ಬೆಂಗಳೂರು: ಮಾಲ್ ಗಳಲ್ಲಿ ಜ್ಯೂಸ್ ಹಾಗೂ ತಂಪು ಪಾನೀಯಗಳನ್ನು ಕುಡಿಯುವ ಗ್ರಾಹಕರೇ ಎಚ್ಚರ! ಜನಪ್ರಿಯ ಮಾಲ್ ನಲ್ಲಿರುವ ಆಹಾರ ಮಳಿಗೆಯಲ್ಲಿ ಗ್ರಾಹಕರ ಆರೋಗ್ಯದ ಜೊತೆ ಚೆಲ್ಲಾಟವಾಡುತ್ತಿರುವ ಗಂಭೀರ ಆರೋಪ ಕೇಳಿಬಂದಿದೆ. ಬೇರೆಯವರು ಜ್ಯೂಸ್ ಕುಡಿದು ಬಿಸಾಡಿದ ಬಳಸಿದ ಕಪ್‌ಗಳನ್ನೇ ಮತ್ತೆ ಗ್ರಾಹಕರಿಗೆ ಜ್ಯೂಸ್ ನೀಡಲು ಬಳಸಲಾಗುತ್ತಿದೆ ಎಂಬ ಆತಂಕಕಾರಿ ವಿಚಾರ ಬೆಳಕಿಗೆ ಬಂದಿದೆ.
ಬೆಂಗಳೂರಿನ ಕನಕಪುರ ರಸ್ತೆಯ ಫೋರಂ ಮಾಲ್‌ನ ಪಿವಿಆರ್ ಇನಾಕ್ಸ್‌ನಲ್ಲಿ ಈ ಘಟನೆ ನಡೆದಿರುವುದಾಗಿ ಮಾಹಿತಿ ಲಭ್ಯವಾಗಿದೆ. ಈ ಹಿನ್ನೆಲೆಯಲ್ಲಿ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಇಲಾಖೆ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ತಪಾಸಣೆ ನಡೆಸಿದ್ದಾರೆ.
ನೊಂದ ಗ್ರಾಹಕರೊಬ್ಬರಿಂದ ಸಂದೇಶ.
ನನಗಾದ ಈ ಅನುಭವ ಅತ್ಯಂತ ಅಹಿತಕರವಾಗಿತ್ತು. ಶಾಪಿಂಗ್ ಮಾಲ್‌ಗಳಿಗೆ ಭೇಟಿ ನೀಡುವಾಗ ಎಲ್ಲರೂ ಎಚ್ಚರಿಕೆಯಿಂದ ಇರುವಂತೆ ನಾನು ವಿನಂತಿಸುತ್ತೇನೆ.
ಇಂದು, ನಾನು ನನ್ನ ಕುಟುಂಬದೊಂದಿಗೆ ಕನಕಪುರ ರಸ್ತೆಯಲ್ಲಿರುವ ‘ಫೋರಮ್ ಮಾಲ್’ (Forum Mall) ಗೆ ಚಲನಚಿತ್ರ ವೀಕ್ಷಿಸಲು ಹೋಗಿದ್ದೆ. ಎಂದಿನಂತೆ, ನಾವು ಪಾಪ್‌ಕಾರ್ನ್ ಮತ್ತು ಪೆಪ್ಸಿಯನ್ನು ಆರ್ಡರ್ ಮಾಡಿದೆವು.
ಪೆಪ್ಸಿ ನೀಡಲು ಅವರು ಬಳಸುತ್ತಿದ್ದ ಪೇಪರ್ ಕಪ್‌ಗಳನ್ನು ಗಮನಿಸಿದಾಗ ನನಗೆ ಅನುಮಾನ ಬಂತು. ಹಾಗಾಗಿ, ನಾನು ಅವರ ಬಳಿ ಇದ್ದ ಎಲ್ಲಾ ಕಪ್‌ ಗಳನ್ನು ಹೊರತೆಗೆದು ತೋರಿಸುವಂತೆ ಕೇಳಿದೆ. ಅವರು ಕಪ್‌ ಗಳನ್ನು ತೋರಿಸಿದಾಗ ನನಗೆ ನಿಜಕ್ಕೂ ಆಘಾತವಾಯಿತು; ಏಕೆಂದರೆ ಅಲ್ಲಿನ ಸುಮಾರು 99% ಕಪ್‌ಗಳು ಈಗಾಗಲೇ ಬಳಕೆಯಾದಂತೆ ಕಂಡುಬಂದವು.
ನೀವು ವೀಡಿಯೊದಲ್ಲಿ ನೋಡುವಂತೆ, ಗ್ರಾಹಕರು ಪೆಪ್ಸಿ ಕುಡಿಯಲು ಬಳಸಿದ ಕಪ್‌ ಗಳನ್ನು ಸಂಗ್ರಹಿಸಿ, ಅವುಗಳನ್ನೇ ಮತ್ತೆ ಇತರ ಗ್ರಾಹಕರಿಗೆ ಪೆಪ್ಸಿ ನೀಡಲು ಬಳಸಲಾಗುತ್ತಿತ್ತು ಎಂದು ತೋರುತ್ತದೆ.
ನಾನು ಅವರನ್ನು ಪ್ರಶ್ನಿಸಿ ನನ್ನ ಆಕ್ಷೇಪವನ್ನು ವ್ಯಕ್ತಪಡಿಸಿದಾಗ, ಸಿಬ್ಬಂದಿ ಪದೇ ಪದೇ ಕ್ಷಮೆಯಾಚಿಸಿದರು. ಈ ಘಟನೆಯನ್ನು ನಾನು ನನ್ನ ಮೊಬೈಲ್ ಫೋನ್‌ನಲ್ಲಿ ರೆಕಾರ್ಡ್ ಮಾಡಿಕೊಂಡಿದ್ದೇನೆ.
ಇದು ಕೇವಲ ಕನಕಪುರ ರಸ್ತೆಯಲ್ಲಿರುವ ಫೋರಮ್ ಮಾಲ್‌ಗೆ ಮಾತ್ರ ಸೀಮಿತವಾದ ಸಮಸ್ಯೆ ಎಂದು ನನಗೆ ಅನ್ನಿಸುತ್ತಿಲ್ಲ. ಇತರ ಮಾಲ್ ಗಳಲ್ಲೂ ಇದೇ ರೀತಿಯ ಅಕ್ರಮಗಳು ನಡೆಯುತ್ತಿರಬಹುದು ಎಂದು ನನಗೆ ಸಂಶಯವಿದೆ.
ನನ್ನದೊಂದು ವಿನಮ್ರ ಮನವಿ: ಶಾಪಿಂಗ್ ಮಾಲ್‌ಗಳಲ್ಲಿ ಪಾಪ್‌ಕಾರ್ನ್, ಪೆಪ್ಸಿ ಅಥವಾ ಕೋಕ್ ಖರೀದಿಸುವಾಗ ದಯವಿಟ್ಟು ಎಚ್ಚರಿಕೆಯಿಂದಿರಿ. ಸಾಧ್ಯವಾದರೆ, ಇಂತಹ ವಸ್ತುಗಳನ್ನು ಖರೀದಿಸುವುದನ್ನು ತಪ್ಪಿಸಿ.
ದಯವಿಟ್ಟು ಈ ವೀಡಿಯೊವನ್ನು ನಿಮ್ಮ ಸ್ನೇಹಿತರು ಮತ್ತು ಕುಟುಂಬದವರೊಂದಿಗೆ ಹಂಚಿಕೊಳ್ಳಿ. ನಿಮ್ಮ ಆರೋಗ್ಯದ ಬಗ್ಗೆ ಕಾಳಜಿ ವಹಿಸಿ ಮತ್ತು ಜಾಗರೂಕರಾಗಿರಿ ಎಂದು ತಿಳಿಸಿದ್ದಾರೆ.
ಸಚಿವ ಯು.ಟಿ. ಖಾದರ್‌ರಿಂದ ಮಾಹಿತಿ: ನೋಟಿಸ್ ಜಾರಿ, ಜ್ಯೂಸ್ ಕೌಂಟರ್ ಬಂದ್
ಈ ಪ್ರಕರಣದ ಕುರಿತು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವ ಯು.ಟಿ. ಖಾದರ್ ಅವರು ಮಾಹಿತಿ ಹಂಚಿಕೊಂಡಿದ್ದಾರೆ. ಗ್ರಾಹಕರಿಗೆ ಜ್ಯೂಸ್ ನೀಡಲು ಬಳಸುತ್ತಿದ್ದ ಕಪ್‌ಗಳ ಕುರಿತು ದೂರು ಬಂದ ಹಿನ್ನೆಲೆಯಲ್ಲಿ ಆಹಾರ ಸುರಕ್ಷತಾ ಅಧಿಕಾರಿಗಳು ಸ್ಥಳಕ್ಕೆ ತೆರಳಿ ಪರಿಶೀಲನೆ ನಡೆಸಿದ್ದಾರೆ.
ಪರಿಶೀಲನೆಯ ಸಂದರ್ಭದಲ್ಲಿ ಆಹಾರ ಸುರಕ್ಷತಾ ನಿಯಮಗಳ ಉಲ್ಲಂಘನೆ ಕಂಡುಬಂದಿದೆ. ಈ ಹಿನ್ನೆಲೆಯಲ್ಲಿ ಸಂಬಂಧಪಟ್ಟ ಸಂಸ್ಥೆಗೆ ನೋಟಿಸ್ ನೀಡಲಾಗಿದ್ದು, ಅಲ್ಲಿನ ಜ್ಯೂಸ್ ಮಾರಾಟ ಕೌಂಟರ್ ಅನ್ನು ತಾತ್ಕಾಲಿಕವಾಗಿ ಮುಚ್ಚಿಸಲಾಗಿದೆ ಎಂದು ಸಚಿವರು ತಿಳಿಸಿದ್ದಾರೆ.
ನಮ್ಮ ಆರೋಗ್ಯ ಇಲಾಖೆಯ ಆಹಾರ ಸುರಕ್ಷತಾ ಅಧಿಕಾರಿಗಳು, ಬೆಂಗಳೂರಿನ ಕೋಣನಕುಂಟೆ ಕ್ರಾಸ್‌ನ ಫೋರಂ ಮಾಲ್‌ನಲ್ಲಿರುವ PVR INOX ನಲ್ಲಿ ಗ್ರಾಹಕರಿಗೆ ಜ್ಯೂಸ್ ಕೊಡಲು ಬಳಸುತ್ತಿದ್ದ ಕಪ್‌ಗಳ ಬಗ್ಗೆ ಬಂದ ದೂರಿನ ಮೇರೆಗೆ ಕ್ರಮ ಕೈಗೊಂಡಿದ್ದಾರೆ.
ಪರಿಶೀಲನೆಯ ವೇಳೆ ಆಹಾರ ಸುರಕ್ಷತಾ ನಿಯಮಗಳ ಉಲ್ಲಂಘನೆ ಕಂಡುಬಂದಿದ್ದು, ಸಂಸ್ಥೆಗೆ ನೋಟಿಸ್ ನೀಡಲಾಗಿದೆ ಹಾಗೂ ಜ್ಯೂಸ್ ಮಾರಾಟ ಕೌಂಟರ್ ಅನ್ನು ಮುಚ್ಚಿಸಲಾಗಿದೆ. ಆಹಾರ ಸುರಕ್ಷತೆಯ ವಿಚಾರದಲ್ಲಿ ದೊಡ್ಡ ಬ್ರ್ಯಾಂಡ್ ಆಗಲಿ, ಸಣ್ಣ ಅಂಗಡಿಯಾಗಲಿ ಎಲ್ಲರಿಗೂ ಒಂದೇ ನಿಯಮ. ಎಲ್ಲಾ ಆಹಾರ ಉದ್ದಿಮೆಗಳು ನಿಯಮಗಳನ್ನು ಕಡ್ಡಾಯವಾಗಿ ಪಾಲಿಸಿ, ಗ್ರಾಹಕರ ಆರೋಗ್ಯದ ದೃಷ್ಟಿಯಿಂದ ವ್ಯಾಪಾರ ನಡೆಸಬೇಕು ಎಂದು ಮನವಿ ಮಾಡುತ್ತೇನೆ. ವ್ಯಾಪಾರದಷ್ಟೇ ಸಾರ್ವಜನಿಕ ಆರೋಗ್ಯವೂ ಮುಖ್ಯ. ಎಲ್ಲಾದರೂ ಅಶುಚಿಯಾದ ಆಹಾರ, ಪ್ಯಾಕಿಂಗ್ ಅಥವಾ ವಿತರಣಾ ವಿಧಾನ ಕಂಡುಬಂದರೆ, ಕೆಳಗಿನ ಆಹಾರ ಸುರಕ್ಷತಾ QR ಕೋಡ್ ಸ್ಕ್ಯಾನ್ ಮಾಡಿ ದೂರು ನೀಡಿ. ಪ್ರತಿಯೊಂದು ದೂರನ್ನೂ ಪರಿಶೀಲಿಸಲಾಗುವುದು ಎಂದು ಸಚಿವರು ತಿಳಿಸಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆದ ಘಟನೆ
ಗ್ರಾಹಕರೊಬ್ಬರು ಬಳಸಿದ ಕಪ್‌ಗಳ ಕುರಿತು ಮಳಿಗೆಯ ಸಿಬ್ಬಂದಿಯನ್ನು ಪ್ರಶ್ನಿಸಿರುವ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಕಪ್‌ ಗಳಲ್ಲಿ ಹಿಂದಿನ ಪಾನೀಯದ ಅವಶೇಷಗಳಿದ್ದವು ಎಂಬ ಆರೋಪವೂ ಕೇಳಿಬಂದಿದೆ. ಈ ಘಟನೆ ಗ್ರಾಹಕರಲ್ಲಿ ತೀವ್ರ ಅಸಮಾಧಾನ ಮೂಡಿಸಿದೆ.
ಆಹಾರ ಸುರಕ್ಷತೆಯೇ ಮುಖ್ಯ
ದೊಡ್ಡ ಬ್ರ್ಯಾಂಡ್ ಗಳಾಗಲಿ, ಸಣ್ಣ ಆಹಾರ ಮಳಿಗೆಗಳಾಗಲಿ ಗ್ರಾಹಕರಿಗೆ ಆಹಾರ ಮತ್ತು ಪಾನೀಯಗಳನ್ನು ನೀಡುವಾಗ ಸ್ವಚ್ಛತೆ ಹಾಗೂ ಆಹಾರ ಸುರಕ್ಷತಾ ನಿಯಮಗಳನ್ನು ಕಡ್ಡಾಯವಾಗಿ ಪಾಲಿಸಬೇಕು. ಬಳಸಿದ ಕಪ್‌ಗಳನ್ನು ಮತ್ತೆ ಬಳಕೆ ಮಾಡುವುದು ಗ್ರಾಹಕರ ಆರೋಗ್ಯಕ್ಕೆ ಅಪಾಯ ಉಂಟುಮಾಡುವ ಸಾಧ್ಯತೆಯಿದೆ.
ಎಲ್ಲಿಯಾದರೂ ಅಶುಚಿಯಾದ ಆಹಾರ, ಕಳಪೆ ಪ್ಯಾಕಿಂಗ್ ಅಥವಾ ಅಸುರಕ್ಷಿತ ಆಹಾರ ವಿತರಣಾ ಪದ್ಧತಿ ಕಂಡುಬಂದರೆ ಆಹಾರ ಸುರಕ್ಷತಾ ಇಲಾಖೆಗೆ ದೂರು ನೀಡುವಂತೆ ಸಚಿವರು ಸಾರ್ವಜನಿಕರಲ್ಲಿ ಮನವಿ ಮಾಡಿದ್ದಾರೆ.
ಒಟ್ಟಿನಲ್ಲಿ, ಸಿನಿಮಾ ವೀಕ್ಷಣೆಗೆಂದು ಮಾಲ್‌ಗೆ ತೆರಳುವ ಗ್ರಾಹಕರಿಗೆ ಈ ಘಟನೆ ಎಚ್ಚರಿಕೆಯ ಗಂಟೆಯಾಗಿದೆ. ಆಹಾರ ಮತ್ತು ಪಾನೀಯಗಳನ್ನು ಖರೀದಿಸುವಾಗ ಸ್ವಚ್ಛತೆ ಹಾಗೂ ಗುಣಮಟ್ಟದ ಬಗ್ಗೆ ಗಮನಹರಿಸುವುದು ಅಗತ್ಯವಾಗಿದೆ.
