ಜಾಗತಿಕ ಸೌಂದರ್ಯವರ್ಧಕ ಉದ್ಯಮದಲ್ಲಿ ಪ್ರಸಿದ್ಧ ಹೆಸರು ಗಳಿಸಿರುವ ‘ಹುಡಾ ಬ್ಯೂಟಿ’ (Huda Beauty) ಬ್ರ್ಯಾಂಡ್‌ನ ಸಂಸ್ಥಾಪಕಿ ಹಾಗೂ ಉದ್ಯಮಿ ಹುಡಾ ಕಟ್ಟನ್, ಈ ಬಾರಿಯ ದೀಪಾವಳಿ ಹಬ್ಬದ ಆಚರಣೆಗೆ ಭಾರತೀಯ ಸಾಂಪ್ರದಾಯಿಕ ಉಡುಪಿನಲ್ಲಿ ಕಂಗೊಳಿಸುವ ಮೂಲಕ ಜಾಗತಿಕ ಫ್ಯಾಷನ್ ಪ್ರಿಯರ ಗಮನ ಸೆಳೆದಿದ್ದಾರೆ. ಸೋಷಿಯಲ್ ಮೀಡಿಯಾದಲ್ಲಿ ಕೋಟ್ಯಂತರ ಹಿಂಬಾಲಕರನ್ನು ಹೊಂದಿರುವ ಅವರು, ಭಾರತೀಯ ಕಲೆ ಮತ್ತು ಸಂಸ್ಕೃತಿಗೆ ಗೌರವ ಸೂಚಿಸುವ ರೀತಿಯಲ್ಲಿ ಅಚ್ಚ ಕನ್ನಡತಿಯಂತೆ ಸೀರೆಯುಟ್ಟು ಮಿಂಚಿದ್ದಾರೆ.
ದೀಪಾವಳಿ ಸಂಭ್ರಮಕ್ಕಾಗಿ ಹುಡಾ ಕಟ್ಟನ್ ಅವರು ಪ್ರಸಿದ್ಧ ಡಿಸೈನರ್ ಮಹಿಮಾ ಮಹಾಜನ್ ವಿನ್ಯಾಸಗೊಳಿಸಿದ ‘ಯಾಮಿನಿ’ ಸೀರೆಯನ್ನು ಆಯ್ಕೆ ಮಾಡಿಕೊಂಡಿದ್ದರು. ಸಿಂಧೂರಿ ಕೆಂಪು ಬಣ್ಣದ ಈ ಪ್ರೀ-ಡ್ರೇಪ್ಡ್ ಸೀರೆಯ ಮೌಲ್ಯ ಬರೋಬ್ಬರಿ 95,000 ರೂಪಾಯಿ ಆಗಿದೆ. ಬನಾರಸಿ ಸಿಲ್ಕ್ ಚಂದೇರಿ ಮತ್ತು ಬನಾರಸಿ ಜಾರ್ಜೆಟ್ ಬಟ್ಟೆಯಿಂದ ತಯಾರಿಸಲಾದ ಈ ಸೀರೆಯಲ್ಲಿ ಆಕರ್ಷಕ ರೇಷ್ಮೆ ದಾರದ ಸೂಜಿ ಕೆಲಸ, ಮೈಕ್ರೋ-ಬೀಡ್ಸ್ ಹಾಗೂ ಸಾಂಪ್ರದಾಯಿಕ ಝರ್ದೋಜಿ ಎಂಬ್ರಾಯ್ಡರಿಯ ಸಸ್ಯೋದ್ಯಾನ ಮಾದರಿಯ ಕಲಾಕೃತಿಗಳು ಸೀರೆಯ ಅಂಚುಗಳಲ್ಲಿ ಮನಮೋಹಕವಾಗಿ ಮೂಡಿಬಂದಿವೆ.
ಈ ಅದ್ಭುತ ಉಡುಪಿಗೆ ತಕ್ಕಂತೆ ಹುಡಾ ಕಟ್ಟನ್ ಅವರು ‘ರೆಡ್ ಡಾಟ್ ಜ್ಯುವೆಲ್ಸ್’ ಬ್ರ್ಯಾಂಡ್ ವಿನ್ಯಾಸಗೊಳಿಸಿದ ಬೃಹತ್ ಕಟ್-ಪೋಲ್ಕಿ ವಜ್ರದ ನೆಕ್ಲೇಸ್, ಚಿನ್ನದ ಕಫ್‌ಗಳು ಹಾಗೂ ಕಡುಗೆಂಪು ಬಣ್ಣದ ಬಳೆಗಳನ್ನು ಧರಿಸಿದ್ದರು. ತಮ್ಮದೇ ಬ್ರ್ಯಾಂಡ್‌ಗೆ ಹೆಸರಾದ ಪರ್ಫೆಕ್ಟ್ ಮ್ಯಾಟ್ ಬೇಸ್ ಮೇಕಪ್, ಸ್ಮೋಕಿ ಐ ಮೇಕಪ್ ಹಾಗೂ ಬ್ರೈಟ್ ರೆಡ್ ಲಿಪ್‌ಸ್ಟಿಕ್‌ನೊಂದಿಗೆ ಸಾಂಪ್ರದಾಯಿಕ ಮತ್ತು ಮಾಡರ್ನ್ ಫ್ಯಾಷನ್ ಸಮ್ಮಿಲನದಂತೆ ಫೋಟೋಗಳಿಗೆ ಪೋಸ್ ನೀಡಿದ್ದಾರೆ.
ಹುಡಾ ಕಟ್ಟನ್ ಅವರು ಭಾರತೀಯ ಸಾಂಪ್ರದಾಯಿಕ ಉಡುಪಿನಲ್ಲಿ ಮಿಂಚುತ್ತಿರುವುದು ಇದೇ ಮೊದಲೇನಲ್ಲ. ಕಳೆದ 2025 ರ ನವೆಂಬರ್ ತಿಂಗಳಲ್ಲಿ ಪ್ರಸಿದ್ಧ ‘ಎಲ್ ಇಂಡಿಯಾ’ (ELLE India) ಮ್ಯಾಗಜೀನ್‌ನ ಡಿಜಿಟಲ್ ಕವರ್ ಶೂಟ್‌ಗಾಗಿ ಖ್ಯಾತ ವಿನ್ಯಾಸಕರಾದ ಅಬು ಜಾನಿ ಮತ್ತು ಸಂದೀಪ್ ಖೋಸ್ಲಾ ರೂಪಿಸಿದ್ದ ಲೈಟ್ ಮೊಚಾ ಬಾದ್ಲಾ ಮೈಕ್ರೋ-ಕ್ರಿಸ್ಟಲ್ ಸೀರೆಯನ್ನು ಧರಿಸಿ ಫ್ಯಾಷನ್ ಲೋಕದಲ್ಲಿ ಭಾರಿ ಸದ್ದು ಮಾಡಿದ್ದರು.
