ಮುಂಬೈನಲ್ಲಿ ನಡೆದ ಬಾಲಿವುಡ್ ಮ್ಯೂಸಿಕ್ ಪ್ರಾಜೆಕ್ಟ್ (BMP) ಸಂಗೀತ ಕಾರ್ಯಕ್ರಮದಲ್ಲಿ ಅಕ್ಟೋಬರ್ 24 ರಂದು ಪ್ರದರ್ಶನ ನೀಡುತ್ತಿದ್ದಾಗ ಗಾಯಕಿ ಶಿಲ್ಪಾ ರಾವ್ ಅವರ ಮೈಕ್ ಮತ್ತು ವೇದಿಕೆಯ ದೀಪಗಳನ್ನು ಇದ್ದಕ್ಕಿದ್ದಂತೆ ಆಫ್ ಮಾಡಲಾಗಿತ್ತು. ಈ ಕಹಿ ಘಟನೆಯ ಕೆಲವೇ ದಿನಗಳ ನಂತರ, ಶಿಲ್ಪಾ ರಾವ್ ಅವರು ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಅದೇ ಪ್ರದರ್ಶನದ ವಿಡಿಯೋ ತುಣುಕೊಂದನ್ನು ಹಂಚಿಕೊಂಡಿದ್ದಾರೆ. ವಿಡಿಯೋದಲ್ಲಿ ‘ಬಚ್ನಾ ಏ ಹಸೀನೋ’ ಚಿತ್ರದ ‘ಖುದಾ ಜಾನೇ’ ಹಾಡನ್ನು ಅವರು ಹಾಡುತ್ತಿದ್ದು, ಪ್ರೇಕ್ಷಕರು ಜೊತೆಯಾಗಿ ಹಾಡುವ ದೃಶ್ಯವಿದೆ. ವಿಡಿಯೋ ಜೊತೆಗೆ “ನಾನು ನಿಮಗಾಗಿ ಪೂರ್ಣ ಹೃದಯದಿಂದ ಹಾಡುತ್ತೇನೆ… ಅಷ್ಟೇ ನನಗೆ ಮುಖ್ಯ” ಎಂದು ಬರೆದುಕೊಂಡಿದ್ದಾರೆ.
ವಿವಾದದ ಕುರಿತು ಮೌನ ಮುರಿದ ಗಾಯಕ ಕುಟ್ಲೆ ಖಾನ್! ಶಿಲ್ಪಾ ಅವರ ಪ್ರದರ್ಶನ ಅರ್ಧಕ್ಕೆ ನಿಂತ ತಕ್ಷಣವೇ ಪಕ್ಕದ ವೇದಿಕೆಯಲ್ಲಿ ಮತ್ತೊಬ್ಬ ಗಾಯಕ ಕುಟ್ಲೆ ಖಾನ್ ಅವರ ಪ್ರದರ್ಶನ ಶುರುವಾಗಿತ್ತು. ಶಿಲ್ಪಾ ಅವರು ಪ್ರೇಕ್ಷಕರನ್ನು ಉದ್ದೇಶಿಸಿ ಮಾತನಾಡಲು ಯತ್ನಿಸಿದಾಗ ಕುಟ್ಲೆ ಖಾನ್ ಹಾಡಲು ಶುರು ಮಾಡಿದ್ದಕ್ಕೆ ಸೋಶಿಯಲ್ ಮೀಡಿಯಾದಲ್ಲಿ ಆಕ್ರೋಶ ವ್ಯಕ್ತವಾಗಿತ್ತು. ಈ ಕುರಿತು ಸ್ಪಷ್ಟನೆ ನೀಡಿರುವ ಕುಟ್ಲೆ ಖಾನ್, “ಪ್ರತಿಯೊಬ್ಬ ಕಲಾವಿದರಿಗೂ ಸಮಯ ನಿಗದಿಯಾಗಿತ್ತು. ಶಿಲ್ಪಾ ನನ್ನ ಸಹೋದರಿಯಂತೆ. ಮೈಕ್ ಆಫ್ ಆದ ವಿಚಾರ ನನಗೆ ಗೊತ್ತಿರಲಿಲ್ಲ, ಆಯೋಜಕರ ಸೂಚನೆಯಂತೆ ನಾನು ಹಾಡಲು ಪ್ರಾರಂಭಿಸಿದೆ. ಅನಗತ್ಯವಾಗಿ ನನ್ನನ್ನು ಟ್ರೋಲ್ ಮಾಡಲಾಗುತ್ತಿದೆ” ಎಂದಿದ್ದಾರೆ.
ಘಟನೆಯ ಕುರಿತು ತೀವ್ರ ವಿಮರ್ಶೆ ಎದುರಿಸಿದ ಬಾಲಿವುಡ್ ಮ್ಯೂಸಿಕ್ ಪ್ರಾಜೆಕ್ಟ್ ಆಯೋಜಕರು ಶಿಲ್ಪಾ ರಾವ್ ಅವರಲ್ಲಿ ಕ್ಷಮೆಯಾಚಿಸಿದ್ದಾರೆ. ಮುಂಚಿನ ಪ್ರದರ್ಶನಗಳು ತಡವಾಗಿದ್ದರಿಂದ ಹಾಗೂ ಸ್ಥಳೀಯ ಆಡಳಿತದ ಸಮಯದ ನಿರ್ಬಂಧಗಳಿಂದಾಗಿ ಕಾರ್ಯಕ್ರಮವನ್ನು ಬೇಗನೇ ಮುಕ್ತಾಯಗೊಳಿಸಬೇಕಾಯಿತು ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
