ರಾಷ್ಟ್ರ ಪ್ರಶಸ್ತಿ ವಿಜೇತ ಜನಪ್ರಿಯ ನಟಿ ಕೀರ್ತಿ ಸುರೇಶ್ ತಮ್ಮ ಪತಿ ಆಂಟೋನಿ ತಟ್ಟಿಲ್ ಅವರೊಂದಿಗಿನ 15 ವರ್ಷಗಳ ಸುದೀರ್ಘ ಪ್ರೇಮ ಪಯಣ ಮತ್ತು ಮದುವೆಯ ಸಂದರ್ಭದಲ್ಲಿ ಕುಟುಂಬದಲ್ಲಾದ ಘಟನೆಗಳ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾರೆ. 2024 ಡಿಸೆಂಬರ್‌ನಲ್ಲಿ ಗೋವಾದಲ್ಲಿ ವಿವಾಹವಾದ ಈ ಜೋಡಿ, ಮದುವೆಗೂ ಮುನ್ನ ಎದುರಿಸಿದ ಸವಾಲುಗಳ ಬಗ್ಗೆ ನಟಿ ಇತ್ತೀಚಿನ ಸಂದರ್ಶನವೊಂದರಲ್ಲಿ ನೆನಪಿಸಿಕೊಂಡಿದ್ದಾರೆ.
ತಮ್ಮ 12ನೇ ತರಗತಿ ಶಿಕ್ಷಣ ಮುಗಿದ ತಕ್ಷಣ ಅಂದರೆ 2010 ರಲ್ಲಿ ಆಂಟೋನಿ ಅವರೊಂದಿಗೆ ಪ್ರೀತಿ ಪ್ರಾರಂಭವಾಯಿತು ಎಂದು ತಿಳಿಸಿದ ಕೀರ್ತಿ, ಕಾಲೇಜು ದಿನಗಳಲ್ಲಿ ತಮ್ಮ ತಾಯಿ (ಹಿರಿಯ ನಟಿ ಮೇನಕಾ) ತಮ್ಮ ವೈಯಕ್ತಿಕ ಡೈರಿ ಓದಿ ಪ್ರೇಮ ವಿಚಾರವನ್ನು ತಿಳಿದುಕೊಂಡಿದ್ದನ್ನು ಹಂಚಿಕೊಂಡಿದ್ದಾರೆ. “ನನ್ನ ತಾಯಿ ಡೈರಿ ಓದಿದ ನಂತರವೇ ನಮ್ಮ ವಿಷಯ ಮನೆಯಲ್ಲಿ ಗೊತ್ತಾಯಿತು. ಅದಾದ ಮೇಲೆ ನಾನು ಡೈರಿ ಬರೆಯುವುದನ್ನೇ ಸಂಪೂರ್ಣವಾಗಿ ನಿಲ್ಲಿಸಿಬಿಟ್ಟೆ. ಆ ಡೈರಿಯನ್ನು ನನ್ನ ತಾಯಿ ಸುಟ್ಟುಹಾಕಿರಬಹುದು ಅನಿಸುತ್ತದೆ” ಎಂದು ಕೀರ್ತಿ ಹೇಳಿದ್ದಾರೆ.
ಮತ್ತೊಂದೆಡೆ, ಆಂಟೋನಿ ಕ್ರಿಶ್ಚಿಯನ್ ಧರ್ಮಕ್ಕೆ ಸೇರಿದವರಾಗಿದ್ದರಿಂದ ಆರಂಭದಲ್ಲಿ ಮನೆಯಲ್ಲಿ ಈ ಅಂತರಧರ್ಮೀಯ ಸಂಬಂಧಕ್ಕೆ ತೀವ್ರ ವಿರೋಧ ಹಾಗೂ ಸಮಸ್ಯೆಗಳು ಎದುರಾಗಿದ್ದವು. ಕುಟುಂಬದವರನ್ನು ಒಪ್ಪಿಸಲು ಸಾಕಷ್ಟು ಸಮಯ ಬೇಕಾಯಿತು. ಕೀರ್ತಿ ನಟಿಯಾಗುವ ಮೊದಲೇ ಇಬ್ಬರ ಪರಿಚಯವಿದ್ದು, ಒಟ್ಟಿಗೇ ಬೆಳೆದ ಅನುಭವ ಅವರಿಗಿತ್ತು.
ಉದ್ಯಮಿಯಾಗಿರುವ ಆಂಟೋನಿ ಅವರಿಗೆ ಸಿನಿಮಾ ರಂಗದ ಗ್ಲಾಮರ್ ಮತ್ತು ಮಾಧ್ಯಮಗಳ ಗಮನ ಹೊಸದಾಗಿದ್ದರಿಂದ, ಮದುವೆ ಪ್ರಕಟವಾದಾಗ ಅವರು ತೀವ್ರ ಒತ್ತಡಕ್ಕೆ ಒಳಗಾಗಿದ್ದರು ಎಂದು ಕೀರ್ತಿ ತಮಾಷೆಯಾಗಿ ನೆನಪಿಸಿಕೊಂಡಿದ್ದಾರೆ. 2024 ಡಿಸೆಂಬರ್ 12 ರಂದು ಗೋವಾದಲ್ಲಿ ತಮಿಳು ಬ್ರಾಹ್ಮಿಣ ಮತ್ತು ಮಲಯಾಳಿ ಕ್ರಿಶ್ಚಿಯನ್ ಸಂಪ್ರದಾಯಗಳಂತೆ ಇಬ್ಬರ ಮದುವೆ ವಿಜೃಂಭಣೆಯಿಂದ ನೆರವೇರಿತ್ತು.
ಇತ್ತೀಚೆಗೆ ಧರ್ಮರಾಜ್ ಶೆಟ್ಟಿ ನಿರ್ದೇಶನದ ನೆಟ್‌ಫ್ಲಿಕ್ಸ್ ಸರಣಿ ‘ಅಕ್ಕ’ದಲ್ಲಿ ನಟಿ ರಾಧಿಕಾ ಆಪ್ಟೆ ಅವರೊಂದಿಗೆ ಕೀರ್ತಿ ಸುರೇಶ್ ಕೊನೆಯದಾಗಿ ಕಾಣಿಸಿಕೊಂಡಿದ್ದರು.
