ಸಂಜೆ ಚಹಾ ಜತೆಗೆ ತಿನ್ನಲು ಗರಿಗರಿಯಾದ ಹಾಗೂ ರುಚಿಕರವಾದ ತಿಂಡಿಯನ್ನು ಇಷ್ಟಪಡದವರೇ ಇಲ್ಲ. ಅಂತಹ ಜನಪ್ರಿಯ ಸ್ನ್ಯಾಕ್ಸ್ ಗಳಲ್ಲಿ ನಮಕ್‌ಪಾರಾ ಕೂಡ ಒಂದು. ಸಾಮಾನ್ಯವಾಗಿ ಮೈದಾ ಹಿಟ್ಟು, ಅಜ್ವೈನ್ ಹಾಗೂ ತುಪ್ಪವನ್ನು ಬಳಸಿ ಎಣ್ಣೆಯಲ್ಲಿ ಕರಿದು ಇದನ್ನು ತಯಾರಿಸಲಾಗುತ್ತದೆ. ಆದರೆ ಆರೋಗ್ಯದ ಬಗ್ಗೆ ಕಾಳಜಿ ವಹಿಸುವವರಿಗೆ ಎಣ್ಣೆಯಲ್ಲಿ ಕರಿದ ಈ ಸಾಂಪ್ರದಾಯಿಕ ತಿನಿಸು ಅಷ್ಟು ಸೂಕ್ತವಲ್ಲ. ಆರೋಗ್ಯಕ್ಕೆ ಹಾನಿಯಾಗದಂತೆ ಅದೇ ರುಚಿಯನ್ನು ಸವಿಯಲು ಇಷ್ಟಪಡುವವರಿಗೆ ಈ ಆರೋಗ್ಯಕರ ಹಾಗೂ ಸುಲಭವಾದ ಬೇಕಿಂಗ್ ವಿಧಾನ ಅತ್ಯುತ್ತಮ ಆಯ್ಕೆಯಾಗಿದೆ.
ಮೈದಾ ಬದಲು ಗೋಧಿ ಹಿಟ್ಟು ಹಾಗೂ ಓಟ್ಸ್ ಪೌಡರ್ ಬಳಸಿ ಎಣ್ಣೆಯಲ್ಲಿ ಕರಿಯದೆ ಬೇಕಿಂಗ್ ಅಥವಾ ಏರ್ ಫ್ರೈ ಮಾಡುವ ಮೂಲಕ ಈ ನಮಕ್‌ಪಾರಾವನ್ನು ತಯಾರಿಸಬಹುದು. ಇದು ದೇಹಕ್ಕೆ ಹಾನಿ ಮಾಡದಂತೆ ಸಂಜೆಯ ಹಸಿವನ್ನು ನೀಗಿಸಲು ನೆರವಾಗುತ್ತದೆ. ಹಬ್ಬ ಹರಿದಿನಗಳಲ್ಲಂತೂ ಮನೆಮಂದಿಯೆಲ್ಲರೂ ಇಷ್ಟಪಟ್ಟು ಸವಿಯುವ ಈ ಗರಿಗರಿಯಾದ ತಿನಿಸನ್ನು ಮನೆಯಲ್ಲಿಯೇ ಸುಲಭವಾಗಿ ಮಾಡಬಹುದು.
ಬೇಕಾಗುವ ಸಾಮಗ್ರಿಗಳು: ಒಂದು ಕಪ್ ಗೋಧಿ ಹಿಟ್ಟು, ಒಂದು ಕಪ್ ಓಟ್ಸ್ ಪೌಡರ್, ಒಂದು ಚಮಚ ಅಜ್ವೈನ್ ಅಥವಾ ಓಮ, ಒಂದು ಚಮಚ ಎಣ್ಣೆ ಅಥವಾ ತುಪ್ಪ, ಒಂದು ಚಮಚ ಕಸೂರಿ ಮೇತಿ ಹಾಗೂ ರುಚಿಗೆ ತಕ್ಕಷ್ಟು ಉಪ್ಪು.
ಮಾಡುವ ವಿಧಾನ: ಮೊದಲಿಗೆ ಒಂದು ಪಾತ್ರೆಯಲ್ಲಿ ಗೋಧಿ ಹಿಟ್ಟು ಮತ್ತು ಓಟ್ಸ್ ಪುಡಿಯನ್ನು ಒಟ್ಟಿಗೆ ಸೇರಿಸಿ. ಅದಕ್ಕೆ ಕಸೂರಿ ಮೇತಿ, ಉಪ್ಪು, ತುಪ್ಪ ಅಥವಾ ಎಣ್ಣೆ ಹಾಗೂ ಓಮವನ್ನು ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿಕೊಳ್ಳಿ. ನಂತರ ಸ್ವಲ್ಪ ಸ್ವಲ್ಪವೇ ನೀರನ್ನು ಸೇರಿಸಿ ಗಟ್ಟಿಯಾದ ಹದಕ್ಕೆ ಹಿಟ್ಟನ್ನು ಕಲಸಿಟ್ಟುಕೊಳ್ಳಬೇಕು. ಆ ಹಿಟ್ಟನ್ನು ಚಪಾತಿಯಂತೆ ಲಟ್ಟಿಸಿ, ಚಾಕುವಿನ ಸಹಾಯದಿಂದ ವಜ್ರಾಕೃತಿಯಲ್ಲಿ ಸಣ್ಣ ತುಂಡುಗಳಾಗಿ ಕತ್ತರಿಸಿಕೊಳ್ಳಿ. ನಂತರ ಅವುಗಳನ್ನು ಬೇಕಿಂಗ್ ಟ್ರೇ ಅಥವಾ ಏರ್ ಫ್ರೈಯರ್ ಬಾಸ್ಕೆಟ್‌ನಲ್ಲಿ ಜೋಡಿಸಿ ನೂರಾ ಎಂಭತ್ತು ಡಿಗ್ರಿ ಸೆಲ್ಸಿಯಸ್ ತಾಪಮಾನದಲ್ಲಿ ಹನ್ನೆರಡು ನಿಮಿಷಗಳ ಕಾಲ ಅಥವಾ ಗರಿಗರಿಯಾಗಿ ಬಂಗಾರದ ಬಣ್ಣ ಬರುವವರೆಗೆ ಬೇಕ್ ಮಾಡಿಕೊಳ್ಳಿ. ಸಂಪೂರ್ಣವಾಗಿ ತಣ್ಣಗಾದ ಬಳಿಕ ಗಾಳಿಯಾಡದ ಡಬ್ಬದಲ್ಲಿ ಸಂಗ್ರಹಿಸಿದರೆ ಒಂದು ತಿಂಗಳವರೆಗೆ ತಾಜಾವಾಗಿರುತ್ತದೆ.
