ಕನ್ನಡದ ಪ್ರತಿಭಾವಂತ ನಟಿ ರುಕ್ಮಿಣಿ ವಸಂತ್ ಅವರು ಸಾಲು ಸಾಲು ಸಿನಿಮಾಗಳ ಮೂಲಕ ಗಮನ ಸೆಳೆಯುತ್ತಿದ್ದು, ಇದೀಗ ಮತ್ತೊಂದು ಹೊಸ ಚಿತ್ರಕ್ಕೆ ಕರಾರು ಮಾಡಿಕೊಂಡಿದ್ದಾರೆ. ‘ಒಕೆ ಒಕೆ ಜೀವಿತಮ್’ (ತಮಿಳಿನಲ್ಲಿ ‘ಕಣಮ್’) ಖ್ಯಾತಿಯ ನಿರ್ದೇಶಕ ಶ್ರೀ ಕಾರ್ತಿಕ್ ಅವರ ಹೊಸ ಸಿನಿಮಾಗೆ ರುಕ್ಮಿಣಿ ವಸಂತ್ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ.
ಕುತೂಹಲಕಾರಿ ವೀಡಿಯೊ ಮೂಲಕ ಈ ಚಿತ್ರವನ್ನು ಅಧಿಕೃತವಾಗಿ ಘೋಷಿಸಲಾಗಿದ್ದು, ಇದರಲ್ಲಿ ನಟಿ ರುಕ್ಮಿಣಿ ವಸಂತ್ ಅವರನ್ನು ‘ತಾರಾ’ ಎಂಬ ಪಾತ್ರದ ಮೂಲಕ ಪರಿಚಯಿಸಲಾಗಿದೆ. ವೀಡಿಯೊದ ಆರಂಭದಲ್ಲಿ ನಿರ್ದೇಶಕ ಶ್ರೀ ಕಾರ್ತಿಕ್ ಹಾಗೂ ಇತರ ಪ್ರಮುಖ ನಟರಾದ ದೇವ್ ರಾಮ್ನಾಥ್ ಮತ್ತು ವಿನಾಯಕ್ ವೈದ್ಯನಾಥನ್ ಅವರು ‘ತಾರಾ’ ಪಾತ್ರಕ್ಕಾಗಿ ನಟಿಯನ್ನು ಅಂತಿಮಗೊಳಿಸಲು ಸಮಯಾವಕಾಶವಿಲ್ಲದೆ ಚರ್ಚಿಸುತ್ತಿರುವುದು ಹಾಸ್ಯಭರಿತವಾಗಿ ಮೂಡಿಬಂದಿದೆ. ಆ ಬಳಿಕ ಬರುವ ಒಂದು ಅನಿರೀಕ್ಷಿತ ನೋಟಿಫಿಕೇಶನ್ ಮೂಲಕ ರುಕ್ಮಿಣಿ ವಸಂತ್ ಅವರ ಎಂಟ್ರಿಯನ್ನು ರೋಚಕವಾಗಿ ತೋರಿಸಲಾಗಿದೆ.
ಶೀರ್ಷಿಕೆ ಅಂತಿಮಗೊಳ್ಳದ ಈ ಚಿತ್ರಕ್ಕೆ ಸಿರುನಿ ಸೈನ್ ಕಾರ್ಪೊರೇಷನ್ ಹಾಗೂ ಮ್ಯಾಡ್ ಬಾಯ್ಸ್ ಎಂಟರ್ಟೈನ್ಮೆಂಟ್ ಸಂಸ್ಥೆಗಳು ಬಂಡವಾಳ ಹೂಡುತ್ತಿದ್ದು, ಸಾಯಿ ಕೃಷ್ಣ ಗದ್ವಾಲ್ ಸಹ-ನಿರ್ಮಾಪಕರಾಗಿದ್ದಾರೆ. ನಿರ್ಮಾಪಕ ಜಸ್ವಂತ್ ನಡಿಪಲ್ಲಿ ಅವರ ಸಿರುನಿ ಸಂಸ್ಥೆಯು ಈಗಾಗಲೇ ರಾಹುಲ್ ರವೀಂದ್ರನ್ ನಿರ್ದೇಶನದ ರಾಷ್ಟ್ರ ಪ್ರಶಸ್ತಿ ವಿಜೇತ ‘ಚಿ ಲ ಸೌ’ ಚಿತ್ರಕ್ಕೆ ಬೆಂಬಲ ನೀಡಿತ್ತು. ಸದ್ಯ ‘ತಾರಾ’ ಪಾತ್ರದ ಮೂಲಕ ಸದ್ದು ಮಾಡುತ್ತಿರುವ ಈ ಸಿನಿಮಾದ ಅಧಿಕೃತ ಶೀರ್ಷಿಕೆ ಮತ್ತು ಇತರ ವಿವರಗಳು ಶೀಘ್ರದಲ್ಲೇ ಹೊರಬರಲಿವೆ.
