ಮಠದ ಜಮೀನಿನಲ್ಲಿಯೂ ನೈಸ್ ಅಕ್ರಮ: ಆಶಿರ್ವಾದ ಮಾಡಲು ಮಾತ್ರ ಬನ್ನಿ ಎಂಬ ಸಿಎಂ ಹೇಳಿಕೆ ವಿಚಾರ: ಸ್ಪಷ್ಟನೆ ನೀಡಿದ ಸಿದ್ದಗಂಗಾ ಶ್ರೀ

ತುಮಕೂರು: ಸಿದ್ಧಗಂಗಾ ಮಠದ 7 ಎಕರೆ ಜಮೀನನ್ನು ನೈಸ್ ಯೋಜನೆಗೆಂದು ಅಶೋಕ್ ಖೇಣಿ ಸ್ವಾಧೀನ ಮಾಡಿಕೊಂಡು ಅದರಲ್ಲಿ 1 ಎಕರೆ ಮಾತ್ರ ಬಳಕೆ ಮಾಡಲಾಗಿದೆ. ಉಳಿದ ಭೂಮಿಯನ್ನು ಮಠಕ್ಕೆ ವಾಪಸ್ ಕೊಡುವ ವಿಚಾರವಾಗಿ ಸ್ವಾಮೀಜಿ ಸಿಎಂ ಗೆ ಕೇಳಿದಾಗ ಸ್ವಾಮೀಜಿಗಳ ಜೊತೆ ಸಿಎಂ ಡಿ.ಕೆ.ಶಿವಕುಮಾರ್ ಉದ್ಧಟತನ ತೋರಿದ್ದಾರೆ ಎಂಬ ಕೇಂದ್ರ ಸಚಿವ ಹೆಚ್.​ಡಿ.ಕುಮಾರಸ್ವಾಮಿ ಗಂಭೀರ ಆರೋಪಕ್ಕೆ ಇದೀಗ ಸಿದ್ದಗಂಗಾ ಮಠದ ಸಿದ್ದಲಿಂಗ ಶ್ರೀಗಳು ಉತ್ತರ ನೀಡಿದ್ದಾರೆ.

ತುಮಕೂರಿನಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಸಿದ್ದಲಿಂಗ ಶ್ರೀಗಳು, ಹಲವು ವಿಚಾರಗಳ ಬಗ್ಗೆ ಚರ್ಚಿಸುವುದಕ್ಕಾಗಿ ಮುಖ್ಯಮಂತ್ರಿಗಳ ಭೇಟಿಗೆ ತೆರಳಿದ್ದು ನಿಜ. ನೈಸ್ ರಸ್ತೆಗೆ ಬಳಸದೇ ಇರುವ ಜಮೀನನ್ನು ವಾಪಸ್ ಕೊಡಿ ಎಂಬುದು ನಮ್ಮ ಬೇಡಿಕೆಯಾಗಿದೆ ಎಂದರು.

ನಾವು ಮಠದ 7 ಎಕರೆ 39 ಗುಂಟೆ ಜಮೀನನ್ನು (ಸೋಮಪುರದಲ್ಲಿ ಮಠಕ್ಕೆ ದಾನವಾಗಿ ಸಿಕ್ಕಿದ್ದ ಜಾಗ) ಯೋಜನೆಗೆ ಎಂದು ನೀಡಿದ್ದೆವು. 2001-2002 ರ ಸಂದರ್ಭದಲ್ಲಿ ಅಶೋಕ್ ಖೇಣಿಯವರೇ ಆ ಬಗ್ಗೆ ಮಠಕ್ಕೆ ಬಂದು ಮನವಿ ಮಾಡಿದ್ದರು. ಆ ಸಂದರ್ಭದಲ್ಲಿ ಮಠಕ್ಕೆ ನಿಗದಿತ ಆದಾಯ ಬರುವಂತೆ ಮಾಡಿಕೊಡುವುದಾಗಿ ಭರವಸೆಯನ್ನೂ ನೀಡಿದ್ದರು. ಆದರೆ, ಅವ್ಯಾವುವೂ ಈಡೇರಿಲ್ಲ. ಆ ಬಗ್ಗೆ ಮಠದಿಂದ ಹಲವು ಬಾರಿ ಪತ್ರ ಬರೆದರೂ ಪ್ರಯೋಜನವಾಗಿಲ್ಲ. ಮಠದಿಂದ ಪಡೆದ 1.5 ಎಕರೆ ಭೂಮಿ ಯೋಜನೆಗೆ ಬಳಕೆಯಾಗಿದ್ದು ಬಿಟ್ಟರೆ ಉಳಿದ ಜಮೀನು ಖಾಲಿ ಬಿಡಲಾಗಿದೆ. ಸರ್ಕಾರದ ಯೋಜನೆಗೆಂದು ಸ್ವಾಧೀನ ಮಾಡಿದ ಜಾಗ 25 ವರ್ಷಗಳಿಂದ ಬಳಕೆಯಾಗದೆ ಇದ್ದರೆ ಅದನ್ನು ಮೂಲ ಭೂಮಾಲೀಕರಿಗೆ ಕೊಡಬೇಕೆಂಬ ನಿಯಮ ಇದೆಯಂತೆ. ಈ ಮಧ್ಯೆ, ಮಠದವರೇ ಜಾಗ ನೀಡುತ್ತಿದ್ದಾರೆ ಎಂದು ಅನೇಕ ರೈತರು ಸಹ ಜಮೀನು ನೀಡಿದ್ದರು. ರೈತರು ನಮ್ಮನ್ನು ಬಹಳ ಒತ್ತಾಯಿಸಿದರು. ರಸ್ತೆ ಆದಮೇಲೆ ಜಾಗವನ್ನ ಟೋಲ್​​ಗೆ ಬಳಕೆ ಮಾಡುತ್ತಿದ್ದಾರೆ. ಇದರಿಂದ ಭಕ್ತರಿಗಷ್ಟೇ ಅಲ್ಲ, ನಮಗೂ ತುಂಬಾ ನೋವಾಯ್ತು. ಹಾಗಾಗಿ ಮಠದ ಜಾಗವನ್ನು ನಾವು ವಾಪಸ್ ಕೇಳುತ್ತಿದ್ದೇವೆ’ ಎಂದು ತಿಳಿಸಿದ್ದಾರೆ.

ಇನ್ನು ಅರ್ಜಿ ಕೊಡುವುದಕ್ಕೆ ಬರಬೇಡಿ, ಆಶೀರ್ವಾದ ಮಾಡಲು ಮಾತ್ರ ಬನ್ನಿ ಎಂದು ಡಿ.ಕೆ. ಶಿವಕುಮಾರ್ ಹೇಳಿದ್ದಾರೆ ಎಂಬ ವಿಚಾರದ ಬಗ್ಗೆ ಪ್ರತಿಕ್ರಿಯಿಸಿದ ಶ್ರೀಗಳು, ‘ನಮಗೆ ಅನಿವಾರ್ಯ ಇತ್ತು, ಸಮಸ್ಯೆ ಯಾರಿಗೆ ಹೇಳೋಣ? ಅದಕ್ಕಾಗಿ ಸಿಎಂ ಅವರನ್ನು ಭೇಟಿಯಾಗಲು ನಿರ್ಧರಿಸಿದ್ದೆವು. ಅವರು ಸಿಎಂ ಆಗಿ ಒಂದು ತಿಂಗಳಾಗಿರಬಹುದು. ಆದರೆ ನಾನೇ ಭೇಟಿಗೆ ಭೇಟಿಗೆ ಬರುತ್ತೇನೆಂದು ಅವರ ಸಿಬ್ಬಂದಿಗೆ ತಿಳಿಸಿರಲಿಲ್ಲ. ಹೀಗಾಗಿ ಮಠದಿಂದ ಬೇರಾರೋ ಬರುತ್ತಾರೆಂದು ಅವರು ತಿಳಿದಿದ್ದರು. ಹಾಗಾಗಿ ಅವರು, ನೀವು ಆಶೀರ್ವಾದ ಮಾಡುವುದಕ್ಕೆ ಮಾತ್ರ ಬನ್ನಿ. ನೀವು ಕರೆದರೆ ನಾನೇ ಬರುತ್ತೇನೆ ಎಂಬ ಸಂಸ್ಕಾರದ ಮಾತುಗಳನ್ನು ಹೇಳಿದರು’ ಎಂದು ತಿಳಿಸಿದ್ದಾರೆ.

ಶಿವಕುಮಾರ ಸ್ವಾಮೀಜಿಗಳು ಲಿಂಗೈಕ್ಯರಾದ ಸಂದರ್ಭ ಮಠಕ್ಕೆ ತೆರಳಿದ್ದಾಗಿಯೂ ಚಿನ್ನದ ಕರಡಿಗೆ ನೀಡಿದ್ದಾಗಿಯೂ ಅಶೋಕ್ ಖೇಣಿ ಹೇಳಿದ್ದಾರೆ ಎನ್ನಲಾದ ವರದಿಗಳ ಬಗ್ಗೆ, ಅವುಗಳನ್ನು ನಿರಾಕರಿಸಿದ್ದಾರೆ. ಖೇಣಿಯವರು ಆ ಸಂದರ್ಭದಲ್ಲಿ ಮಠಕ್ಕೆ ಬಂದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

‘ನೈಸ್ ಯೋಜನೆಗಾಗಿ ಸಿದ್ಧಗಂಗಾ ಮಠಕ್ಕೆ ಸೇರಿದ 7 ಎಕರೆ ಭೂಮಿ ಸರ್ಕಾರ ಸ್ವಾಧೀನಪಡಿಸಿತ್ತು. ಆದರೆ ರಸ್ತೆಗೆ 1 ಎಕರೆ ಹೋಗಿದೆ, ಉಳಿದ ಭೂಮಿ ಕೊಡಿ ಎಂದು ಶ್ರೀಗಳು ಅರ್ಜಿ ಕೊಟ್ಟಿದ್ದಾರೆ. ಈ ವಿಚಾರಕ್ಕೆ ನನ್ನ ಮನೆಗೆ ಬರಬೇಡಿ. ಆಶೀರ್ವಾದ ಮಾಡೋಕೆ ಮಾತ್ರ ಬನ್ನಿ ಎಂದು ಸಿದ್ಧಗಂಗಾ ಸ್ವಾಮೀಜಿಗೆ ಸಿಎಂ ಹೇಳ್ತಾರೆ’ ಎಂದು ಕುಮಾರಸ್ವಾಮಿ ಆರೋಪಿಸಿದ್ದರು.