ಬಾಲಿವುಡ್‌ನ ಜನಪ್ರಿಯ ಹಾಗೂ ತಾರಾ ದಂಪತಿ ರಣಬೀರ್ ಕಪೂರ್ ಮತ್ತು ಆಲಿಯಾ ಭಟ್ ತಮ್ಮ ವೃತ್ತಿಜೀವನ ಮತ್ತು ವೈಯಕ್ತಿಕ ಜೀವನದ ಕಾರಣದಿಂದ ಸದಾ ಸುದ್ದಿಯಲ್ಲಿರುತ್ತಾರೆ. ಇತ್ತೀಚೆಗೆ ಭಾರತೀಯ ಕಿರುತೆರೆಯ ಜನಪ್ರಿಯ ರಿಯಾಲಿಟಿ ಗೇಮ್ ಶೋ ‘ಕೌನ್ ಬನೇಗಾ ಕರೋಡ್‌ಪತಿ ಸೀಸನ್ 18’ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ರಣಬೀರ್ ಕಪೂರ್, ಆಫ್ರಿಕಾದ ಪ್ರಸಿದ್ಧ ಮಸಾಯಿ ಮಾರಾ ಅಭಯಾರಣ್ಯದಲ್ಲಿ ತಮ್ಮ ಧರ್ಮಪತ್ನಿ ಆಲಿಯಾ ಭಟ್ ಅವರಿಗೆ ಪ್ರೇಮ ನಿವೇದನೆ (ಪ್ರಪೋಸ್) ಮಾಡಿದ ರೋಚಕ ಹಾಗೂ ಹಾಸ್ಯಸ್ಪದ ಘಟನೆಯನ್ನು ನೆನಪಿಸಿಕೊಂಡಿದ್ದಾರೆ.
ಸಂಗೀತ ಮತ್ತು ಫೋಟೋಗ್ರಫಿ ಎಂದರೆ ಅತ್ಯಂತ ಪ್ರೀತಿಸುವ ಆಲಿಯಾಗಾಗಿ ತಾವು ಮಾಡಿದ ವಿಶೇಷ ಪ್ಲಾನ್ ಬಗ್ಗೆ ಬಿಗ್ ಬಿ ಅಮಿತಾಭ್ ಬಚ್ಚನ್ ಅವರೊಂದಿಗೆ ರಣಬೀರ್ ಹಂಚಿಕೊಂಡಿದ್ದಾರೆ. “ಸಾಮಾನ್ಯವಾಗಿ ಹೆಣ್ಣುಮಕ್ಕಳಿಗೆ ಸುಂದರವಾದ ಫೋಟೋಗಳನ್ನು ತೆಗೆಸಿಕೊಂಡು ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಳ್ಳುವುದೆಂದರೆ ಅಪಾರ ಇಷ್ಟ. ಆಲಿಯಾ ಕೂಡ ಇದಕ್ಕೆ ಹೊರತಲ್ಲ. ಹೀಗಾಗಿ ನಾನು ಆಫ್ರಿಕಾದ ಕೆನ್ಯಾದಲ್ಲಿರುವ ಮಸಾಯಿ ಮಾರಾ ಕಾಡಿನ ಪ್ರವಾಸದಲ್ಲಿದ್ದಾಗ, ನಮಗೆ ಮಾರ್ಗದರ್ಶಿಯಾಗಿದ್ದ ಗೈಡ್ ಹಾಗೂ ಡ್ರೈವರ್‌ಗೆ ಮುಂಚಿತವಾಗಿಯೇ ದೊಡ್ಡ ಮೊತ್ತದ ಟಿಪ್ಸ್ ನೀಡಿದ್ದೆ. ಕಾಡಿನ ಮಧ್ಯದಲ್ಲಿ ಕಾರು ನಿಲ್ಲಿಸುವಂತೆ ಮತ್ತು ನಾನು ಮೊಣಕಾಲೂರಿ ಉಂಗುರ ತೊಡಿಸುವಾಗ ದೂರದಿಂದ ನಮಗೆ ತಿಳಿಯದಂತೆ ಫೋಟೋಗಳನ್ನು ಕ್ಲಿಕ್ಕಿಸುವಂತೆ ಸೂಚಿಸಿದ್ದೆ” ಎಂದು ರಣಬೀರ್ ವಿವರಿಸಿದರು.
ಆ ವಿಶೇಷ ಕ್ಷಣವನ್ನು ನೆನಪಿಸಿಕೊಳ್ಳುತ್ತಾ ರಣಬೀರ್, “ನಾವು ನಿಂತಿದ್ದ ಸ್ಥಳದಿಂದ ಕೇವಲ 100 ಮೀಟರ್ ಅಂತರದಲ್ಲಿ ಮೂರು ಬೃಹತ್ ಗಂಡು ಸಿಂಹಗಳು ನಿಂತಿದ್ದವು. ಅತ್ತ ಕಾಡಿನ ರಾಜ ಸಿಂಹಗಳಿದ್ದರೆ, ಇತ್ತ ನನ್ನ ಮುಂದೆ ನನ್ನ ನಿಜವಾದ ಶೇರ್ನಿ (ಆಲಿಯಾ ಭಟ್) ನಿಂತಿದ್ದಳು! ಆ ಕ್ಷಣದಲ್ಲಿ ನಾನು ಸಂಪೂರ್ಣವಾಗಿ ಇಲಿಯಂತಾಗಿ, ಹೆದರಿಕೆಯಿಂದಲೇ ಮೊಣಕಾಲೂರಿ ‘ಬೇಬಿ, ವಿಲ್ ಯು ಮ್ಯಾರಿ ಮೀ?’ (ನನ್ನನ್ನು ಮದುವೆಯಾಗುತ್ತೀಯಾ?) ಎಂದು ಉಂಗುರ ಚಾಚಿದೆ. ಅದು ನನ್ನ ಇಡೀ ಜೀವನದಲ್ಲಿ ಅತ್ಯಂತ ರೋಮಾಂಚನಕಾರಿ ಮತ್ತು ಎಂದಿಗೂ ಮರೆಯಲಾಗದ ಅದ್ಭುತ ಕ್ಷಣವಾಗಿತ್ತು” ಎಂದು ತಮಾಷೆಯಾಗಿ ಹೇಳಿದರು. ರಣಬೀರ್ ಅವರ ಈ ಮಾತುಗಳನ್ನು ಕೇಳಿ ಕಾರ್ಯಕ್ರಮದ ನಿರೂಪಕ ಅಮಿತಾಭ್ ಬಚ್ಚನ್ ಸೇರಿದಂತೆ ರಂಗಮಂದಿರದಲ್ಲಿದ್ದ ಪ್ರೇಕ್ಷಕರು ನಗೆಗಡಲಲ್ಲಿ ತೇಲಿದರು.
ಕೆನ್ಯಾದ ಮಸಾಯಿ ಮಾರಾ ಅರಣ್ಯದಲ್ಲಿ ನಿಶ್ಚಿತಾರ್ಥ ಮಾಡಿಕೊಂಡ ರಣಬೀರ್ ಮತ್ತು ಆಲಿಯಾ ಭಟ್, ಏಪ್ರಿಲ್ 14, 2022 ರಂದು ಮುಂಬೈನ ತಮ್ಮ ನಿವಾಸ ‘ವಾಸ್ತು’ನಲ್ಲಿ ಕುಟುಂಬಸ್ಥರು ಹಾಗೂ ಆಪ್ತರ ಸಮ್ಮುಖದಲ್ಲಿ ಸರಳವಾಗಿ ವಿವಾಹವಾಗಿದ್ದರು. ಅದೇ ವರ್ಷ ನವೆಂಬರ್ 6 ರಂದು ಈ ದಂಪತಿಗೆ ಸುಂದರ ಹೆಣ್ಣು ಮಗು ಜನಿಸಿದ್ದು, ಹಿರಿಯ ನಟಿ ನೀತು ಕಪೂರ್ ಅವರ ಸೂಚನೆಯಂತೆ ಮಗುವಿಗೆ ‘ರಾಹಾ’ ಎಂದು ಹೆಸರಿಡಲಾಗಿದೆ. ಪ್ರಸ್ತುತ ಈ ಜೋಡಿ ತಮ್ಮ ವೃತ್ತಿಜೀವನದ ಜೊತೆಗೆ ಮಗಳ ಪಾಲನೆಯಲ್ಲಿ ನಿರತರಾಗಿದ್ದಾರೆ.
