಂಪನಿ ಚೀನಾದಲ್ಲಿ 17 ಲಕ್ಷಕ್ಕೂ ಹೆಚ್ಚು ಟೆಸ್ಲಾ ಕಾರುಗಳನ್ನು ಮಾರಾಟ ಮಾಡಿದೆ. 2020 ರಲ್ಲಿ ಚೀನಾದ ಶಾಂಘೈನಲ್ಲಿ 7 ಶತಕೋಟಿ ಡಾಲರ್‌ ವೆಚ್ಚದಲ್ಲಿ EV ಕಾರುಗಳನ್ನು ತಯಾರಿಸಲು ಟೆಸ್ಲಾ ಅತಿದೊಡ್ಡ ಕಾರ್ಖಾನೆಯನ್ನು ಸ್ಥಾಪಿಸಿತ್ತು.

ಎಲೋನ್ ಮಸ್ಕ್ ಭಾರತದ ಮೇಲೆ ಕೂಡ ಕಣ್ಣಿಟ್ಟಿದ್ದಾರೆ. ಭಾರತದಲ್ಲಿ ಟೆಸ್ಲಾ ಕಾರುಗಳ ಉತ್ಪಾದನಾ ಘಟಕವನ್ನು ಸ್ಥಾಪಿಸಲು ಅವರು ಭಾರತಕ್ಕೆ ಬರಲು ಹೊರಟಿದ್ದರು. ಟೆಸ್ಲಾ ಭಾರತದಲ್ಲಿ 2 ರಿಂದ 3 ಬಿಲಿಯನ್ ಡಾಲರ್ ಅಂದರೆ 25 ಸಾವಿರ ಕೋಟಿ ರೂಪಾಯಿವರೆಗೆ ಹೂಡಿಕೆ ಮಾಡಲಿದೆ. ಇವಿ ಕಾರುಗಳ ಹೊರತಾಗಿ, ಉಪಗ್ರಹ ಸಂವಹನಕ್ಕಾಗಿ ಮಸ್ಕ್ ಅರ್ಜಿ ಸಲ್ಲಿಸಿದ್ದಾರೆ. ಈಗ ಭಾರತದ ಯೋಜನೆಯನ್ನು ರದ್ದುಗೊಳಿಸಿ ಚೀನಾ ತಲುಪಿದ ಟೆಸ್ಲಾ ಮಾಲೀಕರ ನಡೆ ಕುತೂಹಲ ಮೂಡಿಸಿದೆ.