ಟಾಲಿವುಡ್‌ನ ಸ್ಟಾರ್ ನಟ ವಿಜಯ್ ದೇವರಕೊಂಡ ಮತ್ತು ನಿರ್ದೇಶಕ ರಾಹುಲ್ ಸಂಕೃತ್ಯನ್ ಕಾಂಬಿನೇಷನ್‌ನಲ್ಲಿ ಮೂಡಿಬರುತ್ತಿರುವ ಬಹು ನಿರೀಕ್ಷಿತ ಪಿರಿಯಡ್ ಆಕ್ಷನ್ ಡ್ರಾಮಾ ರಾಣಬಾಲಿ ಸಿನಿಮಾ ಅಕ್ಟೋಬರ್ 16 ರಂದು ಅತ್ಯಂತ ವೈಭವೋಪೇತವಾಗಿ ತೆರೆಕಾಣಲು ಸಕಲ ಸಿದ್ಧತೆಗಳು ನಡೆದಿವೆ. ಈ ಚಿತ್ರದಲ್ಲಿ ನಾಯಕಿಯಾಗಿ ಖ್ಯಾತ ನಟಿ ರಶ್ಮಿಕಾ ಮಂದಣ್ಣ ಅಭಿನಯಿಸುತ್ತಿದ್ದು, ಟಾಲಿವುಡ್‌ನ ಪ್ರತಿಷ್ಠಿತ ಬ್ಯಾನರ್ ಆದ ಮೈತ್ರಿ ಮೂವಿ ಮೇಕರ್ಸ್ ಈ ಬ್ರಹ್ಮಾಂಡ ಸಿನಿಮಾವನ್ನು ಅತ್ಯಂತ ಭರ್ಜರಿಯಾಗಿ ನಿರ್ಮಾಣ ಮಾಡಿದೆ. 1860 ರ ಬ್ರಿಟಿಷರ ಆಡಳಿತದ ಅವಧಿಯಲ್ಲಿ ಅವರು ಸೃಷ್ಟಿಸಿದ ಮಾನವ ನಿರ್ಮಿತ ಕ್ಷಾಮ ಹಾಗೂ ಅದರ ವಿರುದ್ಧದ ಹೋರಾಟದ ಕಥಾಹಂದರವನ್ನು ಈ ಸಿನಿಮಾ ಹೊಂದಿದೆ.
ಸಾಮಾನ್ಯವಾಗಿ ದೊಡ್ಡ ನಟರ ಸಿನಿಮಾಗಳು ಹಾಗೂ ಪ್ಯಾನ್ ಇಂಡಿಯಾ ಅಥವಾ ಪ್ರತಿಷ್ಠಿತ ತೆಲುಗು ಚಿತ್ರಗಳು ವಿದೇಶಗಳಲ್ಲಿ, ಅದರಲ್ಲೂ ಮುಖ್ಯವಾಗಿ ಉತ್ತರ ಅಮೆರಿಕಾದಂತಹ ಪ್ರಮುಖ ಮಾರುಕಟ್ಟೆಗಳಲ್ಲಿ ಬಿಡುಗಡೆಯಾಗುವಾಗ ಪ್ರೀಮಿಯರ್ ಪ್ರದರ್ಶನಗಳಿಗೆ ದುಬಾರಿ ಟಿಕೆಟ್ ದರವಿರುತ್ತದೆ ಮತ್ತು ಯಾವುದೇ ಪಾಸ್ ಅಥವಾ ರಿಯಾಯಿತಿಗಳು ಸುಲಭವಾಗಿ ಸಿಗುವುದಿಲ್ಲ. ಆದರೆ ರಾಣಬಾಲಿ ಚಿತ್ರದ ತಯಾರಕರು ಪ್ರೇಕ್ಷಕರನ್ನು ಚಿತ್ರಮಂದಿರಗಳತ್ತ ಸೆಳೆಯಲು ಮತ್ತು ಹೆಚ್ಚಿನ ಸಂಖ್ಯೆಯಲ್ಲಿ ಜನರನ್ನು ತಲುಪಲು ಒಂದು ಅಸಾಧಾರಣ ಹಾಗೂ ದಿಟ್ಟ ಹೆಜ್ಜೆಯನ್ನು ಇಟ್ಟಿದ್ದಾರೆ. ಪ್ರೀಮಿಯರ್ ಪ್ರದರ್ಶನದ ಮೊದಲ ದಿನದಿಂದಲೇ ಎಲ್ಲಾ ಪಾಸ್ ಗಳನ್ನು ಮುಕ್ತಗೊಳಿಸುವುದರ ಜೊತೆಗೆ, ಅತಿ ಹೆಚ್ಚು ಬೆಲೆ ಇಡದೆ ಸಾಮಾನ್ಯ ಚಿತ್ರಮಂದಿರಗಳ ಅಧಿಕೃತ ದರದಲ್ಲೇ ಟಿಕೆಟ್ ಗಳು ಲಭ್ಯವಾಗುವಂತೆ ಮಾಡಿರುವುದು ಸಿನಿಪ್ರಿಯರಲ್ಲಿ ಅಚ್ಚರಿ ಹಾಗೂ ಸಂತಸ ಮೂಡಿಸಿದೆ.
ನಿರ್ಮಾಪಕರ ಈ ಮಾಸ್ಟರ್‌ ಪ್ಲಾನ್ ನಿರ್ಧಾರದಿಂದಾಗಿ ಸಾಗರೋತ್ತರ ರಾಷ್ಟ್ರಗಳಲ್ಲಿ ಸಿನಿಮಾಗೆ ಯಾವುದೇ ಹಿಂಜರಿಕೆಯಿಲ್ಲದೆ ಬೃಹತ್ ಆರಂಭಿಕ ಸ್ವಾಗತ ಸಿಗುವ ಸಾಧ್ಯತೆ ದಟ್ಟವಾಗಿದೆ. ದುಬಾರಿ ಟಿಕೆಟ್ ದರಗಳ ಕಾರಣದಿಂದಾಗಿ ಪ್ರೀಮಿಯರ್ ಶೋಗಳಿಂದ ದೂರ ಉಳಿಯುವ ಪ್ರತಿಯೊಬ್ಬ ಸಾಮಾನ್ಯ ಚಲನಚಿತ್ರ ಪ್ರೇಮಿಗೂ ಹಾಗೂ ಅಭಿಮಾನಿಗಳಿಗೆ ಇದು ಅತ್ಯಂತ ಅನುಕೂಲಕರವಾಗಲಿದೆ. ಈಗಾಗಲೇ ಚಿತ್ರದ ಮೇಲಿರುವ ಭಾರಿ ಹೈಪ್ ಹಾಗೂ ಟಿಕೆಟ್ ದರ ಕಡಿತದ ಈ ಹೊಸ ಪ್ರಯೋಗವು ಬಾಕ್ಸ್ ಆಫೀಸ್‌ನಲ್ಲಿ ಯಾವ ರೀತಿಯ ನೂತನ ದಾಖಲೆಗಳನ್ನು ಸೃಷ್ಟಿಸಲಿದೆ ಎಂಬ ಕುತೂಹಲ ಗರಿಗೆದರಿದೆ.
