ಬೆಳಗ್ಗೆ ಎದ್ದ ತಕ್ಷಣ ಕಾಫಿ ಕುಡಿಯುವುದು, ಕೆಲಸದ ನಡುವೆ ಗಂಟೆಗಟ್ಟಲೆ ಕುರ್ಚಿಯಲ್ಲೇ ಕುಳಿತುಕೊಳ್ಳುವುದು, ವ್ಯಾಯಾಮಕ್ಕೆ ಸಮಯವಿಲ್ಲ ಎಂದು ಮುಂದೂಡುವುದು… ಇವೆಲ್ಲವೂ ನಮ್ಮಲ್ಲಿ ಬಹುತೇಕರ ದಿನಚರಿಯ ಭಾಗವಾಗಿವೆ. ಆದರೆ, ಆರೋಗ್ಯಕ್ಕೆ ಹಾನಿಯಾಗದ ಸಾಮಾನ್ಯ ಅಭ್ಯಾಸಗಳು ಎಂದೇ ನಾವು ಭಾವಿಸಿರುವ ಇವುಗಳಲ್ಲಿ ಕೆಲವು ಮೂಳೆಗಳ ಆರೋಗ್ಯದ ಮೇಲೂ ಪರಿಣಾಮ ಬೀರಬಹುದು ಎಂಬುದು ನಿಮಗೆ ಗೊತ್ತೇ?
ವಿಶೇಷವೆಂದರೆ, ಮೂಳೆಗಳು ದುರ್ಬಲವಾಗುತ್ತಿದ್ದರೂ ಆರಂಭದಲ್ಲಿ ಯಾವುದೇ ನೋವು ಅಥವಾ ಅಸ್ವಸ್ಥತೆ ಕಾಣಿಸಿಕೊಳ್ಳದಿರಬಹುದು. ಎಲ್ಲವೂ ಸರಿಯಾಗಿಯೇ ಇದೆ ಎಂದುಕೊಂಡಿರುವಾಗಲೇ ಆಸ್ಟಿಯೊಪೊರೋಸಿಸ್ (Osteoporosis) ಎಂಬ ಸಮಸ್ಯೆ ಮೂಳೆಗಳ ಸಾಂದ್ರತೆಯನ್ನು ನಿಧಾನವಾಗಿ ಕಡಿಮೆ ಮಾಡಬಹುದು. ಕೆಲವೊಮ್ಮೆ ಸಣ್ಣದಾಗಿ ಎಡವಿ ಬಿದ್ದರೂ ಮೂಳೆ ಮುರಿಯುವಷ್ಟು ದುರ್ಬಲವಾಗುವ ಸಾಧ್ಯತೆಯಿದೆ.
ವಯಸ್ಸಾದ ನಂತರ ಮಾತ್ರ ಮೂಳೆಗಳ ಬಗ್ಗೆ ಕಾಳಜಿ ವಹಿಸಿದರೆ ಸಾಕು ಎಂದುಕೊಳ್ಳುವವರೂ ಇದ್ದಾರೆ. ಆದರೆ, ನಮ್ಮ ಇಂದಿನ ಆಹಾರ ಪದ್ಧತಿ ಮತ್ತು ಜೀವನಶೈಲಿಯೇ ಮುಂದಿನ ದಿನಗಳಲ್ಲಿ ಮೂಳೆಗಳ ಆರೋಗ್ಯ ಹೇಗಿರಲಿದೆ ಎಂಬುದನ್ನು ನಿರ್ಧರಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಹಾಗಾದರೆ, ನಾವು ಪ್ರತಿದಿನ ಅರಿವಿಲ್ಲದೆ ಮಾಡುತ್ತಿರುವ ಯಾವ ಏಳು ತಪ್ಪುಗಳು ಮೂಳೆಗಳನ್ನು ದುರ್ಬಲಗೊಳಿಸುತ್ತಿವೆ?
ನಿಮ್ಮ ಮೂಳೆಗಳ ಬಲ ಕಸಿಯಬಹುದಾದ 7 ಅಭ್ಯಾಸಗಳು
1. ಕ್ಯಾಲ್ಸಿಯಂ, ವಿಟಮಿನ್ ಡಿ ಬಗ್ಗೆ ನಿರ್ಲಕ್ಷ್ಯ
ಹಾಲು ಕುಡಿಯದಿರುವುದು, ಪೌಷ್ಟಿಕ ಆಹಾರ ಸೇವಿಸದಿರುವುದು ಅಥವಾ ವಿಟಮಿನ್ ಡಿ ಕೊರತೆಯ ಬಗ್ಗೆ ಗಮನ ಕೊಡದಿರುವುದು ಮೂಳೆಗಳ ಆರೋಗ್ಯಕ್ಕೆ ಸಮಸ್ಯೆಯಾಗಬಹುದು. ಮೂಳೆಗಳಿಗೆ ಕ್ಯಾಲ್ಸಿಯಂ ಅಗತ್ಯವಿದ್ದರೆ, ಅದನ್ನು ದೇಹ ಹೀರಿಕೊಳ್ಳಲು ವಿಟಮಿನ್ ಡಿ ಸಹಾಯ ಮಾಡುತ್ತದೆ.
2. ಕುಳಿತಲ್ಲೇ ದಿನ ಕಳೆಯುವ ಅಭ್ಯಾಸ
ಬೆಳಗ್ಗೆಯಿಂದ ಸಂಜೆಯವರೆಗೆ ಕಂಪ್ಯೂಟರ್ ಮುಂದೆ ಕೆಲಸ, ಮನೆಗೆ ಬಂದ ಬಳಿಕ ಮೊಬೈಲ್ ನೋಡುತ್ತಾ ಕುಳಿತುಕೊಳ್ಳುವುದು… ಹೀಗೆ ದೈಹಿಕ ಚಟುವಟಿಕೆಯೇ ಇಲ್ಲದ ಜೀವನಶೈಲಿ ಮೂಳೆ ಮತ್ತು ಸ್ನಾಯುಗಳ ಬಲದ ಮೇಲೆ ಪರಿಣಾಮ ಬೀರಬಹುದು. ಪ್ರತಿದಿನ ಸ್ವಲ್ಪ ಸಮಯ ವಾಕಿಂಗ್ ಮಾಡುವುದು ಕೂಡ ಉತ್ತಮ ಅಭ್ಯಾಸ.
3. ವ್ಯಾಯಾಮ ಎಂದರೆ ದೂರ ಓಡುವುದು
ವ್ಯಾಯಾಮಕ್ಕೆ ಸಮಯವಿಲ್ಲ, ವಯಸ್ಸಾದ ಮೇಲೆ ವ್ಯಾಯಾಮ ಮಾಡುವುದು ಕಷ್ಟ ಎಂಬ ಕಾರಣಕ್ಕೆ ಹಲವರು ದೈಹಿಕ ಚಟುವಟಿಕೆಯಿಂದ ದೂರ ಉಳಿಯುತ್ತಾರೆ. ಆದರೆ, ಸೂಕ್ತವಾದ ವೇಟ್ ಟ್ರೈನಿಂಗ್ ಮತ್ತು ಶಕ್ತಿ ಹೆಚ್ಚಿಸುವ ವ್ಯಾಯಾಮಗಳು ಸ್ನಾಯುಗಳ ಬಲ ಹಾಗೂ ಮೂಳೆಗಳ ಆರೋಗ್ಯ ಕಾಪಾಡಲು ನೆರವಾಗುತ್ತವೆ.
4. ಧೂಮಪಾನವನ್ನು ಸಾಮಾನ್ಯವೆಂದು ಭಾವಿಸುವುದು
ಧೂಮಪಾನದಿಂದ ಶ್ವಾಸಕೋಶಕ್ಕೆ ಹಾನಿಯಾಗುತ್ತದೆ ಎಂಬುದು ಎಲ್ಲರಿಗೂ ಗೊತ್ತು. ಆದರೆ, ಇದರ ಪರಿಣಾಮ ಮೂಳೆಗಳ ಮೇಲೂ ಬೀಳಬಹುದು. ನಿರಂತರ ಧೂಮಪಾನವು ಮೂಳೆಗಳ ಆರೋಗ್ಯವನ್ನು ಹದಗೆಡಿಸಿ ಮುರಿತದ ಅಪಾಯವನ್ನು ಹೆಚ್ಚಿಸಬಹುದು.
5. ಮದ್ಯಪಾನದ ಅತಿಯಾದ ಅಭ್ಯಾಸ
ಕೆಲವರಿಗೆ ಪ್ರತಿದಿನ ಮದ್ಯಪಾನ ಮಾಡುವುದು ದಿನಚರಿಯ ಭಾಗವಾಗಿರಬಹುದು. ಆದರೆ, ಅತಿಯಾದ ಮದ್ಯಪಾನವು ಮೂಳೆಗಳ ಆರೋಗ್ಯಕ್ಕೆ ಹಾನಿ ಉಂಟುಮಾಡಬಹುದು. ಜೊತೆಗೆ ದೇಹದ ಸಮತೋಲನ ತಪ್ಪಿ ಕೆಳಗೆ ಬೀಳುವ ಅಪಾಯವೂ ಹೆಚ್ಚಾಗಬಹುದು.
6. ತೂಕ ಇಳಿಸುವ ಭರದಲ್ಲಿ ಆಹಾರ ಕಡಿತ
ತೂಕ ಕಡಿಮೆ ಮಾಡಿಕೊಳ್ಳಬೇಕೆಂದು ಊಟ ಬಿಡುವುದು, ಆಹಾರವನ್ನು ಅತಿಯಾಗಿ ನಿಯಂತ್ರಿಸುವುದು ಕೆಲವರ ಅಭ್ಯಾಸ. ಆದರೆ, ಇಂತಹ ಆಹಾರ ಪದ್ಧತಿಯಿಂದ ದೇಹಕ್ಕೆ ಅಗತ್ಯವಿರುವ ಪ್ರೋಟೀನ್, ಕ್ಯಾಲ್ಸಿಯಂ ಮತ್ತು ವಿಟಮಿನ್ ಡಿ ಸರಿಯಾಗಿ ಸಿಗದೇ ಇರಬಹುದು. ಇದರಿಂದ ಮೂಳೆಗಳು ಮತ್ತು ಸ್ನಾಯುಗಳ ಆರೋಗ್ಯದ ಮೇಲೆ ಪರಿಣಾಮ ಬೀರಬಹುದು.
7. ನೋವಿಲ್ಲವೆಂದು ಮೂಳೆಗಳ ಆರೋಗ್ಯದ ಬಗ್ಗೆ ತಲೆಕೆಡಿಸಿಕೊಳ್ಳದಿರುವುದು
ಇದು ಬಹುತೇಕರು ಮಾಡುವ ದೊಡ್ಡ ತಪ್ಪು. ದೇಹದಲ್ಲಿ ನೋವಿಲ್ಲ, ನಡೆಯಲು ಯಾವುದೇ ತೊಂದರೆಯಿಲ್ಲ ಎಂದರೆ ಮೂಳೆಗಳು ಗಟ್ಟಿಯಾಗಿವೆ ಎಂದರ್ಥವಲ್ಲ. ಆಸ್ಟಿಯೊಪೊರೋಸಿಸ್ ಹಲವು ವರ್ಷಗಳವರೆಗೆ ಯಾವುದೇ ಲಕ್ಷಣವಿಲ್ಲದೆ ಬೆಳೆಯಬಹುದು. ವಯಸ್ಸು, ಕುಟುಂಬದ ಆರೋಗ್ಯ ಇತಿಹಾಸ ಅಥವಾ ಹಿಂದಿನ ಮೂಳೆ ಮುರಿತದಂತಹ ಅಪಾಯದ ಅಂಶಗಳಿದ್ದರೆ ವೈದ್ಯರ ಸಲಹೆ ಪಡೆಯುವುದು ಮುಖ್ಯ.
ಮೂಳೆಗಳು ಗಟ್ಟಿಯಾಗಿರಬೇಕೆಂದರೆ ಇಂದಿನಿಂದಲೇ ಈ ಬದಲಾವಣೆ ಮಾಡಿ!
ಮೂಳೆ ಮುರಿದ ಬಳಿಕ ಚಿಕಿತ್ಸೆ ಪಡೆಯುವುದಕ್ಕಿಂತ ಮೊದಲೇ ಅವುಗಳ ಆರೋಗ್ಯ ಕಾಪಾಡಿಕೊಳ್ಳುವುದು ಉತ್ತಮ. ಸಮತೋಲಿತ ಆಹಾರ, ಸಾಕಷ್ಟು ಕ್ಯಾಲ್ಸಿಯಂ ಮತ್ತು ವಿಟಮಿನ್ ಡಿ, ನಿಯಮಿತ ವಾಕಿಂಗ್, ಸೂಕ್ತವಾದ ವ್ಯಾಯಾಮ ಹಾಗೂ ಧೂಮಪಾನದಿಂದ ದೂರವಿರುವುದು ಮುಖ್ಯ.
ನೆನಪಿಡಿ, ಮೂಳೆಗಳು ದುರ್ಬಲವಾಗುವಾಗ ಯಾವಾಗಲೂ ಎಚ್ಚರಿಕೆಯ ಗಂಟೆ ಬಾರಿಸುವುದಿಲ್ಲ. ಹೀಗಾಗಿ ನೋವು ಕಾಣಿಸಿಕೊಳ್ಳುವವರೆಗೆ ಕಾಯದೆ ಇಂದಿನಿಂದಲೇ ನಿಮ್ಮ ಮೂಳೆಗಳ ಆರೋಗ್ಯದ ಬಗ್ಗೆ ಕಾಳಜಿ ವಹಿಸಿ.
ಹಕ್ಕುತ್ಯಾಗ (Disclaimer): ಈ ಲೇಖನದಲ್ಲಿರುವ ಮಾಹಿತಿಯು ಸಾಮಾನ್ಯ ಆರೋಗ್ಯ ಜಾಗೃತಿಗಾಗಿ ಮಾತ್ರ. ಇದನ್ನು ವೈದ್ಯಕೀಯ ಸಲಹೆ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಪರಿಗಣಿಸಬಾರದು. ಆಹಾರ ಪದ್ಧತಿಯಲ್ಲಿ ಬದಲಾವಣೆ ಮಾಡಿಕೊಳ್ಳುವ ಮೊದಲು, ಪೌಷ್ಟಿಕಾಂಶಗಳ ಪೂರಕ ಮಾತ್ರೆಗಳನ್ನು ಸೇವಿಸುವ ಮೊದಲು ಅಥವಾ ಹೊಸ ವ್ಯಾಯಾಮ ಆರಂಭಿಸುವ ಮೊದಲು ಅರ್ಹ ವೈದ್ಯರು ಅಥವಾ ಪೌಷ್ಟಿಕತಜ್ಞರ ಸಲಹೆ ಪಡೆಯುವುದು ಸೂಕ್ತ. ಯಾವುದೇ ಆರೋಗ್ಯ ಸಮಸ್ಯೆ ಅಥವಾ ಲಕ್ಷಣಗಳು ಕಂಡುಬಂದಲ್ಲಿ ವೈದ್ಯರನ್ನು ಸಂಪರ್ಕಿಸಿ.
