ಭಾರತದಲ್ಲಿ ಅತಿ ಹೆಚ್ಚು ಮದ್ಯ ಸೇವನೆ ಮಾಡುವ ಅಗ್ರ ರಾಜ್ಯಗಳಲ್ಲಿ ಒಂದಾಗಿರುವ ತೆಲಂಗಾಣದಲ್ಲಿ, ಹಬ್ಬದ ಸೀಸನ್‌ನಲ್ಲಿ ಮದ್ಯದ ಮಾರಾಟ ಹೊಸ ದಾಖಲೆಯನ್ನು ಬರೆದಿದೆ. ದಸರಾ ಹಬ್ಬದ ಸಂದರ್ಭದಲ್ಲಿ ರಾಜ್ಯದಲ್ಲಿ ಮದ್ಯದ ಮಾರಾಟವು ಗಗನಕ್ಕೇರಿದ್ದು, ಕೆಲವೇ ದಿನಗಳಲ್ಲಿ ಸಾವಿರಾರು ಕೋಟಿ ರೂಪಾಯಿಗಳ ವ್ಯವಹಾರ ನಡೆದಿರುವುದು ವರದಿಯಾಗಿದೆ.
ತೆಲಂಗಾಣ ಅಬಕಾರಿ ಇಲಾಖೆಯ ಅಧಿಕೃತ ಮಾಹಿತಿಯ ಪ್ರಕಾರ, ಅಕ್ಟೋಬರ್ 1 ರಿಂದ 19 ರ ನಡುವಿನ ಅವಧಿಯಲ್ಲಿ ರಾಜ್ಯದಲ್ಲಿ ಬರೋಬ್ಬರಿ 2,054 ಕೋಟಿ ರೂಪಾಯಿಗಳಿಗೂ ಅಧಿಕ ಮೌಲ್ಯದ ಮದ್ಯ ಮಾರಾಟವಾಗಿದೆ. ಇದು ಇದುವರೆಗಿನ ದಸರಾ ಹಬ್ಬದ ಅವಧಿಯಲ್ಲಿ ದಾಖಲಾದ ಅತ್ಯಧಿಕ ಮಾರಾಟದ ಮೊತ್ತವಾಗಿದೆ. ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಈ ಬಾರಿ ಮದ್ಯದ ಮಾರಾಟವು ಶೇಕಡಾ 37 ರಿಂದ 40 ರಷ್ಟು ಹೆಚ್ಚಳ ಕಂಡಿದೆ.
ವಿಶೇಷವೆಂದರೆ, ಕೇವಲ ನಾಲ್ಕು ದಿನಗಳ ಅಂತರದಲ್ಲಿ ತೆಲಂಗಾಣದಲ್ಲಿ 755 ಕೋಟಿ ರೂಪಾಯಿಗಳ ಮದ್ಯ ಮಾರಾಟವಾಗಿದ್ದು, ಅಕ್ಟೋಬರ್ 19 ರ ಒಂದೇ ದಿನ ಬರೋಬ್ಬರಿ 303.40 ಕೋಟಿ ರೂಪಾಯಿಗಳ ಮದ್ಯ ಮಾರಾಟವಾಗುವ ಮೂಲಕ ಸಾರ್ವಕಾಲಿಕ ದಾಖಲೆ ನಿರ್ಮಿಸಿದೆ. ಹಬ್ಬದ ಸಂಭ್ರಮ ಮತ್ತು ಸಾಮಾಜಿಕ ಜೀವನಶೈಲಿಯ ಭಾಗವಾಗಿರುವ ಮದ್ಯದ ಮಾರಾಟದಲ್ಲಿ ಈ ಬಾರಿ ಭರ್ಜರಿ ಏರಿಕೆ ಕಂಡುಬಂದಿರುವುದು ಅಬಕಾರಿ ಇಲಾಖೆಯ ವರದಿಯಿಂದ ಸ್ಪಷ್ಟವಾಗಿದೆ.
