ಭಾರತೀಯ ಷೇರುಪೇಟೆಯಲ್ಲಿ ವಹಿವಾಟು ಪ್ರಾರಂಭದಲ್ಲೇ ಏರಿಕೆ ಕಂಡುಬಂದಿದೆ. ನಿಫ್ಟಿ 47 ಅಂಕಗಳ ಏರಿಕೆಯೊಂದಿಗೆ 22,742.20ರಲ್ಲಿ ವಹಿವಾಟು ಆರಂಭಿಸಿದರೆ, ಸೆನ್ಸೆಕ್ಸ್ 335 ಅಂಕಗಳ ಏರಿಕೆಯೊಂದಿಗೆ 73,665.64ರಲ್ಲಿ ಆರಂಭವಾಯಿತು. ವಿವಿಧ ವಲಯಗಳ ಸೂಚ್ಯಂಕಗಳಲ್ಲಿ ಮಿಶ್ರ ವಹಿವಾಟು ಕಂಡುಬಂದಿದೆ.
ಇನ್ನೊಂದು ಕಡೆ ನೋಡುವದಾದ್ರೆ, ಭಾರತೀಯ ರೂಪಾಯಿ ಮೌಲ್ಯದಲ್ಲಿ ಅಲ್ಪ ಚೇತರಿಕೆ ಕಂಡುಬಂದಿದೆ. ಗುರುವಾರ ಡಾಲರ್‌ಗೆ 94.82 ರೂಪಾಯಿಯಲ್ಲಿ ಮುಕ್ತಾಯಗೊಂಡಿದ್ದ ರೂಪಾಯಿ, ಮುಂದಿನ ವಹಿವಾಟಿನ ಆರಂಭದಲ್ಲಿ ಡಾಲರ್‌ಗೆ 94.79 ರೂಪಾಯಿಗೆ ತಲುಪಿತು.
ಅಮೆರಿಕದ ಬಾಂಡ್ ಇಳುವರಿ ಇಳಿಕೆ; ಹೂಡಿಕೆದಾರರಲ್ಲಿ ಆಶಾವಾದ
ಅಮೆರಿಕದ ಬಾಂಡ್ ಇಳುವರಿಯಲ್ಲಿ ಅಲ್ಪ ಇಳಿಕೆಯಾಗಿರುವುದು ಹೂಡಿಕೆದಾರರಲ್ಲಿ ಆಶಾವಾದ ಮೂಡಿಸಿದೆ ಎಂದು ಸ್ವತಂತ್ರ ಮಾರುಕಟ್ಟೆ ವಿಶ್ಲೇಷಕ ಅಂಬರೀಶ್ ಬಲಿಗಾ ತಿಳಿಸಿದ್ದಾರೆ. ಆದರೆ, ಷೇರುಪೇಟೆಯಲ್ಲಿನ ಈ ಏರಿಕೆ ಮತ್ತು ಹೂಡಿಕೆದಾರರ ಸಕಾರಾತ್ಮಕ ಭಾವನೆ ಹೆಚ್ಚು ಕಾಲ ಉಳಿಯದೇ ಇರಬಹುದು ಎಂದೂ ಅವರು ಎಚ್ಚರಿಸಿದ್ದಾರೆ.
ಕಚ್ಚಾ ತೈಲ ಬೆಲೆ ಏರಿಕೆ ದೊಡ್ಡ ಸವಾಲು
ಜಾಗತಿಕ ಮಾರುಕಟ್ಟೆಯಲ್ಲಿ ಬ್ರೆಂಟ್ ಕಚ್ಚಾ ತೈಲದ ಬೆಲೆ ಪ್ರತಿ ಬ್ಯಾರೆಲ್‌ಗೆ 114 ಡಾಲರ್ ಸಮೀಪ ತಲುಪಿದ್ದು, ಐದು ತಿಂಗಳ ಗರಿಷ್ಠ ಮಟ್ಟವನ್ನು ದಾಖಲಿಸಿದೆ ಎಂದು ವರದಿಯಾಗಿದೆ. ಮಧ್ಯಪ್ರಾಚ್ಯದಲ್ಲಿ ತೈಲ ಪೂರೈಕೆಗೆ ಅಡ್ಡಿಯಾಗಬಹುದೆಂಬ ಚಿಂತೆ ಮತ್ತೆ ಹೆಚ್ಚಾಗಿರುವುದು ಬೆಲೆ ಏರಿಕೆಗೆ ಪ್ರಮುಖ ಕಾರಣವಾಗಿದೆ.
ಕಚ್ಚಾ ತೈಲದ ಬೆಲೆ ಏರಿಕೆಯು ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ಅನಿಶ್ಚಿತತೆ ಹೆಚ್ಚಿಸುವುದರ ಜೊತೆಗೆ, ಕಂಪನಿಗಳ ಉತ್ಪಾದನಾ ವೆಚ್ಚ, ಹಣದುಬ್ಬರ ಮತ್ತು ಷೇರುಪೇಟೆಯ ಮೇಲೂ ಪರಿಣಾಮ ಬೀರುತ್ತದೆ.
Invest Aaj For Kal ಸಂಸ್ಥಾಪಕ ಅನಂತ್ ಲಾಧಾ ಅವರ ಪ್ರಕಾರ, ಭಾರತವು ತನ್ನ ಅಗತ್ಯದ ಬಹುಪಾಲು ಕಚ್ಚಾ ತೈಲವನ್ನು ಆಮದು ಮಾಡಿಕೊಳ್ಳುತ್ತದೆ. ಹೀಗಾಗಿ ತೈಲ ಬೆಲೆ ಹೆಚ್ಚಾದರೆ ಹಲವು ಕಂಪನಿಗಳ ಉತ್ಪಾದನಾ ವೆಚ್ಚ ಏರಿಕೆಯಾಗುತ್ತದೆ. ಇದರಿಂದ ಕಂಪನಿಗಳ ಪ್ರತಿ ಷೇರಿನ ಗಳಿಕೆ (EPS) ಮತ್ತು ಲಾಭದಾಯಕತೆ ಮೇಲೆ ಒತ್ತಡ ಉಂಟಾಗಬಹುದು.
ಕಂಪನಿಗಳ ಗಳಿಕೆಯ ಬೆಳವಣಿಗೆಯೇ ಷೇರುಪೇಟೆಯ ಚಲನೆಯ ಪ್ರಮುಖ ಅಂಶವಾಗಿರುವುದರಿಂದ, ಕಚ್ಚಾ ತೈಲದ ಬೆಲೆ ಏರಿಕೆಯು ಭಾರತೀಯ ಮಾರುಕಟ್ಟೆಗೆ ದೊಡ್ಡ ಅಪಾಯವಾಗಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ತೈಲ ಬೆಲೆ ಇಳಿಕೆಯಾದರೆ ಮಾರುಕಟ್ಟೆಗೆ ನಿರಾಳತೆ?
ಕಚ್ಚಾ ತೈಲದ ಬೆಲೆ ಪ್ರತಿ ಬ್ಯಾರೆಲ್‌ಗೆ 113 ಡಾಲರ್‌ಗಿಂತ ಹೆಚ್ಚಿರುವವರೆಗೆ ಷೇರುಪೇಟೆಯ ಏರಿಕೆಗೆ ಅಡ್ಡಿಯಾಗಬಹುದು ಎಂದು ಅನಂತ್ ಲಾಧಾ ಹೇಳಿದ್ದಾರೆ. ತೈಲ ಬೆಲೆ 90ರಿಂದ 85 ಡಾಲರ್ ಮಟ್ಟಕ್ಕಿಂತ ಕೆಳಗೆ ಇಳಿಯುವವರೆಗೆ ಮಾರುಕಟ್ಟೆಯ ಮೇಲೆ ಒತ್ತಡ ಮುಂದುವರಿಯುವ ಸಾಧ್ಯತೆಯಿದೆ ಎಂಬುದು ಅವರ ಅಭಿಪ್ರಾಯ.
ಒಟ್ಟಿನಲ್ಲಿ, ಷೇರುಪೇಟೆ ಆರಂಭದಲ್ಲಿ ಏರಿಕೆ ಕಂಡಿದ್ದರೂ, ಕಚ್ಚಾ ತೈಲದ ಬೆಲೆ ಮತ್ತು ಭೌಗೋಳಿಕ ರಾಜಕೀಯ ಉದ್ವಿಗ್ನತೆಗಳ ಬಗ್ಗೆ ಹೂಡಿಕೆದಾರರು ಎಚ್ಚರಿಕೆಯಿಂದಿದ್ದಾರೆ. ಮುಂದಿನ ದಿನಗಳಲ್ಲಿ ಮಾರುಕಟ್ಟೆಯ ದಿಕ್ಕು ಜಾಗತಿಕ ಬೆಳವಣಿಗೆಗಳು ಮತ್ತು ಕಂಪನಿಗಳ ಗಳಿಕೆಯ ಮೇಲೆ ಅವಲಂಬಿತವಾಗಿರಲಿದೆ.
