ದಕ್ಷಿಣ ಆಫ್ರಿಕಾದ ಪ್ರತಿಷ್ಠಿತ ಟಿ20 ಲೀಗ್ ಆಗಿರುವ ‘SA20’ ತನ್ನ ಮೈಲಿಗಲ್ಲಿನ 5ನೇ ಆವೃತ್ತಿಗೆ (Season 5) ಅದ್ಧೂರಿ ಚಾಲನೆ ನೀಡಲು ಸಜ್ಜಾಗಿದೆ. ಜನೆವರಿ 17, 2027 ರಿಂದ ಫೆಬ್ರವರಿ 21, 2027 ರವರೆಗೆ ನಡೆಯಲಿರುವ ಈ ಕ್ರಿಕೆಟ್ ಹಬ್ಬಕ್ಕಾಗಿ ಅಧಿಕೃತ ಪ್ರಚಾರ ಅಭಿಯಾನವನ್ನು ಗುರುವಾರ ಅಧಿಕೃತವಾಗಿ ಅನಾವರಣಗೊಳಿಸಲಾಗಿದೆ.
ಕಳೆದ ಬಾರಿಯ ಫೈನಲಿಸ್ಟ್‌ಗಳ ನಡುವೆ ಉದ್ಘಾಟನಾ ಪಂದ್ಯ
ಗೆಬೆಹಾದ ಸೇಂಟ್ ಜಾರ್ಜ್ ಪಾರ್ಕ್ ಮೈದಾನದಲ್ಲಿ ಜನವರಿ 17 ರಂದು ನಡೆಯಲಿರುವ ಉದ್ಘಾಟನಾ ಪಂದ್ಯದಲ್ಲಿ 3 ಬಾರಿಯ ಚಾಂಪಿಯನ್ ಸನ್ ರೈಸರ್ಸ್ ಈಸ್ಟರ್ನ್ ಕೇಪ್ ಹಾಗೂ ಪ್ರಿಟೋರಿಯಾ ಕ್ಯಾಪಿಟಲ್ಸ್ ತಂಡಗಳು ಮುಖಾಮುಖಿಯಾಗಲಿವೆ. ಸರಣಿಯುದ್ಯಕ್ಕೂ ಮಂಡ್ಯದ ಪಂದ್ಯಗಳನ್ನು ಹೊರತುಪಡಿಸಿ, ವಾರಾಂತ್ಯಗಳಲ್ಲಿ ದಿನಕ್ಕೆರಡು ಪಂದ್ಯಗಳು ನಡೆಯಲಿವೆ. ಪಾರ್ಲ್, ಪ್ರಿಟೋರಿಯಾ, ಡರ್ಬನ್, ಕೇಪ್‌ಟೌನ್ ಮತ್ತು ಜೋಹಾನ್ಸ್‌ಬರ್ಗ್ ನಗರಗಳಲ್ಲಿ ಕ್ರಿಕೆಟ್ ಕದನ ನಡೆಯಲಿದೆ.
ಅಭಿಮಾನಿಗಳಿಗೆ ಧನ್ಯವಾದ ತಿಳಿಸಿದ ಗ್ರೇಮ್ ಸ್ಮಿತ್
SA20 ಸೀಸನ್ 5 ಅಭಿಯಾನಕ್ಕೆ ಚಾಲನೆ ನೀಡಿ ಮಾತನಾಡಿದ ಲೀಗ್ ಕಮಿಷನರ್ ಗ್ರೇಮ್ ಸ್ಮಿತ್, “5ನೇ ಆವೃತ್ತಿಗೆ ಕಾಲಿಡುತ್ತಿರುವ ಈ ಹಂತದಲ್ಲಿ SA20 ಯಶಸ್ಸಿನ ಸಂಪೂರ್ಣ ಶ್ರೇಯಸ್ಸು ಅಭಿಮಾನಿಗಳಿಗೆ ಸಲ್ಲುತ್ತದೆ. ಪ್ರೇಕ್ಷಕರು ಕ್ರೀಡಾಂಗಣಗಳನ್ನು ಭರ್ತಿ ಮಾಡಿ ನೀಡಿರುವ ಬೆಂಬಲಕ್ಕೆ ಧನ್ಯವಾದ ಅರ್ಪಿಸಲು ಈ ಸೀಸನ್ ಅನ್ನು ಮತ್ತಷ್ಟು ವಿಜೃಂಭಣೆಯಿಂದ ಆಯೋಜಿಸುತ್ತಿದ್ದೇವೆ. ಪ್ರಪಂಚದ ಶ್ರೇಷ್ಠ ಟಿ20 ಆಟಗಾರರು ಮತ್ತು ದಕ್ಷಿಣ ಆಫ್ರಿಕಾದ ಉದಯೋನ್ಮುಖ ಯುವ ಪ್ರತಿಭೆಗಳು ಈ ಬಾರಿ ಒಂದೇ ವೇದಿಕೆಯಲ್ಲಿ ಕಣಕ್ಕಿಳಿಯಲಿದ್ದಾರೆ” ಎಂದು ಸಂತಸ ಹಂಚಿಕೊಂಡಿದ್ದಾರೆ.
ಇದೇ ವೇಳೆ ಪಂದ್ಯಾವಳಿಯ ಟಿಕೆಟ್ ಮಾರಾಟವೂ ಆರಂಭಗೊಂಡಿದ್ದು, ಪ್ರೇಕ್ಷಕರಿಗಾಗಿ ಆರಂಭಿಕ ಬೆಲೆ ಅತ್ಯಂತ ಕೈಗೆಟುಕುವ ದರದಲ್ಲಿ ($3) ನಿಗದಿಯಾಗಿದೆ. ಆನ್‌ಲೈನ್ ಮೂಲಕ ಟಿಕೆಟ್‌ಗಳನ್ನು ಕಾಯ್ದಿರಿಸಬಹುದಾಗಿದ್ದು, ನವೆಂಬರ್ 15, 2026 ರಿಂದ ಸ್ಟೇಡಿಯಂ ಕೌಂಟರ್‌ಗಳಲ್ಲೂ ಟಿಕೆಟ್ ಲಭ್ಯವಿರಲಿದೆ.
