ಟೆಲ್ ಅವಿವ್: ಟೆಲ್ ಅವಿವ್-ಬೌಂಡ್ (ಟೆಲ್ ಅವಿವ್ ಕಡೆಗೆ ತೆರಳುತ್ತಿದ್ದ) ವಿಮಾನವನ್ನು ಅಪಹರಿಸುವ ಪ್ರಯತ್ನದ ವೇಳೆ ತೋರಿದ ಅಸಾಧಾರಣ ಧೈರ್ಯಕ್ಕಾಗಿ, ಭಾರತೀಯ ಫ್ಲೈದುಬೈ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಅವರಿಗೆ ‘ನಾಗರಿಕ ವೀರತ್ವಕ್ಕಾಗಿ ನೀಡುವ ಅಧ್ಯಕ್ಷೀಯ ಪ್ರಶಸ್ತಿ’ಯನ್ನು (Presidential Award for Civilian Heroism) ನೀಡಲು ಇಸ್ರೇಲ್ ನಿರ್ಧರಿಸಿದೆ.
ತೀವ್ರ ಗಾಯಗಳಾಗಿದ್ದರೂ ಮತ್ತು ವಿಪರೀತ ರಕ್ತಸ್ರಾವವಾಗಿದ್ದರೂ, ಕ್ಯಾಪ್ಟನ್ ಮಚ್ಚಾರ್ ಕಾಕ್‌ಪಿಟ್ ಬಾಗಿಲನ್ನು ತೆರೆಯುವಲ್ಲಿ ಯಶಸ್ವಿಯಾದರು; ಇದರಿಂದಾಗಿ ಪ್ರಯಾಣಿಕರು ಒಳಗೆ ನುಗ್ಗಿ ದಾಳಿಕೋರನನ್ನು ನಿಯಂತ್ರಿಸಲು ಸಾಧ್ಯವಾಯಿತು. ಅವರ ಈ ಸಮಯೋಚಿತ ಕ್ರಮವು ಸಂಭವಿಸಬಹುದಾಗಿದ್ದ ಭೀಕರ ದುರಂತವನ್ನು ತಪ್ಪಿಸಲು ಮತ್ತು ವಿಮಾನದಲ್ಲಿದ್ದ 174 ಪ್ರಯಾಣಿಕರು ಹಾಗೂ ಸಿಬ್ಬಂದಿಯ ಜೀವ ರಕ್ಷಿಸಲು ನೆರವಾಯಿತು.
ಗಾಯಗಳಿಂದ ಚೇತರಿಸಿಕೊಂಡ ನಂತರ ಮಚ್ಚಾರ್ ಅವರಿಗೆ ಈ ಪ್ರತಿಷ್ಠಿತ ಗೌರವವನ್ನು ನೀಡಲಾಗುವುದು ಎಂದು ಇಸ್ರೇಲ್ ಅಧ್ಯಕ್ಷ ಐಸಾಕ್ ಹರ್ಜೋಗ್ ಘೋಷಿಸಿದರು. ಈ ಭಾರತೀಯ ಪೈಲಟ್ ಪ್ರಸ್ತುತ ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ನ ಆಸ್ಪತ್ರೆಯೊಂದರಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಮಚ್ಚಾರ್ ಅವರ ಧೈರ್ಯ ಮತ್ತು ವೃತ್ತಿಪರತೆಯನ್ನು ಶ್ಲಾಘಿಸಿದ ಅಧ್ಯಕ್ಷ ಹರ್ಜೋಗ್, ಅವರ ಸಾಧನೆಯನ್ನು ಗುರುತಿಸುವ ನಿರ್ಧಾರವನ್ನು ಪ್ರಕಟಿಸಿದರು. ಪೈಲಟ್ ನ ಕ್ರಮಗಳು ದೊಡ್ಡ ದುರಂತವನ್ನು ತಪ್ಪಿಸಲು ಸಹಾಯ ಮಾಡಿವೆ ಎಂದು ಹೇಳಿದ ಅವರು, ಮಚ್ಚಾರ್ ಅವರು ಶೀಘ್ರವಾಗಿ ಮತ್ತು ಸಂಪೂರ್ಣವಾಗಿ ಗುಣಮುಖರಾಗಲಿ ಎಂದು ಆಶಿಸಿದರು.
“ಇಂದು ನಾವು ಗೌರವಿಸುತ್ತಿರುವ ಇಸ್ರೇಲಿ ವೀರರಿಗೆ ನಾವು ನಮನ ಸಲ್ಲಿಸುತ್ತೇವೆ ಮತ್ತು ಅವರೊಂದಿಗೆ, ಭಾರತದ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಅವರು ಸಂಪೂರ್ಣವಾಗಿ ಮತ್ತು ಶೀಘ್ರವಾಗಿ ಗುಣಮುಖರಾಗಬೇಕೆಂದು ಹಾರೈಸುತ್ತೇವೆ. ಕ್ಯಾಪ್ಟನ್ ಮಚ್ಚಾರ್ ಅವರ ಅಪಾರ ಧೈರ್ಯ ಮತ್ತು ಅತ್ಯುತ್ತಮ ವೃತ್ತಿಪರತೆಯು ದೊಡ್ಡ ದುರಂತವನ್ನು ತಡೆಯಲು ಸಹಾಯ ಮಾಡಿತು. ಅವರು ಗುಣಮುಖರಾದ ನಂತರ, ಇಸ್ರೇಲ್ ಜನರ ಪರವಾಗಿ ಅವರಿಗೆ ‘ನಾಗರಿಕ ವೀರತ್ವಕ್ಕಾಗಿ ನೀಡುವ ಅಧ್ಯಕ್ಷೀಯ ಪ್ರಶಸ್ತಿ’ಯನ್ನು ಪ್ರದಾನ ಮಾಡುವುದು ನನಗೆ ಗೌರವದ ವಿಷಯವಾಗಿದೆ” ಎಂದು ತಿಳಿಸಿದ್ದಾರೆ.
ತೀವ್ರ ಗಾಯಗಳಾಗಿದ್ದರೂ ಕರ್ತವ್ಯ ನಿರ್ವಹಿಸುವುದನ್ನು ಮುಂದುವರಿಸಿದ ಮಚ್ಚಾರ್ ಅವರ, ಅತ್ಯಂತ ಒತ್ತಡದ ಪರಿಸ್ಥಿತಿಯಲ್ಲಿನ ಪ್ರತಿಕ್ರಿಯೆಯನ್ನು ಈ ಪ್ರಶಸ್ತಿಯು ಗುರುತಿಸುತ್ತದೆ. ಕಾಕ್‌ಪಿಟ್ ಬಾಗಿಲನ್ನು ತೆರೆಯುವ ಅವರ ನಿರ್ಧಾರವು ನಿರ್ಣಾಯಕವಾಗಿ ಸಾಬೀತಾಯಿತು; ಇದು ವಿಮಾನದಲ್ಲಿದ್ದವರಿಗೆ ದಾಳಿಕೋರನನ್ನು ಎದುರಿಸಲು ಮತ್ತು ಪರಿಸ್ಥಿತಿಯನ್ನು ನಿಯಂತ್ರಣಕ್ಕೆ ತರಲು ಅವಕಾಶ ಮಾಡಿಕೊಟ್ಟಿತು.
ಫ್ಲೈದುಬೈ ಕಾಕ್‌ಪಿಟ್ ಒಳಗೆ ಏನಾಯಿತು?
ಮಚ್ಚಾರ್ ಅವರ ಮೇಲೆ ಕಾಕ್‌ಪಿಟ್‌ನಲ್ಲೇ ಅವರ ಓಮಾನಿ ಸಹ-ಪೈಲಟ್ ಹಮ್ಮಮಿ ಅಲ್-ಹಮ್ಮಮಿ ದಾಳಿ ನಡೆಸಿದ್ದ. ಈ ದಾಳಿಯ ವೇಳೆ ಅವರು ‘ಕ್ರಾಶ್ ಆಕ್ಸ್’ (ವಿಮಾನ ತುರ್ತು ಪರಿಸ್ಥಿತಿಯಲ್ಲಿ ಬಳಸುವ ಕೊಡಲಿ) ಅನ್ನು ಬಳಸಿದ್ದಾರೆ ಎಂದು ಆರೋಪಿಸಲಾಗಿದೆ. ದಾಳಿಯಿಂದಾಗಿ ಭಾರತೀಯ ಕ್ಯಾಪ್ಟನ್ ತೀವ್ರವಾಗಿ ಗಾಯಗೊಂಡರು ಮತ್ತು ಅವರಿಗೆ ವಿಪರೀತ ರಕ್ತಸ್ರಾವವಾಯಿತು. ಇಂತಹ ಸ್ಥಿತಿಯಲ್ಲೂ, ಮಚ್ಚಾರ್ ಕಾಕ್‌ಪಿಟ್ ಬಾಗಿಲನ್ನು ತೆರೆಯುವಲ್ಲಿ ಯಶಸ್ವಿಯಾದರು. ಇದು ಪ್ರಯಾಣಿಕರಿಗೆ ಕಾಕ್‌ಪಿಟ್‌ಗೆ ಪ್ರವೇಶಿಸಲು ಮತ್ತು ಸಹ-ಪೈಲಟ್‌ನನ್ನು ನಿಯಂತ್ರಿಸಲು ಅವಕಾಶ ನೀಡಿತು, ಆ ಮೂಲಕ ಆತ ತನ್ನ ಯೋಜನೆಯನ್ನು ಕಾರ್ಯಗತಗೊಳಿಸದಂತೆ ತಡೆಯಲಾಯಿತು. ಈ ಘಟನೆಯು ವಿಮಾನ ಮತ್ತು ಅದರಲ್ಲಿ ಪ್ರಯಾಣಿಸುತ್ತಿದ್ದ ಎಲ್ಲರನ್ನೂ ತೀವ್ರ ಅಪಾಯಕ್ಕೆ ಸಿಲುಕಿಸಿತು. ಸಂಭವಿಸಬಹುದಾಗಿದ್ದ ಭಾರಿ ದುರಂತವನ್ನು ತಪ್ಪಿಸುವಲ್ಲಿ ಮಚ್ಛಾರ್ ಅವರ ಪ್ರತಿರೋಧ ಹಾಗೂ ಪ್ರಯಾಣಿಕರು ಮತ್ತು ಇತರ ಪೈಲಟ್‌ಗಳ ಮಧ್ಯಪ್ರವೇಶವು ನಿರ್ಣಾಯಕ ಪಾತ್ರ ವಹಿಸಿತು.
ವಿಮಾನ ಪತನಗೊಳಿಸುವ ಸಂಚಿನ ಕುರಿತು ಇಸ್ರೇಲಿ ಗುಪ್ತಚರ ವರದಿ
ಅಲ್-ಹಮ್ಮಮಿ ವಿಮಾನದ ನಿಯಂತ್ರಣವನ್ನು ವಶಕ್ಕೆ ಪಡೆದು, ಅದನ್ನು ಟೆಲ್ ಅವೀವ್‌ಗೆ ಹಾರಿಸಿ, ಉದ್ದೇಶಪೂರ್ವಕವಾಗಿ ಕಟ್ಟಡವೊಂದಕ್ಕೆ ಡಿಕ್ಕಿ ಹೊಡೆಸುವ ಯೋಜನೆ ಹೊಂದಿದ್ದನೆಂದು ವರದಿಯೊಂದು ಉಲ್ಲೇಖಿಸಿದೆ. ವಿಮಾನವನ್ನು ಟೆಲ್ ಅವೀವ್ ಕಡೆಗೆ ಕೊಂಡೊಯ್ಯುವ ಆ ಯೋಜನೆ ವಿಫಲವಾದ ನಂತರ, ಸಹ-ಪೈಲಟ್ ವಿಮಾನವನ್ನು ಮರುಭೂಮಿಯಲ್ಲಿ ಪತನಗೊಳಿಸಲು ಪ್ರಯತ್ನಿಸಿದನೆಂದು ವರದಿಯಾಗಿದೆ. ಆದಾಗ್ಯೂ, ವಿಮಾನದಲ್ಲಿ ಪ್ರಯಾಣಿಸುತ್ತಿದ್ದ ಕರ್ತವ್ಯದಲ್ಲಿಲ್ಲದ ಪೈಲಟ್ ಗಳು ಮಧ್ಯಪ್ರವೇಶಿಸಿ ವಿಮಾನದ ನಿಯಂತ್ರಣವನ್ನು ತಮ್ಮ ವಶಕ್ಕೆ ತೆಗೆದುಕೊಂಡರು ಎಂದು ವರದಿ ತಿಳಿಸಿದೆ. ನಂತರ ಅವರು ವಿಮಾನವನ್ನು ಸೌದಿ ಅರೇಬಿಯಾದಲ್ಲಿ ಸುರಕ್ಷಿತವಾಗಿ ಇಳಿಸುವಲ್ಲಿ ಯಶಸ್ವಿಯಾದರು; ಹೀಗೆ, ಸಂಭವನೀಯ ದುರಂತಕ್ಕೆ ಕಾರಣವಾಗಬಹುದಾಗಿದ್ದ ಆ ಬೆದರಿಕೆಯು ಯಾವುದೇ ಅಪಘಾತವಿಲ್ಲದೆ ಅಂತ್ಯಗೊಂಡಿತು.
