ಸ್ಥೂಲಕಾಯತೆ ಭಾರತದಲ್ಲಿ ಮಾತ್ರವಲ್ಲ ಇಡೀ ಪ್ರಪಂಚವನ್ನೇ ಕಾಡುತ್ತಿರುವ ಬಹುದೊಡ್ಡ ಸಮಸ್ಯೆ. ಇದು ಸ್ವತಃ ಒಂದು ರೋಗವಲ್ಲ, ಆದರೆ ಅನೇಕ ಮಾರಕ ಕಾಯಿಲೆಗಳಿಗೆ ಮೂಲ ಕಾರಣವಾಗಿದೆ. ಸರಿಯಾದ ಸಮಯಕ್ಕೆ ಬೊಜ್ಜಿನ ನಿಯಂತ್ರಣ ಮಾಡದೇ ಇದ್ದರೆ ಅಧಿಕ ಕೊಲೆಸ್ಟ್ರಾಲ್, ಅಧಿಕ ರಕ್ತದೊತ್ತಡ, ಹೃದಯಾಘಾತ, ಪರಿಧಮನಿಯ ಕಾಯಿಲೆ, ಟ್ರಿಪಲ್ ನಾಳೀಯ ಕಾಯಿಲೆಯಂತಹ ಸಮಸ್ಯೆಗಳನ್ನು ಉಂಟುಮಾಡಬಹುದು.
ಇದಲ್ಲದೆ ತೂಕ ಹೆಚ್ಚಾಗುವುದರಿಂದ, ದೇಹದ ಒಟ್ಟಾರೆ ಆಕಾರವು ಹಾಳಾಗುತ್ತದೆ. ಹಾಗಾಗಿ ಅನೇಕ ಜನರು ತೂಕ ಇಳಿಸಿಕೊಳ್ಳಲು ಬಯಸುತ್ತಾರೆ. ಇದಕ್ಕಾಗಿ ಕಟ್ಟುನಿಟ್ಟಾದ ಆಹಾರ ಮತ್ತು ಶಿಸ್ತಿನ ಜೀವನಕ್ರಮವನ್ನು ಆಶ್ರಯಿಸಬೇಕು. ಒತ್ತಡದ ಬದುಕಿನಲ್ಲಿ ಜಿಮ್‌ನಲ್ಲಿ ಗಂಟೆಗಟ್ಟಲೆ ಬೆವರು ಹರಿಸಲು ಎಲ್ಲರಿಗೂ ಸಾಕಷ್ಟು ಸಮಯವಿಲ್ಲ, ಕೆಲವರಿಗೆ ಹಣದ ಕೊರತೆಯೂ ಇದೆ.
ಆದ್ದರಿಂದ ಖರ್ಚೇ ಇಲ್ಲದೆ ಮನೆಯಲ್ಲಿಯೇ ತೂಕ ಇಳಿಸುವ ಸುಲಭದ ವಿಧಾನವನ್ನು ಆಯ್ದುಕೊಳ್ಳಬಹುದು. ಇದಕ್ಕಾಗಿ ಸ್ಕಿಪ್ಪಿಂಗ್‌ ಪ್ರಾರಂಭಿಸಿ. ಈ ವ್ಯಾಯಾಮದಿಂದ ಅನೇಕ ಪ್ರಯೋಜನಗಳಿವೆ. ಸ್ಕಿಪ್ಪಿಂಗ್‌ ಮಾಡುವುದರಿಂದ ತೂಕ ಕಡಿಮೆಯಾಗುತ್ತದೆ. ಈ ಹಿಂದೆ ಪುಟ್ಟ ಪುಟ್ಟ ಮಕ್ಕಳೆಲ್ಲ ಸ್ಕಿಪ್ಪಿಂಗ್‌ ಆಡುತ್ತಿದ್ದರು. ಆದರೆ ಕಾಲಾನಂತರದಲ್ಲಿ ಈ ಅಭ್ಯಾಸವು ಕಳೆದುಹೋಗಿದೆ. ಈಗ ಮತ್ತೆ ಈ ವ್ಯಾಯಾಮವನ್ನು ಪ್ರಾರಂಭಿಸುವ ಸಮಯ ಬಂದಿದೆ.
ನೀವು ಪ್ರತಿದಿನ 20 ರಿಂದ 25 ನಿಮಿಷಗಳ ಕಾಲ ನಿರಂತರವಾಗಿ ಸ್ಕಿಪ್ಪಿಂಗ್‌ ಮಾಡಿದರೆ ಹೊಟ್ಟೆ ಮತ್ತು ಸೊಂಟದ ಕೊಬ್ಬು ತ್ವರಿತವಾಗಿ ಕಡಿಮೆಯಾಗಲು ಪ್ರಾರಂಭಿಸುತ್ತದೆ. ಏಕೆಂದರೆ ಇದು ದಿನಕ್ಕೆ 200-300 ಕ್ಯಾಲೊರಿಗಳನ್ನು ಬರ್ನ್ ಮಾಡುತ್ತದೆ. ಜೊತೆಗೆ ದೇಹದ ತ್ರಾಣವೂ ಹೆಚ್ಚಾಗುತ್ತದೆ. ಪ್ರತಿನಿತ್ಯ ಸ್ಕಿಪ್ಪಿಂಗ್‌ ಮಾಡಿದರೆ ರಕ್ತ ಪರಿಚಲನೆ ಉತ್ತಮವಾಗಿರುತ್ತದೆ. ಈ ವ್ಯಾಯಾಮವನ್ನು ಅಭ್ಯಾಸ ಮಾಡಿಕೊಂಡರೆ ಹೃದಯದ ಕಾಯಿಲೆಗಳ ಅಪಾಯವು ಕಡಿಮೆಯಾಗುತ್ತದೆ.
ಸ್ಕಿಪ್ಪಿಂಗ್‌ ಮಾನಸಿಕ ಆರೋಗ್ಯಕ್ಕೆ ಸಹ ಪ್ರಯೋಜನಕಾರಿ. ಇದು ಖಿನ್ನತೆಯನ್ನು ದೂರ ಮಾಡುತ್ತದೆ. ಅಷ್ಟೇ ಅಲ್ಲ ಸ್ಕಿಪ್ಪಿಂಗ್‌ ನಮ್ಮ ಮೂಳೆಗಳನ್ನು ಬಲಪಡಿಸಲು ಸಹಾಯ ಮಾಡುತ್ತದೆ. ಹದಿಹರೆಯದವರು ಸ್ಕಿಪ್ಪಿಂಗ್‌ ಅಭ್ಯಾಸ ಮಾಡಿಕೊಂಡರೆ ಎತ್ತರವನ್ನು ಸಹ ಹೆಚ್ಚಿಸಿಕೊಳ್ಳಬಹುದು.
Loading ...