ಮಣಿಪುರದ ಗುಡ್ಡಗಾಡು ಜಿಲ್ಲೆಗಳಲ್ಲಿ ಕಳೆದ 24 ಗಂಟೆಗಳಲ್ಲಿ ನಡೆದ ಸರಣಿ ಹಿಂಸಾತ್ಮಕ ಘಟನೆಗಳಲ್ಲಿ ಕನಿಷ್ಠ ಒಂಬತ್ತು ಮಂದಿ ಸಾವನ್ನಪ್ಪಿದ್ದಾರೆ ಮತ್ತು 14 ಮನೆಗಳಿಗೆ ಬೆಂಕಿ ಹಚ್ಚಲಾಗಿದೆ. ಈ ಘಟನೆಗಳು ಕುಕಿ ಮತ್ತು ನಾಗಾ ಸಮುದಾಯಗಳ ನಡುವೆ ಹೊಸದಾಗಿ ಉದ್ವಿಗ್ನತೆಯನ್ನು ಉಂಟುಮಾಡಿದ್ದು, ಕಾಂಗ್‌ ಪೋಕ್‌ ಪಿ ಜಿಲ್ಲೆಯಲ್ಲಿ ಬಂದ್‌ ಗೆ ಕಾರಣವಾಗಿವೆ.
ಮೃತಪಟ್ಟವರಲ್ಲಿ ಕಾಮ್‌ ಜಾಂಗ್ ಜಿಲ್ಲೆಯಲ್ಲಿ ಗುಂಡಿನ ಚಕಮಕಿಯ ವೇಳೆ ಸಾವನ್ನಪ್ಪಿದ ಕುಕಿ ಮಹಿಳೆ, ಕಾಮ್‌ ಜಾಂಗ್ ಮತ್ತು ಕಾಂಗ್‌ ಪೋಕ್‌ ಪಿಯಲ್ಲಿ ಪ್ರತ್ಯೇಕ ದಾಳಿಗಳಿಗೆ ಗುರಿಯಾದ ನಾಗಾ ಗ್ರಾಮ ರಕ್ಷಕರು ಮತ್ತು ಉಖ್ರುಲ್ ಜಿಲ್ಲೆಯಲ್ಲಿ ಹಠಾತ್ ದಾಳಿಗೆ ಸಿಲುಕಿದ ನಾಗರಿಕ ಪ್ರಯಾಣಿಕರೊಬ್ಬರು ಸೇರಿದ್ದಾರೆ ಎಂದು ಅಧಿಕಾರಿಗಳು ಶನಿವಾರ ತಿಳಿಸಿದ್ದಾರೆ.
ಹಿಂಸಾಚಾರದ ಹಿನ್ನೆಲೆಯಲ್ಲಿ, ಕಾಮ್‌ ಜಾಂಗ್ ಜಿಲ್ಲಾಡಳಿತವು ಚಸ್ಸಾದ್ ಪೊಲೀಸ್ ಠಾಣೆಯ 400 ಮೀಟರ್ ವ್ಯಾಪ್ತಿಯಲ್ಲಿ ಗುಂಪುಗೂಡುವುದನ್ನು ನಿಷೇಧಿಸಿದೆ. ಏತನ್ಮಧ್ಯೆ, ಕುಕಿ ಸಂಘಟನೆಯಾದ ‘ಕಮಿಟಿ ಆನ್ ಟ್ರೈಬಲ್ ಯೂನಿಟಿ’ (CoTU), ಶನಿವಾರ ಸಂಜೆ 6 ಗಂಟೆಯಿಂದ ಕಾಂಗ್‌ ಪೋಕ್‌ ಪಿ ಜಿಲ್ಲೆಯಲ್ಲಿ 24 ಗಂಟೆಗಳ ಬಂದ್‌ಗೆ ಕರೆ ನೀಡಿದೆ.
ಚಸ್ಸಾದ್ ಪೊಲೀಸ್ ಠಾಣೆಯ ಸಮೀಪ ನಡೆದ ಗುಂಡಿನ ಚಕಮಕಿಯಲ್ಲಿ ಐವರು ಮಕ್ಕಳ ತಾಯಿಯಾದ 42 ವರ್ಷದ ಕುಕಿ ಮಹಿಳೆ ಡೊಮ್‌ ಖೋನಿ ಟೌಥಾಂಗ್ ಸಾವನ್ನಪ್ಪಿದ ನಂತರ ಶುಕ್ರವಾರ ರಾತ್ರಿ (ಅಕ್ಟೋಬರ್ 9) ಹಿಂಸಾಚಾರ ಭುಗಿಲೆದ್ದಿತು.
ಪೊಲೀಸರ ಪ್ರಕಾರ, ಪೊಲೀಸ್ ಠಾಣೆಯ ಸಮೀಪದಲ್ಲಿ ಅಕ್ರಮ ಬಂಕರ್‌ ಗಳನ್ನು ನಿರ್ಮಿಸಲಾಗುತ್ತಿದೆ ಎಂಬ ವರದಿಗಳ ಹಿನ್ನೆಲೆಯಲ್ಲಿ, ಸಿವಿಲ್ ಪೊಲೀಸ್, ಇಂಡಿಯಾ ರಿಸರ್ವ್ ಬೆಟಾಲಿಯನ್ ಮತ್ತು ಗಡಿ ಭದ್ರತಾ ಪಡೆಯ ಸಿಬ್ಬಂದಿಯನ್ನು ಒಳಗೊಂಡ ಭದ್ರತಾ ತಂಡವು ಅವುಗಳನ್ನು ತೆರವುಗೊಳಿಸುವ ಕಾರ್ಯಾಚರಣೆಯನ್ನು ಕೈಗೊಂಡಿತ್ತು.
ಈ ಕಾರ್ಯಾಚರಣೆಗೆ ಸ್ಥಳೀಯ ಮಹಿಳೆಯರು ಅಡ್ಡಿಪಡಿಸಲು ಪ್ರಯತ್ನಿಸುತ್ತಿದ್ದಾಗ, ಗುರುತಿಸಲಾಗದ ಸಶಸ್ತ್ರ ದುಷ್ಕರ್ಮಿಗಳು ಭದ್ರತಾ ಸಿಬ್ಬಂದಿಯ ಮೇಲೆ ಗುಂಡು ಹಾರಿಸಿದರು; ಇದಕ್ಕೆ ಪ್ರತಿಯಾಗಿ ಭದ್ರತಾ ಸಿಬ್ಬಂದಿ ಕೂಡ ಗುಂಡಿನ ದಾಳಿ ನಡೆಸಿದರು. ಟೌಥಾಂಗ್ ಅವರ ಕುತ್ತಿಗೆಯ ಸಮೀಪ ಗುಂಡು ತಗುಲಿದ್ದು, ಅವರು ಸ್ಥಳದಲ್ಲೇ ಮೃತಪಟ್ಟರು ಎಂದು ಪೊಲೀಸರು ತಿಳಿಸಿದ್ದಾರೆ.
ಚಸ್ಸಾದ್ ಗ್ರಾಮದ ಸ್ವಯಂಸೇವಕರನ್ನು ಅನಿಯಂತ್ರಿತವಾಗಿ ಬಂಧಿಸಿ ವಶದಲ್ಲಿರಿಸಲಾಗಿದೆ ಎಂಬ ಆರೋಪದ ಮೇರೆಗೆ ಪ್ರತಿಭಟನೆಗಳು ನಡೆಯುತ್ತಿದ್ದಾಗಲೇ, ಈ ಘಟನೆ ಸಂಭವಿಸಿದೆ.
ಈ ಹತ್ಯೆಯ ನಂತರ ಬೆಂಕಿ ಹಚ್ಚುವ ಕೃತ್ಯಗಳು ಮತ್ತು ಸಶಸ್ತ್ರ ಗುಂಪುಗಳು ಹಾಗೂ ಭದ್ರತಾ ಸಿಬ್ಬಂದಿಯ ನಡುವೆ ಮತ್ತಷ್ಟು ಗುಂಡಿನ ಚಕಮಕಿಗಳು ನಡೆದವು. ಎರಡೂ ಸಮುದಾಯಗಳ ಸದಸ್ಯರಿಗೆ ಸೇರಿದ ಕನಿಷ್ಠ 14 ಮನೆಗಳಿಗೆ ಬೆಂಕಿ ಹಚ್ಚಲಾಯಿತು. ದುಷ್ಕರ್ಮಿಗಳು ಚಸ್ಸಾದ್ ಪೊಲೀಸ್ ಠಾಣೆಗೂ ಬೆಂಕಿ ಹಚ್ಚಲು ಪ್ರಯತ್ನಿಸಿದರು ಮತ್ತು ಠಾಣೆಯ ಪ್ರವೇಶದ್ವಾರದ ಬಳಿಯಿದ್ದ ಕೆಲವು ಮರದ ಅಂಗಡಿಗಳಿಗೆ ಹಾನಿ ಉಂಟುಮಾಡಿದರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ನ್ಯಾಷನಲ್ ಸೋಷಿಯಲಿಸ್ಟ್ ಕೌನ್ಸಿಲ್ ಆಫ್ ನಾಗಾಲಿಮ್ (ಇಸಾಕ್-ಮುಯಿವಾ) ಅಥವಾ NSCN-IM ಮತ್ತು ಅದರ ‘ಈಸ್ಟರ್ನ್ ಫ್ಲಾಂಕ್’ ಬಣದ ಕಾರ್ಯಕರ್ತರು ಎಂದು ಶಂಕಿಸಲಾದ ಗುಂಪಿನಿಂದ ಮೈಕೆಲ್ ಂಗಾಮ್ಮಿನ್ಲೆನ್ ಹಾವೊಕಿಪ್ (23) ಎಂಬುವವರನ್ನು ಗುಂಡಿಕ್ಕಿ ಕೊಲ್ಲಲಾಗಿದೆ ಎಂದು ‘ಕುಕಿ ವುಮೆನ್ ಯೂನಿಯನ್’ ಪ್ರಧಾನ ಕಚೇರಿ ಆರೋಪಿಸಿದೆ. ಮತ್ತೊಂದು ಘಟನೆಯಲ್ಲಿ, ಶನಿವಾರ ಬೆಳಿಗ್ಗೆ 9.30ರ ಸುಮಾರಿಗೆ ಕಾಮ್‌ಜಾಂಗ್ ಜಿಲ್ಲೆಯ ನಿಂಗ್ಚೌ ಚಿಂಗ್‌ಡಾಂಗ್ ಗ್ರಾಮದಲ್ಲಿ ನಡೆದ ದಾಳಿಯಲ್ಲಿ ಇಬ್ಬರು ನಾಗಾ ಗ್ರಾಮ ರಕ್ಷಕರು (ವಿಲೇಜ್ ಗಾರ್ಡ್ಸ್) – 30 ವರ್ಷದ ಂಗಾಚನ್ಸೊ ನಿಂಗ್‌ಶೆನ್ ಮತ್ತು 50 ವರ್ಷದ ಲೈಶಿಶಾನ್ ಹಂಗ್ಯೊ – ಹತ್ಯೆಗೀಡಾಗಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಈ ಗ್ರಾಮವು ಚಸ್ಸಾದ್ ಪೊಲೀಸ್ ಠಾಣೆಯಿಂದ ಆಗ್ನೇಯಕ್ಕೆ ಸುಮಾರು 17 ಕಿ.ಮೀ ದೂರದಲ್ಲಿದೆ.
ಭಾರತ-ಮ್ಯಾನ್ಮಾರ್ ಗಡಿಯುದ್ದಕ್ಕೂ ಕಾರ್ಯಾಚರಣೆ ನಡೆಸುತ್ತಿರುವ ಸಶಸ್ತ್ರ ಗುಂಪುಗಳು ಈ ದಾಳಿಯಲ್ಲಿ ಭಾಗಿಯಾಗಿರಬಹುದು ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ಹೆಸರು ಬಹಿರಂಗಪಡಿಸದ ಷರತ್ತಿನ ಮೇಲೆ ‘ಇಂಡಿಯಾ ಟುಡೇ’ಗೆ ತಿಳಿಸಿದ್ದಾರೆ. ಆದಾಗ್ಯೂ, ಇದಕ್ಕೆ ಯಾವುದೇ ಅಧಿಕೃತ ದೃಢೀಕರಣವಿಲ್ಲ ಮತ್ತು ತನಿಖೆ ನಡೆಯುತ್ತಿದೆ.
ಕಾಂಗ್‌ಪೋಕ್‌ಪಿ ಜಿಲ್ಲೆಯಲ್ಲಿ, ಶಸ್ತ್ರಸಜ್ಜಿತ ಕುಕಿ ಉಗ್ರಗಾಮಿಗಳೆಂದು ಶಂಕಿಸಲಾದ ಗುಂಪು ನಡೆಸಿದ ಹೊಂಚುದಾಳಿಯಲ್ಲಿ ನಾಗಾ ಗ್ರಾಮದ ಸ್ವಯಂಸೇವಕರೊಬ್ಬರು ಸಾವನ್ನಪ್ಪಿದ್ದಾರೆ ಮತ್ತು ಇಬ್ಬರು ಗಾಯಗೊಂಡಿದ್ದಾರೆ.
ಚಲ್ವಾ ಪೊಲೀಸ್ ಠಾಣೆಯಿಂದ ಈಶಾನ್ಯಕ್ಕೆ ಸುಮಾರು 15 ಕಿ.ಮೀ ದೂರದಲ್ಲಿರುವ ಇಂಫಾಲ್-ತಮೆಂಗ್‌ಲಾಂಗ್ ರಸ್ತೆಯ ಮಕುಯಿ ಮತ್ತು ಟಾಪೋಕ್ ಗ್ರಾಮಗಳ ನಡುವೆ ಬೆಳಿಗ್ಗೆ 6 ಗಂಟೆಯ ಸುಮಾರಿಗೆ ಈ ದಾಳಿ ನಡೆದಿದೆ.
ಮೃತ ವ್ಯಕ್ತಿಯನ್ನು ತಮೇಯಿ ಉಪವಿಭಾಗದ ಥಾಲೋನ್ ಗ್ರಾಮದ ಮಚುಂಗ್‌ವಾಂಗ್‌ಬೌ (35) ಎಂದು ಪೊಲೀಸರು ಗುರುತಿಸಿದ್ದಾರೆ. ಗಾಯಗೊಂಡವರನ್ನು ಎಲ್. ಪಬ್ರಾಮ್ ಗ್ರಾಮದ ನಹಸೋನ್ (29) ಮತ್ತು ಕಡಿ ಗ್ರಾಮದ ಮಥಂಗಂಬೌ (30) ಎಂದು ಗುರುತಿಸಲಾಗಿದೆ.
ಪೊಲೀಸರ ಪ್ರಕಾರ, ಮಕುಯಿ ಗ್ರಾಮದ ಮೇಲೆ ದಾಳಿ ನಡೆಯುತ್ತಿದೆ ಎಂಬ ಮಾಹಿತಿ ಪಡೆದ ನಂತರ ನಾಲ್ವರು ನಾಗಾ ಗ್ರಾಮದ ಸ್ವಯಂಸೇವಕರು ಟಾಪೋನ್ ಗ್ರಾಮದಿಂದ ಮಕುಯಿಗೆ ತೆರಳಿದ್ದರು. ಆಗ ಹೊಂಚು ಹಾಕಿ ಕುಳಿತಿದ್ದ ಸಶಸ್ತ್ರ ವ್ಯಕ್ತಿಗಳು ಟಾಪೋನ್‌ನಿಂದ ಸುಮಾರು 2 ಕಿ.ಮೀ ದೂರದಲ್ಲಿ ಅವರ ಮೇಲೆ ದಾಳಿ ನಡೆಸಿದರು.
ಮಚುಂಗ್‌ವಾಂಗ್‌ಬೌ ಸ್ಥಳದಲ್ಲೇ ಮೃತಪಟ್ಟರು. ನಹಸೋನ್ ಅವರ ಎರಡೂ ಕಾಲುಗಳಿಗೆ ಗುಂಡೇಟು ಬಿದ್ದಿದ್ದರೆ, ಮಥಂಗಂಬೌ ಅವರ ಕಾಲುಗಳು ಮತ್ತು ಕೈಗಳಿಗೆ ಗಾಯಗಳಾಗಿವೆ. ಗಾಯಗೊಂಡವರನ್ನು ಚಿಕಿತ್ಸೆಗಾಗಿ ಸೇನಾಪತಿ ಜಿಲ್ಲಾ ಕೇಂದ್ರಕ್ಕೆ ರವಾನಿಸಲಾಗಿದೆ.
ಈ ಹೊಂಚುದಾಳಿಗೂ ಮುನ್ನ ಬೆಳಿಗ್ಗೆ 5 ಗಂಟೆಯ ಸುಮಾರಿಗೆ ಮಕುಯಿ ಮೇಲೆ ದಾಳಿ ನಡೆದಿತ್ತು ಮತ್ತು ಅದರಲ್ಲಿ ಮೂವರು ನಾಗಾ ಗ್ರಾಮ ರಕ್ಷಕರು ಹತ್ಯೆಗೀಡಾಗಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ. ಬಲಿಯಾದವರಲ್ಲಿ ಒಬ್ಬರ ಶಿರಚ್ಛೇದನ ನಡೆಸಲಾಗಿದೆ ಎಂದು ವರದಿಯಾಗಿದೆ.
ಶಸ್ತ್ರಸಜ್ಜಿತ ಇಬ್ಬರು ವ್ಯಕ್ತಿಗಳು ಶಿರಚ್ಛೇದನಕ್ಕೊಳಗಾದ ವ್ಯಕ್ತಿಯ ದೃಶ್ಯವನ್ನು ಚಿತ್ರೀಕರಿಸುತ್ತಿರುವಂತೆ ತೋರುವ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದೆ. ಮೃತರನ್ನು ಅಜಿನ್‌ಪೌ ರಿಂಗ್‌ಕಾಂಗ್‌ಮೈ ಎಂದು ಗ್ರಾಮಸ್ಥರು ಗುರುತಿಸಿದ್ದಾರೆ. ಮೃತರಾದ ಇತರರನ್ನು ಮಚುಂಗಮ್ಮಾಂಗ್ ಮತ್ತು ರಾಬರ್ಟ್ ಎಂದು ಗುರುತಿಸಲಾಗಿದೆ.
ಮತ್ತೊಂದು ಪ್ರತ್ಯೇಕ ಘಟನೆಯಲ್ಲಿ, ಇಂಫಾಲ್ ಅನ್ನು ಉಖ್ರುಲ್ ಮೂಲಕ ನಾಗಾಲ್ಯಾಂಡ್‌ಗೆ ಸಂಪರ್ಕಿಸುವ ರಾಷ್ಟ್ರೀಯ ಹೆದ್ದಾರಿ 202ರ ಕೊಂಜಾಂಗ್ ಗ್ರಾಮದ ಬಳಿ, ಗುರುತಿಸಲಾಗದ ಶಶಸ್ತ್ರಸಜ್ಜಿತ ದುಷ್ಕರ್ಮಿಗಳು ಸಂಜೀಪ್ ರೈ (30) ಅವರ ಕಾರಿನ ಮೇಲೆ ಅನಿರೀಕ್ಷಿತ ದಾಳಿ ನಡೆಸಿ ಅವರನ್ನು ಹತ್ಯೆಗೈದಿದ್ದಾರೆ. ಶನಿವಾರ ಬೆಳಿಗ್ಗೆ ಸುಮಾರು 5.30ರ ಸುಮಾರಿಗೆ ಲಿಟಾನ್ ಪೊಲೀಸ್ ಠಾಣೆಯಿಂದ ವಾಯುವ್ಯಕ್ಕೆ ಸುಮಾರು 12 ಕಿ.ಮೀ ದೂರದಲ್ಲಿ ಈ ದಾಳಿ ನಡೆದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಸೇನಾಪತಿ ಜಿಲ್ಲಾ ಕೇಂದ್ರದ ಸಮೀಪವಿರುವ ಟಫೌ ಸೇನಾಪತಿ ನೇಪಾಳಿ ಗ್ರಾಮದ ನಿವಾಸಿಯಾಗಿದ್ದ ರೈ, ತಮ್ಮ ಕಾರಿನಲ್ಲಿ ಪ್ರಯಾಣಿಸುತ್ತಿದ್ದಾಗ ದುಷ್ಕರ್ಮಿಗಳು ಅವರ ಮೇಲೆ ದಾಳಿ ನಡೆಸಿದರು.
ಪೊಲೀಸರು ಮೃತದೇಹವನ್ನು ವಶಕ್ಕೆ ಪಡೆದು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ನಂತರ ಮರಣೋತ್ತರ ಪರೀಕ್ಷೆಗಾಗಿ ಮೃತದೇಹವನ್ನು ಇಂಫಾಲ್‌ನ ಜವಾಹರಲಾಲ್ ನೆಹರು ಇನ್‌ಸ್ಟಿಟ್ಯೂಟ್ ಆಫ್ ಮೆಡಿಕಲ್ ಸೈನ್ಸಸ್‌ನ ಶವಾಗಾರಕ್ಕೆ ರವಾನಿಸಲಾಗಿದೆ. ಹತ್ಯೆಯ ಉದ್ದೇಶ ಮತ್ತು ಅದಕ್ಕೆ ಕಾರಣರಾದವರ ಬಗ್ಗೆ ಇನ್ನೂ ಮಾಹಿತಿ ಲಭ್ಯವಾಗಿಲ್ಲ.
