ಉಜ್ಜಯಿನಿ: ಮಧ್ಯಪ್ರದೇಶದ ಉಜ್ಜಯಿನಿಯಲ್ಲಿರುವ ದೇವಾಸ್ ರಸ್ತೆಯಲ್ಲಿರುವ ‘ಹೋಟೆಲ್ ಶ್ರೀ ಗಂಗಾ’ದಲ್ಲಿ, ಶನಿವಾರ ರಾತ್ರಿ ಭೂಗತ ತ್ಯಾಜ್ಯ ಸಂಗ್ರಹಣಾ ಕೊಠಡಿಯನ್ನು (ವೇಸ್ಟ್ ಚೇಂಬರ್) ಸ್ವಚ್ಛಗೊಳಿಸುವಾಗ ವಿಷಾನಿಲ ಸೇವಿಸಿ ಕನಿಷ್ಠ ನಾಲ್ವರು ಹೋಟೆಲ್ ಕಾರ್ಮಿಕರು ಮೃತಪಟ್ಟಿದ್ದಾರೆ. ಅವರನ್ನು ರಕ್ಷಿಸಲು ಮುಂದಾದ ಮತ್ತಿಬ್ಬರು ಅಸ್ವಸ್ಥಗೊಂಡಿದ್ದು, ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಮೃತಪಟ್ಟವರನ್ನು ಉಜ್ಜಯಿನಿಯ ವಾಲ್ಮೀಕಿ ನಗರದ ನಿವಾಸಿಗಳಾದ ಕಮಲೇಶ್ ಮತ್ತು ನಿತಿನ್; ಉಜ್ಜಯಿನಿಯ ಸೋಮವಾರಿಯಾದ ನಿವಾಸಿ ವಾಹಿದ್; ಹಾಗೂ ರಾಜಸ್ಥಾನದ ಝಾಲಾವಾರ್‌ನ ನಿವಾಸಿ ಮನೋಜ್ ಮೀನಾ ಎಂದು ಗುರುತಿಸಲಾಗಿದೆ.
ಘಟನೆ ನಡೆದದ್ದು ಹೇಗೆ?
ಶನಿವಾರ ರಾತ್ರಿ 10.30ರ ಸುಮಾರಿಗೆ, ಹೋಟೆಲ್ ಸಿಬ್ಬಂದಿ ತ್ಯಾಜ್ಯ ಸಂಗ್ರಹಣಾ ಕೊಠಡಿಯನ್ನು ಸ್ವಚ್ಛಗೊಳಿಸಲು ಒಳಗೆ ಪ್ರವೇಶಿಸಿದಾಗ ಈ ದುರಂತ ಸಂಭವಿಸಿದೆ. ಹೋಟೆಲ್ ನ ಸಿಹಿ ತಿನಿಸು(ಕಾನ್ಫೆಕ್ಷನರಿ) ಮತ್ತು ಡೈರಿ ವಿಭಾಗಗಳಿಂದ ಉತ್ಪತ್ತಿಯಾಗುವ ತ್ಯಾಜ್ಯವನ್ನು ಇಲ್ಲಿ ಸಂಗ್ರಹಿಸಲಾಗುತ್ತಿತ್ತು ಎಂದು ತಿಳಿದುಬಂದಿದೆ.
ಘಟನಾ ಸ್ಥಳಕ್ಕೆ ರಕ್ಷಣಾ ತಂಡಗಳು, ಪೊಲೀಸ್ ಸಿಬ್ಬಂದಿ ಮತ್ತು ಆಂಬ್ಯುಲೆನ್ಸ್ ಗಳನ್ನು ತಕ್ಷಣವೇ ಕಳುಹಿಸಲಾಯಿತು.
ಉಜ್ಜಯಿನಿ ಪೊಲೀಸ್ ವರಿಷ್ಠಾಧಿಕಾರಿ (SP) ಪ್ರದೀಪ್ ಶರ್ಮಾ ಮತ್ತು ಇತರ ಅಧಿಕಾರಿಗಳ ಮೇಲ್ವಿಚಾರಣೆಯಲ್ಲಿ ರಾತ್ರಿ ತಡವಾಗುವವರೆಗೂ ರಕ್ಷಣಾ ಕಾರ್ಯಾಚರಣೆ ನಡೆಯಿತು.
ರಕ್ಷಣಾ ಕಾರ್ಯಾಚರಣೆಯ ಭಾಗವಾಗಿ, ಕೊಠಡಿಯಲ್ಲಿ ಸಿಲುಕಿದ್ದ ಕಾರ್ಮಿಕರನ್ನು ಹೊರತೆಗೆಯಲು ಎಲೆಕ್ಟ್ರಿಕ್ ಕಟ್ಟರ್ ಬಳಸಿ ಆ ಕೊಠಡಿಯ ಒಂದು ಭಾಗವನ್ನು ಕತ್ತರಿಸಲಾಯಿತು. ಕಾರ್ಮಿಕರನ್ನು ಹೊರತೆಗೆದ ತಕ್ಷಣ, ಅವರನ್ನು ಬದುಕಿಸಲು ಪೊಲೀಸರು ಸಿಪಿಆರ್ (CPR) ನೀಡಲು ಪ್ರಯತ್ನಿಸಿದರಾದರೂ, ಅವರನ್ನು ಉಳಿಸಿಕೊಳ್ಳಲು ಸಾಧ್ಯವಾಗಲಿಲ್ಲ.
ಆಳವಾದ ಕೊಠಡಿಯೊಳಗೆ ವಿಷಾನಿಲದ ಪ್ರಭಾವಕ್ಕೆ ಒಳಗಾಗಿ ಕಾರ್ಮಿಕರು ಮೃತಪಟ್ಟಿರಬಹುದು ಎಂದು ಶಂಕಿಸಲಾಗಿದೆ. ಅವರನ್ನು ರಕ್ಷಿಸಲು ಮುಂದಾದ ಇತರ ಸಿಬ್ಬಂದಿ ಕೂಡ ವಿಷಾನಿಲಕ್ಕೆ ತುತ್ತಾಗಿ ಅಸ್ವಸ್ಥಗೊಂಡರು. ಅವರನ್ನು ಚಿಕಿತ್ಸೆಗಾಗಿ ತಕ್ಷಣವೇ ಆಸ್ಪತ್ರೆಗೆ ಸಾಗಿಸಲಾಯಿತು.
ಪೊಲೀಸರು ಹೇಳಿದ್ದೇನು?
ಪೊಲೀಸರ ಪ್ರಕಾರ, ಈ ಕೆಲಸಕ್ಕಾಗಿ ನೇಮಕಗೊಂಡಿದ್ದ ಹೊರಗಿನ ವ್ಯಕ್ತಿಗಳು ಮತ್ತು ಹೋಟೆಲ್ ಸಿಬ್ಬಂದಿ, ಆಹಾರದ ತ್ಯಾಜ್ಯ ಹಾಗೂ ಇತರ ಕಸವನ್ನು ಸಂಗ್ರಹಿಸುವ ಕೊಠಡಿಯೊಳಗೆ ಪ್ರವೇಶಿಸಿದಾಗ ಈ ಘಟನೆ ನಡೆದಿದೆ.
ಉಜ್ಜಯಿನಿ ಪೊಲೀಸ್ ವರಿಷ್ಠಾಧಿಕಾರಿ ಪ್ರದೀಪ್ ಶರ್ಮಾ ಮಾತನಾಡಿ, ಅನಿಲ ಸೋರಿಕೆಯಾಗಿರಬಹುದು (ಗ್ಯಾಸ್ ಲೀಕ್), ಇದರಿಂದಾಗಿ ಕಾರ್ಮಿಕರು ಪ್ರಜ್ಞೆ ತಪ್ಪಿ ಬಿದ್ದಿರಬಹುದು ಎಂದು ಶಂಕಿಸಲಾಗಿದೆ. ಅವರನ್ನು ರಕ್ಷಿಸಲು ಒಳಗೆ ಹೋದ ಇತರರು ಕೂಡ ವಿಷಾನಿಲದ ಪ್ರಭಾವಕ್ಕೆ ಒಳಗಾಗಿ ಅಸ್ವಸ್ಥಗೊಂಡಿದ್ದು, ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ತಿಳಿಸಿದರು.
“ಶ್ರೀ ಗಂಗಾ ಹೋಟೆಲ್‌ನಲ್ಲಿ, ಸಿಬ್ಬಂದಿ ವರ್ಗದವರು ಮತ್ತು ಈ ಕೆಲಸಕ್ಕಾಗಿ ಹೊರಗಿನಿಂದ ಕರೆಸಲಾದ ಕೆಲವರು, ಉಳಿದ ಆಹಾರ ಹಾಗೂ ತ್ಯಾಜ್ಯವನ್ನು ಸಂಗ್ರಹಿಸುವ ನೆಲಮಟ್ಟದ ಮೇಲಿರುವ ಕೋಣೆಯೊಂದರ (ಚೇಂಬರ್) ಒಳಗೆ ಪ್ರವೇಶಿಸಿದರು. ಅಲ್ಲಿ ಅನಿಲ ಸೋರಿಕೆ ಉಂಟಾದಂತೆ ಕಾಣುತ್ತದೆ; ಇದರಿಂದ ನೆಲವು ಅತ್ಯಂತ ಜಾರುವಂತಾಗಿ, ಒಳಗಿದ್ದವರು ಕುಸಿದು ಬಿದ್ದರು. ಅವರನ್ನು ರಕ್ಷಿಸಲು ಒಳಗೆ ಹೋದ ಇತರರೂ ಸಹ ಕುಸಿದು ಬಿದ್ದರು. ಇವರನ್ನೆಲ್ಲ ರಕ್ಷಿಸಿ ಆಸ್ಪತ್ರೆಗೆ ಸಾಗಿಸಲಾಯಿತು. ಸದ್ಯ ಕೆಲವರ ಸ್ಥಿತಿ ಸ್ಥಿರವಾಗಿದ್ದರೂ, ನಾಲ್ವರ ಸ್ಥಿತಿ ಗಂಭೀರವಾಗಿದೆ. ಪೊಲೀಸರು ಸಿಪಿಆರ್ (CPR) ನೀಡುವ ಮೂಲಕ ಅವರನ್ನು ಪ್ರಜ್ಞೆಗೆ ತರಲು ನಿರಂತರ ಪ್ರಯತ್ನ ನಡೆಸಿದರು. ಆಸ್ಪತ್ರೆಯಲ್ಲಿ ವೈದ್ಯಕೀಯ ತಂಡವನ್ನು ಸನ್ನದ್ಧ ಸ್ಥಿತಿಯಲ್ಲಿ ಇರಿಸಲಾಗಿದೆ. ಈ ನಾಲ್ವರನ್ನೂ ಆಂಬ್ಯುಲೆನ್ಸ್ ಮೂಲಕ ಆಸ್ಪತ್ರೆಗೆ ಕರೆದೊಯ್ಯಲಾಗುತ್ತಿದೆ,” ಎಂದು ಎಸ್‌ಪಿ ಶರ್ಮಾ ತಿಳಿಸಿದ್ದಾರೆ.
ಸಿಹಿತಿಂಡಿ ತಯಾರಿಕಾ ಘಟಕದಿಂದ ಹೊರಬರುವ ತ್ಯಾಜ್ಯಗಳು—ಉದಾಹರಣೆಗೆ ಕಸ, ನೀರು, ಸಕ್ಕರೆ ಪಾಕ, ತುಪ್ಪ ಮತ್ತು ಎಣ್ಣೆ—ಈ ತ್ಯಾಜ್ಯ ಸಂಗ್ರಹಣಾ ಕೋಣೆಯ ಮೂಲಕ ಒಳಚರಂಡಿ ವ್ಯವಸ್ಥೆಗೆ ಸೇರುತ್ತವೆ. ಈ ಕೋಣೆಯಲ್ಲಿ ತಡೆ ಉಂಟಾದರೆ ಅದು ಸಮಸ್ಯೆಗಳಿಗೆ ದಾರಿ ಮಾಡಿಕೊಡುತ್ತದೆ. ‘ಹೋಟೆಲ್ ಶ್ರೀ ಗಂಗಾ’ದ ಸಿಬ್ಬಂದಿ ಇಂತಹ ಸ್ವಚ್ಛತಾ ಕಾರ್ಯಕ್ಕಾಗಿ ಈ ಕೋಣೆಯೊಳಗೆ ಪ್ರವೇಶಿಸಿದ್ದರು ಎನ್ನಲಾಗಿದೆ.
